Nirese i Gideona o Midianitao

Nanompo sampy indraike o Israelitao tafara atoy, fa tsy nanompo i Jehovah. Tagnate ty fito taogne, le nangalare o Midianitao ty bibi’e sady sinimba’e ka ty raha nambolé iareo. Tsy maintsy nietake agnate lakato naho am-bohitsey o Israelitao. Nipay fagnavotagne boake amy i Jehovah iareo. Le nagnirake ty anjeli’e ho amy i Gideona agne ty Jehovah. Hoe i anjelỳ: ‘Finily i Jehovah ho mpialy mahery rehe hagnavotse o Israelitao.’ Le hoe ty Gideona: ‘Izaho ndaty tsy misy dika’e toy vao le hahavita izay?’

Akore ty nahafantara i Gideona fa nifily aze ty Jehovah? Nisia’e volon’agnondry ty tamy i taney eo, le hoe reke tamy i Jehovah: ‘Naho legne o zonò ty volon’agnondry toy naho maray faie maike o taneo, le ho fantako vata’e fa nifily ahy rehe mba hagnavotse o Israelitao.’ Nilegne vata’e i volon’agnondrỳ naho nimaraindray, fa o taneo nimaike. Nangatake tamy i Jehovah indraike reke mba ho maike i volon’agnondrỳ fa ho legne o taneo. Rese lahatse ty Gideona fa nifily aze ty Jehovah naho fa niseho zay. Navori’e hialy amo o Midianitao amy izay ty maramila’e.

Hoe ty Jehovah tamy i Gideona: ‘Hampandreseko o Israelitao. Faie maro loatse ty maramila’areo, le va’e hieretseretse nareo fa matanjake kanao mandrese. Ampolio ze matahotse.’ Maramila 10 000 ty sisa’e, fa noly ty 22 000 amy iareo. Faie hoe indraike ty Jehovah: ‘Agnafaho indraike. Ampinomo rano amy i reneranoy ey iareo. Le ze trea’o mahay mitao ro andeso.’ Maramila 300 lahy ro nahay nitao naho fa ninon-drano. Nampitamà ty Jehovah fa o 300 lahy rehoe ty hampiasae’e handrese ty maramila midianita 135 000.

Hoe ty Jehovah tamy i Gideona tamy i halegney: ‘Akia tafiho’areo amy izay o Midianitao.’ Nimea i Gideona antsiva naho siny lahibey misy jiro ty agnate’e ao i maramila’e rey. Le hoe reke: ‘Henteo soa raho sady anò ty raha ataoko.’ Tinio i Gideona amy izay i antsivay, le pinotepote’e i sinỳ sady naviovio’e i jiroy sady nikorake reke tie: ‘Mesabey i Jehovah naho i Gideona!’ Le nitsikombe ty natao’e ka i 300 lahy rey. Natahotse naho nikorontagne o Midianitao, le nifamono. Nampea i Jehovah handrese indraike o Israelitao.