LESOGNE 07
Manao Akore ze o Jehovah Zao?
Ino ty avy an-tsai’o ao naho fa mieretseretse i Jehovah Andrianagnahare rehe? Misy ty mieretseretse fa tena fara’e ambone reke, le tsy misy dika’e ama’e tika sady manahake ty atimo naho ty avaratse ty elagnelantikagne ama’e. Sa mieretseretse rehe tie tsy tena misy reke fa hery manahake o hotrokeo avao? Manao akore maregne ze o Jehovah zao? Ampahafantare’e antikagne agnate ty Saontsi’e ao, le ty Baiboly ty toetse’e, naho tihoe mikarakara azo reke.
1. Nagnino tika ro tsy afake mahatrea an’Andrianagnahare?
Ty anto’e, “Fagnahy ty Andrianagnahare.” (Jaona 4:24) Ty dika izay, tsy nofotse manahake antikagne reke. Fagnahy Reke sady miambesatse an-dagnitse agne, le tsy trea maso.
2. Ino iaby ty ila’e amy ty toetse i Jehovah?
Tsy trea maso ty Jehovah. Faie afake mahafantatse naho tea aze tika satria tena misy reke sady managne toetse soa maro. Hoe ty Baiboly: “Tea ty rare’e ty Jehovah sady tsy foe’e ze ndaty tsy mivalike ama’e.” (Salamo 37:28) “Bey hatea sady mamindra fo” reke, lohotsie fa amy ze ndaty mijale. (Jakoba 5:11) “Marine ze torotoro fo ty Jehovah, sady magnavotse ze mamoe fo.” (Salamo 34:18) Fanta’o vao fa mahafale ndra mampanahelo i Jehovah ty raha ataontikagne? Diso tamà naho malahelo ohatse ty Jehovah naho fa misy ndaty raike manao raha raty. (Salamo 78:40, 41) Faie fale reke naho fa misy ndaty manao ze raha mampifale aze.—Vakio ty Ohabolana 27:11.
3. Akore ty ahatreavagne fa tea antikagne ty Jehovah?
Ty hatea ty toetse mampiambake i Jehovah. Tsy tihoe managne hatea avao ty Andrianagnahare. Fa naho ty maregne “Andrianagnahare hatea.” (1 Jaona 4:8) Tsy ty Baiboly avao ty mampibaribary ty hatea i Jehovah antika fa trea amy ty raha finoro’e ka zay. (Vakio ty Asan’ny Apostoly 14:17.) Dineho ohatse ty fomba namboara’e antika. Natao’e ty hahavy antika hahatrea loko soasoa sambe karaza’e sady ho finaritse amy izay. Afake mahatrea tsiro’e amy ty mozike naho hahatsapa tsiron-kanegne sambe karaza’e ka tika. Tea’e hankamamy o fiaignagneo vata’e tikagne!
ANDAO HANDINEKE TY PITSOPITSO’E
Hodinehentikagne ato ty raha nampiasae i Jehovah naho fa namboatse o raha mahaveregneo reke. Ho treantikagne ato ka ty fomba nampisehoa’e i toetse’e rey.
4. Hery ampiasaen’Andrianagnahare ty fagnahy masigne
Mampiasa ty tagnantikagne tika naho fa misy raha ataontikagne. Ty fagnahy masigne ka ty ampiasae i Jehovah naho fa misy raha atao’e. Rehafe ty Baiboly fa hery ampiasaen’Andrianagnahare o fagnahy masigneo fa tsy andrianagnahare. Vakio ty Lioka 11:13 naho ty Asan’ny Apostoly 2:17, sady iharò midineke ty fagnonteneagne retoa:
‘Mean’Andrianagnahare’ antikagne i fagnahy masigney naho fa angatahentikagne ama’e. Naho ty heve’o, hery ampiasaen’Andrianagnahare vao i fagnahy masigney sa andrianagnahare? Nagnino rehe ro mirehake izay?
Mampiasa ty fagnahy masigne ty Jehovah mba hanoagne raha mahaveregne. Vakio ty Salamo 33:6; 2 Petera 1:20, 21, sady iharò midineke ty fagnonteneagne toy:
Ino iaby ty nampiasà i Jehovah i fagnahy masigney?
5. Fanjaka iaby ty toetse i Jehovah
Nahatsapa ty Mosesy fa nila namantatse soa i Mpamorogne azey reke ndra tie fa nanompo an’Andrianagnahare tagnate ty taogne maro aza. Hoe reke tama’e: “Ampahafantaro ahy ty lala’o mba hahafantarako azo.” (Eksodosy 33:13) Nampahafantare i Jehovah i Mosesy areke ty toetse’e. Vakio ty Eksodosy 34:4-6, sady iharò midineke ty fagnonteneagne retoa:
Ino iaby ty toetse i Jehovah nampahafantare’e i Mosesy?
Ty aia amo o toetse i Jehovah reo ty tena tea’o?
6. Mivazoho ty fijaleantikagne ty Jehovah
Nindevo ta Ejipta agne o Hebreò, i mpanompon’Andrianagnahare taloha rey. Ino ty nitsapa i Jehovah naho fa nahavazoho ty fijalea o vahoa’e rehoe? Alefaso ty RAKI-PEO toy sady oriho amy i Baiboli’oy ao, ndra vakio ty Eksodosy 3:1-10, le iharò midineke ty fagnonteneagne retoa.
Ino ty tsapa i Jehovah naho fa mijale o ndatio, arake o fitantaragne iohoe?—Henteo ty andine’e 7 naho 8.
Naho ty heve’o, te hagnampe o ndatio vata’e vao ty Jehovah? Vita’e vao ty hanao izay? Ino ty anto’e?
7. Ahafantarantikagne ty toetse i Jehovah o raha finoro’eo
Mampibaribary ty toetse i Jehovah o raha finoro’eo. Alefaso i VIDEO oy. Vakio ka ty Romanina 1:20, sady iharò midineke ty fagnonteneagne toy.
Ino iaby ty toetse i Jehovah trea amo o raha finoro’eo?
MISY TY MIREHAKE FA: “Tsy midare antikagne ze o Andrianagnahare zao.”
Akore ty heve’o?
Nagnino rehe ro mirehake izay?
FAMINTIGNAGNE
Fagnahy tsy trea maso ty Jehovah faie managne toetse fanjaka maro, agnisa izay ty hatea.
Fameregnagne
Nagnino tika ro tsy afake mahatrea i Jehovah?
Ino ty atao tihoe fagnahy masigne?
Ino iaby ty ila’e amy ty toetse i Jehovah?
FAGNAZAVAGNE FAGNAMPE’E
Hahafantatse soa i Jehovah rehe naho mandineke ty toetse’e efatse miambake rehafegne ato retoa.
“Manao Akore o Andrianagnahare Zao?” (Fitalakesan-davitse Nim. 1 2019)
Ho trea’o ato ty porofo fa tsy egne ho egne avao ty Andrianagnahare.
“Misy an’Andrianagnahare Iaby vao ze Kila Toeragne?” (Lahatsoratse amy jw.org ao)
Ho trea’o ato ty anto’e mahavy ty Baiboly mirehake tie fitàn’Andrianagnahare o fagnahy masigneo.
“Inogne moa o Fagnahy Masigne Zao?” (Lahatsoratse amy jw.org ao)
Nihevetse ty lahilahy raike goa toy fa tsy midare aze ty Andrianagnahare. Ho trea’o ato ty nagnova ze fomba fisaigna’e zay.
“Afake Magnampe Ndaty Raho Ndra tie Goa” (Fitalakesan-davitse 1 Oktobra 2015)