Ko Mialogne fa Mikezaha Mafe Hampisy Filongoagne

1. Ino ty voka’e naho fa nialogne i Josefa i rahalahi’e rey?

SAMBE tea i Jakoba iaby i ana-dahi’e rey. Faie i Josefa ty tena nikokoa’e. Ino ty voka izay tamy i rahalahi’e rey? Nanjare nialogne i Josefa naho tena nalaigne aze iareo, tamy reke 17 taogne. Faie tsy misy anto’e toko’e halaigna iareo aze satria tsy nanao raty tamy iareo reke. Tsy vita izay, fa navaro iareo ho ndevo reke, le navande taman-drae’e iareo tie vinono ty biby masiake i ana-dahi’e ikokoa’ey. Ino ty voka’e? Nikorontagne ty keleia iareo sady tena nampikoretse ty arofon-drae iareo izay.—Gen. 37:3, 4, 27-34.

2. Nagnino ro tena magnoho-doza o fialognagneo, naho henteagne ty Galatianina 5:19-21?

² Rehafe ty Soratse Masigne fa agnisa ty ‘asa ty nofotse’ sady magnoho-doza o fialognagneob satria mahavy ty ndaty raike tsy handova ty Fanjakan’Andrianagnahare. (Vakio ty Galatianina 5:19-21.) O fialognagneo ka mateteke ty mahavy o ndatio hifankalaigne, hifamale, naho ho tsiela boseke.

3. Ino ty hodinehentikagne ato?

³ Treantika boake amy ty raha natao i rahalahy i Josefa rey, fa tena manimba filongoagne sady mampikorontagne o keleiagneo ty fialognagne. Azo antoke tie tsy hanao raha manahake ty natao i rahalahy i Josefa rey tikagne. Faie tsy voririke tikagne, le mora mamitake antika ty fontika. (Jer. 17:9) Izay ty mahavy antika mila mikezake mafe mba tsy hialogne kindraike. Andao tika handineke ohatse tsiampeampe boake agnate Baiboly ao, mba hahafantarantika ty anto’e mahavy o fialognagneo hitiry am-pontikagne ao. Hodinehentikagne ka ty azo atao mba hahavy antika tsy hialogne fa hampisy filongoagne avao.

INO TY MAHAVY ANTIKA HIALOGNE TY HAFA?

4. Ino ty nahavy o Filistinao nialogne Isaka?

⁴ Ty fanagna’e. Tena nimpagnarivo ty Isaka, le nialogna o Filistinao reke. (Gen. 26:12-14) Ino ty natao iareo? Nievà iareo naho nilembefa iareo ty vovogne nampinoma Isaka rano o bibi’eo. (Gen. 26:15, 16, 27) Mialogne ze ndaty manan-draha ambone’e ka ty ndaty ila’e amy hinane zao, manahake ty natao o Filistinao. Tsy tihoe magniry hahazo i raha anagna i ndatỳ avao iareo fa manao raha mba hanimbagne izay ka.

5. Ino ty nahavy o mpitarike fivavahagne reo nialogne i Jesosy?

⁵ Tea o ndaty reke. Nialogna o mpitarike fivavahagne Jiosio ty Jesosy satria maro ty ndaty tea aze. (Mat. 7:28, 29) Nirahen’Andrianagnahare ty Jesosy mba hampianatse ty hamarenagne. Faie nao mpavande zao reke hoe o mpitarike fivavahagne reo, le niharatiratie iareo. (Mar. 15:10; Jaona 11:47, 48; 12:12, 13, 19) Misy rahalahy naho rahavave teà o ndaty ka ty amo o fiangonagne misy antikagneo, noho iareo managne toetse soa. Mila mikezake mafe areke tika mba tsy hialogne iareo naho fa miseho zay. Itika aza toko’e hikezake hanahake iareo fa tsy hialogne.—1 Kor. 11:1; 3 Jaona 11.

