Ino o Fanjakàn’Andrianagnahare Zao?

Ty Fanjakàn’Andrianagnahare ro foto-kevetse lahibey tena rehafe ty Baiboly. Hampiasa o Fanjakagne iohoe ty Jehovah mba hagneregnagne ty tane toy ho Paradisa. Ino o Fanjakàn’Andrianagnahare zao? Ino ty porofo fa minday o Fanjakagne iohoe tie amy izao? Ino iaby ty raha fa natao’e? Ino ka ty raha mbe hatao’e amy ty hoavy? Hamale o fagnonteneagne rehoe ty lesogne toy naho ty lesogne roe magnarake aze.

1. Ino o Fanjakàn’Andrianagnahare zao, sady ia ty Mpanjaka’e?

Fitondram-panjakagne raike naore i Jehovah an-dagnitse agne o Fanjakàn’Andrianagnahare zao. I Jesosy Kristy ty Mpanjaka o Fanjakagne iohoe. (Matio 4:17; Jaona 18:36) Izao ty rehafe ty Baiboly miomba i Jesosy: “Ho Mpanjaka ... nainai’e” reke. (Lioka 1:32, 33) Ho Mpanjaka hifehe ty tane toy iaby reke.

2. Ia ty hiarake manjaka amy i Jesosy?

Hisy ndaty hiarake manjaka amy i Jesosy. “Boake amy ty foko naho ty firehake vaho ty vahoake sady boake amy ty firenena iaby” iareo, le “ho mpanjaka hifehe ty tane toy.” (Apokalypsy 5:9, 10) Ndaty an-tapetrisa’e ty nanjare mpanonjohy ty lia i Jesosy nanomboke ty niavia’e an-tane etoy hatrake amy izao. Hiarake manjaka amy i Jesosy iaby vao iareo? Aha’a. Ndaty 144 000 avao ty hiarake manjaka ama’e. (Vakio ty Apokalypsy 14:1-4.) Faie ze sisa’e hiaigne nainai’e an-tane etoy, sady ho vahoake hindese i Fanjakagney.​—Salamo 37:29.

3. Nagnino ty Fanjakàn’Andrianagnahare ro soa ambone o fitondran’olombelogneo?

Mba te hanao raha soa avao ty mpitondra ila’e faie voafetra avao ty raha vita iareo. Tsy maintsy ho tapetse ka ty fotoagne itondra’e, le va’e tsy hidare o vahoakeo ze misolo aze. Faie tsy hoe izay ty Jesosy, i Mpanjaka i Fanjakàn’Andrianagnahareỳ, satria tsy hisy hisolo aze. Ty anto’e, “fanjakagne tsy ho rava sasa” ty naoren’Andrianagnahare. (Daniela 2:44) Tsy hagnavakavake ty Jesosy naho fa hanjaka amy ty tane toy iaby. Bey hatea naho soa fagnahy sady tea rare’e reke, le hampianare’e ka o ndatio mba hampiseho o toetse rehoe.​—Vakio ty Isaia 11:9.

4. Hifehe ty tane toy iaby i Fanjakàn’Andrianagnaharey

Managne fahefagne lahibey ty Jesosy Kristy fa tsy manahake o mpitondrao. Vakio ty Matio 28:18, sady iharò midineke ty fagnonteneagne toy:

• Nagnino ty fahefà i Jesosy ro ambone ty fahefà o mpitondrao?

Miovaova avao o fitondran’olombelogneo, sady amy ze firenena misy i mpitondray avao ro fehe’e. Faie manao akore ty Fanjakàn’Andrianagnahare? Vakio ty Daniela 7:14, sady iharò midineke ty fagnonteneagne retoa:

• Ino ty mahasoa tihoe “tsy ho rava sasa” i Fanjakàn’Andrianagnaharey?

• Ino ty mahasoa tihoe hitondra ty tane toy iaby o Fanjakagne iohoe?

