Nagnino ty Jesosy ro Nitory Miomba ty Fanjakàn’Andrianagnahare?

Nitreantika tamy i lahatsoratse taloha itoỳ fa ty “nitory naho nagnambara ty talily soa i Fanjakàn’Andrianagnaharey” ty raha tena natao i Jesosy. (Lioka 8:1) Nahavita nandeha tomboke an-jato’e kilometatse nagneragne Israely aza reke mba hitoriagne ty miomba io. Trea amy i Filazantsara efatse rey ao ty raha natao’e naho ty raha nirehafe’e tamy izay. Voatognogne in-jato mahery ao i Fanjakagney, sady ty reha i Jesosy ro ahitagne ty ankamaroa’e. Azo antoke fa vaho sombitsombi’e amy ty raha nirehafe’e miomba i Fanjakàn’Andrianagnaharey avao rey.​—Jaona 21:25.

Fa nagnino ro tena lahibey tamy i Jesosy o Fanjakagne iohoe, tamy ireke tan-tane etoay? Satria ireke ty jinobon’Andrianagnahare ho Mpanjaka’e. (Isaia 9:6; Lioka 22:28-30) Faie tsy ty hahazo fahefagne naho voninahitse vaho tombotsoa ro nifantoha i Jesosy. (Matio 11:29; Marka 10:17, 18) Raha lahibey tama’e i Fanjakàn’Andrianagnahareya satria hai’e fa misy raha hanoe io ho an-dRae’e an-dagnitse agney naho hoahy ze ndaty tsy mivalike ama’e.

INOGNE TY HATAO I FANJAKAGNEY HOAHY I RAE I JESOSỲ?

Le vata’e teà i Jesosy i Rae’e an-dagnitse agney. (Ohabolana 8:30; Jaona 14:31) Mahafinaritse aze ty toetsen-dRae’e. Agnisa izay ty toetse’e retoa: Bey hatea, mitretré sady manao ty rare’e. (Deoteronomia 32:4; Isaia 49:15; 1 Jaona 4:8) Tena heje’e areke naho fa atao kitomboke ty Rae’e. Misy ndaty ohatse mirehake tie tsy darean’Andrianagnahare ze ndaty mijale, sady tea’e hijale tikagne. Hay i Jesosy tie tsy maregne zay, le izay ty agnisa ty nahavy aze nazoto nitory ty “talily soa i Fanjakagney.” (Matio 4:23; 6:9, 10) Hai’e tie hatao o Fanjakagne iohoe ze tsy hagnaratiratiagne an-dRae’e sasa. Akore ty hanoa o Fanjakagne iohoe izay?

Hagnova tanterake ty fiaigna o ndatio amy ty alala i Fanjakagney ty Jehovah. ‘Hofafa’e ty ranomaso’ ze ndaty tsy mivalike ama’e. Hofoagna’e ka ze raha mahavy izay. Tsy hisy sasa ohatse ‘o fateo, sady tsy hisy sasa ka ty alahelo naho ty fitaraignagne vaho ty fanaintaignagne.’ (Apokalypsy 21:3, 4) Ze kila raha mampijale o ndatio le hafahan’Agnahare iaby.b

Tsy mahalatsa areke naho nazoto nitory miomba i Fanjakagney ty Jesosy. Hai’e fa hatao o Fanjakagne iohoe ze hahatreava o ndatio tie mahery naho mitretré ty Rae’e. (Jakoba 5:11) Faie tsy izay avao. Hanao raha fanjaka hoahy ze ndaty tsy mivalike aman’Andrianagnahare ka i Fanjakagney.

INOGNE TY HATAO I FANJAKAGNEY HOAHY O NDATIO?

Niara-nipetrake tamy i Baba’e tan-dagnitse agne ty Jesosy, ela bey taloha ty nihova’e an-tane etoy. Nampiasa aze ty Baba’e naho fa namorogne ze kila raha, agnisa izay i lagnitse mahaveregney, o kintagne naho o vahindagnitse tsy hay isahegneo, ty tane soasoa toy, o ndatio, naho ty raha managne aigne hafa. (Kolosianina 1:15, 16) Faie o ndatio ro ‘tena tea’ i Jesosy amy iareo iaby reo.​—Ohabolana 8:31.