6. Ino ty mampiseho tie nialogne ty Diotrefa?

⁶ Ty andraiki’e amo o fiangonagneo. Tamy ty taonjato voaloha’e, le nialogne ty ndaty nitarike tagnivo fiangonagneo ty Diotrefa. ‘Te ho voaloha’e’ tamo o fiangonagneo reke, le niharatiratie’e ty apostoly Jaona naho ty rahalahy hafa nanagne andraikitse. (3 Jaona 9, 10) Azo antoke fa tsy hanao manahake ty natao i Diotrefa tika. Faie va’e hialogne ty mpiara-manompo nahazo ty tombotsoa nirientika mafe tika, lohotsie naho mieretseretse tika tie itikagne ro tena mahavita i andraikitsey.

7. Ino ty voka o fialognagneo amantikagne?

⁷ Azo ampitoviegne amo o akata ratio o fialognagneo. Naho fa manomboke mitiry am-pontikagne ao io, le tena sarotse ty magnafake aze. O fialognagneo ka ty mahavy antika hagnambone tegna naho ho tea tegna ndra hagnindra izay. Mahavy o folerao tsy hitombo naho hamono aze o akata ratio. Hoe izay ka, fa mikalagne antika tsy hanagne ty toetse soa retoa ty fialognagne: hatea, fitretrézagne naho hasoa fagnahy. Naho vaho tsapantikagne areke tie manomboke mitiry am-pontikagne ao zay, le avy le omboto malaky. Akore ty hanoantikagne izay?

MIKEZAHA HIAMBANE NAHO HO FALE AMY TY RAHA ANAGNA’O

8. Ino iaby ty toetse hagnampe antika tsy hialogne?

⁸ Ho vitantika ty hagnombotse o fialognagneo tsy ho am-pontikagne ao naho mikezake miambane tika sady fale amy ze raha anagnantikagne. Naho itika managne ro o toetse rehoe, le tsy hitiry am-pontikagne ao ty fialognagne. Tsy mihevetse ty tegna’e ho ambone noho ty hafa ohatse, ty ndaty miambane. Tsy mieretseretse reke tie ie avao ty fagneva hahazo raha raike fa tsy ty ndaty hafa. (Gal. 6:3, 4) Le ty ndaty mifale amy ze raha anagna’e tsy mampitaha ty tegna’e amy ty hafa. (1 Tim. 6:7, 8) Hiara-pale amy ze ndaty mahazo raha soa tika naho managne o toetse rehoe.

9. Magnampe antika hahavita ino ty fagnahy masigne, arake ty Galatianina 5:16 naho ty Filipianina 2:3, 4?

⁹ Afake magnampe antika tsy hialogne ty fagnahy masin’Andrianagnahare. Faie tsy izay avao, fa magnampe antika hiambane naho ho fale amy ze anagnantikagne ka. (Vakio ty Galatianina 5:16; Filipianina 2:3, 4.) Magnampe antika hamantatse soa ty eretserentika naho ty anto’e mandrisike antika hanao raha ty fagnahy masigne. Naho fa ampea i Jehovah tika, le hahavita hampahery ty hafa fa tsy hialogne iareo. (Sal. 26:2; 51:10) Ohatse soa ho antika ty Mosesy naho i Paoly satria tsy nengà iareo hitiry tam-po iareo ao ty fialognagne. Andao tika handineke izay.

10. Ino ty raha niseho, le va’e ho nahavy i Mosesy hialogne ty hafa? (Henteo ty sare amy ty fogno ty gazete toy.)

¹⁰ Nanagne fahefagne lahibey tamy ty vahoa i Jehovah ty Mosesy. Faie tsy nialogne ndra nanao raha mba hahavy ty hafa tsy hahazo fahefagne reke. Nisy fotoagne ty Jehovah nangalake ty ampaha’e tamy ty fagnahy masigne niasa tamy i Mosesy, le nafindra’e tamy i androanavi-pagnahy niavy tamy i tragnolay fihaognagne teo rey. Tsiela tafara izay, le naharey ty Mosesy tie nisy androanavi-pagnahy roe nijanogne tan-tobe tao avao nahazo fagnahy masigne ka sady nanao ty raha fatao o mpaminanio. Ino ty natao i Mosesy naho fa nirehake tama’e ty Josoa tie ‘rarao iareo roe’? Tsy nialogne iareo reke satria hai’e tie boake amy i Jehovah zay. Ireke aza, niambane le niara-pale tamy iareo noho iareo nahazo tombotsoa haminany. (Nom. 11:24-29) Ino ty azontikagne ianaragne boake amy i Mosesy?

