LESOGNE 56
Mikezaha Hampisy Firaisan-tsaigne amo o Fiangonagneo Eo
Mahatsapa ty reha i Davida Mpanjaka toy tikagne naho fa miarake amo o mpiara-manompò: “Fanjaka sady mahafinaritse naho fa ty mpirahalahy ro miara-monegne amim-piraisan-tsaigne!” (Salamo 133:1) Tsy mandeha hoaze ty firaisan-tsaigne misy amantikagne eo, fa mila mikezake tikagne tsikiraidraike mba hampisy izay.
1. Ino ty raha mampiambake ty vahoan’Andrianagnahare?
Naho fa magnatreke fivoriagne amy ty tane hafa agne rehe, le va’e tsy ho azo’o ty reha iareo. Faie hahatsapa manahake ty tamy ty nisy azo taloha agne avao rehe naho fa agne. Ino ty anto’e? Satria mitovy avao ty boke naho ty gazete ampiasaentikagne mba hianaragne Baiboly. Itikagne ka mikezake mba hifankatea. Ndra aia ndra aia ty tane misy antikagne, le sambe ‘mitoka ty tahina i Jehovah tikagne sady manompo aze amim-piraisan-tsaigne.’—Zefania 3:9.
2. Ino ty azo’o atao mba hampisy firaisan-tsaigne?
‘Mifankateava amy ty fo’ nareo tsikiraidraike. (1 Petera 1:22) Akore ty hagnorihagne izay? Ko mifantoke amy ty toetse raty ty hafa, fa henteo tie ino ty toetse soa’e. Mikezaha hinamagne amy ty rahalahy naho ty rahavave sambe hafa fa tsy amy ze ndaty mitovy raha teagne ama’o avao. Ankoatse izay, le mikezaha mafe mba tsy hagnavakavake ndra tie am-po’o ao avao aza.—Vakio ty 1 Petera 2:17.a
3. Ino ty toko’e hatao’o naho managne olagne amo o mpiara-manompò rehe?
Miray saigne tikagne faie sambe tsy voririke iaby avao ka. Va’e hisy fotoagne tikagne hanao raha mandiso fanantenagne ty hafa ndra mampalahelo ty hafa. Iareo ka va’e hanao izay amantikagne. Izay ty mahavy ty Saontsin’Andrianagnahare manoro hevetse antikagne tihoe, “mahaia mifamela heloke tanterake.” Naho tihoe, “namela tanterake ty helo’areo ty Jehovah, le mba mifamelà heloke ka nareo.” (Vakio ty Kolosianina 3:13.) Isan’andro tikagne manao raha mampalahelo i Jehovah faie mamela antikagne reke. Tea’e ka tikagne naho mamela o rahalahintikagneo naho o rahavaventikagneo. Naho tsapa’o tie nanao raha nampalahelo ty hafa rehe, le avy le manoa raha mba handaminagne i olagney.—Vakio ty Matio 5:23, 24.b
ANDAO HANDINEKE TY PITSOPITSO’E
Hodinehentikagne ato ty raha azo’o atao mba hampisy firaisan-tsaigne naho hampisy filongoagne amo o fiangonagneo eo.
Ino ty toko’e hatao’o mba hahavy azo hilongo soa amy ty hafa?
4. Ko magnavakavake
Toko’e ho teantikagne iaby o mpiara-manompò. Faie va’e ho sarotse amantikagne ty minamagne amy ty ndaty tsy mitovy amantikagne. Inogne areke ty hagnampe antikagne? Vakio ty Asan’ny Apostoly 10:34, 35, sady iharò midineke ty fagnonteneagne retoa:
Eké i Jehovah ho Vavolombelo’e ze kila ndaty. Mba hahavy azo hanahake i Jehovah, le akore ty toko’e hihevera’o ty ndaty tsy mitovy ama’o?
Inogne iaby ty raha atao ty ndaty ama’areo ey mampiseho tie magnavakavake iareo? Nagnino rehe ro tsy toko’e hanao izay?
Vakio ty 2 Korintianina 6:11-13, sady iharò midineke ty fagnonteneagne toy:
Ino ty azo’o atao mba hahavy azo hifandrambe marine amy ze mpiara-manompo tsy mitovy fiaviagne ama’o?