5. Tsy maintsy ho soloagne o fitondran’olombelogneo

Nagnino ro tsy maintsy ho soloagne o fitondran’olombelogneo? Alefaso i VIDEO oy, sady iharò midineke ty fagnonteneagne toy naho fa avy eo.

VIDEO: Inogne o Fanjakàn’Andrianagnahare Zao?​—Tapatapa’e (1:41)

• Ino ty voka’e raty naboa o fitondran’olombelogneo?

Vakio ty Mpitoriteny 8:9, sady iharò midineke ty fagnonteneagne toy:

• Naho ty heve’o, toko’e ho soloagne ty Fanjakàn’Andrianagnahare vao o fitondran’olombelogneo? Ino ty anto’e?

6. Mahatakatse soa ty raha mahazo antika i hiara-manjaka amy i Fanjakàn’Andrianagnaharey ao rey

‘Mahay mitretré antikagne amy ty fahalemeantika’ ty Jesosy Mpanjaka satria fa nindaty reke. (Hebreo 4:15) A manao akore ka o 144 000 hiarake manjaka amy i Jesosy reo? Finily i Jehovah “boake amy ty foko naho ty firehake vaho ty vahoake sady boake amy ty firenena iaby” o lahilahy naho ampela tsy mivalike rehoe.​—Apokalypsy 5:9.

• Mahatakatse soa ty raha mahazo o ndatio ty Jesosy naho i hiara-manjaka ama’e rey. Mampahery azo vao zay? Ino ty anto’e?

7. Soa ty lalàna i Fanjakàn’Andrianagnaharey

Magnomey lalàna eretserete iareo hahasoa naho hiarovagne ty vahoa’e o mpitondrao. Magnomey lalàna tsy maintsy orihe ty vahoa’e ka ty Fanjakàn’Andrianagnahare. Vakio ty 1 Korintianina 6:9-11, sady iharò midineke ty fagnonteneagne retoa:

• Hanao akore ty fiaignantika naho sambe magnorike ty lalàn’Andrianagnahare miomba ty findesam-batagne o ndatio iaby?a

• Rare’e vao naho mandily ty vahoa i Fanjakà’ey mba hagnorike o lalàna rehoe ty Jehovah? Ino ty anto’e?

• Ino ty mampiseho fa afake miova ze ndaty mbe tsy magnorike o lalàna rehoe? ​—Henteo ty andine’e 11.

FAMINTIGNAGNE

Fitondram-panjakagne tena misy an-dagnitse agne o Fanjakàn’Andrianagnahare zao, sady hinday ty tane toy iaby.

Fameregnagne

• Ia iaby ty hiarake manjaka amy i Fanjakàn’Andrianagnaharey ao?

• Nagnino ty Fanjakàn’Andrianagnahare ro soa ambone o fitondran’olombelogneo?

• Ino iaby ty také i Jehovah amy ty vahoa i Fanjakà’ey?

FAGNAZAVAGNE FAGNAMPE’E

Naho henteagne ty raha nampianare i Jesosy, aia ty misy i Fanjakàn’Andrianagnaharey?

“Am-po’o ao Avao vao o Fanjakàn’Andrianagnahare Zao?” (Lahatsoratse amy jw.org ao.)

Nagnino ro tena lahibey amo o Vavolombelo i Jehovah-o ty tsy fivalihagne amy i Fanjakàn’Andrianagnaharey?

Tsy Nivalike Tamy ty Fanjakàn’Andrianagnahare (1:43)

Ino ty raha rehafe ty Baiboly miomba i ndaty 144 000 finily i Jehovah hiarake manjaka amy i Jesosy rey?

“Ia ty Mandeha An-dagnitse Agne?” (Lahatsoratse amy jw.org ao.)

Nagnino ty ampela raike nigadra toy ro nirese lahatse fa Andrianagnahare raike avao ro mahavita mamaha ty olagne amy ty tontolo toy eto?

“Nanjare Nifantako ty Anto’e Mampisy o Tsy Rare’eo” (Mifohaza! Novambra 2011)