11. Akore ty azo o androanavi-pagnahio anahafagne i Mosesy?

¹¹ Naho androanavi-pagnahy rehe, le eretsereto zao: ‘Manao akore ty fihetseko naho asaegne mampiofagne rahalahy mba hahavita ty andraikitse tena teako raho?’ Ohatse, tena tea’o zao ty mitarike ty Fianaragne Fitalakesan-davitse isan-keregnandro. Naho miambane manahake i Mosesy rehe, le tsy hieretseretse ty vata’o ho tsy misy dika’e sasa naho asaegne mampiofagne rahalahy hafa mba hahavita o andraiki’o iohoe. Toko’e ho fale aza rehe hagnampe o rahalahy iohoe!

12. Akore ty ampisehoa ty rahalahy naho rahavave amy izao fa fale amy ze tombotsoa anagna’e naho miambane iareo?

¹² Tsy mora amo o rahalahio ka ty hamita ty andraiki’e naho fa bey reke. Misy amy iareo zao ohatse, fa ni-androanavi-pagnahy mpandrindra tagnate ty taogne maro. Faie naho fa nifeno 80 taogne iareo, le nagneke hijanogne tsy ho mpandrindra sasa. Maro ka ty mpiandraikitse faritse miambane le vognogne hamoe o tombotsoa iohoe naho fa feno 70 taogne. Magneke ze fanendreagne vaovao azo’e iareo. Maro amy ty Betelita magneran-tane ka ty nahazo fanendreagne vaovao, taogne tsiampeampe lasa zay. Faie tsy ialogna iareo ze rahalahy naho rahavave managne o tombotsoa nanagna iareo taloha iohoe.

13. Nagnino ty Paoly ro va’e ho nialogne i Apostoly 12 rey naho tsy nitao?

¹³ Ohatse soa ho antika ka ty apostoly Paoly satria nifale tamy ze tombotsoa nanagna’e sady niambane. Tsy nengà i Paoly hitiry tam-po’e tao o fialognagneo . Niambane reke ndra tie niasa mafe tamy ty fanompoagne aza. Izao ohatse ty raha nirehafe’e: “Izaho ty fara’e kede amo o apostolio sady tsy fagneva ty hatao tihoe apostoly raho.” (1 Kor. 15:9, 10) Tsy niara-nanompo tamy i Jesosy ty Paoly fa i apostoly 12 rey nanagne ze tombotsoa zay. Ty anto’e, tafara ty nimateza i Jesosy naho ty namelomagne aze indraike ty Paoly vaho izay nanjare Kristiana. Ndra tie tinendre ho ‘apostoly hoahy ty hafa firenena’ ka ty Paoly, le tsy nahazo tombotsoa manokagne ho agnisa i apostoly 12 rey. (Rom. 11:13; Asa. 1:21-26) Tsy nialogne i apostoly 12 rey ty Paoly ndra tie nifandrambe maifitse tamy i Jesosy iareo. Ndra aleo’e nifale tamy ze tombotsoa nanagna’e.

14. Ino ty raha hataontikagne naho fale amy ze tombotsoa anagnantika sady miambane tikagne?

¹⁴ Naho fale amy ze tombotsoa anagnantikagne tika sady miambane, le hanahake i Paoly sady hagnaja ze nimey i Jehovah fahefagne. (Asa. 21:20-26) Natao i Paoly azo antoke tie misy androanavi-pagnahy ho afake hikarakara o fiangonagneo. Maregne fa tsy voririke iareo, faie amy i Jehovah le “lahilahy ho fagnomezagne” iareo. (Efes. 4:8, 11) Naho magnaja o lahilahy tinendre rehoe sady miambane naho magnorike ty tari-dalagne mey iareo tikagne, le ho soa filongoagne amy i Jehovah naho amo o mpiara-manompò.

