Taratasy Boake amy ty Filan-keve-pitantanagne

Ry Rahalahy Naho Rahavave,

Amy ty maha mpanompo i Jehovah antika, le teàntika ty Baiboly, fa Saontsi’e. Matoky tikagne fa maregne ty tantara trea ao, sady azo orihegne ty tari-dalagne mei’e. Porofoe ty Baiboly ka fa tea antika ty Jehovah. (Salamo 119:105; Lioka 1:3; 1 Jaona 4:19) Teà’ay ty hagnampe ndaty, hahafantatse ty maregne agnate ty Saontsin’Andrianagnahare ao, le nampiboake ty boke Andao Hianatse Tantara amy Baiboly Ao toy zahay. Andao hohenteantikagne ty raha ho trea ato.

Natao hoahy ty ajaja ty ankamaroa ty raha amy ty boke toy ato. Faie afake magnampe ty ndaty bey ka toy, naho tea’e ty hampitombo ty raha fanta’e miomba ty Baiboly. Natao hoahy ze kila ndaty ty Baiboly. Hahasoa antika sady hagnampe antika ho sambatse ty mianatse ty boke toy.

Boake amy ty Baiboly ao ty tantara agnate ty boke toy ato, sady rehafegne ato ty namboaragne o ndatio naho ty raha niseho tafara izay. Natao tsotra naho mora azo o tantara rehoe, sady natao milahatse mifanandrife amy ty fotoagne nisehoa’e.

Tsy mirehake tantara agnate Baiboly ao avao ty boke toy. Natao hagnampeagne antika hahatrea sare an-tsaigne naho hahatsapa ty fihetseham-po ze ndaty tantaraegne ao, ty sare naho ty tantara agnate ty boke toy ato.

Hotreantika agnate ty boke toy ato fa nisy vata’e ty ndaty rehafe ty Baiboly. Nisy ty nankatò i Jehovah fa nisy ka ty tsy nankatò aze. Afake mandrambe fianaragne boake amy iareo tika. (Romanina 15:4; 1 Korintianina 10:6) Misy fizaràgne 14 ty boke toy. Fintignegne am-boaloha ty fizaràgne tsikiraidraike ty raha azontika ianaragne, naho ze raha tsy toko’e hohalignontika.

Naho managn’anake rehe, le azo’o atao ty mamaky lesogne raike hoahy ty ana’o, miara mandineke sare, naho mamaky ty andinin-teny ahatreavagne i tantaray agnate Baiboly ao. Afake manao hoe izay ka rehe naho fa magnampe ndaty bey hahazo ze raha rehafe ty Baiboly.

Mino zahay fa hagnampe ndaty soa fo ty boke toy, ndra ajaja ndra ndaty bey, mba hampihatse ze ianara’e boake amy ty Saontsin’Andrianagnahare. Hivavake amy i Jehovah iareo amy izay sady ho agnisa ty keleia’e.