Akore ty Hahavy azo ho Ragne i Jehovah?

1, 2. Ia ty ndaty ila’e niragne i Jehovah?

NDATY manao akore ty teà’o ho ragnetse? Ndaty raike mahafinaritse azo. Ndaty mahay mifandrambe ama’o sady hai’o ifandrambesagne. Ndaty soa fagnahy sady managne toetse teà’o.

² Misy ndaty ila’e jinobo i Jehovah Andrianagnahare ho ragne’e. Agnisa izay ty Abarahama. (Isaia 41:8; Jakoba 2:23) Niteà i Jehovah ka ty Davida, le hoe ty saontsi’e miomba aze: ‘Lahilahy zoto ty foko reke.’ (Asan’ny Apostoly 13:22) “Ndaty teàgne” ty nisaontsia i Jehovah i Daniela mpaminany.—Daniela 9:23.

3. Nagnino ty Abarahama naho i Davida vaho i Daniela ro niragne i Jehovah?

³ Akore ty nahavy i Abarahama, i Davida naho i Daniela ho ragne i Jehovah? Hoe ty Jehovah tamy i Abarahama: “Nitsanogne ze raha vinolako rehe.” (Genesisy 22:18) Miragnetse amy ze ndaty miambane sady magnorike ty lili’e ty Jehovah. Mahazo miragnetse ama’e ndra ty ndaty iaby amy ty firenena raike. Hoe ty fagnazavà i Jehovah tamo o Isiraelio: “Oriho ty rehako, soa tie ho Andrianagnahare’areo raho, le inareo ho ndatiko.” (Jeremia 7:23) Toko’e hagnorike ty lily i Jehovah ka rehe naho magniry ho ragne’e.

AROVA I JEHOVAH ZE RAGNE’E

4, 5. Akore ty iarova i Jehovah ze ragne’e?

⁴ Rehafe ty Baiboly fa mipay fomba “hanoroa’e ty heri’e handrombahagne ze mipiteke ama’e amy ty fo’e” ty Jehovah. (2 Tantara 16:9) Izao ka ty ampitamae i Jehovah ze ragne’e, amy Salamo 32:8: “Hanao ze hampahiratse azo raho, sady hanoro ze lalagne handehana’o. Ho toroako hevetse rehe sady hitalake azo ty masoko.”

⁵ Misy fahavalo raike mahery te hampijanogne ty firagnetantikagne aman’Andrianagnahare. Faie magniry hiaro antikagne ty Jehovah. (Vakio Salamo 55:22.) Amy ty maha ragne i Jehovah antikagne, le amy ty fontikagne ty anompoagne aze. Tsy mivalike ama’e tikagne ndra tie misy raha sarotse mahazo antikagne. Matoky manahake ty mpanoratse salamo raike toy tikagne. Izao ty nisorate’e miomba i Jehovah: “Tsy hihondrahondra raho fa ankavanako eo reke.” (Salamo 16:8; 63:8) Akore ty atao i Satana mba hahavy antikagne tsy hiragnetse aman’Andrianagnahare?

TY FAGNARATIAGNE NATAO I SATANA

6. Inogne ty rehafe i Satana fa anompoa o ndatio i Jehovah?

⁶ Nianarantikagne tamy Toko faha-11 ao, fa nanohetse i Jehovah ty Satana. Nagnaratiraty aze reke tie mpavande naho tsy manao ty rare’e ty Jehovah, fa tsy nagnenga i Adama naho i Eva hanapa-kevetse miomba ty soa naho ty raty. Ampianare ty boke i Joba fa mbe magnaratiraty ze ndaty te hiragnetse an’Andrianagnahare ty Satana. Mirehake ty Satana fa tsy hatea ty anompoa o ndatio an’Andrianagnahare, fa tie te hahazo raha avao. Mirehake reke fa vita’e ty mampisintake ze kila ndaty aman’Andrianagnahare. Andao tikagne hagnente ty raha azontikagne ianaragne boake amy i Joba naho ty fomba niarova i Jehovah aze.

7, 8. a) Inogne ty nisaontsie i Jehovah fa mampiambake i Joba? b) Inogne ty nirehafe i Satana miomba i Joba?

