Nanjare Mesia ty Jesosy

Fa nitory ty Jaona tie: ‘Mbe ho avy ty lahibey mihoatse ahy.’ Ie naho fa 30 taogne ty Jesosy, le nandeha mbamy ty Renerano i Jordana mbeo, fa tagne ty nanoa i Jaona badisa. Rineha’e ty Jaona mba hanao badisa aze. Faie hoe ty Jaona: ‘Tsy izaho vao ro toko’e hatao’o badisa?’ Le hoe ty Jesosy: ‘Teà i Jehovah hanao badisa ahy rehe.’ Le nimbamy ty Renerano i Jordana mbeo iareo, le nalipo i Jaona tagnate rano ao ty Jesosy.

Nivavake ty Jesosy naho fa niakatse boake agnate rano ao. Nisokake amy izay i lagnitsey, le nizotso tama’e teo ty fagnahin’Andrianagnahare hoe voromahilala. Le nisaontsy ty Jehovah tie: “I rehe ty Anak’isoko, i rehe ty ankasitrahako.”

Nanjare Kristy ndra Mesia ty Jesosy naho fa nizotso tama’e ty fagnahy i Jehovah. Hanao ty asa nagniraha i Jehovah aze an-tane etoy amy izay reke.

Naho fa nivita badisa ty Jesosy, le nandeha an-tane efetse agne sady nijanogne agne 40 andro. Nimbamy i Jaona mbeo reke tafara izay. Hoe ty Jaona naho fa narine ty Jesosy: ‘Igne i Anak’agnondrin’Andrianagnaharey. I reke ty hagnafake ty fahotà ty tontolo toy.’ Nirehake izay ty Jaona, satria teà’e ho fanta o ndatio fa i Jesosy ro Mesia. Ino ty raha niseho tamy i Jesosy tan-tane efetse agney? Andao hagnente izay.