FAGNONTENEAGNE 7

Ino ty Hataoko Naho Misy Manere Ahy Hanao Firaisagne?

NAGNINO ZAY RO MILA FANTAREGNE?

Ho simba ty fiaigna’o naho manaotao fahatane rehe.

INO TY HATAO’O?

Eretsereto zao: Vaho roe volagne ty niaraha i Masitata naho i Soatsara, faie le hoe fa niarake an-tao’e iareo! Mbe tsy tapetse ty raha rehafe ty raike, le fa hay ty raike ty tohi’e. Mifandefa mesazy lognandro iareo sady mifampitoka ela bey. Fa raha hafa ty paliave i Masitata amy hinane zao fa tsy fifampirehafagne sasa.

Taloha hey iareo nifampitagne naho nifagnoroke kedekede avao. Tsy te hihoatse izay ty Soatsara faie matahotse ka reke tsy mone hisarake ama’e ty Masitata. Ie raike avao ty mba nirehake ama’e tie ampela soa reke sady tsy misy mitovy ama’e. Mieretseretse amy izao reke tie: ‘A ino moa ty olagne? Izahay toe mifankatea!’

Va’e fa ampe taogne varagne rehe, le fa afake mampiarake. Ino ty ho natao’o naho ihe ro Soatsara?

MANDINEHA SOA HEY!

Akanjo atao famafagne loto — Fagnomezagne boake aman’Andrianagnahare hoahy ty mpivaly avao ty firaisagne. Tsy isia’o dika’e i fagnomezagne zay naho manao firaisagne amy ty ndaty tsy vali’o rehe. Mitovy amy ty nimea o ndaty akanjo fanjaka rehe faie atao’o famafagne lemboke naho manao izay

Va’e ho mate o ndatio naho tsy minon-drano. Mitovy amy izay ka fa ho raty ty voka’e naho tsy orihegne ty lilin’Andrianagnahare tihoe: ‘Falio ty fijangajangagne.’—1 Tesalonianina 4:3.

Ino ty ho voka’e naho tsy mankatò o lily iohoe rehe? Hoe ty Baiboly: ‘Manota amy ty vata’e avao ty mpijangajanga.’ (1 Korintianina 6:18) Ino ty dika izay?

Ino ty tsapa ty tanora fa nanao firaisagne aloha ty fanambaliagne? Izao ty trea ty mpikaroke ila’e:

MANEGNEGNE. Ty ankamaroa’e ro mahatsapa izay.
TSY MIFAMPATOKY. Sambe mivali-doha iareo roe tie: ‘Kera ndra fa nanao firaisagne tama o ndaty hafa reke?’
DISO TAMÀ. Maro ty somondrara diso tamà, satria i lahilahy nitamae’e hiaro azey ka ro nagnararaotse aze. Mateteke ro tsy teà i lahilahỳ sasa i somondrara nagneke hanao firaisagne ama’ey.
Naho fintignegne: Tsy isia’o dika’e ty vata’o, naho magneke hanao firaisagne aloha ty fanambaliagne rehe. (Romanina 1:24) Sarobily ty vata’o, le ko meigne ndaty avao.

Atorò fa vita’o ty mankatò i lilin’Andrianagnahare tihoey: ‘Falio ty fijangajangagne.’ (1 Tesalonianina 4:3) Ko meke fa mbe hanao firaisagne avao rehe naho fa manambaly. Tsy hanegnegne ndra hivali-doha mitovy amy ze tanora nanao firaisagne aloha ty fanambaliagne rehe, fa le vata’e hahatrea tsiro’e ama’e naho fa amy izay.—Ohabolana 7:22, 23; 1 Korintianina 7:3.

AKORE TY HEVE’O?

Hanimba ty vata’o naho hanao ze raha hampanahelo azo vao ty ndaty raike naho tea azo vata’e?
Hanimba ty fifandrambesa’o amy i Jehovah vao reke naho tea azo?—Hebreo 13:4.