⁷ Ia o Joba zao? Lahilahy soa toetse. Fa 3 600 taogne zay ty niaigna’e. Nisaontsy ty Jehovah fa tsy nisy ndaty nitovy ama’e ty toetse ty ndaty tan-tane etoy tamy ty andro’e. Niasy an’Andrianagnahare ty Joba sady nalaigne raha raty. (Joba 1:8) Niragne i Jehovah vata’e ty Joba.

⁸ Nirehake ty Satana fa hatea tegna ty anto’e anompoa i Joba an’Andrianagnahare. Hoe ty reha i Satana tamy i Jehovah: “Toe tsy ihe hao niaro [ndra, namahetse] i fanagna’ey amy i tragno’ey naho o vata’eo? Nitahie’o ze asa tagna’e, le mangetseketseke mameno tane ty biby hinare’e. Fa mangatake ajafady ama’o areke, le arangao ambone i tagna’oy sady dosio ze fanagna’e, le henteo tie tsy hozogne’e amasoamaso’o eo rehe.”—Joba 1:10, 11.

9. Nengà i Jehovah hanao akore ty Satana?

⁹ Nagnaraty i Joba ty Satana, fa misy soa azo i Joba kanao reke manompo i Jehovah. Nao vita’e ty mampisintake i Joba tsy hanompo i Jehovah. Tsy niharo hevetse amy izay ty Jehovah. Nengà’e hitsapa hevetse i Joba ty Satana hahatreavagne naho toe hatea sa tsy hatea ty mahavy i Joba hiragnetse i Jehovah.

NANAFIKE I JOBA TY SATANA

10. Ino ty loza natao i Satana tamy i Joba, le akore ty natao i Joba?

¹⁰ Voaloha’e, natao i Satana ze haha lany ze biby tineza i Joba. Vinono’e ty ankamaroa ty mpanompo i Joba. Vinono’e amy ty tiobey ty ana i Joba folo tamy ty fara’e. Maro ty raha nafoe i Joba, faie tsy nampivalike aze tamy i Jehovah zay. “Tsy nanota ty Joba ndra tie teo iaby zay, sady tsy mba nagnomey tsiny an’Andrianagnahare.”—Joba 1:12-19, 22.

11. a) Inogne ty raha ila’e natao i Satana i Joba? b) Inogne ty nirehafe i Joba?

¹¹ Tsy le lia’e nitofa ty Satana. Izao ka ty reha’e taman’Andrianagnahare: “Dosio iaby o taola’eo miharo amy ty nofo’e, le henteo tie tsy hagnozogne azo amasoamaso’o eo reke.” Le nisia i Satana bae mampangirifiry ty Joba. (Joba 2:5, 7) Faie mbe tsy nivalike avao ty Joba. Hoe reke: “Le mate avao raho fa tsy mba hivalike [ndra, hagneke ho resy].”—Joba 27:5.

12. Akore ty nagnaporofoa i Joba fa mpavande ty Satana?

¹² Tsy nifanta i Joba ty fagnaratiratia i Satana naho ty anto’e nampijale aze. Nieretseretse reke fa boake amy i Jehovah ty haoreagne mahazo aze. (Joba 6:4; 16:11-14) Tsy nivalike tamy i Jehovah reke ndra tie teo zay. Fantatse amy izay, fa hatea ty niragneta i Joba aman’Andrianagnahare, fa tsy hatea tegna. Vande iaby i fagnaratiratia i Satana rey!

13. Inogne ty voka ty tsy fivaliha i Joba?

¹³ Tsy nivalike aman’Andrianagnahare ty Joba ndra tie tsy nahafantatse ty raha niseho tan-dagnitse agne. Niporofoe’e fa mpavande ty Satana. Nivalea i Jehovah soa ty Joba fa tsy nivalike ama’e.—Joba 42:12-17.

INO TY FAGNARATIA I SATANA AZO?

14, 15. Inogne ty fagnaratia i Satana o ndatio?

