LESOGNE 11

Ino ty Hagnampe Azo Handrambe Soa Boake amo o Baibolio?

Raha Vita Pirinty azo Sintonegne

Fa nisy fotoagne vao rehe nisy raha tea’o hatao faie sarotse ty manao aze? Va’e natao’o tsikede i rahay, amy izay mba mora ty manao aze. Hoe izay ka varagne ty fahatreava’o ty mamaky Baiboly. Va’e hieretseretse rehe tie: ‘Akore koahe ty hanombohako aze?’ Ho trea’o amy ty lesogne toy ato fa misy raha tsotra azo’o atao, amy izay ho tea’o ty mamaky naho mianatse Baiboly.

1. Nagnino tikagne ro toko’e hamaky Baiboly isan’andro?

Ho sambatse sady ho tomombagne soa ty raha atao ty ndaty raike naho mamaky Baiboly isan’andro reke, ty dika izay mamaky ty “lalà i Jehovah.” (Vakio ty Salamo 1:1-3.) Amy ty voaloha’e ohatse rehe afake mamaky agnate ty minitra tsiampeampe isan’andro. Naho fa zatse mamaky Baiboly rehe, le hanjare hahafinaritse azo ty mamaky aze naho fa mandeha ty fotoagne.

2. Ino ty hagnampe azo handrambe soa naho fa mamaky Baiboly?

Naho fa mamaky Baiboly rehe, le toko’e hitofa kede heike, le eretsereto ze vakie’o. Tsy ampe ty mamaky avao fa tena ilaegne ka ty ‘misaintsaigne.’ (Josoa 1:8) Azo’o eretseretegne retoa: ‘Ino ty ianarako miomba i Jehovah Andrianagnahare amy itoy? Akore ty hagnorihako ty andinin-teny toy? Akore ty azoko ampiasagne ty andinin-teny toy mba hagnampeagne ty hafa?’

3. Akore ty hahatreava’o fotoagne hamakiagne Baiboly?

Sarotse ama’o vao ty mahatrea fotoagne hamakiagne Baiboly? Maro ty mahatsapa hoe izay. Mikezaha ‘mba hagnararaotse soa o fotoagneo.’ (Efesianina 5:16) Afake manokagne fotoagne voafaritse soa isan’andro rehe mba hamakiagne Baiboly. Ty ila’e zao maraindray bey ty amakia’e aze. Ty ila’e ka naho fa boake nihinagne atoandro, ndra hariva aloha ty hiroro. A i rehe, ombia ty fotoagne mete ama’o?

ANDAO HANDINEKE TY PITSOPITSO’E

Henteo ato tie ino ty azo’o atao mba hahafinaritse azo ty mamaky Baiboly, sady akore ty hagnomana’o ty fianara’o Baiboly.

Sare: Ajaja lahilahy raike mamolake tsikede ty tegna’e mba ho tea ty karazan-kanegne mbe tsy nihane’e. 1. Hisahisa’e i hanegney. 2. Fa beibey reke sady homagne i hanegney. 3. Nihabey avao reke le nanjare nitea’e i hanegney. — Mila mamolake ty vatantikagne tika vaho izay ho teantikagne ty hanegne mbe tsy nihanentikagne. Mila mikezake ka tika vaho izay ho tea mamaky Baiboly

4. Mikezaha ho tea mamaky Baiboly

Va’e ho sarotse tihoe manomboke mamaky Baiboly. Va’e hamolake ty vata’e ty ndaty raike vaho izay ho tea’e ty hihinagne ty karazan-kanegne mbe tsy nihane’e. Tsy maintsy mikezake ka rehe vaho izay ho tea mamaky Baiboly. Vakio ty 1 Petera 2:2, sady iharò midineke ty fagnonteneagne toy:

Va’e hanjare ho tea mamaky Baiboly vao rehe, naho mamaky aze isan’andro?

Alefaso i VIDEO mampiseho tie ino ty natao ty ndaty ila’e mba ho tea iareo ty mamaky Baibolỳ. Iharò midineke ty fagnonteneagne retoa naho fa avy eo.

VIDEO: Ry Tanora Anò ze Hiteava’o ty Saontsin’Andrianagnahare (5:33)

Ino ty olagne natrehe i tanora tamy i video teo rey?
Ino ty nagnampe iareo hamaky Baiboly isan’andro?
Ino ty natao iareo mba hahafinaritse iareo ty mamaky Baiboly?

Soso-kevetse hagnampe azo:

Ze Baiboly maregne soa naho mora azo ro filio. Oharo ty Fandikan-tenin’ny Tontolo Vaovao naho misy amy ty fireha’o io.
Ze tena mahaliagne azo heike ro vakio. Va’e hagnampe azo i tabilò tihoey “Hanomboke Hamaky Baiboly.”
Asio mareke ze fa nivakie’o. Ampiasao i tabilò tihoey “Vakio Isan’andro o Baibolio” amy ty boke toy ato.
Ampiasao ty programa tihoe JW Library^®. Naho mampiasa io rehe, le ho afake hamaky Baiboly amy ty telefony ndra amy ty fitaovagne hafa, ndra aia ndra aia ty misy azo. Afake mitsanogne famakiagne Baiboly nalaegne feo ka rehe.
Ampiasao ty bokekele tihoe Tari-dalagne Hoahy ze Mianatse ty Saontsin’Andrianagnahare. Hahafinaritse azo ty mamaky Baiboly, naho magnente i sare-tane naho i tabilò ao rey rehe.

5. Omano soa ty fianara’o Baiboly

Vakio ty Salamo 119:34, sady iharò midineke ty fagnonteneagne toy:

Nagnino ro ilaegne ty mivavake aloha ty hamakiagne Baiboly ndra aloha ty hagnomanagne fianaragne Baiboly?

Ino ty hagnampe azo handrambe soa isake tie mianatse Baiboly? Naho fa magnomagne ty lesogne tsikiraidraike rehe, le oharo retoa:

A. Vakio ty fizaràgne voaloha’e amy i lesogney.
B. Vakio i andinin-tenỳ, sady eretsereto tie ino ty ifandrambesa’e amy i hevetse rehafegney.
D. Asio mareke ze rehake mamale i fagnonteneagne rey. Izay ty hagnampe azo naho fa hiara-midineke i lesogney nareo amy i mpampianatse azoy.

Sare: Ampela raike magnomagne fianaragne Baiboly hatao’e. A. Mamaky i peje voaloha’e amy i lesogneỳ reke. B. Mamaky i andinin-teny rey amy Baiboly ao reke. D. Asia’e mareke ze hevetse lahibey.

Raha Mahaliagne

Maro ty dikan-drehake fa nampiasae ty Vavolombelo i Jehovah. Faie Ny Soratra Masina—Fandikan-tenin’ny Tontolo Vaovao ty tena tea’ay, satria maregne soa naho mazava sady mampiasa ty tahinan’Andrianagnahare.—Henteo i lahatsoratse amy jw.org ao tihoey “Managne ty Baiboli’e Manokagne vao o Vavolombelo i Jehovah-o?”

MISY TY MIREHAKE TIE: “Tena sarotse ze o mamaky naho mianatse Baiboly zao. Tsy managne fotoagne naho hery hanoagne izay raho.”

Akore ty heve’o?

FAMINTIGNAGNE

Handrambe soa boake amo o Baibolio rehe naho manokagne fotoagne hamakiagne aze, mivavaha mba hahazoa’o ze raha vakie’o, sady omano ty fianara’o Baiboly.