FIAIGNANTIKA KRISTIANA
“Nisaotse an’Andrianagnahare ty Paoly Sady Nihanahery”
Naho vaho nirey ty fiangonagne ta Roma agne fa ho avy ty Paoly, le nisy rahalahy nanao lia lavitse 64 km teo ho eo mba hanalaka aze. Ino ty nivoka ze hatea feno fahafoezan-tegna zay tamy i Paoly? “Naho vaho nahatrea iareo reke, le nisaotse an’Andrianagnahare sady nihanahery.” (As 28:15) Nampahery ty fiangonagne nitilihe’e ty Paoly. Faie tamy ty fotoagne toy, i reke ndraike ro nanjare nahazo fampaherezagne.—2Ko 13:10.
Mitilike fiangonagne ka o mpiandraikitse faritseo ty amy izao mba hampahery o rahalahio naho o rahavaveo. Faie manahake ty mpanompon’Andrianagnahare iaby avao ka iareo. Mahatsiaro ho rokake, minekoneko, sady kivy. Naho fa hitilike ty fiangona’areo ty mpiandraikitse faritse naho ty vali’e amy ty magnarake, ino ty azo’o atao mba hampaherezagne iareo, amy izay mba “misy fifampaherezagne ty ama’areo eo”?—Ro 1:11, 12.
Magnatreha fivoriagne aloha ty fanompoagne. Le vata’e mampahery ty mpiandraikitse faritse ty mahita mpitory mikezake mafe mba handrambe soa amo o heregnandro manokagne iohoe. (1Te 1:2, 3; 2:20) Dineho ty miomba ty asa ty mpisava lalagne mpagnampe amy ty volagne hitiliha’e. Azo’o atao ty miarake mitory ama’e naho amy ty vali’e ndra miarake mampianatse Baiboly amy ty raike amy iareo. Le vata’e mahafale iareo ty miarake mitory amy ty mpitory vaovao ndra ty mpitory tsy le za-draha.
Mikezaha handrambe ambahiny. Afake magnomey iareo tragno hiroroagne vao rehe ndra mikarakara hanegne ho ahy iareo? Naho manao ireo rehe, le mampiseho tie tea’o iareo. Iareo ka tsy le mipay raha maro.—Lk 10:38-42.
Tsanogno soa sady ampiharo ty tari-dalagne mei’e. Tea o mpiandraikitse faritseo ty magnampe antikagne mba hagnasoa ty fanompoantikagne i Jehovah. Va’e hisy fotoagne iareo hagnomey torohevetse mafemafe antikagne. (1Ko 5:1-5) Fale iareo naho fa mankatò sady magnorike ty tari-dalagne mei’e tikagne.—He 13:17.
Manehoa Fankasitrahagne. Rehafo amy ty mpiandraikitse ty faritse naho ty vali’e tie, tena mandrambe soa rehe amy ty kezake atao iareo. Afake rehafe’o mivantagne zay, ndra amy ty alala ty taratasy ndra karta.—Kl 3:15.