Teà i Josia ty Lalà i Jehovah

Naho fa nivalo taogne ty Josia, le nanjare mpanjaka i Joda. Nanao aoly naho nanompo sampy ty ndaty tamy izay. Te hahafantatse ty fomba toko’e hivavahagne tamy i Jehovah ty Josia naho fa 16 taogne. Nampipoteke ty sampy naho ty alitara nisy ta Joda tao reke tamy tie 20 taogne. Nampamboatse ze nisimba tamy i tempolỳ ka reke naho fa 26 taogne.

I Hilkia ty mpisorom-bey tamy izay. Nahatrea horognam-boke misy ty Lalà i Jehovah tamy i tempolỳ ao reke, va’e ty horognam-boke sinora i Mosesy varagne. Nente i Safana sekretera i mpanjakay tamy i Josia agne ze raha zay, le nivakie’e mafe. Naho fa naharey izay ty Josia, le nihai’e tie fa ela o vahoakeo ro tsy nankatò i Jehovah. Hoe ty Josia mpanjaka tamy i Hilkia: ‘Boseke amantika hinane zao ty Jehovah, le mba mandehana agne rehe hagnontane aze ty toko’e hataontika.’ I Holda mpaminany vave ty nampamalé i Jehovah i rehakey tie: ‘Ho sazeako ty ndaty a Joda ao, satria tsy niraharaha ahy.’ Faie tsy hataoko amy ty andro i Josia zay, satria niambane reke.

Naho fa naharey izay ty Josia, le nandeha mbamy i tempolỳ mbeo sady nampandehane’e agne ka o vahoakeo. Nivakie’e mafe amy izay ty Lalà i Jehovah, le nanao vava ty Josia naho o vahoakeo tie hankatò i Jehovah amy ty fo’e.

Fa ela bey tsy nankalaza Pasake ty ndaty ta Joda ao. Nivakie i Josia tamy i Lalànay ao fa toko’e hankalaza Pasake indraike isan-taogne o vahoakeo. Hoe reke: ‘Andao tika hankalaza Pasake.’ Namory biby maro hatao sorogne ty Josia sady nasia’e mpihira ka ty tamy i tempolỳ ao. Nankalaza Pasake naho ty Fete ty Mofo Tsy Misy Karibonate o vahoakeo tagnate ty fito andro. Mbe tsy nisy Pasake hoe izay indraike ty tafara ty andro i Samoela. Tea ty Lalà i Jehovah vata’e ty Josia. Teà’o ka vao ty mianatse ty miomba i Jehovah?