“MIKEZAHA MAFE HAMPISY FILONGOAGNE”

15. Ino ty raha mila ataontikagne?

¹⁵ Tsy hilongo soa tikagne naho mifampialogne. Mila ombotantika tsy ho am-pontikagne ao ty fialognagne sady toko’e hitao tika mba tsy hanao raha hahavy ty hafa hialogne antika. Tsy maintsy manao o raha lahibey roe reo tikagne naho teantikagne ty hagnorike i lily i Jehovah tihoey tie “mikezaha mafe hampisy filongoagne naho hifampahery.” (Rom. 14:19) Ino areke ty toko’e hataontika mba tsy hialogne antika ty hafa amy izay tikagne milongo soa amy iareo?

16. Ino ty raha mila itaoantikagne mba tsy hahavy ty hafa hialogne antika?

¹⁶ Tena misy voka’e amy ty hafa ty toe-tsaintika naho ty raha ataontikagne. Tea ‘mampisengesenge fanagnagne’ ty tontolo toy, le tea iareo hanao izay ka tikagne. (1 Jaona 2:16) Faie mampisy fialognagne ze toe-tsaigne zay. Tsy hialogne antika ty ndaty hafa naho tsy mirehake mateteke miomba ty raha anagnantikagne ndra ty raha ho vilientikagne tika. Tsy hampisy fialognagne ka tika naho tsy mirehareha amy ty andraikitse anagnantika amo o fiangonagneo. Ho mora hitiry am-po ty hafa ao ty fialognagne naho mirehake mateteke miomba ty tombotsoa anagnantikagne tika. Faie ho fale amy ze tombotsoa anagna’e iareo sady hilongo soa tikagne iaby, naho asehontika tie mihevetse iareo tika le midera iareo amy ze raha soa nivita iareo.

17. Nanjare nanao akore indraike ty ry Josefa keleian-draike, le ino ty anto’e?

¹⁷ Naho iheregnantikagne indraike ty raha natao i rahalahy i Josefa rey, le ho treantika fa vitantika ty tsy hialogne ty hafa. Taogne maro tafara ty nanoa i rahalahi’e rey raha raty tama’e, le nifankatrea ta Ejipta tagne indraike iareo faie tsy nifanta iareo reke. Nihentea i Josefa hey tamy izay tie fa niova vao iareo, le nasae’e nihinagne niarake ama’e iareo faie natao’e maro ty anjara i Benjamina. (Gen. 43:33, 34) Nanao akore ty fihetse i zoke’e rey? Tsy trea tamy ty tarehe iareo tie nialogne i Benjamina iareo. Iareo aza nihevetse ze hahasoa aze naho i Jakoba rae iareo. (Gen. 44:30-34) Nanjare nilongo soa indraike iareo keleian-draike satria fa tsy nialogne sasa i rahalahi’e rey. (Gen. 45:4, 15) Manahake izay ka, fa naho ombotantika tsy ho am-pontikagne ao o fialognagneo, le hilongo soa ty keleiantika naho ty fiangonagne.

18. Ino ty ho voka’e naho mikezake hampisy filongoagne avao tika, arake ty Jakoba 3:17, 18?

¹⁸ Tea i Jehovah hikezake hampisy filongoagne tika fa tsy hialogne ty hafa. Mila mikezake mafe tika naho te hahavita izay. Nianarantikagne tamy ty lahatsoratse toy tie mora mialogne tika. (Jak. 4:5) Bey fialognagne ka ty ankamaroa ty ndaty magnodidigne antikagne. Faie tsy hanahake iareo tika naho miambane, fale amy ze tombotsoa anagnantika, sady mahay mankasitrake. Naho manao izay tika, le hilongo soa amy ty hafa sady hitombo ty toetse soa anagnantika.—Vakio ty Jakoba 3:17, 18.