¹⁴ Afake mandrambe lesogne boake amy ty raha nanjò i Joba rehe. Magnaratiraty antikagne ka ty Satana amy hinane zao tie misy raha soa azontikagne boake amy i Jehovah kanao manompo Aze tikagne. Hoe ty Satana amy Joba 2:4: “Ze raha anagna o ndatio, le homei’e hiarovagne ty fiai’e.” Tsy i Joba raike avao ty haratie i Satana tie tea tegna, fa ze kila ndaty. An-jato taogne tafara ty nimateza i Joba ka, le mbe magnafa-baraka i Jehovah sady magnaratiraty ty mpanompo’e ty Satana. Izao ty rehafe ty Ohabolana 27:11: “Mihendrea, anake, le ampifaleo ty foko, hamaleako i magnaraty [ndra, magnafa baraka] ahỳ.”

¹⁵ Afake mijobogne ty hagnorike ty lily i Jehovah naho ho ragnetse tsy mivalike ama’e rehe. Izay ty agnaporofoa’o fa mpavande ty Satana. Va’e ho sarotse ama’o ty hanao o fagnovàgne iohoe amy ty fiaigna’o mba hahavy azo hiragnetse an’Andrianagnahare, faie io ty fanapaha-kevetse fara’e soa nanoe’o hatrake amy izay. Lahibey o fanapaha-kevetse iohoe. Hivalike aman’Andrianagnahare rehe hoe ty Satana, naho fa misy raha sarotse manjò azo. Mikezake mamitake antikagne reke mba hahavy antikagne hivalike aman’Andrianagnahare. Akore ty anoa’e izay?

16. a) Ino ty fomba ampiasae i Satana mba hahavy o ndatio tsy hanompo i Jehovah? b) Ino ty va’e hatao i Devoly hisakanagne azo tsy hanompo i Jehovah?

¹⁶ Mampiasa fomba isan-karaza’e mba hahavy antikagne tsy hiragnetse an’Andrianagnahare ty Satana. Manafike “hoe liona miregnetse mipay ndaty havorembore’e” ty Satana. (1 Petera 5:8) Tsy toko’e ho tampoke ama’o naho misy ragne’o, ndra longo’o, ndra ndaty hafa misakagne azo tsy hianatse Baiboly naho hanao ty maregne. Va’e hanao izao rehe tie heje iareo raho.a (Jaona 15:19, 20) Miseho “hoe anjely ty mazava” ty Satana. Va’e hamitake antikagne mba tsy hagnorike ty lily i Jehovah reke. (2 Korintianina 11:14) Fomba hafa amitaha i Satana antikagne tsy hanompoagne i Jehovah ka ty fieretseretagne tie, tsy fagneva ty hanompo an’Andrianagnahare tikagne.—Ohabolana 24:10.

ORIHO TY LILY I JEHOVAH

17. Ino ty anto’e agnorihantikagne ty lily i Jehovah?

¹⁷ Magnaporofo tikagne tie mpavande ty Satana naho magnorike ty lily i Jehovah. Inogne ty hagnampe antikagne hanao izay? Hoe ty Baiboly: “Anò amy ty fo’o naho amy ty vata’o vaho amy ty oza’o ty hatea’o i Jehovah Andrianagnahare’o.” (Deoteronomia 6:5) Ty hateantikagne i Jehovah ty agnorihantikagne ty lili’e. Teàntikagne ty hanao ze raha ampanoe i Jehovah, naho mitombo ty hateantikagne aze. Izao ty nisorate i apositoly Jaona: “Izao ty hatea an’Andrianagnahare, le ty hagnorihantikagne ty lili’e. Tsy mavesatse ty lili’e.”—1 Jaona 5:3.

18, 19. a) Inogne ty raha ila’e saontsie i Jehovah fa raty? b) Akore ty ahafantarantikagne fa tsy mandily antikagne hanao ze raha tsy ho vitantikagne ty Jehovah?

