Handrisike Azo Hatao Badisa ty Hatea’o i Jehovah Naho ty Fankasitraha’o Aze

1-2. Ino ty nandrisike i manam-pahefagne ambone Etiopianay hatao badisa, arake ty Asan’ny Apostoly 8:27-31, 35-38?

TE HATAO badisa vao rehe mba hanjare mpiana i Kristy? Nandrisike ndaty maro hatao badisa ty hatea iareo i Jehovah naho ty fankasitraha iareo aze. Mampiseho izay ty tantara i manam-pahefagne ambone Etiopianay.

² Le avy le natao badisa o lahilahy Etiopiana iohoe naho fa nitaka’e tie izay ty také ty Soratse Masigne. (Vakio ty Asan’ny Apostoly 8:27-31, 35-38.) Ino ty nandrisike aze? Ty hatea’e ty Saontsin’Andrianagnahare. Mirehake izay tika satria namaky andinin-teny amy ty boke i Isaia tao reke, tamy ie nandeha sarete boake a Jerosalema agney. Ie naho fa nihazavae i Filipo tama’e i andinin-teny nivakie’ey, le nanjare tena nankasitrake ty raha natao i Jesosy ho aze ka reke. Fa nagnino moa o lahilahy Etiopiana iohoe ro nandeha ta Jerosalema agne? Noho ty hatea’e i Jehovah. Mirehake izay ka tikagne satria vaho hirike nanompo i Jehovah tagne reke tamo o fotoagne iohoe. Ty dika izay, fa niala tamy ty fivavaha ty rae aman-drene’e reke, le nanompo i Andrianagnahare maregney niarake tamy i firenena nanompo Azey. Ze hatea’e i Jehovah zay, ty nandrisike aze ho tapa-kevetse hatao badisa, le hanjare ho mpiana i Kristy. (Mat. 28:19) Tena dingagne lahibey o raha natao’e iohoe.

3. Ino ty va’e hisakagne ty ndaty raike tsy hatao badisa? (Henteo ty efajoro tihoe “Karazan-tane Manao Akore ty Fo’o?”)

³ Handrisike azo hatao badisa ka ty hatea’o i Jehovah. Faie hatea avao ka ty va’e hisakagne azo tsy hatao badisa. Agnisa izay zao, ohatse, ty hatea’o i longo’o naho i nama’o tsy mpanompo i Jehovah rey. Ty anto’e, va’e hatahotse rehe kera ho heje iareo naho fa vita badisa. (Mat. 10:37) Agnisa izay ka, ty hatea’o i fahazaragne fa hai’o tie heje i Jehovah rey. Va’e ho sarotse ama’o ty hiala amy izay satria tea’o i raha rey. (Sal. 97:10) Eo ka ty hatea’o i fete naho i fombafomba tsy ankasitraha i Jehovah rey. Va’e fa tagnate ty taogne maro rehe ty nankalaza irey, le tena mbe imanigna’o ty raha natao’o tamy izay. Voka’e, va’e hieretseretse rehe tie tsy ho vita’o ty hiala amo o raha heje i Jehovah rehoe. (1 Kor. 10:20, 21) Faie tsy maintsy mijobogne rehe tie, “Aia ty tena tea’o? I Jehovah vao sa o raha hafa rehoe?”

IA TY TOKO’E HO TEANTIKAGNE VOALOHA’E?

4. Ino ty anto’e voaloha’e toko’e handrisike azo hatao badisa?

⁴ Va’e nisy raha ila’e fa nitea’o sady nankasitraha’o tie taloha. Fa nihajae’o zao ohatse o Baibolio, ndra tie mbe tsy nianatse aze tamy ty Vavolombelo i Jehovah rehe. Va’e fa nitea’o ka ty Jesosy. Naho fa nahafantatse miomba ty Vavolombelo i Jehovah ka rehe tafara tatoy, le nanjare tena tea’o ty miarake amy iareo. Faie tsy ireo ty tena toko’e handrisike azo hanokan-tegna naho hatao badisa fa ty hatea’o i Jehovah. Io ty toko’e ho anto’e voaloha’e. Naho irehe tena tea i Jehovah, le tsy hisy hahavita hisakagne azo tsy hanompo aze. Izay ka ty hagnampe azo tsy hisalasala ty hatao badisa sady hagnampe azo tsy hivalike ama’e afara i badisa’oy.

