FIZARÀGNE 9
Miharoa Fanompoagne i Jehovah
“Mivavaha amy ty namboatse i lagnitsey naho ty tane toy.”—Apokalypsy 14:7
Nianarantikagne tamy ty bokekele toy ato fa misy fanoroagne maro magnampe azo naho ty keleia’o, ty agnate Baiboly ao. Teà i Jehovah ho sambatse rehe. Mampitamà reke fa hagnomey ze raha paliae’o naho atao’o anton’asa ty fanompoagne aze. (Matio 6:33) Teà’e hatao ragnetse rehe. Mikezaha mafe mba ho ragnen’Andrianagnahare. Izay ty voninahitse lahibey tsy misy hoe’e hoahy o ndatio.—Matio 22:37, 38.
1 HASOAO TY FILONGOA’O AMY I JEHOVAH
INOGNE TY RAHA REHAFE TY BAIBOLY? “Ho rae’areo raho, vaho ho ana-dahiko naho ho anak’ampelako nareo, hoe ty Jehovah.” (2 Korintianina 6:18) Teàn’Andrianagnahare ho ragnetse maifitse aze rehe. Hagnampe azo ho ragne’e ty vavake. Mandrisike azo ‘hivavake lognandro’ ty Jehovah. (1 Tesalonianina 5:17) Magniry mafe hitsatsike ze agnate eretsere’o ao naho ze mampinekoneko azo reke. (Filipianina 4:6) Naho fa miharo vavake amy ty keleia’o rehe, le ho fanta’iareo tie mino an’Andrianagnahare vata’e.
Toko’e hitsanogne an’Andrianagnahare ka rehe fa tsy hirehake ama’e avao. Manao izay rehe naho fa mianatse ty Saontsi’e sady mamaky boke mioregne agnate Baiboly. (Salamo 1:1, 2) Vetsevetseo ze raha ianara’o. (Salamo 77:11, 12) Toko’e hagnatreke o fivoriagne kirisitianagneo ka rehe mba hitsanogna’o an’Andrianagnahare.—Salamo 122:1-4.
Rehafo amy ty hafa ka ty miomba an’Andrianagnahare naho teà’o hihasoa ty filongoa’o ama’e. Miankigne amy ty firehafa’o ty miomba aze ty hahafantara’o fa maifitse aze rehe.—Matio 28:19, 20.
INOGNE TY TOKO’E HATAO’O?
Mipalià lera hamakiagne Baiboly naho hivavahagne sanandro
Ze raha miomba o fivavahagneo heike ro anò aloha agnate tragno’areo ao vaho izay ty fihisàgne naho ty fitofatofagne
2 MIFALEA AMY TY ANDRO FIVAVAHA TY KELEIA’AREO
INOGNE TY RAHA REHAFE TY BAIBOLY? “Magnarinea an’Andrianagnahare, le hagnarine anareo reke.” (Jakoba 4:8) Toko’e hanokagne andro hanoagne Andro Fivavaha ty Keleiagne nareo sady le ambeno mafe ze andro zay. (Genesisy 18:19) Faie tsy izay avao. Ko haligno amy ze raha atao’areo sanandro ty Andrianagnahare. Ampeo ty keleia’o ho soa filongoagne aman’Andrianagnahare, le rehafo ama’e ty miomba aze “ndra tie mitoboke an-tragno’o ao rehe ndra mandeha an-dalagney ndra mandre ndra mifoha.” (Deoteronomia 6:6, 7) Kezaho mafe ty hanahake i Josoa, fa nirehake reke tie: “Izahay amo o keleiakò hanompo i Jehovah.”—Josoa 24:15.
INOGNE TY TOKO’E HATAO’O?
Ko tapahegne sady ovao hifanandrife amy ze raha paliae ty tsikiraike amy ty keleiagne ty Andro Fivavaha ty Keleiagne