Miomana Manomboke amy Izao Hiatreke Fagnenjehagne

1. Nagnino tikagne ro mila miomagne hiatreke fagnenjehagne?

NIREHAKE ty Jesosy Tompontikagne, tamy i halegne taloha ty nimateza’ey, fa tsy maintsy hisy avao ty halaigne antikagne noho itikagne mifily ty hanonjohy ty lia’e. (Jaona 17:14) Nanomboke tamy izay hatrake amy izao, le nenjehe ty ndaty tsy mpanompo i Jehovah o Kristiana tsy mivalikeo. (2 Tim. 3:12) Fa ampoizentikagne fa vao mainke hanohetse antikagne o fahavalò, arakarake ty iharinea ty fara ty tontolo toy.​—Mat. 24:9.

2-3. a) Nagnino ro tena magnoho-doza o tahotseo? b) Ino ty hodinehentikagne ato?

² Ino ty azontikagne atao manomboke amy izao mba ho vognogne hiatreke fagnenjehagne? Tsy toko’e hieretseretse loatse ze kila raha hanjò antikagne tika. Va’e hinekoneko bey tikagne naho izay, le fa ho mate ty tahontikagne eo avao, ie amy izao mbe tsy misy raha miseho. (Ohab. 12:25; 17:22) O tahotseo ty ampiasae i ‘Devoly fahavalontikagne’ mba hampivalihagne antikagne, sady fialiagne tena mete soa io. (1 Pet. 5:8, 9) Ino areke ty toko’e hataontikagne manomboke amy izao mba ho vognogne soa naho fa avy i fagnenjehagney?

³ Izay ty hodinehentikagne ato. Hotreantikagne tie akore ty atao naho te hifandrambe marine amy i Jehovah, sady nagnino tikagne ro mila mikezake manao izay manomboke amy izao. Horehafentikagne ka tie ino ty hagnampe antikagne ho bey herim-po, sady ino ty azontikagne atao naho fa malaigne antikagne o ndatio.

INO TY HAGNAMPE ANTIKAGNE HIFANDRAMBE MARINE AMY I JEHOVAH?

4. Tsy maintsy rese lahatse amy ty inogne tikagne, arake ty Hebreo 13:5, 6? Ino ty anto’e?

⁴ Mikezaha ho rese lahatse tie tea azo ty Jehovah sady tsy ombia hahafoe azo. (Vakio ty Hebreo 13:5, 6.) Izao ty nirehafe ty gazete Fitalakesan-davitse, taogne maro lasa zay: “Ze mahafantatse soa an’Andrianagnahare ro tena hatoky aze naho fa misy fagnenjehagne.” Tena maregne zay! Tena tsy te hivalike vao rehe? Naho te hahavita izay rehe, le tsy maintsy tea i Jehovah naho matoky aze tanterake, sady tsy misalasala tie tea azo reke.​—Mat. 22:36-38; Jak. 5:11.

5. Ino ty hagnampe azo hahatsapa tie tea azo ty Jehovah?

⁵ Vakio isan’andro o Baibolio, sady anò tanjogne ty hifandrambe marine amy i Jehovah. (Jak. 4:8) Naho fa mamaky ty Saontsi’e rehe, le mifantoha amy ty toetse’e, ohatse bey hatea naho mamindra fo sady soa fagnahy. Dineho tie, inogne amy ty raha atao’e naho ty raha saontsie’e ro magnaporofo fa tea azo reke. (Eks. 34:6) Mbe lia’e naho nanehoagne hatea ty ndaty ila’e hatrake amy izay, le va’e ho sarotse ama’e ty hino tie tea aze ty Andrianagnahare. Hoe izay ka vao rehe? Manoa lisitse isan’andro, le sorato ao ty fomba nampisehoa i Jehovah tie namindra fo naho soa fagnahy tama’o reke. (Sal. 78:38, 39; Rom. 8:32) Azo antoke fa hahatadidy raha maro fa natao i Jehovah ho azo rehe, naho mieretseretse ty raha niaigna’o sady misaintsaigne ze raha nivakie’o tagnate ty Saontsi’e ao. Vao mainke harine aze rehe, naho fa mankasitrake ze soa natao’e tama’o.​—Sal. 116:1, 2.

