Nangatake Ana-dahy Tamy i Jehovah ty Hana

Israelita ty Elkana. Roe ty vali’e, le i Hana naho i Penina. Faie i Hana ty tea’e vata’e. Nanagn’anake maro ty Penina fa i Hana tsy niterake, le izay ty nitsikiha i Penina aze. Ninday ty keleia’e hivavake tamy ty tragno lay masigne ta Silo agne isan-taogne ty Elkana. Nitrea i Elkana fa nanahelo ty Hana tie tagne. Hoe reke: ‘Ko mitagny sasa Hana fa ama’o eto raho sady tea azo.’

Nandeha nivike irery ty Hana mba hivavake. Nitagny vata’e reke sady nangatake i Jehovah hagnampe aze. Hoe ka reke: ‘Naho mea’o ana-dahy raho, le homeiko azo reke hanompo azo amparake ty andro iaigna’e.’

Nieretserete i Ely ho mamo ty Hana naho fa nitrea’e nitagny. Faie hoe ty Hana: ‘Tsy mamo raho fa misy raha manahiragne ahy, le rehafeko amy i Jehovah.’ Hoe ty Ely: ‘Lonike ho azo’o i raha angatahe’o zay!’ Tsy nanahelo sasa ty Hana. Niterake ana-dahy reke naho fa niafake tao’e raike, le i Samoela ty natao’e agnara’e. Fale ty Hana tamy izay!

Tsy nagnaligno ty vava natao’e tamy i Jehovah ty Hana. Nente’e hanompo tamy i tragno lay agne ty Samoela naho fa nisara-nono. Hoe reke tamy i Ely: ‘Intoy i ajaja nangatahekoy, le atokako hanompo i Jehovah nainai’e.’ Nitilike i Samoela isan-taogne ty rae’e naho ty rene’e, le nanday akanjo tsy misy tagna’e ho aze. Nimea i Jehovah ana-dahy telo naho anak’ampela roe ka ty Hana.