LESOGNE 54
Ia i “Mpanompo Mahihitse Naho Mahimbagney” Sady Ino ty Atao’e?
I Jesosy ty Loha o fiangonagne Kristianao. (Efesianina 5:23) Mpanjaka an-dagnitse agne ty Jesosy tie amy izao faie mitarike ze mpanonjohy ty lia’e. I “mpanompo mahihitse naho mahimbagney” ty ampiasae’e amy izay. (Vakio ty Matio 24:45.) Managne fahefagne handrambe fanapahan-kevetse ila’e i “mpanompoy” satria i Jesosy ty nanendre aze. Faie tsy maintsy mankatò i Kristy lognandro i mpanompoy sady manompo o rahalahy i Kristy reo. Ia areke i mpanompoy? Sady ino ty atao o mpanompo iohoe mba hikarakaragne antikagne?
1. Ia i “Mpanompo Mahihitse Naho Mahimbagney”?
Fa ela ty Jehovah ro nampiasa lahilahy raike ndra lahilahy tsiampeampe mba hagnomeagne tari-dalagne ty vahoa’e. (Malakia 2:7; Hebreo 1:1) Tafara ty nimateza i Jesosy, le i apostoly rey naho ze androanavi-pagnahy ta Jerosalema ao ty nitarike ty vahoa’e. (Asan’ny Apostoly 15:2) Mitovy amy izay ka ty amy izao. Androanavi-pagnahy tsiampeampe atao tihoe Filan-keve-pitantana ty Vavolombelo i Jehovah ty magnomey hanegne ara-pagnahy ty vahoa’e naho mitarike i asa fitoriagney. Iareo ro atao tihoe “mpanompo mahihitse naho mahimbagne tinendre [i Jesosy].” (Matio 24:45a) Kristiana voahosotse iaby ty agnisa ty Filan-keve-pitantanagne sady mitamà hiarake manjaka amy i Kristy an-dagnitse agne iareo naho fa mifaragne ty fiaigna’e an-tane etoy.
2. Manao akore ty hanegne ara-pagnahy mey i mpanompo mahihitsey?
Nirehake ty Jesosy fa “hagnomey hanegne iareo [o Kristiana mpanonjohy ty lia’eo] amy ty fotoagne mete” i mpanompo mahihitsey. (Matio 24:45b) Magnomey hery naho mahavy antikagne ho salama ohatse, o hanegne hanentikagneo. Hoe izay ka o hanegne ara-pagnahio, ndra ty tari-dalagne boake amy ty Saontsin’Andrianagnahare. Magnomey hery antikagne mba hahavy antikagne tsy hivalike amy i Jehovah sady mba hahavitagne i asa nampanoe i Jesosy antikagney io. (1 Timoty 4:6) Maro ty fomba ahazoantikagne ze hanegne ara-pagnahy zay. Agnisa izay ty fivoriagne, havoriambey faritse, havoriambey vondrom-paritse, boke naho gazete vaho video. Magnampe antikagne hahafantatse soa ty zoton’arofon’Andrianagnahare naho hinamagne ama’e lognandro o raha rehoe.
ANDAO HANDINEKE TY PITSOPITSO’E
Hodinehentikagne ato tie, nagnino tikagne ro mipay i “mpanompo mahihitse naho mahimbagney” ndra ty Filan-keve-pitantanagne.
Magnomey hanegne ara-pagnahy naho tari-dalagne vaho fagnampeagne hoahy ty Vavolombelo i Jehovah magneran-tane ty Filan-keve-pitantanagne
3. Toko’e hilamigne soa ty vahoa i Jehovah
Mandamigne ty asa ty Vavolombelo i Jehovah ty Filan-keve-pitantanagne sady ty tari-dala i Jesosy ty orihe’e. Fa nisy hoe izay ka tamy ty andro o Kristiana voaloha’eo. Alefaso i VIDEO oy.
Vakio ty 1 Korintianina 14:33, 40, sady iharò midineke ty fagnonteneagne toy:
Arake o andine’e reo, inogne ty mampiseho fa tea i Jehovah ho voalamigne soa ty Vavolombelo’e?
4. Mandamigne i asa fitoriagney i mpanompo mahihitsey
O fitoriagneo ty asa tena lahibey nanoe o Kristiana voaloha’eo. Vakio ty Asan’ny Apostoly 8:14, 25, sady iharò midineke ty fagnonteneagne retoa:
Ia ty nandamigne i asa fitoriagney tamy ty andro o Kristiana voaloha’eo?