6. Arake ty Salamo 94:17-19, nagnino ro tena ilaegne ty mivavake amy ty fo?

⁶ Mivavaha tsy tapake. Eretsereto tie misy ajaja lahilahy raike fihinen-drae’e, le tena tsy matahotahotse. Sahi’e tantaraegne amy i baba’e iaby ze raha nahafinaritse aze naho ze raha raty nanjò aze tamy i andro igne. Tea’o vao naho mba mifandrambe marine hoe izay nareo amy i Jehovah? Hahatsapa hoe izay rehe naho mivavake amy ty fo isan’andro. (Vakio ty Salamo 94:17-19.) “Voraho [ama’e] ty am-po’o ao le engao handeha manahake o ranò.” (Fitom. 2:19) Rehafo amy i Baba’o bey hateay ze raha mampatahotse naho mampinekoneko azo. Ino ty ho voka izay? Ho tsapa’o i raha rehafe ty Baiboly tihoey tie “ty fiadanan’Andrianagnahare ambone ze kila raha taka ty say o ndatio.” (Fil. 4:6, 7) Arakarake ty irehafa’o amy i Jehovah hoe izay ro hahavy azo harine aze.​—Rom. 8:38, 39.

7. Nagnino rehe ro toko’e ho rese lahatse tie tena ho tanterake ze raha ampitamae i Jehovah fa hatao i Fanjakà’ey?

⁷ Anò ty haharese lahatse azo tie tena fa marine ty soa ho ente i Fanjakàn’Andrianagnaharey. (Nom. 23:19) Ho mora amy i Satana naho o mpanohagne azeo ty hampatahotse azo naho tsy tena matoky izay rehe. (Ohab. 24:10; Heb. 2:15) Ino areke ty toko’e hatao’o manomboke amy izao mba hahavy azo tena hatoky i Fanjakàn’Andrianagnaharey? Manokàgna fotoagne hikarohagne tie ino ty ampitamae i Jehovah fa hatao i Fanjakà’ey, sady nagnino zay ro azo antoke fa ho tanterake. Tena hagnampe azo zay! Eretsereto ty nanjò i Stanley Jones. Ginadra fito taogne reke noho ty finoa’e.b Ino ty nagnampe aze tsy hivalike? Hoe reke: “Natanjake ty finoako satria haiko soa ty atao tihoe Fanjakàn’Andrianagnahare. Fantako soa tie ino ty hatao io, sady tena natoky raho tie ho tanterake zay. Tsy nisalasala ndra raike raho! Izay ty nahavy ahy tsy hivalike.” Naho tena matoky ty raha ampitamae i Jehovah ka rehe, le hifandrambe marine ama’e sady tsy ho rese ty tahotse.​—Ohab. 3:25, 26.

8. Akore ty ahafantaragne naho hahavita hiatreke fagnenjehagne tikagne ndra tsy hahavita? Hazavao.

⁸ Mikezaha hivory tsy tapake. Magnampe antikagne hifandrambe marine amy i Jehovah ka zay. Tena raha lahibey ama’o vao o fivoriagneo? Izay ty ahatreavagne naho hahavita hiatreke fagnenjehagne rehe ndra tsy hahavita. (Heb. 10:24, 25) Eretsereto moa! Hanao akore tikagne amy ty hoavy naho olagne tsy misy dika’e ty mikalagne antikagne tsy hivory ty amy izao? Va’e ho rarà o fanjakagneo o fivoriagneo tie amy izay. Faie naho amy izao tikagne le fa tapa-kevetse ty hivory tsy tapake, le tsy hahavita hikalagne antikagne o mpanohetseo amy ty hoavy. Tsy ndra aleo vao mikezake ho tea mivory manomboke amy izao? Amy izay, ndra tie hikalagne antikagne tsy hivory o mpanohetseo, ndra o fitondram-panjakagneo ro handrara antikagne, le ho vitantikagne avao ty hankatò an’Andrianagnahare fa tsy hagnorike reha o ndaty.​—Asa. 5:29.

