LESOGNE 09

Magnarinea An’Andrianagnahare amy ty Alala ty Vavake

Raha Vita Pirinty azo Sintonegne

Tsapa’o vao fa mipay tari-dalagne amy ty fiaigna’o rehe? Te hahazo fagnampeagne vao rehe naho fa managne olagne? Mila fampionognagne vao rehe? Tea’o vao ty hiharine i Jehovah? Afake magnampe antikagne amo o raha reo iaby ty vavake. Akore ty atao naho fa mivavake? Mijanjigne ze kila vavake vao ty Andrianagnahare? Ino ty toko’e hatao’o mba hijanjigna’e ty vavake atao’o? Andao tikagne hamale ireo.

1. Ia ty toko’e hivavahantikagne, le ino ty azo rehafegne naho fa mivavake?

Nampianare i Jesosy fa i Raentikagne an-dagnitse agney avao ty toko’e hivavahagne. Ndra i Jesosy aza nivavake tamy i Jehovah. Hoe reke: “Le mivavaha hoe izao nareo: ‘Rae’ay amy i lagnitsey ao ...’” (Matio 6:9) Mihamarine i Jehovah tikagne naho fa mivavake ama’e.

Azontikagne angatahegne amy ty vavake ze raha ilaentikagne. Faie toko’e hifagnarake amy ty zoton’arofon’Andrianagnahare zay mba hamalea’e ty vavake ataontikagne. “Ndra inogn’inogne angatahentikagne naho fa mifanandrife amy ty zoton’arofo’e [Andrianagnahare], le mijanjigne antikagne reke.” (1 Jaona 5:14) Nirehake raha tsiampeampe azontikagne rehafegne amy ty vavake ty Jesosy. (Vakio ty Matio 6:9-13.) Maregne fa afake rehafentikagne amy ty vavake ze raha mampinekoneko antikagne. Faie tsy toko’e ho halignontikagne ty misaotse an’Andrianagnahare amy ze raha natao’e ho antikagne sady mangatake aze hagnampe ty hafa.

2. Akore ty toko’e hatao naho fa mivavake?

Mandrisike antikagne ty Baiboly mba ‘hamorake ama’e [Andrianagnahare] ze raha am-pontikagne ao.’ (Salamo 62:8) Ze raha tena am-pontikagne ao areke ty toko’e ho rehafentikagne naho fa mivavake. Azontikagne atao ty mirehake naho fa mivavake ndra mivavake am-pontikagne ao avao, ndra ombia ndra ombia sady ndra aia ndra aia. Toko’e hanao akore ty pozintikagne naho fa mivavake? Tsy farita i Jehovah tie, tsy maintsy mitongaleke ndra mitoboke ndra mitsangagne tika naho fa mivavake. Ty lahibey ama’e le tihoe magnaja Aze tikagne.

3. Akore ty amalean’Andrianagnahare ty vavake ataontikagne?

Maro ty fomba amalea’e ty vavake ataontikagne. Nimea’e ty Saontsi’e, le ty Baiboly ohatse tikagne. Ao mateteke ty ahatreavagne ty vale ty fagnonteneantikagne. ‘Mampahihitse ze ndaty mbe tsy nandia fiaignagne’ ty famakiagne ty Saontsin’Andrianagnahare. (Salamo 19:7; vakio ty Jakoba 1:5.) Mea’e filaminan-tsaigne tika naho fa miatreke olagne. Mampiasa ty mpanompo’e ka reke mba hagnampe antikagne naho fa mipay izay tika.

ANDAO HANDINEKE TY PITSOPITSO’E

Hodinehentikagne ato ty raha toko’e hataontikagne naho fa mivavake mba hampifaleagne an’Andrianagnahare. Ho trea ato ka tie ino ty soa ho azontikagne naho fa mivavake.

4. Ty raha takén’Andrianagnahare amantikagne naho fa mivavake

Akore ty ahafantaragne tie, ekén’Andrianagnahare ty vavake ataontikagne ndra tsy eké’e? Alefaso i VIDEO oy.