5. Mikezaha hamela heloke naho hilongo amy ty hafa
Mamela heloke antikagne ty Jehovah ndra tie tsy ombia hangata-pamelagne amantikagne aza reke. Vakio ty Salamo 86:5, sady iharò midineke ty fagnonteneagne retoa:
Ino ty ianarantikagne miomba i Jehovah naho henteagne o andinin-teny iohoe?
Mahafale azo vao ty mahafantatse tie mamela heloke ty Jehovah? Ino ty anto’e?
Naho fa manao akore ro sarotse ama’o ty milongo amy ty hafa?
Hilongo amo o rahalahintikagneo naho o rahavaventikagneo tika naho manahake i Jehovah. Akore ty ampisehoantikagne izay? Vakio ty Ohabolana 19:11, sady iharò midineke ty fagnonteneagne toy:
Ino ty toko’e hatao’o naho misy ndaty manao raha mandagìgne azo ndra mahaboseke azo, mba hampilamigne anareo?
A naho ohatse itikagne ro manao raha mahaboseke ty hafa, ino ty toko’e hataontikagne? Alefaso i VIDEO oy, sady iharò midineke ty fagnonteneagne toy.
Arake i video teoy, ino ty natao i rahavavey mba hahavy aze hilongo indraike amy i rahavave nanagne olagne ama’ey?
6. Mifantoha amy ty toetse soa o rahalahio naho o rahavaveo
Naho fa mifagnosehose amo o mpiara-manompò tikagne, le tsy ty toetse soa’e avao ty treantikagne fa ty toetse rati’e ka. Ino areke ty hagnampe antikagne mba hifantoke amy ty toetse soa’e? Alefaso i VIDEO oy, sady iharò midineke ty fagnonteneagne toy.
Ino ty hagnampe antikagne hifantoke amy ty toetse soa o rahalahio naho o rahavaveo?
Mifantoke amy ty toetse soantikagne ty Jehovah. Vakio ty 2 Tantara 16:9a, sady iharò midineke ty fagnonteneagne toy:
Mahavy azo hanao akore ty fahafantara’o tie, mifantoke amy ty toetse soa’o ty Jehovah?
Ndra tie misy raha tsy mete kedekede aza o diamà-ao le mbe sarobily avao. Mbe sarobily amy i Jehovah avao ka o rahalahio naho o rahavaveo ndra tie tsy voririke aza
MISY TY MIREHAKE TIE: “I raho aloha tsy hamela aze naho tsy mifogne amako hey reke!”
Nagnino tikagne ro toko’e hamela heloke ty hafa avao?
FAMINTIGNAGNE
Hampiharo saigne i fiangonagney rehe naho mamela heloke sady tea o rahalahio naho o rahavaveo.
Fameregnagne
Ino ty hagnampe azo tsy hagnavakavake?
Ino ty toko’e hatao’o naho misy mpiara-manompo tsy mifagnarake ama’o?
Te hamela heloke manahake i Jehovah ka vao rehe? Ino ty anto’e?
FAGNAZAVAGNE FAGNAMPE’E
Hagnampe antikagne tsy hitsaratsara ty hafa ty raike amy i fagnoharagne natao i Jesosỳ.
Toko’e hiala tsiny amy ty hafa vao tikagne ndra tie tsy itikagne aza ro nanao diso?
“Mampisy Filongoagne ty Fialan-tsiny” (Fitalakesan-davitse 1 Novambra 2002)
Henteo ato tie ino ty nagnampe ty ndaty ila’e hahavita tsy hagnavakavake.
Naho tsy mifagnarake amy ty mpiara-manompo tikagne, le ino ty toko’e hataontikagne, amy izay tsy hanimba ty firaisan-tsay o fiangonagneo?
“Mikezaha Haneho Hatea Naho fa Mandamigne Tsy Fifagnarahagne” (Fitalakesan-davitse Mey 2016)
a Trea amy ty Fagnazavagne 6 ao fa tea o Kristiana namantikagneo tikagne naho mitao mba tsy hamindra aretegne amy iareo naho ohatse tika voa ty aretegne mifindra.
b Trea amy ty Fagnazavagne 7 ao ty fomba handaminagne ty olagne miomba ty fifagnarahagne ara-barotse naho ty raha toko’e handesegne amo o fitsaràgneo ey.