9. Nagnino ro tena ilaegne ty mitadidy andinin-teny naho te hiomagne hiatreke fagnenjehagne?

⁹ Anò tsianjere ty andinin-teny tena tea’o. (Mat. 13:52) Va’e tsy mora ama’o ty mitadidy raha. Faie tena mahery o fagnahy masigneo, le afake mampiasa io ty Jehovah mba haniahiagne azo i andinin-teny rey. (Jaona 14:26) Ginadra tan’Alemaigne Atignanagne agne ohatse, ty rahalahy raike sady natoka-toeragne. Izao ty nitantarae’e: “Soa avao fa andinin-teny an-jato’e ro fa nihaiko tsianjere taloha izay. Tsy lany andro avao raho satria afake nisaintsaigne hevetse ara-baiboly sambe karaza’e.” Nagnampe aze harine i Jehovah avao i andinin-teny rey, le nahavita niaretse reke.

10. Nagnino ro ilaegne ty mianatse i hirantikagne rey?

¹⁰ Ianaro ty togno i hirantikagne rey, sady hirao rey. Nahay tsianjere ty hira fideragne i Jehovah ty Paoly naho i Silasy sady nihira izay iareo naho fa ginadra ta Filipy agne. (Asa. 16:25) Izay ka ty nagnampe ty rahalahy naho ty rahavave tamy ty Firaisagne Sovietika taloha, naho fa natao sesetane ta Siberia agne iareo. Nagnampe iareo hanagne finoagne matanjake avao ty hirantikagne. Hoe ty Rahavave Mariya Fedun: “Nihirà’ay iaby ze hira hai’ay tamy i fihiragney tao.” Nirehake ka reke tie nampahery iaby i hira rey sady nagnampe iareo harine i Jehovah. A irehe? Ia amy ty hira amy i fihirantikagney ao naho amy i tragnom-porarontikagne ao rey ty tena tea’o? Mampahery azo ty mihira irey? Ianaro tsianjere manomboke amy izao areke i hira rey!​—Henteo ty efajoro tihoe “Meo Herim-po Raho.”

INO TY HAGNAMPE ANTIKAGNE VAO MAINKE HO BEY HERIM-PO?

11-12. a) Ino ty nahavy i Davida ho bey herim-po, arake ty 1 Samoela 17:37, 45-47? b) Ino ty ianarantikagne boake amy ty tantara i Davida?

¹¹ Ilaegne ty managne herim-po naho fa miatreke fagnenjehagne. Faie akore naho tsapa’o tie tsy le bey herim-po rehe? Ko haligno fa tsy miankigne amy ty habey ndra ty hery ndra ty fahaizagne ty tena herim-po. Eretsereto ty Davida, tamy ireke nialy tamy i Goliatay. Tena kedekede reke ie amy izao ty Goliata jabajaba! Tsy le natanjake ka reke naho oharegne amo o lahilahy iohoe, sady zara’e naho nanagne fitaovam-pialiagne. Tsy nanagne mesa iaby aza reke! Faie tena bey herim-po ty Davida. Tena tsy natahotse reke naho fa nagnatogne hialy tamo o lahilahy jabajaba sady mpagnambane ndaty iohoe.