VIDEO: Mijanjigne ze Kila Vavake vao ty Andrianagnahare?—Tapatapa’e (2:42)

Tea i Jehovah hivavake ama’e tikagne. Vakio ty Salamo 65:2, sady iharò midineke ty fagnonteneagne toy:

Naho ty heve’o, tea i “Mpijanjigne vavakey” hivavake ama’e vao rehe? Hazavao.

Tsy maintsy miaigne mifagnarake amy ty fitsipin’Andrianagnahare tikagne vaho izay reke hijanjigne ty vavake ataontikagne. Vakio ty Mika 3:4 naho ty 1 Petera 3:12, sady iharò midineke ty fagnonteneagne toy:

Ty vavake atao ty ndaty manao akore ty janjigne i Jehovah?

Sambe mivavake ty handrese o maramilao naho fa hialy. Le hamale ty vavake atao iareo vao ty Andrianagnahare?

5. Rehafo ze am-po’o ao naho fa mivavake sady anò amy ty fireha’o

Nampianaregne mba hanao tsianjere vavake ty ndaty ila’e sady raha mitovy avao ty aherenkere’e. Faie akore ty tean’Andrianagnahare hataontikagne naho fa mivavake ama’e? Vakio ty Matio 6:7, sady iharò midineke ty fagnonteneagne toy:

Ino ty toko’e hatao’o mba hahavy azo tsy “hagnerenkeregne rehake mitovy avao” naho fa mivavake?

Isan’andro rehe, le mieretsereta fitahiagne raike niazo’o amy i androy, le isaoro ty Jehovah naho fa avy eo. Naho ohatse rehe misaintsaigne fitahiagne raike niazo’o agnate ty andro raike sady manao izay ka amy ty andro magnarake igne, le hahatrea raha fito sambe hafa hisaora’o i Jehovah rehe agnate ty heregnandro raike.

Ajaja lahilahy raike mirehake ze raha tsapa’e amy ty rae aman-drene’e. — Tea ty rae hirehake ama’e ty raha tena tsapa’e ty ana’e. Tea i Jehovah ka naho rehafentikagne ama’e ze raha tena am-pontikagne ao

6. Fagnomezagne boake aman’Andrianagnahare ty vavake

Akore ty agnampea o vavakeo antikagne, lohotsie naho fa miatreke raha sarotse tika? Alefaso i VIDEO oy.

VIDEO: Magnampe ty Vavake (1:32)

Mampitamà ty Baiboly fa magnampe antikagne hilamin-tsaigne ty vavake. Vakio ty Filipianina 4:6, 7, sady iharò midineke ty fagnonteneagne retoa:

Akore ty agnampea o vavakeo antikagne ndra tie tsy afake aza i olagney?
Ino iaby ty raha tea’o hangatahegne amy ty vavake?

Raha mahaliagne

Ty rehake tihoe “amena”, le midika tihoe “izay vata’e” ndra “lonike mba ho tanterake zay.” Nanomboke tamy ty andro ty Baiboly, le “amena” ty rehafegne naho fa amy ty fara i vavakey.—1 Tantara 16:36.

7. Manokàgna fotoagne mba hivavahagne

Mateteke tikagne rempotse amy ty fiaignagne, le haligno ty mivavake. Tena lahibey tamy i Jesosy vao ty vavake? Vakio ty Matio 14:23 naho ty Marka 1:35, sady iharò midineke ty fagnonteneagne retoa:

Nanokagne fotoagne ty Jesosy mba hivavahagne. Akore ty natao’e?
Isake ombia ty fotoagne atoka’o mba hivavahagne?

Sare: Ampela raike mivavake agnate i andro raikey. 1. Vaho mifoha. 2. Miarake amy i ana’e rey. 3. Naho fa am-piasagne agne. 4. Aloha ty hihinagne.

MISY TY MIREHAKE FA: “Tsy mamale vavake ty Andrianagnahare.”

Akore ty hamalea’o izay?

FAMINTIGNAGNE

Naho ze raha am-pontikagne ao ty rehafentikagne naho fa mivavake, le hagnarine an’Andrianagnahare, hilamin-tsaigne sady hahavita hampifale i Jehovah tikagne.