Akore ty natao i Petera naho i Jaona naho fa nagnomey toromareke iareo i apostoly nama’e rey?
Ty asa fitoriagne ro asa fara’e lahibey alamy ty Filan-keve-pitantanagne. Alefaso i VIDEO oy.
Nambaha i Jesosy fa tena lahibey i asa fitoriagney. Vakio ty Marka 13:10, sady iharò midineke ty fagnonteneagne retoa:
Nagnino ro lahibey amy ty Filan-keve-pitantanagne o asa fitoriagneo?
Nagnino tikagne ro mila i “mpanompo mahihitse naho mahimbagney” mba handamigne o asa fitoriagne atao magneran-tane iohoe?
5. Magnomey tari-dalagne i mpanompo mahihitsey
Magnomey tari-dalagne hoahy ty Kristiana magneran-tane ty Filan-keve-pitantanagne. Akore ty atao’e naho fa manapa-kevetse tie ino ty tari-dalagne toko’e homeigne? Andao hohenteantikagne tie ino ty natao ty filan-keve-pitantanagne tamy ty andro ty Kristiana voaloha’e. Vakio ty Asan’ny Apostoly 15:1, 2, sady iharò midineke ty fagnonteneagne retoa:
Ino ty raha nampifandietse ty Kristiana ila’e tamy ty taonjato voaloha’e?
Nipay tari-dalagne tamy ia ty Paoly naho i Barnabasy vaho ty ndaty hafa mba handaminagne i olagney?
Vakio ty Asan’ny Apostoly 15:12-18, 23-29, sady iharò midineke ty fagnonteneagne toy:
Aloha ty nandrambesa iareo fanapahan-kevetse, ino ty natao ty filan-keve-pitantanagne mba hahafantara’e ty tari-dalan’Andrianagnahare miomba i rahay?—Henteo ty andine’e 12, 15, naho 28.
Vakio ty Asan’ny Apostoly 15:30, 31 naho ty 16:4, 5, sady iharò midineke ty fagnonteneagne retoa:
Akore ty natao o Kristiana tamy ty taonjato voaloha’eo naho fa nahazo tari-dalagne boake amy ty filan-keve-pitantanagne iareo?
Ino ty fitahiagne nimey i Jehovah noho iareo nankatò?
Vakio ty 2 Timoty 3:16 naho ty Jakoba 1:5, sady iharò midineke ty fagnonteneagne toy:
Naho fa hanapa-kevetse ty Filan-keve-pitantanagne amy izao, aia ty ipaliava’e tari-dalagne?
MISY TY MIREHAKE FA: “Magnorike ndaty avao rehe naho magnorike ty raha rehafe ty Filan-keve-pitantanagne.”
Mino vao rehe fa i Jesosy ty mitarike ty Filan-keve-pitantanagne? Inogne ty anto’e?
FAMINTIGNAGNE
I “mpanompo mahihitse naho mahimbagne” tinendre i Kristỳ ty atao tihoe Filan-keve-pitantanagne. Magnomey tari-dalagne naho hanegne ara-pagnahy hoahy ty Kristiana magneran-tane io.
Fameregnagne
Ia ty nanendre i “mpanompo mahihitse naho mahimbagney”?
Ino ty atao ty Filan-keve-pitantanagne mba hikarakaragne antikagne?
Mino vao rehe fa ty Filan-keve-pitantanagne i “mpanompo mahihitse naho mahimbagney”?
FAGNAZAVAGNE FAGNAMPE’E
Henteo ato ty fomba andamina ty Filan-keve-pitantanagne ty asa atao’e.
“Ino ty Atao Tihoe Filan-keve-pitantana ty Vavolombelo i Jehovah?” (Lahatsoratse amy jw.org ao)
Akore ty atao ty Filan-keve-pitantanagne mba hahazo hanegne ara-pagnahy azo antoke soa tikagne?
Akore ty fihevera o ndaty agnisa ty Filan-keve-pitantanagne reo i asa nankine i Jesosy tamy iareoy?
Nagnino o fivoriagneo naho o havoriambeio ro magnaporofo fa i Jehovah ro mitarike ty Filan-keve-pitantanagne?