¹² Fa nagnino ro bey herim-po hoe izay ty Davida? Satria tena natoky reke tie eo avao ty Jehovah hagnampe aze. (Vakio ty 1 Samoela 17:37, 45-47.) Maregne fa tena jabajaba ty Goliata naho oharegne amy i Davida. Faie tsy nifantoke amy izay reke, fa natao’e an-tsaigne avao tie tsy misy dika’e ty habey i Goliata naho oharegne amy i Jehovah. Ino ty ianarantikagne boake amy izay? Ho bey herim-po tikagne naho matoky tie eo avao ty Jehovah hagnampe antikagne, sady matoky tie tsy misy dika’e o mpanohetse antikagne reo naho oharegne amy i Andrianagnahare Fara’e Maherỳ. (2 Tan. 20:15; Sal. 16:8) Ino ty azontikagne atao mba hahavy antikagne vao mainke ho bey herim-po, amy ie mbe tsy avy i fagnenjehagney io?

13. Ino ty azontikagne atao naho te ho bey herim-po? Hazavao.

¹³ Vao mainke ho bey herim-po tikagne manomboke amy izao, naho mitory ty talily soa i Fanjakàn’Andrianagnaharey. Ino ty anto’e? Satria tikagne mianatse mitoky amy i Jehovah naho fa mitory sady mianatse mandrese ty tahotse o ndatio. (Ohab. 29:25) Manahake o ozatseo ty herim-po. Mihamatanjake o hozatseo naho fa manao fagnazaran-tegna tikagne. Vao mainke ho bey herim-po tikagne naho fa mitory, ndra isan-tragno zay, ndra tsy mifamotoagne, ndra amy ty toeragne maro ndaty, ndra amy ty faritane maro toeragne fiasagne. Naho fa mikezake ho bey herim-po tikagne manomboke amy izao, le ho vognogne hitory avao tikagne ndra tie voarara aza zay.​—1 Tes. 2:1, 2.

14-15. Ino ty ianarantikagne boake amy i Nancy Yuen naho i Valentina Garnovskaya?

¹⁴ Tena miambake ty herim-po i Nancy Yuen naho i Valentina Garnovskaya. Afake mandrambe lesogne boake amy i rahavave tsy nivalike rey tikagne. Metatse raike sy sasa’e eo ho eo avao ty halava i Nancy Yuen, faie tsy mba matahotse ndaty reke!c Nitory miomba ty Fanjakàn’Andrianagnahare avao reke ndra tie rinara aza. Nigadra 20 taogne teo ho eo reke voka izay. Nirehake o manam-pahefagne nagnadikadigne azeo tie ireke ro “ndaty tena mahery loha” ta Chine agne.

¹⁵ I Valentina Garnovskaya ka nigadra intelo tamy ty Firaisagne Sovietika taloha tagne, sady fa 21 taogne ty fitambara ty fotoagne nigadra’e.d Ino ty anto’e nampigadràgne aze? Satria reke tapa-kevetse ty hitory avao. Nimea o manam-pahefagneo agnaragne aza reke tie “mpandika lalàna magnoho-doza.” Ino ty nahavy o rahavave roe rehoe ho bey herim-po? Rese lahatse iareo tie eo avao ty Jehovah hagnampe iareo.

16. Ino ty toko’e hataontikagne naho te ho bey herim-po tikagne?

¹⁶ Nirehafentikagne teo tie tsy toko’e hiantehetse amy ty herintikagne naho ty fahaizantikagne tika, naho te ho bey herim-po. Tsy maintsy matoky tika tie eo avao ty Jehovah hagnampe antikagne, sady ireke ro mialy ho antikagne. (Deot. 1:29, 30; Zak. 4:6) Amy izay avao tikagne ro ho bey herim-po.

INO TY AZONTIKAGNE ATAO NAHO MALAIGNE ANTIKAGNE O NDATIO?

17-18. Arake ty Jaona 15:18-21, ino ty nirehafe i Jesosy fa hiseho? Nagnino tikagne ro heje o ndatio?

