Fifehezan-tegna Toetse Tena Ilaegne Naho Te Hahazo Sitrake amy i Jehovah

“Nisy longo’ay zay, le avy le nifeozeko naho fa nipay aly tamako. Naìnako ho nivonoegne reke tamy izay.”—Paul.

“Le avy le boseke raho naho vaho misy raha kedekede tsy teako ty an-tragno ao. Le avy le foiefoieko iaby ze raha voarambe ty tagnako.”—Marco.

Maregne aloha fa va’e tsy hanao raha manahake ty natao iareo tika faie misy fotoagne tsy mora amantika ty mifehe tegna. Nandova ota boake amy i Adama tika, le izay ty anto’e tena mahasarotse ty mifehe tegna. (Rom. 5:12) Ty ndaty ila’e ohatse tsy mahafehe ty haboseha’e manahake i Paul naho i Marco. Ty ila’e tsy mahavita mifehe ty eretsere’e. Raha mampatahotse naho mahakivy avao ohatse ty lava eretserete iareo. Misy ka tsy mahavita mifehe ty fagniria’e hanao firaisagne, ndra hinon-toake ndra hifoke rongony.

Tena hikorontagne ty fiaigna ze ndaty tsy mifehe ty eretsere’e naho ty fagniria’e vaho ty raha atao’e. Faie tsy hanjò antikagne zay naho mifehe tegna tika. Andao tika handineke ty fagnonteneagne retoa: 1) Ino ty atao tihoe fifehezan-tegna? 2) Nagnino io ro tena ilaegne? 3) Ino ty hagnampe antika hanagne o toetse agnisa ty “vokatse ty fagnahy” iohoe? (Gal. 5:22, 23) Hodinehentikagne ka ty azo atao naho tsy nahavita nifehe tegna tika.

INO TY ATAO TIHOE FIFEHEZAN-TEGNA?

Tsy ty fihetseham-po’e naho ty fagniria’e ro mikomandy ty ndaty mahafehe tegna. Mikezake reke mba tsy hirehake ndra hanao raha hejen’Andrianagnahare.

Natoro i Jesosy tamy ty fiaigna’e tie manao akore o mifehe tegna zao. Hoe ty Baiboly: “Tsy niteratera reke ndra tie nisy niteratera, sady tsy nagnorohoro ndra tie nijale, fa i mpitsara maregney avao ro nitavandrae’e amy ty fiaigna’e.” (1 Pet. 2:23) Nahavita nifehe tegna hoe izay ty Jesosy naho fa nitsikike aze o ndatio tamy ireke tamy i hazo fijaleagney eoy. (Mat. 27:39-44) Nifehe tegna ka reke naho fa nisy mpitarike fivavahagne nipay fomba hamandrihagne aze, mba hampivalike ty sai’e amy izay reke mirehake raha diso. (Mat. 22:15-22) Tsy namale fate ka reke naho fa nisy Jiosy niboseke tama’e nangalake vato hitorahagne aze. ‘Nietake reke tamy izay, le niakatse i tempolỳ.’—Jaona 8:57-59.

Ho vitantikagne vao ty hifehe tegna manahake i Jesosy? Eka. Hoe ty apostoly Petera: ‘Nijale ho anareo ty Kristy, le nagnomey modely ho anareo mba hagnoriha’areo soa ty lia’e.’ (1 Pet. 2:21) Ndra tie tsy voririke tika, le afake mifehe tegna manahake i Jesosy. Fa nagnino tika ro tena mila mifehe tegna?

NAGNINO IO RO TENA ILAEGNE?

Tsy hahazo sitrake amy i Jehovah tika naho tsy mifehe tegna. Ndra tie fa ela aza tikagne ro nanompo aze, le va’e ho simba ty fifandrambesantikagne ama’e naho tsy mahavita mifehe ty raha ataontikagne naho rehafentikagne tika.

Dineho ohatse ty Mosesy. Tamy ty andro’e, le tsy nisy ndaty ‘bey fandeferagne’ nihoatse aze. (Nom. 12:3) Ndra tie nahavita niaretse ty figneogneo o Israelitao tagnate ty taogne maro aza ty Mosesy, le nisy fotoagne tsy nahafehe tegna. Tena niboseke reke satria nigneogneogne indraike o Israelitao tie tsy misy rano iareo. Nasiaha i Mosesy iareo tamy izay, le nirehafe’e tie: ‘Tsanogno areo raho ty ndaty tsy mitsanom-bolagnegne retoa! Tsy maintsy magnakatse rano ho anareo boake amy ty lamilamy toy vao zahay?’—Nom. 20:2-11.

Tsy nahavita nifehe tegna ty Mosesy. I Jehovah ty nanao i fahagagagney mba hagnomeagne rano iareo faie tsy mba nagnomey voninahitse aze ty Mosesy. (Sal. 106:32, 33) Tsy nengà i Jehovah hizilike tamy i Tane Nampitamaegney ao areke ty Mosesy. (Nom. 20:12) Azo antoke fa va’e nanegnena i Mosesy ampara-pahafate’e ty tsy fahavita’e nifehe tegna tamy izay.—Deot. 3:23-27.

