FAGNONTANEAGNE 4

Hagneke ho Diso vao Raho?

NAGNINO ZAY RO MILA FANTAREGNE?

Naho magneke ty hadisoa’o rehe, le hanjare hatokisa o ndaty sady hihamatotse.

INO TY HATAO’O?

Eretsereto zao: Nihisa labole niharo tamy ty ragne’e ty Tsiraty. Natora’e i laboley, kay ndra nandeha an-dafinete o ndaty agne, le nivaky i fitaratsey!

Ino ty ho natao’o naho ihe ro Tsiraty?

MANDINEHA SOA HEY!

MANAGNE SAFILY TELO REHE:

Le avy le lomay.
Asara’o ndaty hafa.
Mitsotra amy i ndatỳ tie diso, sady mirehake ama’e fa hanolo i fitaratsey.

Va’e ho safily 1 varagne ty teà’o hanoegne. Faie tsy mete zay fa aleo magneke tie diso naho vinaki’o i fitara o ndatỳ, ndra nanao fahadisoagne hafa rehe.

ANTO’E TELO MAHAVY AZO TOKO’E HAGNEKE FAHADISOAGNE

Mahasoa ty mirehake ty maregne.

Hoe ty Baiboly: ‘Te hanao ty maregne amy ze kila raha zahay.’—Hebreo 13:18.
Mora ama o ndaty ty mamela heloke azo naho magneke ty hadisoa’o rehe.

Hoe ty Baiboly: “Tsy hahomby ze mandika lily faie magnetaketake ty natao’e, fa ze magneke ty fahota’e naho miala amy izay ro hamindragne fo.”—Ohabolana 28:13.
Mampifale i Jehovah ty fanoagne izay.

Hoe ty Baiboly: “Mampangorigne i Jehovah ty ndaty fetsefetse, faie ty ndaty maregne ro managne fifandrambesagne soa ama’e.”—Ohabolana 3:32.

Nandefa tognabile mafe bey ty Tsarasoa, 20 taogne, le nampandoave ty polisy lamandy. Naeta’e an-drae’e i rahay faie nitratse avao reke naho fa tafara atoy. Hoe reke: “Nagnente ty faktira’ay ty Baba herentaogne tafara atoy, le nitrea’e tao fa nisy lamandy naloa tamy ty agnarako. Niboseha’e raho!”

Hoe ty Tsarasoa: “Le ko ndra magnetaketake zao naho fa diso. Tsy maintsy tratse avao rehe naho fa afara agne. Amy izay rehe le halilo vata’e!”

MANDRAMBESA FIANARAGNE

Hoe ty Baiboly: “Sambe manao diso tikagne iaby.” (Jakoba 3:2) Miambane naho matotse rehe naho le avy le magneke ty fahadisoa’o.

Mandrambesa fianaragne boake amy ty fahadisoagne nanoe’o. Hoe ty Vera: “Naho fa diso raho, le mandrambe fianaragne boake amy igne. Eretsereteko soa ze raha hataoko amy ty magnarake naho fa misy hoe igne indraike.” Andao tikagne hagnente ty fomba hanoagne izay.

Nindrame’o ty basikaleta i baba’o faie ndra sinimba’o. Ino ty hatao’o?

Tsy mirehadrehake sady mitamà tie tsy ho tratse.
Mitsotra amy baba’o tie sinimba’o i basikaleta’ey.
Mirehake tie simba i rahay faie asara’o ndaty hafa.

Tsy afake fagnadignagne rehe satria tsy nianatse lesogne. Ino ty hatao’o?

Mirehake rehe tie sarotse loatse i fagnadignagney.
Mitsotra rehe tie tsy nianatse lesogne.
Mirehake rehe tie malaigne azo ty ramosé.

Somondrara magnente fitaratse fangnenteagne afara agne amy ie mandefa tognabiley — Naho mieretseretse bey i fahadisoagne natao’oy rehe, le sahala mandefa tognabile faie i fitaratse fagnenteagne ty afara agney avao ty ifantoha’o

Dineho soa o ohatse rehoe sady eretsereto tie 1) ihe ro rae’o, ndra 2) ihe ro ramosé. Ino ty ho eretserete i rae’o ndra i ramosey miomba azo naho mitsotra ty hadisoa’o rehe? Ino ka ty ho eretserete iareo naho tsy mirehake ty maregne rehe?

Eretsereto indraike ty fahadisoagne natao’o tamy i taogney sady valeo ty fagnonteneagne retoa:

Inogne zay? Akore ty natao’o tamy izay?

Tsy nirehadrehake raho.
Nasarako ndaty hafa.
Nagneke raho tie diso.

Naho tsy nitsotra rehe tie diso. Ino ty tsapa’o?

Fale raho fa tsy tratse!
Nanegnegne raho tie tahake izay nirehake ty maregne.

Faie ino ty toko’e ho natao’o tamy izay?

Ino ty nianara’o boake amy i fahadisoagney?

AKORE TY HEVE’O?

Nagnino ro sarotse amy ty ndaty ila’e ty magneke ty fahadisoa’e?

Akore ty ho fihevera o ndaty azo naho zatse tsy magneke ty fahadisoa’o rehe? Faie akore ka ty ho fihevera iareo azo naho magneke ty fahadisoa’o rehe?—Lioka 16:10.