FIAIGNANTIKA KRISTIANA
Oriho ty Fitsipy i Jehovah Miomba ty Findesam-batagne
I Jehovah Andrianagnahare ty mamaritse ty fitsipike toko’e hindesa o ndatio ty vata’e. Agnisa izay ohatse ty fanambaliagne. Lahilahy raike naho ampela raike ty toko’e ho mpivaly sady tsy toko’e hisarake. (Mt 19:4-6, 9) Tsy tea’e ty findesam-batagne maloto. (1Ko 6:9, 10) Izay ty mahavy aze mametrake toro lalagne miomba ty fisikinagne naho ty pozy ty volontikagne mba hampiambake ty vahoa’e.—De 22:5; 1Ti 2:9, 10.
Maro ty ndaty mandietse ty fitsipy i Jehovah amy hinane zao. (Ro 1:18-32) Ty hafa ro enga iareo hikomandy ty fiakanjo’e, ty volo’e, naho ty findesam-bata’e. Manenge ty raha raty atao’e iareo sady magnaraty ze tsy magnorike iareo.—1Pe 4:3, 4.
Vavolombelo i Jehovah tikagne, le tsy maintsy bey herim-po mba hagnorike ty fitsipi’e miomba ty findesam-batagne. (Ro 12:9) Akore ty hahavitagne izay? Toko’e mampahafantatse ty raha eke’e tikagne. Sady ilaentikagne ka ty magnorike ty fitsipi’e amy ty fiaignantikagne. Ohatse, naho fa mifily ty akanjontikagne, ty pozy ty volontikagne naho ty findesam-batantikagne. Toko’e hieretseretse tikagne tie: ‘Trea amy ty poziko vao fa magnorike ty fitsipy i Jehovah raho sa ty ahy ty tontolo toy? Ty poziko vao manoro fa Kristiana matahotse an’Andrianagnahare raho?’ Naho fa mifily fandaharagne ndra filma ho henteagne tikagne, le afake mieretseretse tie: ‘Ankasitraha i Jehovah vao ty fandaharagne toy? Mandrisike ahy hanagne findesam-batagne soa vao? Kera ndra hahavy ahy ho raty findesam-batagne ty fihisagne filieko? (Sl 101:3) Hahavy ty keleiako ndra ty hafa hihemotse vao ty raha toy?’—1Ko 10:31-33.
Nagnino ro lahibey ty fagnorihagne ty fitsipy i Jehovah miomba ty findesam-batagne? Satria tsy ho ela ty Jesosy Kristy le handrava o firenenao naho ty ndaty raty fagnahy. (Ezk 9:4-7) Ze manao ty zoton’arofo i Jehovah avao ty ho sisa. (1Jn 2:15-17) Lonike tikagne mba hagnorike ty fitsipike miomba ty findesam-batagne tea i Jehovah horihentikagne, amy izay hagnomey engegne i Jehovah ze mahatrea aze.—1Pe 2:11, 12.
Ty fitsipy ia ro oriheko naho fa mifily fisikinagne ndra ty ho pozy ty voloko raho?
HENTEO TY VIDEO ANÒ RAGNETSE TY JEHOVAH: LAHILAHY RAIKE NAHO AMPELA RAIKE, LE VALEO TY FAGNONTENEAGNE RETOA:
Nagnino ro fahendreagne ty magnorike ty fitsipy i Jehovah miomba ty findesam-batagne?
Nagnino ro toko’e hampianare ty rae aman-drene ty fitsipy i Jehovah miomba ty findesam-batagne ty ana’e amy ie mbe kedey?
Akore ty azo ty tanora naho ty ndaty fa antetse agnampeagne ty hafa mba handrambe soa amy ty hasoa fagnahy i Jehovah?