Nagnino o Fijaleagneo Engàn’Andrianagnahare Hisio?

INOGNE TY TSAPAN’ANDRIANAGNAHARE NAHO FA MAHAVAZOHO ANTIKAGNE MIJALE?

Nirina: Akore Bodo? Tsy magnahy avao vao rehe? Fale raho fa mifankatrea ama’o indraike.

Bodo: Tsy magnahy avao. Izaho ka fale mahatrea azo.

Nirina: Nirehafentikagne tamy i fara’ey tie mahavazoho ty fijaleantikagne ty Andrianagnahare.a Nirehake rehe tamy izay tie tena nampivali-doha azo zay, lohotsie tamy i rene’o niaksida tamy ty tobiley.

Bodo: Miovaova ty fahasalama’e. Fa androany reke mba metemete.

Nirina: Soa zay. Mila mialy mafe rehe amy ty raha hoe izao mba tsy ho kivy.

Bodo: Ie, kindraike raho le mieretseretse tie: ‘Hatrake ombia reke ro tsy maintsy hijale hoe izao?’

Nirina: Rare’e aloha naho mieretseretse hoe izay rehe. Taloha ty nifaragna i debantikagney, le nagnontane raho tie, naho toe managne hery hagnafoagnagne o fijaleagneo ty Andrianagnahare, nagnino reke ro mbe tsy manao izay avao. Ke tadidi’o igne ao?

Bodo: Ie, tadidiko.

Nirina: Fa aloha ty hamaleantikagne izay, le andao hiheregnantikagne heike i hevetse nirehafentikagne tamy i fara’eỳ.

Bodo: Ndao!

Nirina: Nirehafentikagne tamy izay fa ndra o ndaty nanam-pinoagne talohao aza, mba fa nagnontane tie nagnino ty Andrianagnahare ro magnenga o ndatio hijale. Faie tsy nivignetse tama’e ty Andrianagnahare ndra nisaontsy tie tsy ampe finoagne reke.

Bodo: Vaovao tamako i hevetse igne.

Nirina: Nitreantikagne ka fa tsy tea i Jehovah Andrianagnahare ty mahavazoho antikagne mijale. Rehafe ty Baiboly ohatse fa “ore reke”, naho fa nijale o vahoa’eo.b Tsy mampahery vao ty mahafantatse tie malahelo ty Andrianagnahare mahavazoho antikagne mijale?

Bodo: Ie mampahery!

Nirina: Nagneke ka tikagne tie afake magnafoagne o fijaleagneo i Mpamorogney ndra ombia ndra ombia satria managne hery fara’e lahibey.

Bodo: Izay nio tsy azoko! Nagnino reke ro mbe magnenga o ndatio hijale, ie amy izao reke managne hery hagnafoagnagne o fijaleagneo?

IA TY NIREHAKE TY MAREGNE?

Nirina: Andao tikagne hagnente ty boke Genesisy mba hamaleagne i fagnontenea’oy. Va’e hai’o ty tantara i Adama naho i Eva vaho i hatae rinaray.

Bodo: Fa nianarako tamy ty sekoly lahady zay. Fa rinaran’Andrianagnahare iareo mba tsy hihinagne tamy ty voan-katae raike, faie mbe nihane iareo avao i rahay.

Nirina: Ie. Andao hohenteantikagne heike ty raha niseho taloha izay. Misy ifandrambesa’e amy ty anto’e mahavy antikagne hijale zay. Afake vakie’o vao ty Genesisy 3:1-5?

Bodo: Eka. “O menaragneo ty tena fetse amy ze kila biby namboaren’Andrianagnahare. Le hoe reke tamy i ampelay: ‘Tena nisaontsy tama’areo vata’e vao ty Andrianagnahare tie tsy azo’areo hanegne iaby ze voan-katae amy ty zaridaigne toy ato?’ Le hoe i ampelay tamy i menaragney: ‘Mahazo mihinagne amy ty voan-katae amy ty zaridaigne toy ato zahay! Faie fa nisaontsy miomba i voan-katae agnivo i zaridaigney eo ty Andrianagnahare tie: ‘Ko mihinagne io nareo, sady ko mikitikitike io, fa naho tsy izay le ho mate nareo.’ Le hoe i menaragney tamy i ampelay: ‘Tsy ho mate zao nareo! Fa fantan’Andrianagnahare fa amy ty andro ihinana’areo o voan-katae iohoe, le hibeake ty maso’areo, sady hanahake an’Andrianagnahare nareo, le hahafantatse ty soa naho ty raty.’”

Nirina: Misaotse azo. Hodinehentikagne kede o adinin-teny iohoe. Nirehafe i andine’e teoy tie nisy menaragne nirehake tamy i Eva. Rehafe ty andine’e hafa amy Baiboly ao fa i Satana Devoly o nirehake tamy i Evao, faie nampiasa menaragne reke tamy io.c Nagnontenea i Satana i Eva tie ino ty lilin’Andrianagnahare miomba i hatae raikey. Tsikari’o vao tie inogne ty saontsien’Andrianagnahare fa hanjò i Adama naho i Eva naho homagne ama’e iareo?

Bodo: Ho mate iareo.

Nirina: Izay. Trea tamy ty reha i Satana tafara izay fa nanao kitomboke an’Andrianagnahare reke. Henteo moa ty raha nirehafe’e: “Tsy ho mate zao nareo!” Hoe te hirehake ty Satana tie mpavande ty Andrianagnahare.

