Tempoly Hoahy i Jehovah

Hoe ty Jehovah tamy i Solomona naho fa nanjare mpanjaka reke: ‘Ino ty teà’o homeiko azo?’ Hoe ty Solomona: ‘Omeo fahendreagne raho fa mbe kede, mba hahaiako minday ty vahoake toa.’ Hoe ty Jehovah: ‘Hataoko hendre mandikoatse ty ndaty an-tane etoy rehe, satria nangatake fahendreagne. Ho mpagnarivo ka rehe. Naho mankatò ahy rehe, le ho lava havelogne.’

Namboatse i tempolỳ amy izay ty Solomona. Volamena, volafotsy naho hatae fara’e soa ty nampiasae’e. Maro sady nahay ty lahilahy naho ampela namboatse i tempolỳ. Vita i asay naho fa niafake fito taogne, le nitokanegne hoahy i Jehovah. Nasiagne fagnatetse ty tambone i alitaray eo, le nitongaleke nivavake teo ty Solomona tie: ‘O Jehovah, tsy antognogne azo ty tempoly toy, faie rambeso naho janjigno ajafady ty vavake naho ty fanompoagne anoe’ay.’ Ino ty natao i Jehovah? Naho fa vita i vavakey, le nisy afo boake an-dagnitse agne nandevogne i fagnatetsey. Nahafale o Israelitao ze raha zay, satria nankasitraha i Jehovah i tempolỳ.

Nalaza tamo o Israelitao naho tamy ze kila tane ty fahendrea i Solomona. Nimbama’e mbeo ze nanagne olagne. Niavy tao ka ty mpanjaka vave i Seba, le nagnontane aze raha sarotse. Naho fa nivoavale i Solomona iaby ty fagnontenea’e, le hoe reke: ‘Tsy ninoako naho tsy ty masoko hinane zao ro mahatrea tie hendre vata’e rehe. Nitahy azo ty Jehovah Andrianagnahare’o.’ Nisoa ty fiaigna o Israelitao tamy izay sady nisambatse iaby iareo. Faie niova ze raha zay.