5. Ino ty hodinehentikagne ato?

⁵ Hoe ty Jesosy: ‘Teavo amy ty fo’o, amy ty tegna’o, naho amy ty sai’o, vaho amy ty heri’o ty Jehovah.’ (Mar. 12:30) Faie akore ty hahavy antika ho tena tea i Jehovah naho hagnaja aze? Mila misaintsaigne ty hatea naseho i Jehovah tamantikagne tika. (1 Jaona 4:19) Hodinehentika amy ty lahatsoratse toy tie inogne ty toko’e hatao’o mba hitombo ty hatea’o i Jehovah, le hagniry hatao badisa.

6. Ino ty toko’e hatao’o naho te hahafantatse ty toetoe i Jehovah rehe, arake ty Romanina 1:20?

⁶ Dineho ty raha finoro i Jehovah, le hitombo ty fahafantara’o ty toetoe’e. (Vakio ty Romanina 1:20; Apok. 4:11) Maro ty raha mitiry naho biby finoro i Jehovah. Dineho tie nagnino o raha rehoe ro mampiseho fa Andrianagnahare tena mahilala reke. Dineho ka fa mahalatsa vata’e ty fomba namboara i Jehovah ty vata’o. (Sal. 139:14) Trea amo o masoandrò ka tie tena mahery ty Jehovah. Faie naho ty maregne, le tsy io avao ty vasiagne finoro’e fa misy an-tapetrisa’e.b (Isaia 40:26) Tena hagnaja i Jehovah rehe naho mandineke ty raha finoro’e. Maregne fa ilaegne ty mahafantatse tie Andrianagnahare tena mahilala naho mahery ty Jehovah. Faie naho teantikagne hitombo ty hateantikagne aze sady tena te hifandrambe ama’e tika, le mila mahafantatse aze soa.

7. Naho irehe tena te ho tea i Jehovah, le ino hey ty raha toko’e haharese lahatse azo?

⁷ Anò ze hahavy azo ho rese lahatse fa tea azo vata’e ty Jehovah. Sarotse ama’o vao ty mino tie mivazoho naho midare azo ty Jehovah, i Andrianagnahare namorogne ze kila rahay? Naho izay ty tsapa’o, le tsiarovo tie “tsy lavitse antikagne tsikiraikiraike reke.” (Asa. 17:26-28) “Mandineke ty fo ty Jehovah”, le izay ty nahavy aze nagnomey toky azo amy Saontsi’e ao tie “naho mipay aze rehe, le hatao’e ze hahatreava’o aze.” (1 Tan. 28:9) Naho ty maregne aza, o mahavy azo mianatse Baiboly hinaneo, le noho ty ‘fitariha i Jehovah azo.’ (Jer. 31:3) Saintsaigno iaby areke ze raha fa natao i Jehovah ho azo satria arakarake ty anoa’o izay ro vaho mainke hampitombo ty hatea’o aze.

8. Akore ty fomba hampisehoa’o tie mankasitrake ty hatea i Jehovah azo rehe?

⁸ Mila mivavake amy i Jehovah rehe mba hampisehoa’o tie ankasitraha’o ty hatea’e azo. Hitombo ty hatea’o aze naho irehe mirehake ama’e ze raha mampinekoneko azo sady misaotse aze noho ty raha soa mei’e azo. Tsy izay avao, fa hihasoa ty filongoa’o amy i Jehovah naho fa trea’o tie mamale ty vavake atao’o reke. (Sal. 116:1) Ho rese lahatse ka rehe amy izay tie tena sarobily ama’e rehe. Faie naho te hifandrambe maifitse amy i Jehovah rehe, le mila mahafantatse ty raha tea’e naho ty raha heje’e vaho ty anto’e anoa’e raha. Hanjare ho hai’o ka amy izay ty raha také’e ama’o. Faie ty fianaragne Baiboly avao ty hagnampe azo hahafantatse izay.

9. Akore ty hampisehoa’o tie tea’o ty Saontsin’Andrianagnahare?

⁹ Teavo ty Saontsin’Andrianagnahare. Agnate Baiboly ao avao ro ahatreavagne ty maregne miomba i Jehovah naho ty raha safirie’e ho azo. Naho mamaky Baiboly isan’andro rehe sady magnomagne soa aloha ty hianatse Baiboly, vaho mampihatse ze raha nianara’o, le atoro’o boake amy izay tie tea’o ty Saontsi’e. (Sal. 119:97, 99; Jaona 17:17) Fa mamaky Baiboly isan’andro vao rehe? Mikezake mafe vao rehe mba tsy ho tapatapake ty famakia’o aze?

