Narova i Jehovah ty Josafata

Nipotehe i Josafata mpanjaka i Joda ty sare i Bala naho ty alitara’e ta Joda ao. Teà’e hahay ty lalà i Jehovah ty ndaty magneneke i Joda, le nagnirake manam-boninahitse naho Levita reke hagnanatse iareo.

Natahotse i Joda ty firenena marine iareo, satria fanta’e fa nagnampe iareo ty Jehovah. Ninday fagnomezagne hoahy i Josafata Mpanjaka ty ila iareo. Ie tamy ty indraike, le nanafike i Joda ty Moabita, ty Amonita naho ze tamy ty tanà i Seira agne. Natoky i Jehovah ty Josafata. Navori’e ta Jerosalema ao iaby ty vahoa i Joda, le nivavake reke tie: ‘Ho rese zahay Jehovah naho tsy ampea’o, le mba atorò anay ze raha toko’e hatao’ay.’

Le hoe ty Jehovah: ‘Ko matahotse fa hampeako nareo. Sambe mangalà ty toera’areo nareo, le mitsangana fa ho trea’areo ty hagnavotako anareo.’ Le akore ty natao iareo?

Nifily mpihira ty Josafata naho fa nimaray igne, le nampandehane’e taloha i maramila rey iareo. Niala ta Jerosalema ao iareo hifagnatreke amy ty fahavalo iareo a Tekoa agne.

Falefale i mpihira rey sady nihira mafe hoahy i Jehovah. Nialy hoahy ty vahoa’e ty Jehovah tamy izay. Nampifamotere i Jehovah avao o Amonitao naho o Moabitao, le nifamono. Faie narova i Jehovah iaby ty vahoake naho ty maramila vaho ty mpisorogne ta Joda tao. Rey ze firenena magnodidigne ty natao i Jehovah, le fanta’e fa hiaro ty vahoa’e lognandro ty Jehovah. Izay ka ty atao i Jehovah amy izao. Maro ty fomba ampiasae’e mba hiarovagne iareo sady tsy mila fagnampeagne boake ama o ndaty reke.