Ty Mpanjaka o Israelio Voaloha’e

Fa nimey i Jehovah mpitsara hitarike iareo o Israelitao, faie mpanjaka ty tea iareo. Hoe iareo tamy i Samoela: ‘Sambe managne ty mpanjaka’e o firenenao, izahay ka te hanagne.’ Fanta i Samoela fa tsy mete zay, le nivavake tamy i Jehovah reke. Le hoe ty Jehovah: ‘Tsy ihe ro liere iareo fa izaho. Rehafo iareo tie hanagne mpanjaka iareo, faie ho maro ty raha hangataha i mpanjakay amy iareo.’ Faie hoe i vahoakey: ‘Hahoa’ay inogne zay! Mpanjaka ty paliae’ay.’

I Saoly ro nisaontsie i Jehovah tamy i Samoela mba hatao mpanjaka. Nandeha tamy i Samoela ta Rama agne ty Saoly, le tamy izay ty nagnosora i Samoela aze ho mpanjaka.

Navory i Samoela amy izay o Israelitao, hanoroa’e i mpanjaka iareo vaovaoy. Faie tsy nitrea ty Saoly, fa nietake agnate entagne agne reke. Nisy ndaty nahatrea aze amy izay, le nampitsangane iareo tagnivo i vahoakey eo reke. Ie ty fara’e abo naho tovolahy amy i ndatỳ iaby. Hoe ty Samoela: ‘Itoy ty nifilie i Jehovah.’ Le hoe i vahoakey: ‘Ho lava havelogne abey ty mpanjaka!’

Nitsanogne i Samoela naho nankatò i Jehovah avao ty Saoly Mpanjaka tamy ty voaloha’e. Faie niova reke naho fa tafara atoy. Nisy fotoagne reke nanao sorogne tamy i alitaray eo faie raha tsy toko’e natao’e zay. Akore hoe ty Samoela? Hoe reke: ‘Hagegeagne ty natao’o toy fa tsy nankatò i Jehovah rehe.’ Nandrambe fianaragne boake amy izay vao ty Saoly?

Nialy tamo o Amalekitao ty Saoly tie indraike. Fa nirehake tama’e ty Samoela fa toko’e hovonoegne iaby iareo, hatrake amy ty bibi’e. Faie tsy namono i Agaga Mpanjaka i Amalekita ty Saoly. Le hoe ty Jehovah tamy i Samoela: ‘Tsy mankatò ahy ty Saoly.’ Nanahelo ty Samoela, le hoe reke tamy i Saoly: ‘Hifily mpanjaka hafa ty Jehovah fa tsy nankatò aze rehe.’ Le nandeha ty Samoela, faie sininto i Saoly i akanjo’ey, le niriatse. Le hoe ty Samoela: ‘Ho riate i Jehovah manahake igne ka ty fanjakà’o, le homei’e ze ndaty tea naho mankatò aze.’