Bodo: Mbe tsy naharey izay indraike raho.

Nirina: Tsy ho voavaha tsielatsiela ze olagne zay, fa mitake fotoagne. Hai’o vao tie ino ty anto’e?

Bodo: Tsy haiko.

Nirina: Andao hangalake ohatse kede. Akore naho mirehake ama’o raho tie iraho ty matanjake noho irehe? Akore ty hagnaporofoa’o fa tsy maregne zay?

Bodo: Asiagne fagnandramagne.

Nirina: Ie. Va’e hangalake raha mavesatse tikagne, le henteagne tie ia amantikagne ty mahajiny aze. Tsy sarotse ty magnaporofo tie ia ty tena matanjake.

Bodo: Ie!

Nirina: Faie akore naho mirehake raho tie mpamitake rehe? Naho ty heve’o, tsy sarotse vao ty magnaporofo naho maregne i rehakoy ndra tsy maregne?

Bodo: Ie, sarotse!

Nirina: Tsy ho vita ty fagnandramagne avao zay.

Bodo: Ie.

Nirina: Tsy ho voaporofo zay naho tsy engagne handeha heike i fotoagney, le o ndatio ro engagne hagnaporofo naho mpamitake vata’e rehe ndra tsy mpamitake.

Bodo: Maregne zay!

Nirina: Andao areke hiheregnantikagne indraike i tantara amy Genesisy teoy. Nirehake vao ty Satana tie mahery noho i Andrianagnahare reke?

Bodo: Ay!

Nirina: Tsy ho sarotse taman’Andrianagnahare ty nagnaporofo tie diso ty Satana naho izay. Nirehake ty Satana tie nao mavande ty Andrianagnahare. Izao ty tea’e ho rehafegne tamy i Eva: ‘Navande tama’areo ty Andrianagnahare, fa ty rehako ro maregne.’

Bodo: Mahaliagne ze hevetse zay.

Nirina: Trea tie tena hendre ty Andrianagnahare, le aleo nenga’e handeha heike ty fotoagne. Izay ty fomba tena soa hamahagne o olagne iohoe. Hazava avao naho fa mandeha ty fotoagne tie ia ty maregne le ia ty diso.

OLAGNE LAHIBEY

Bodo: A tsy nitrea vao fa i Andrianagnahare ty maregne naho fa nimate ty Eva?

Nirina: Ie. Faie tsy izay avao ty olagne nirehafe i Satana. Henteo indraike moa ty andine’e faha-5. Ino ty reha i Satana tamy i Eva?

Bodo: Nirehake reke tie hibeake zao ty maso’e naho homagne amy voan-kataey reke.

Nirina: Ie, le “hanahake an’Andrianagnahare” zao ka reke, sady “hahafantatse ty soa naho ty raty.” Te hirehake ty Satana eo tie misy raha soa tsy tean’Andrianagnahare ho azo o ndatio.

Bodo: Kay vao.

Nirina: Mbe olagne lahibey avao ka zay.

Bodo: Inogne ty anto’e?

Nirina: Satria te hirehake ty Satana tie ho soa ty fiaigna i Eva, ndra ty ho fiaigna o ndatio iaby naho tsy Andrianagnahare ty mitondra iareo. Nivazoho i Jehovah ka tie soa naho engagne hagnaporofo heike ty Satana naho maregne ndra diso i reha’ey. Naho izay areke, le nenga’e hitondra ty tontolo toy heike ty Satana. Izay mahavy antikagne mijaleo tie amy izao satria i Satana ty mitondra ty tontolo toy, fa tsy Andrianagnahare.d Faie misy talily soa.

Bodo: Tie akore?

Nirina: Mampianatse ty hamarenagne roe toy ty Baiboly. Voaloha’e, mikarakara antikagne ty Jehovah naho fa mijale tikagne. Henteo ohatse ty reha i Davida Mpanjaka amy Salamo 31:7 ao. Tamy tie ireke mbe nivelogne le tena nijale. Faie mareho ty reha’e tamy ireke nivavake taman’Andrianagnahare toy. Azo’o vakiegne vao o andine’e iohoe ajafady?

Bodo: Eka. Hoe reke: “Tena ho fale raho noho irehe bey hatea naho tsy mivalike, satria vazoho’o ty fijaleako. Fanta’o ty fijaleagne mafe manjò ahy.”

Nirina: Ndra tie nijale aza ty Davida, le nampahery aze ty nahafantatse tie mahavazoho ty raha manjò aze ty Jehovah. Mampahery azo vao ty mahafantatse tie mahafantatse ze kila raha ty Jehovah, ndra o fijaleagne tsy taka o ndaty hafao aza?

Bodo: Ie, mampahery.

Nirina: Ty faharoe le tihoe: Tsy hengan’Andrianagnahare hitohy nainai’e o fijaleagneo. Rehafe ty Baiboly fa tsy ho ela, le ho foagnan’Andrianagnahare ty fitondra i Satana. Hafaha’e o raha ratio, agnisa izay o raha nampijale azo naho i rene’ò. Naho tea’o, le afake miheregne raho amo o heregnandrò, le ho henteantikagne tie nagnino tikagne ro afake matoky fa tsy ho ela, le hofoagnagne o fijaleagneo iaby.e

Bodo: Mete zay.