Nifilie i Jehovah ty Josoa

Fa narine ty himateza i Mosesy, tafara ty nitariha’e o Israelitao tagnate ty taogne maro. Hoe ty Jehovah tama’e: ‘Tsy i rehe ty hitarike o Israelitao hizilike i Tane Nampitamaegney. Faie hampitalakeseko azo avao o taneo.’ Nagnontane i Jehovah ty Mosesy tie ia ty ho mpitarike vaovao hikarakara o Israelitao. Le namale reke tie: ‘Rehafo ty Josoa fa i reke ty ho mpitarike.’

Nirehake tamy i firenenay ty Mosesy tie fa ho mate reke, le i Josoa ty hitarike iareo ho amy i Tane Nampitamaegney agne. Hoe ty Mosesy tamy i Josoa: ‘Ko matahotse, fa hagnampe azo ty Jehovah.’ Tsiela tafara izay ty Mosesy, le nanganike tan-dengo ty Vohy i Nebo ey, le natoro i Jehovah aze i tane nampitamà’e i Abrahama, Isaka naho i Jakobay. Nimate ty Mosesy naho fa 120 taogne.

Hoe ty Jehovah tamy i Josoa: ‘Mitsaha ty Renerano i Jordanao, le miziliha a Kanana ao fa hagnampe azo manahake ty nagnampeako i Mosesy raho. Vakio lognandro ty  lalàko, le ko matahotse fa manàgna herim-po. Mandehana, le anò ze raha ampanoeko azo.’

Nandefa mpitsikilo roe lahy ta Jeriko agne ty Josoa. Hianarantikagne amy ty magnarake ty raha niseho tagne. Naho fa niheregne iareo, le nirehake tie toko’e hizilike a Kanana ao amy izay o Israelitao. Nirehake tamy i firenenay ty Josoa fa toko’e handeha amy izay iareo. Nampandehane’e aloha mba Jordana mbeo i mpisorogne mpinday ty Vata misy i fagninay. Bey i ranoy tamy izay, faie le nijanogne naho fa nandia ey ty tombo i mpisorogne rey. Nitsangagne tagnivo i ranoy ey i mpisorogne rey amparake ty nitsaha i vahoakey. Nampahatsiaro iareo ty raha nanoe i Jehovah tamy i Riake Menay o fahagagagne iohoe.

Niavy tamy i Tane Nampitamaegney ao avao o Israelitao tamy ty fara’e. Namboatse tragno naho tanàgne iareo. Tsy misy mira ama’e ty hasoa o tanàgneo, fa ao iaby ze raha hivelomagne. Nisy tane malalake azo namboleagne ty tao sady nisy tanem-boaloboke.