Trea amy ty raha nirehafe’e naho natao’e tan-tane etoy zay. Naho vaho nanomboke nitory reke, le fa natao’e mazava soa fa “hirehake vaovao fanjaka” amy ze ndaty mijale ty niavia’e. (Lioka 4:18) Faie tsy tihoe nirehake avao ty Jesosy tie hagnampe o ndatio. Mateteke reke ro nampiseho tie tea ndaty. Nisy vahoake maro nivorivory hitsanogne aze ohatse tie indraike. “Niferenaigne iareo reke, le nagnasitragne ze narare.” (Matio 14:14) Nisy lahilahy raike narare mafe ka nirehake tie nino aze fa hahavita hagnasitragne aze ty Jesosy naho te hanao izay. Tea i Jesosy i lahilahỳ, le nisitragne’e. Nitretré aze reke, le nirehake tihoe: “Teako zay. Maliova rehe.” (Lioka 5:12, 13) Naho fa nimate ka ty Lazarosy rahalahy i Maria, le tena “nalahelo mafe” ty Jesosy nahatrea i Maria nitagny. “Nalahelo mafe reke” le ‘nipoke ty ranomaso’e.’ (Jaona 11:32-36) Tsy nampino ty raha natao’e naho fa niavy eo. Nivelome’e tamy ty mate ty Lazarosy, ndra tie fa nimate efatse andro aza!​—Jaona 11:38-44.

Faie nandriogne avao ty raha natao i Jesosy tamy izay. Fanta’e fa mbe harare avao i ndaty nisitragne’e rey, sady mbe ho mate avao ze nivelome’e tamy ty mate. Faie fanta’e fa ty Fanjakàn’Andrianagnahare ro hagnafoagne o olagne rehoe iaby. Izay ty nahavy aze hazoto hitory “ty talily soa i fanjakagney”, fa tsy nionogne avao tamy ty fanoagne fahagagagne. (Matio 9:35) Ndra tie teo zay, le niporofoe’e tamy ty fahagagagne natao’e fa hanao raha fanjaka magneran-tane i Fanjakàn’Andrianagnaharey. Tsy ho ela le hanao izay o Fanjakagne iohoe. Ndra aleo hohenteantikagne ty raha rehafe ty Baiboly.

• 

  Tsy hisy aretegne sasa.

  “Amy ze andro zay avao ka le hahay hitsambokogne manahake o serfao ty kepeke, hirehake mafe haneho ty hafalea’e ty lela o moagneo.” Ankoatse izay le, “tsy hisy sasa ty ndaty hanao tihoe tie: ‘Marare raho.’”​—Isaia 33:24; 35:5, 6.

• 

  Tsy hisy ho mate sasa.

  “Ze ndaty maregne ro handova ty tane toy, sady ho velogne nainai’e etoy.”​—Salamo 37:29.

  “Hofoagna’e tsy hisy nainai’e o fateo. Hofafa i Jehovah Tompo Fara Tampo’e ka ty ranomaso amy ty tarehe iaby.”​—Isaia 25:8.

• Hovelogne o mateo.

  ‘Haharey ty feo’e ze an-kibory agne, le hiakatse.’​—Jaona 5:28, 29.

  “Hisy famelomagne” ty mate.​—Asan’ny Apostoly 24:15.

• 

  Hanagne tragno naho asa iaby o ndatio.

  “Hamboatse tragno o ndatio, le hitoboke ao sady hanao teteke famboleagne voaloboke le hihinagne ze voka’e. Tsy hamboatse tragno hitoboha o ndaty hafa reke ndra hambole raha hohane o ndaty hafa. ... sady hagnaram-pò amy ty asan-tagna’e o ndaty jinobokò.”​—Isaia 65:21, 22.

• 

  Tsy hisy aly.

  “Atao’e tsy misy aly sasa ty magneran-tane.”​—Salamo 46:9.

  “Tsy hifamono amy ty mesa sasa i firenena rey, sady tsy hianatse aly sasa.”​—Isaia 2:4.

• 

  Tsy hisy ho keré sasa.

  “Hahavokatse maro ty tane toy. Hitahy antikagne ty Andrianagnahare, ie, i Andrianagnaharentikagney.”​—Salamo 67:6.

  “Hahavokatse ty tane toy, le ho maro i vokatsey ndra ty ambone vohitse iaby.”​—Salamo 72:16.

• Tsy hisy hahantra sasa.

  “Tsy hohaligno zao o mahantrao.” ​—Salamo 9:18.

  “Hovonje’e o mahantra mitoka vonjeò, naho ty madineke naho ze tsy misy magnampe. Hiferenaigne ty ndaty ambane naho ty mahantra reke, sady hamonje ty fiay ty mahantra.”​—Salamo 72:12, 13.

Naho fa mandineke o raha fanjaka maro rehoe rehe, trea’o amy izay vao tie nagnino ro tena lahibey tamy i Jesosy i Fanjakàn’Andrianagnaharey? Nazoto nirehake o Fanjakagne iohoe tamy ze ndaty te hitsanogne aze reke. Ty anto’e, hai’e fa o Fanjakagne iohoe avao ro hamaha ze olagne iaby mampijale o ndatio.

Tea’o vao areke o fitahiagne ampitamae ty Baiboly reo? Inogne ty toko’e hatao’o naho te hahazo ireo rehe? Sady te hampitombo ty raha fanta’o miomba o Fanjakagne iohoe vao rehe? Hamale ireo ty lahatsoratse magnarake.