¹⁸ Ino iaby ty raha ila’e heje i Jehovah? Misy ohatse ila’e ty amy ty efajoro manao tihoe “Ko Manao ze Raha Heje i Jehovah.” Va’e hieretseretse rehe amy ty voaloha’e tie tsy raty loatse ty ila’e amo o raha rehoe. Faie manjare fanta’o tie mahasoa ty fagnorihagne ty lily i Jehovah naho fa mamaky ty andine’e agnate Baiboly ao rehe sady mieretseretse aze soa. Va’e ho tsapa’o ka fa misy raha toko’e hovagne amy ty fiaigna’o. Va’e ho sarotse ama’o ty hanao ze i fagnovàgne zay. Faie naho manao izay rehe, le ho sambatse naho hiadagne sady ho ragnetse tsy mivalike aman’Andrianagnahare. (Isaia 48:17, 18) Akore ty ahafantarantikagne fa azo atao ty manao o fagnovàgne rehoe?

¹⁹ Tsy mandily antikagne hanao ze raha tsy ho vitantikagne ty Jehovah. (Deoteronomia 30:11-14) Ragnetse mahafantatse soa antikagne, mihoatse ty ahafantarantikagne ty vatantikagne reke. Fanta’e ty toetse soa naho ty fahalemeagne anagnantikagne. (Salamo 103:14) Izao ty fampaherezagne mey i apositoly Paoly antikagne: “Tsy mivalike amy ty saontsi’e ty Andrianagnahare, le tsy hengà’e hisy tsapa hevetse mihoatse ze fa tante’areo, fa naho misy tsapa hevetse, le hisia’e hirike hiakara’e soa tie hahatanteza’areo aze.” (1 Korintianina 10:13) Afake matoky tikagne fa ho mea i Jehovah hery isan’andro mba hanoagne ty soa. Hagnomey azo “tovon’ozatse” reke mba hagnampe azo hiatreke raha sarotse. (2 Korintianina 4:7) Hoe ty Paoly naho fa nahazo ty fagnampea i Jehovah: “Managne ozatse hiatrehagne ze raha miseho raho, fa misy magnomey ozatse ahy.”—Filipianina 4:13.

TEÀO ZE RAHA TEÀ I JEHOVAH

20. Inogne iaby ty toetse teà’o hanagnagne, le inogne ty anto’e?

²⁰ Tsy maintsy magnalavitse ze raha saontsie i Jehovah fa raty tikagne naho te ho ragne’e. (Romanina 12:9) Ragnen’Andrianagnahare ze tea ty raha teà’e. Hazavaegne amy Salamo 15:1-5 ao ty miomba izay. (Vakio.) Mikezake hanahake ty toetse i Jehovah ze ragne’e. Agnisa izay ty “hatea, hafaleagne, fiadanagne, fitanam-po, hasoa fagnahy, hasoa toetse, finoagne, halem-pò, fanjiram-batagne.”—Galatianina 5:22, 23.

21. Akore ty atao mba hanagna’o ze toetse teàn’Andrianagnahare?

²¹ Akore ty atao mba hanagna’o o toetse fanjaka rehoe? Toko’e hianatse ze raha teà i Jehovah rehe amy ty alala ty famakiagne naho ty fianaragne Baiboly tsy tapake. (Isaia 30:20, 21) Hitombo ty hatea’o i Jehovah naho manao izay rehe. Ho mora ama’o ty hagnorike ty lili’e, naho fa tea aze rehe.

22. Inogne ty voka’e naho magnorike ty lily i Jehovah rehe?

²² Azo ampitovizegne amy ty fisoloagne akanjo vaovao ty fagnovàgne tsy maintsy atao’o amy ty fiaigna’o. Rehafe ty Baiboly fa toko’e hagnova ty toetse’o taloha rehe, le ‘hiakanjo ty fagnahy vao.’ (Kolosianina 3:9, 10) Va’e tsy ho mora ty manao izay. Faie mampitamà hagnomey “valesoa lahibey” antikagne ty Jehovah naho manao fagnovàgne mba hagnorihagne ty lili’e tikagne. (Salamo 19:11) Ie zay. Ekeo ty fagnanara i Jehovah sady atorò fa mpavande ty Satana. Ty hateantikagne i Jehovah ty anto’e anompoantikagne aze fa tsy ty fagniriagne hahazo tombo’e. Ho ragnen’Andrianagnahare maifitse aze rehe naho manao izay!