LESOGNE 21
Akore ty Atao mba Hitoriagne i Talily Soay?
Tsy ho ela ty Jehovah, le hampiasa i Fanjakà’ey mba hamoagnagne ze kila raha manahiragne antikagne. Talily soa vata’e zay, le mila mahafantatse izay iaby ze kila ndaty. Nandily ze mpanonjohy ty lia’e ty Jesosy mba hirehake io amy ze kila ndaty. (Matio 28:19, 20) Akore ty atao ty Vavolombelo i Jehovah mba hagnorihagne o lily nirehafe i Jesosy iohoe?
1. Ino ty porofo fa tanterake amo o androntikagne zao ty Matio 24:14?
Nirehake ty Jesosy tie: “Hotoriegne magneran-tane ty talily soa i Fanjakagney toy.” (Matio 24:14) Mahafale ty Vavolombelo i Jehovah ty magnambara o talily soa iohoe. Mitory i talily soay magneran-tane zahay sady amy ty firehake 1 000 mahery ty itoria’ay aze! Asa bey io, le mila kezake mafe naho fandaminagne soa. Tsy vita’ay io naho tsy eo ty fagnampea i Jehovah.
2. Ino ty kezake atao’ay mba hitoriagne amo o ndatio?
Mitory amy ze toeragne ahatreava’ay ndaty zahay. Mitory “isan-tragno” manahake ty natao i Kristiana tamy ty taonjato voaloha’e rey zahay. (Asan’ny Apostoly 5:42) O fomba fitory iohoe ty ahafaha’ay mirehake ama o ndaty an-tapetrisa’e isan-taogne. Mateteke tsy tratse an-tragno o ndatio, le mitory amy ty toeragne maro ndaty ka zahay. Mipay fomba hirehafagne amo o ndatio ty miomba i Jehovah naho ty raha safirie’e zahay.
3. Andraiky ia ty mitory i talily soay?
Andraiky ty tena Kristiana tsikiraidraike iaby ty mizara i talily soay amo o ndatio. Mikezake manao soa o andraikitse iohoe zahay. Mitory arake ze fara’e vita’ay zahay satria fanta’ay fa mamonje ty fiay o ndatio o hafatse iohoe. (Vakio ty 1 Timoty 4:16.) Tsy karamaegne zahay naho fa manao o asa iohoe, satria rehafe ty Baiboly tie: “Fa nahazo maimaim-poagne nareo, le magnomea maimaim-poagne.” (Matio 10:7, 8) Mitory avao zahay ndra tie tsy misy ndaty mandrambe anay aza. Ty anto’e te hankatò i Jehovah zahay sady te hampifale aze.
ANDAO HANDINEKE TY PITSOPITSO’E
Hodinehentikagne ato ty kezake atao’ay Vavolombelo i Jehovah mba hitoriagne magneran-tane naho ty fomba agnampea i Jehovah anay.
Fitoriagne magneran-tane: A) Costa Rica, B) Etazonia, D) Benin, E) Tailande, F) Yap, G) Soeda
4. Mikezake mafe zahay mba hitoriagne amy ze kila ndaty
Manao kezake manokagne o Vavolombelo i Jehovah-o mba hitoriagne i talily soay amy ze toeragne misy ndaty. Alefaso i VIDEO oy, sady iharò midineke ty fagnonteneagne toy.
Ino ty mampieke azo amy ty kezake atao ty Vavolombelo i Jehovah mba hitoriagne?
Vakio ty Matio 22:39 naho ty Romanina 10:13-15, sady iharò midineke ty fagnonteneagne retoa:
Nagnino ro mampiseho ty hatea’ay ty ndaty hafa ty fitoriagne atao’ay?
Akore ty fihevera i Jehovah ze ndaty mitory i talily soay? —Henteo ty andine’e 15.
5. Miara-miasa aman’Andrianagnahare zahay
Maro ty tantara niseho magnaporofo fa mitarike i asa fitoriagne atao’aỳ ty Jehovah. Mipetrake a Nouvelle Zelande agne ohatse, ty rahalahy raike atao tihoe Paul toy. Nitory isan-tragno reke indraike folakandro zay, le tamy ty tragno ze ampela raike zay eo ty nitoria’e. Tamy ty maraindray io o ampela iohoe ro nivavake tamy i Jehovah mba hisy ndaty hitilike aze. Hoe ty Paul: “Telo lera tafara izay, le nitory tan-tragno’e teo raho.”
Vakio ty 1 Korintianina 3:9, sady iharò midineke ty fagnonteneagne toy:
Nagnino o tantara ta Nouvelle Zelande agne iohoe ro mampiseho fa mitarike i asa fitoriagney ty Jehovah?
Vakio ty Asan’ny Apostoly 1:8, sady iharò midineke ty fagnonteneagne toy:
Nagnino ro ilaegne ty fagnampea i Jehovah mba hahavitagne i asa fitoriagney?
Raha mahaliagne
Ampiofagnegne mba hahay hitory zahay amy ty fivoriagne andavanandro atao’ay isan-keregnandro. Naho fa nagnatreke o fivoriagne iohoe rehe, le akore ty fahatreava’o o fivoriagne iohoe?
6. Mitory zahay satria mankatò an’Andrianagnahare
Nisakagne ze mpanonjohy ty lia i Jesosy tsy hitory ty ndaty ila’e tamy ty taonjato voaloha’e. Nampiasa o lalànao areke ty Kristiana tamy izay mba hiarovagne ty zo iareo hitory i talily soay. (Filipianina 1:7) Manao hoe izay ka o Vavolombelo i Jehovah amy izaò.a
Vakio ty Asan’ny Apostoly 5:27-42, sady iharò midineke ty fagnonteneagne toy:
Nagnino zahay ro tapa-kevetse hitory avao?—Henteo ty andine’e 29, 38, naho 39.
VA’E HISY TY HAGNONTANE TIE: “Nagnino o Vavolombelo i Jehovah-o ro mitete tragno?”
Akore ty havale’o izay?
FAMINTIGNAGNE
Nandily ze mpanonjohy ty lia’e ty Jesosy mba hitory i talily soay amy ty firenena iaby. Ampea i Jehovah zahay mba hahavita o asa iohoe.
Fameregnagne
Akore ty atao ty Vavolombelo i Jehovah mba hitoriagne i talily soay magneran-tane?
Nagnino ty fitoria’ay i talily soay ro magnaporofo fa tea’ay ty ndaty hafa?
Naho ty heve’o, asa mahafale vao o asa fitoriagneo? Ino ty anto’e?
FAGNAZAVAGNE FAGNAMPE’E
Akore ty atao ty Vavolombelo i Jehovah mba hitoriagne amy ty ndaty amy ty rova bey agne?
Kezake Manokagne mba Hitoriagne amy ty Toeragne Maro Ndaty a Paris Agne (5:11)
Akore ty atao ty Vavolombelo i Jehovah mba hitoriagne amo o ndaty mpitsoa-ponenagneo?
Henteo ato ty tantara raike toy fa mampiseho tie tena mahasambatse ty mitory marain-tsy hariva.
Ho trea’o ato fa nisy lilim-pitsaràgne tena niambake nagnampe ty Vavolombelo i Jehovah hitory i talily soay.
“Niakatse Fitsaragne ty Vahoa i Fanjakagney” (Fa Mitondra ty Fanjakàn’Andrianagnahare!, toko 13)
a Andrianagnahare ro mandily anay mba hitory. Tsy mila alalagne boake amo o manam-pahefàgneo areke o Vavolombelo i Jehovah-o mba hitoriagne i talily soay.