Vao Mainke Nanjeke ty Hatea Aliko

TY FIAIGNAKO TALOHA:

Nibey tamy ty faritse bey malaso ta Los Angeles, a Etazonia agne raho. Niparitake ka o rongonio tie tagne. Iraho ty anake faharoe ama’ay enegne.

Nenten-dreneko nivavake tamy ty Fiangonagne Ara-pilazantsara zahay. Faie narengerenge raho naho fa nibey. Nihira tamo o koraly o fiangonagneo raho isake lahady. Mamonje fete naho mifoke rongony naho mijangajanga avao raho agnate i heregnandro igne.

Mora boseke raho sady tea aly. Ze raha niazo ty tagnako, le nampiasaeko hijeragne o ndatio. Tsy mba nisy voka’e tamako ty raha nianarako tam-piangonagne agne. Izao avao ty ahy: “Ahy i Tompo ty famaleagne faie iraho ty ampiasae’e!” Liagne tamy ty fikambanagne ara-politike raike (Black Panthers) nialy hoahy ty zo o ndatio raho, taloha kede ty taogne 1970, tamy iraho mbe nianatse tamy i lisé eỳ. Nilitse tamy ty fikambanagne miaro ty zo o ndatio areke raho. Nahili’ay avao i lakilasi’aỳ isake tie nitarike goreve zahay.

Tsy nahafa-po ahy ty goreve natao’ay, le namono ndaty raho. Nisy fotoagne ohatse zahay amy namako rey nandeha nagnente sinema. Nagnente filma fampijaleagne ndevo afrikana ta Etazonia agne zahay. Niboseke zahay, le jinera’ay ze ndaty foty tamy i sinemay tao. Nandeha tamy ty tanàgne nisy ndaty foto rey tagne ka zahay, le nijera ndaty hafa tao.

Nanjare mpamono ndaty raho naho i rahalahiko rey tamy raho ni-20 taogne teo ho eo. Niheagne o polisio avao zahay. Agnisa ty malaso malaza ty zaiko raike, le nindre tamy iareo ka raho. Vao mainke nitea aly raho.

TY NAGNOVA TY BAIBOLY TY FIAIGNAKO:

Vavolombelo i Jehovah ty rae aman-drene ty namako raike. Nitaone iareo hivory tamy iareo agne raho, le nagneke. Le avy le nitreako tie hafa o Vavolombelogneo. Nanagne Baiboly iaby iareo sady nampiasa aze tamy i fivoriagney. Ndra ty tanora aza nanao anjara taloha ey. Gaga raho naho fa nahafantatse tie i Jehovah ty tahinan’Andrianagnahare sady nampiasae iareo i tahinagney. (Salamo 83:18) Sambe hafa fiaviagne ty ndaty tao, faie tsy nifamibìke iareo.

Nahafinaritse ahy ty nivory tamo o Vavolombelo i Jehovah-o agne. Faie tsy te hianatse Baiboly tamy iareo raho tamy ty voaloha’e. Nivory tagne raho tamy ty hariva raike fa i namako rey nandeha nagnente fampisehoagne. Nisy ajaja lahilahy nagnisy palitò holitse zay ty tamy i fampisehoagney tagne, le nivonoe iareo satria tsy nimete nagnomey i palitò oy. Nirehareha aza iareo tie nitantara aze tamako naho fa nihamaray igne. Ndra nihehea iareo iaby avao ka naho fa nitsaraegne iareo. Nigadra amparam-pahafate’e ty ankamaroa iareo. Soa avao raho fa tsy niarake tamy iareo. Tapa-kevetse hiova raho, le nianatse Baiboly.

Niaigne tagnate ty fagnavakavahagne raho tie taloha, le tena nigaga naho fa niarake tamo o Vavolombelogneo. Tsy maintsy nandeha tamy ty toeragne hafa agne ohatse ty Vavolombelogne foty holitse raike, le keleiagne mainte holitse ty nampikarakarae’e ty ana’e. Nalae ty keleiagne foty holitse raike hitoboke tama’e ao ka ze ajaja lahilahy raike tsy nanagne hitobohagne zay. Nieke raho fa ty Vavolombelo i Jehovah ro magnatanterake i reha i Jesosy amy Jaona 13:35 ao tihoey: “Naho mifankatea nareo, le izay ty hahafantara ze kila ndaty fa mpianako.” Tena nahatsapa ze hatea zay vata’e raho naho fa niarake tamy iareo.

Naho fa nianatse Baiboly raho, le nifantako tie mila magnova ty toe-tsaiko. Tsy maintsy miova raho mba ho tea filongoagne naho hieke fa izay ty toko’e hataoko. (Romanina 12:2) Nandroso tsikede raho, le nanjare Vavolombelo i Jehovah tamy Janvie 1974 naho fa natao badisa.

Ndra tie fa nivita badisa aza raho, le tsy maintsy nikezake mba tsy ho mora boseke. Nitory isan-tragno zahay tie indraike. Faie nisy nangalatse i radio i tobilekoỳ, le nagneagne i mpangalatsey raho. Naho fa ho nitrako reke, le natora’e i radioy. Nitantaraeko tamy i niarake nitory tamako rey zay. Nagnontane ahy ty androanavi-pagnahy raike tie: “O Stephen, ho natao’o akore reke naho nitra’o?” Nahatsapa tegna raho, le tapa-kevetse fa hikezake ho tea filongoagne avao.

Nanjare mpitory marain-tsy hariva raho tamy Oktobra 1974, le nampianatse Baiboly 100 lera isam-bolagne. Niasa an-tsitrapo tamy ty Foibey ty Vavolombelo i Jehovah ta Brooklin a New York agne raho naho fa tafara tatoy. Niheregne ta Los Angeles agne raho tamy 1978 mba hikarakara i reneko satria narare reke. Nanambaly i Aarhonda raho, roe taogne tafara izay. Tena nagnampe bey ahy tamy ty fikarakaragne i reneko amparake ty nimateza’e reke. Nagnatreke Sekoly Ara-baiboly Gileada zahay tafara tatoy. Tinendre ho misionera a Panama eto zahay sady mbe eto hatrake amy izao.

Mateteke raho ro tendreke raha va’e ho nahavy ahy ho tea aly tafara ty badisako. Tsy maintsy niala raho naho fa nisy ndaty ni-te hialy tamako ndra nipay fomba hafa handaminagne i olagney. Nidera ahy ty valiko naho ty ndaty hafa naho fa nahatrea izay. Ndra iraho aza nigaga! Faie tsy nirehareha miomba izay raho satria ty Baiboly ro tena magnova ndaty.​—Hebreo 4:12.

TY SOA NIRAMBESEKO:

Ty Baiboly ro nahavy ty fiaignako hisy dika’e sady nampianatse ahy ho tea filongoagne. Tsy mampitegne lio o ndaty sasa raho hinane zao fa magnampe iareo mba ho sitragne ara-pagnahy. Ie aza nampianareko Baiboly ty ajaja lahilahy raike nifahavaloko tamy lisé tey! Misy fotoagne zahay niharo tragno naho fa nivita badisa reke sady mbe mpiragnetse avao zahay hatrake amy izao. Ndaty 80 mahery ty nampea’ay mirovaly, le nanjare Vavolombelo i Jehovah tagnate ze fotoagne zay.

Tena mankasitrake i Jehovah raho satria manjare misy dika’e ty fiaignako, sambatse raho sady managne namagne maro mifankatea.