Ino ty lesogne ho antika? Ndra tie fa ela aza tika ro nanompo i Jehovah, le toko’e ho hajaentikagne avao o mpiara-manompò naho fa manao raha mahaboseke antika ndra mila ahitsy. (Efes. 4:32; Kol. 3:12) Maregne fa va’e tsy hanam-paharetagne tika kindraike naho fa mihantetse. Faie tsiarovo ty Mosesy. Tsy ho teantikagne naho ho montso antoke ty kezake mafe nataontikagne amparake izay noho itika tsy nahavita nifehe tegna indraike avao. Ino areke ty hagnampe antika hanagne o toetse tena ilaegne iohoe?

INO TY HAGNAMPE ANTIKA HANAGNE FIFEHEZAN-TEGNA?

Mangataha fagnahy masigne amy i Jehovah. Ty anto’e, agnisa ty vokatse ty fagnahy ty fifehezan-tegna, le azo antoke fa homey i Jehovah ty fagnahi’e ze mangatake ama’e. (Lioka 11:13) Hahavita hifehe tegna tika naho fa ampea ty fagnahy masy i Jehovah. (Fil. 4:13) Afake magnampe antika hanagne toetse soa hafa agnisa ty vokatse ty fagnahy ka ty Jehovah, agnisa izay ty hatea. Ho mora amantikagne ty mifehe tegna naho managne hatea tikagne.—1 Kor. 13:5.

Ihalaviro ze raha hahavy azo tsy hahavita hifehe tegna. Toko’e hikezake ohatse tikagne mba tsy hanao fihisàgne misy findesam-batagne maloto ndra hagnente izay amy internet ao. (Efes. 5:3, 4) Tsy maintsy magnalavitse ze raha va’e hahavy antika hanao raha raty areke tika. (Ohab. 22:3; 1 Kor. 6:12) Naho tsy mahavita mifehe ty fagniria’e hanao firaisagne ohatse ty ndaty raike, le soa naho mitao reke mba tsy hamaky boke ndra hagnente filma va’e hampitombo ze fagnirian-drati’e zay.

Va’e ho sarotse amantikagne ty hagnorike ze torohevetse zay. Faie naho mikezake mafe tika, le hagnomey hery antika ty Jehovah mba hahavitantikagne hifehe tegna. (2 Pet. 1:5-8) Agnisa izay ty hifehe ty eretserentikagne naho ty raha rehafentikagne vaho ataontikagne. Tsy nimora boseke sasa zao ty Paul naho i Marco, i nirehafegne taloha teo rey. Lava nifamale avao amy ty soafera hafa ka ohatse ze rahalahy raike zay naho fa minday tobile. Ino ty nagnampe aze hifehe tegna? Hoe reke: “Nivavake mafe raho isan’andro. Nianatse lahatsoratse miomba ty fifehezan-tegna ka raho, le nitadidieko ze andinin-teny afake magnampe ahy. Fa nikezake nanao izay tagnate ty taogne maro raho, faie mbe tadidieko avao isake maraindray tie mila mifehe tegna raho. Mandeha aloha ka raho amy izay tsy memeke mba tsy hifamale amy ty soafera hafa.”

INO TY AZO ATAO NAHO TSY NAHAVITA NIFEHE TEGNA TIKA?

Va’e tsy hahavita hifehe tegna tika kindraike. Va’e tsy ho sahy hivavake amy i Jehovah tika naho fa miseho zay. Faie ko haligno fa amy ze fotoagne zay tika ro tena mila mivavake. Ko misalasala areke mivavake amy i Jehovah, le mangataha famelan-keloke naho fagnampeagne ama’e. Ko aheregne sasa ka i raha tsy mete natao’oy. (Sal. 51:9-11) Matokia fa tena hijanjigne azo ty Jehovah. (Sal. 102:17) Maniahy antika ty apostoly Jaona tie “magnalio antikagne ho afake amy ty ota iaby” ty lio i Jesosy. (1 Jaona 1:7; 2:1; Sal. 86:5) Kanao ty Jehovah mandrisike antika hamela heloke avao, le azo antoke fa tena modely amy izay reke. Afake matoky areke tikagne fa tena hamela antikagne reke.—Mat. 18:21, 22; Kol. 3:13.

Nivignetse tamy i Mosesy ty Jehovah naho fa tsy nahavita nifehe tegna reke tamy ie tan-tane efetse agney. Faie namela aze ty Jehovah. Rehafe ty Saontsi’e aza fa ndaty tena nanam-pinoagne naho fagneva ty ho tsikombegne ty Mosesy. (Deot. 34:10; Heb. 11:24-28) Maregne fa tsy nengà i Jehovah hizilike amy i Tane Nampitamaegney ao reke. Faie ho velome’e indraike reke amy Paradisay ao, le ho afake hiaigne nainai’e. Afake mitamà hiaigne nainai’e ka tikagne naho mikezake mafe hifehe tegna avao.—1 Kor. 9:25.