Raha Nabaribary Tamy i Jaona

Tamy ty apostoly Jaona nigadra tamy ty tokonose Patmo agne, ty nanoroa i Jesosy aze fahitagne 16 miomba ty hoavy. Magnambara ty hagnamasinagne ty tahina i Jehovah, ty hiavia ty fanjakà’e naho ty hanoagne ty zoton’arofo’e an-tane etoy o fahitagne reo.

Nahatrea i Jehovah amy ty sezan-droandria’e bey voninahitse an-dagnitse agne ty Jaona tamy ty fahitagne raike. Nisy androanavi- pagnahy 24 ty nagnodidigne aze sady nagnisy akanjo foty naho satro-boninahitse volamena iareo. Nisy helatse naho feon-kotroke ty boake amy i sezan-droandriagney eo. Niankohoke taloha i Jehovah eo o androanavi-pagnahy 24 reo sady nivavake tama’e. Nahatrea ndaty maro boake amy ty firenena naho ty firehake sambe hafa ka ty Jaona tamy ty fahitagne raike hafa. Nivavake tamy i Jehovah o ndaty rehoe. I anak’Agnondrỳ, ndra i Jesosy ty niarake iareo sady ninday iareo amy i rano i havelogney mbeo. Tamy ty fahitagne tafara izay, le nanjare mpanjaka an-dagnitse agne ty Jesosy naho o androanavi-pagnahy 24 reo. Nahatrea i Jesosy nialy tamy i dragogney, ndra i Satana naho ty demonia’e, ty Jaona tamy ty fahitagne magnarake. Natora i Jesosy boake an-dagnitse agne ho an-tane etoy iareo.

Nahatrea i anak’Agnondrỳ naho ty 144 000 nitsangagne tamy ty Vohy i Ziona eo ka ty Jaona. Nahatrea anjely nitiligne magnodidigne ty tane toy ka reke nirehake tamo o ndatio tie toko’e hatahotse an’Andrianagnahare naho hagnomey voninahitse aze iareo.

Ty aly Hara-magedona ty nitrea’e tamy ty fahitagne magnarake. I Jesosy naho ty maramila’e nandrese i Satana naho ty tontolo’e raty toy ty nitrea’e tamo o aly iohoe. Nahatrea filaminagne tan-dagnitse agne naho tan-tane etoy ty Jaona tamy ty fahitagne fara’e. Vinono i Jehovah vata’e ty Satana naho ty tarana’e. Sambe nagnamasigne ty tahina i Jehovah naho nivavake ama’e ty tan-dagnitse agne naho ze tan-tane etoy.