¹⁷ Teantikagne naho mba magnaja antikagne o ndatio. Faie diso tikagne naho mieretseretse tie naho fa marom-pitea vaho izay tena misy vili’e. Hoe ty Jesosy: “Sambatse nareo naho heje o ndaty, naho avibì’e vaho haratie’e le rehafe’e tie raty fagnahy, noho ty amy i Ana o ndatỳ.” (Lioka 6:22) Ino ty tea’e ho rehafegne?

¹⁸ Tsy te hirehake ty Jesosy tie mahafale o Kristianao iareo heje o ndatio. Nirehake ty raha hiseho avao reke. Tsy agnisa ty tontolo toy tika sady magnorike ze raha nampianare i Jesosy, vaho mitory ty hafatse nitorie’e. Ty voka’e, heje ty tontolo toy tikagne. (Vakio ty Jaona 15:18-21.) Faie ze hampifaleagne i Jehovah avao ro ataontikagne. Naho heje o ndatio areke tika satria tea i Jehovah, le ahy iareo zay!

19. Akore ty azontikagne anahafagne i apostoly rey?

¹⁹ Ko atao mahamegnatse azo tihoe Vavolombelo i Jehovah, ndra ino ndra ino ty raha rehafe o ndatio ndra atao’e. (Mika 4:5) Le o ndatio vao ro hahavy azo ho megnatse? Afake mianatse mandrese ty tahotse o ndatio tikagne. Magnampe antikagne amy izay ty modely nenga i apostoly ta Jerosalema agne rey, tafara kede ty namonoagne i Jesosy. Fanta iareo fa tena heje o mpitondra fivavahagne jiosio vintagne iareo. (Asa. 5:17, 18, 27, 28) Faie mbe nandeha isan’andro tamy i tempolỳ agne avao iareo, sady nampahafantatse tamo o ndatio tie mpiana i Jesosy. (Asa. 5:42) Tsy nagneke ho rese ty tahotse ndaty areke o apostolio. Tsy hatahotse ndaty ka tikagne naho mampahafantatse tie Vavolombelo i Jehovah, ndra amy ty mpiara-mianatse, ndra amy ty mpiara-miasa, ndra amy ty mpiharo tanàgne amantikagne.​—Asa. 4:29; Rom. 1:16.

20. Nagnino o apostolio ro sambatse ndra tie niheje o ndatio aza?

²⁰ Sambatse i apostoly rey ndra tie nenjehegne aza. Ino ty anto’e? Satria fanta iareo ty anto’e nalaigna o ndatio iareo. Voninahitse lahibey hoahy iareo tihoe nampijalegne satria nanao ty zoton’arofo i Jehovah. (Lioka 6:23; Asa. 5:41) Izao ty nisorate i apostoly Petera tafara tatoy: “Sambatse nareo ndra tie mijale noho ty hamarenagne aza.” (1 Pet. 2:19-21; 3:14) Naho fa azontikagne tie, noho itikagne manao ty soa ro heje o ndatio, le mbe hanompo i Jehovah avao tikagne ndra tie misy malaigne aza.

HANDRAMBE SOA REHE NAHO MIOMAGNE

21-22. a) Ino ty eretserete’o hatao mba ho vognogne hiatreke fagnenjehagne rehe? b) Ino ty hodinehentikagne amy ty lahatsoratse magnarake?

²¹ Tsy haintikagne ty raha hiseho herone. Va’e hisy fagnenjehagne tampoke ndra ho voarara ty asantikagne. Faie fantantikagne fa manomboke amy izao tikagne, le fa afake miomagne hiatreke izay. Toko’e hikezake tikagne mba hifandrambe marine amy i Jehovah sady ho bey herim-po, vaho hianatse hiaretse naho fa misy malaigne. Hahavita tsy hivalike tikagne amy ty hoavy, naho manomboke amy izao le fa miomagne.

²² Faie akore naho tena raràgne vata’e ty asantikagne? Hodinehentikagne amy ty lahatsoratse magnarake tie inogne iaby ty toro lalagne hagnampe antikagne hanompo i Jehovah avao naho fa miseho zay.