Fanjakagne Mitovy amy ty Hatae Bey

Nampatahotse ty nofy i Nebokadnezara tie indraike. Nitoka o ndaty hendre’e reo reke hagnazava ty dika’e, faie tsy nisy nahay. Nagnontane i Daniela reke tamy ty fara’e.

Hoe reke tamy i Daniela: ‘Nahatrea hatae bey raho tamy ty nofiko. Nitakatse i lagnitsey ty haabo’e sady mahatrea aze iaby ty tane toy. Soa ravegne naho namoa maro ka reke. Nialoke ama’eo o bibio sady namboara o vorogneo ty tragno’e ty ambone’ey. Nisy anjely nizotso boake an-dagnitse agne nitoka tie: “Tapaho ty hatae tia, le rantsagno o sampa’eo. O foto’eo avao ro engao eo sady feheo vigne ty magnodidigne aze. Hovagne ho fom-biby ty fo’e ndra tie nifo o ndaty taloha, le ho fito taogne ty fetra’e. Hahafantatse amy izay o ndatio tie Andrianagnahare ty Mpitondra, le mea’e fanjakagne ze ndaty tea’e.” ’

Nampahafantare i Jehovah i Daniela ty dika i nofỳ. Natahotse ty Daniela naho fa nahafantatse ty dika’e. Hoe reke: ‘O mpanjaka, miomba azo i nofy zay fa tsy miomba ty fahavalo’o. O hatae bey nitontao manondro azo. Hijanogne hey ty fanjakà’o, le hihinagne akata mitovy amo o bibio rehe. Faie nirehake i anjelỳ tie engao avao o foto’eo. Ty dika izay, hiheregne ho mpanjaka indraike rehe.’

Nandehandeha tambone i tafo-tragno’ey ey ty Nebokadnezara tao’e raike tafara izay, sady nitsiriry i Babylona tie: ‘Soa ty tanàgne namboareko toy! Sady toe bey ka raho tompo’e.’ Tamy ie mbe nirehakey, le nisy feo boake an-dagnitse agne nanao tihoe: ‘O Nebokadnezara, tsy ho mpanjaka sasa rehe.’

Nanjare minegne ty Nebokadnezara tamy izay sady nanahake o bibio. Nampialaegne tan-dapa’ao reke, le nitoboke tan-tetekey niarake amo o bibio ey. Nilava volo nanahake o voromaherio reke sady nanahake ty hoho o vorogneo ty halava ty hoho’e.

Naho fa nitampetse i fito taogney, le nahilala indraike ty Nebokadnezara sady natao i Jehovah mpanjaka i Babylona. Hoe ty Nebokadnezara: ‘Midera i Jehovah, mpanjaka i lagnitsey raho. Fantako hinane zao fa i Jehovah ro Mpitondra. Atao’e tsinotsinogne ty ndaty magnambone tegna, le mea’e fanjakagne ze ndaty tea’e.’