10. Ino ty raha raike agnisa ty tena mampiambake o Baibolio?

¹⁰ Misy raha raike tena mampiambake o Baibolio. Inogne zay? Ndaty nahatrea maso ty raha natao i Jesosy naho niaigna’e ty nanoratse ty tantara’e agnate Baiboly ao. Midika zay fa o Baibolio avao ty mirehake raha maregne miomba ty raha natao i Jesosy ho azo. Naho mikezake hahafantatse soa ty raha nirehafe i Jesosy naho ty raha natao’e rehe, le hanjare ho nama’e.

11. Ino ty hagnampe azo ho tena tea i Jehovah?

¹¹ Mianara miomba i Jesosy, le hitombo ty hatea’o i Jehovah. Fa nagnino? Satria tena nanahake ty toetoen-dRae’e ty Jesosy. (Jaona 14:9) Naho fa mahafantatse soa i Jesosy rehe, le hanjare ho hai’o ka ty fomba fiheve i Jehovah naho ty toetoe’e. Hahavy azo hahatsapa ho marine Aze ka zay. Tena nitrétré i ndaty niheveregne ho ambane naho tsy nisy mpidare rey zao ty Jesosy. Agnisa izay, ze ndaty rarake, marare naho manan-kandra. Nagnomey torohevetse fanjaka azo ka reke mba hahasoa ty fiaigna’o. Ino zao ty soa fa nirambese’o naho fa nagnorike irey rehe?—Mat. 5:1-11; 7:24-27.

12. Handrisike azo hanao inogne ty fianara’o miomba i Jesosy?

¹² Nanao sorogne ty fiai’e ty Jesosy mba hahazoantika famelan-keloke. (Mat. 20:28) Naho misaintsaigne soa miomba o solovoigne natao’e iohoe rehe, le hitombo ty hatea’o aze. Handrisike azo hibebake naho hangatake famelan-keloke amy i Jehovah ka ty fahatakara’o tie nivognogne hamoe ty ai’e ho azo ty Jesosy. (Asa. 3:19, 20; 1 Jaona 1:9) Le naho fa mitombo ty hatea’o i Jesosy naho i Jehovah, le manjare te hiarake amy ty ndaty teà iareo ka rehe.

13. Ia ty ampiasae i Jehovah mba hagnampe azo?

¹³ Miaraha amy ty rahalahy naho rahavave agnivo o fiangonagneo. Va’e tsy tena hahatakatse ty anto’e mahavy azo te hanokan-tegna hoahy i Jehovah ty longo’o naho i nama’o taloha rey. Va’e hanohetse azo areke iareo. Faie matokia fa azo i Jehovah ampiasaegne hagnampe azo o rahalahy naho rahavaveo. Naho mikezake hiragnetse amy iareo areke rehe, le ho tsapa’o fa tena tea naho manohagne azo iareo. (Mar. 10:29, 30; Heb. 10:24, 25) Tsy hai’o ka aza tie va’e hanompo i Jehovah naho hankatò ty fitsipi’e avao i longo’o rey naho fa afara agne!—1 Pet. 2:12.

14. Tsapa’o vao fa tena maregne ty raha rehafe ty 1 Jaona 5:3 naho fa nagnorike ty fitsipy i Jehovah rehe?

¹⁴ Teavo ty lily i Jehovah, le ho vita’o ty hampihatse aze amy ty fiaigna’o. Va’e tsy nidare ty fitsipy i Jehovah rehe tie taloha. Faie amy izao rehe mahatsapa tie tena mahasoa azo rey. (Sal. 1:1-3; vakio ty 1 Jaona 5:3.) Misy torohevetse hoahy ty ndaty manambaly naho ty rae aman-drene vaho ty ajaja ohatse ty agnate Baiboly ao. (Efes. 5:22–6:4) Tsy mahatsapa vao rehe tie nanjare sambatse nareo keleian-draike naho fa nikezake nampihatse i torohevetse rey? Nimea i Jehovah torohevetse ka rehe tie ze ndaty hendre avao ro anò ragnetse. Tsy mahatsapa vao rehe tie nanjare nihasoa ty fiaigna’o naho fa nagnorike o torohevetse iohoe?—Ohab. 13:20; 1 Kor. 15:33.

15. Ino ty mila atao’o mba hahaia’o hampihatse ty toro lala ty Baiboly?

¹⁵ Misy fotoagne va’e tsy ho hai’o ty fomba hampiharagne ty toro lalagne nianara’o tagnate Baiboly ao. Izay ty mahavy ty fandamina i Jehovah mampiboake boke naho gazete mba hagnampeagne azo hahatakatse soa ty raha rehafe ty Baiboly naho hahay hagnambake ty soa naho ty raty. (Heb. 5:13, 14) Naho mamaky sady mianatse soa i boke naho gazete rey rehe, le hahatrea fomba azo ampiharagne ty toro lalagne agnate Baiboly ao sady ho tsapa’o fa tena natao ho azo rey. Mahavy azo tsy hiala amy fandaminagne ka zay.

16. Akore ty fomba nandamina i Jehovah ty vahoa’e?

¹⁶ Ankasitraho sady hararaoto ty fagnampeagne mey i fandaminagne azo. Sambe hafa ty fiangonagne misy ty vahoa i Jehovah magneran-tane, le i Jesosy Ana’e ty natao’e ho loha o fiangonagneo iaby. (Efes. 1:22; 5:23) Izay ty fomba nandamina i Jehovah o vahoa’eo. Misy amo o kristiana voahosotseo ka tinendre i Jesosy mba hitarike ty asa nankine’e amy iareo. “Mpanompo mahihitse naho mahimbagne” ty nirehafa i Jesosy aze. Tena manao soa ty andraiki’e o mpanompo iohoe mba hagnomeagne hanegne ara-pagnahy naho hagnampeagne azo hifandrambe soa amy i Jehovah. (Mat. 24:45-47) Atao’e azo antoke areke tie misy androanavi-pagnahy ho afake hitari-dalagne naho hiaro azo ty amo o fiangonagneo. (Isaia 32:1, 2; Heb. 13:17; 1 Pet. 5:2, 3) Tena miasa mafe o androanavi-pagnahio mba hampaherezagne naho hagnampeagne azo hifandrambe maifitse amy i Jehovah avao. Faie agnisa ty andraiky iareo lahibey ka ty magnampe azo mba hahay hampianatse o ndatio ty miomba i Jehovah.—Efes. 4:11-13.

17. Ino ty mahavy antika hirehake amy ty hafa ty miomba i Jehovah, arake ty Romanina 10:10, 13, 14?

¹⁷ Ampianaro ty miomba i Jehovah o ndatio. Nandily ty mpanonjohy ty lia’e ty Jesosy mba hampianatse o ndatio ty miomba i Jehovah. (Mat. 28:19, 20) Faie tsy izay avao ty anto’e mahavy antika mankatò o lily iohoe. Mankatò io ka tika satria teantika ty Jehovah. Naho fa mitombo ze hateantikagne aze zay, le ho tapa-kevetse manahake i apostoly Petera naho i Jaona tika. Hoe iareo: “Tsy azo’ay atao ty tsy hirehake sasa miomba ze raha nihita’ay naho nirei’ay.” (Asa. 4:20) Tsy misy raha mahafale ambone tihoe magnampe ndaty mba ho tea i Jehovah. Azo’o sare an-tsaigne vao ty hafaleagne nitsapa i Filipo naho fa nagnampe i lahilahy Etiopianay mba hahafantatse soa ty hamarenagne naho hatao badisa? Atoro’o tie magniry ho Vavolombelo i Jehovah rehe naho manahake i Filipo, sady magnorike i lily i Jesosy tihoey tie mitoria amy ty ndaty iaby. (Vakio ty Romanina 10:10, 13, 14.) Naho mankatò io rehe, le hirehake manahake i Etiopianay tie: “Inogne ty mitagne ahy tsy hatao badisa?”—Asa. 8:36.

18. Ino ty horehafentikagne amy ty lahatsoratse magnarake?

¹⁸ Naho fa irehe atao badisa, le ko haligno tie io ty fanapahan-kevetse lahibey nirambese’o amy ty fiaigna’o. Faie mila hai’o soa hey ty dika tihoe badisa naho ze raha toko’e ho fanta’o miomba ty badisa. Mila fantare’o ka tie ino ty raha toko’e hatao’o aloha naho afara ty badisa’o. Hirehake miomba ireo tika amy ty lahatsoratse magnarake.