Ino ty Azo’o Ianaragne Boake amy ‘i Mpiana i Jesosy Nikokoa’ey’?

1. Tean’Andrianagnahare tika. Ino ty voka izay ama’o?

HOE ty apostoly Jaona: “Andrianagnahare hatea.” (1 Jaona 4:8) I Andrianagnahare ty namorogne ze kila raha. Faie o reha i Jaona rehoe, le maniahy antika ty hamarenagne raike toy: Andrianagnahare ty Ifotora o hateao. Tena tea antika reke. Ty voka’e, manjare mahatsiaro ho voaaro naho ho fale vaho ho afa-po amy ty fiaignagne.

2. Arake ty Matio 22:37-40, ino i lily fara’e lahibey roe rey, le nagnino ro va’e ho sarotse amantika ty magnorike i lily lahibey faharoey?

² Tsy maintsy maneho hatea tika. Ty anto’e, lily zay fa tsy safidy. (Vakio ty Matio 22:37-40.) Naho fa itika manjare mahafantatse soa an’Andrianagnahare, le va’e ho mora amantika ty magnorike i lily lahibey voaloha’ey. Voririke ka ty Jehovah, le lava mihevetse ze hahasoa antikagne avao sady soa fagnahy naho fa mifandrambe amantika. Faie va’e tsy ho mora amantika ty hagnorike i lily lahibey faharoey, satria tsy voririke o mpiara-manompo amantikagneo. Ie amy izaò, iareo ty tena ragnentika maifitse antika. Noho iareo tsy voririke zay, le va’e hirehake ndra hanao raha hahaboseke antika kindraike. Fohe i Jehovah soa fa tsy mora amantika ty maneho hatea naho fa miseho ze raha zay. Izay ty nahavy aze nampiasa ndaty hanoratse o Baibolio mba hanoroantika tie nagnino tika ro tena toko’e hifankatea, le akore ty fomba hanoroagne izay. Agnisa ty ndaty nampiasae’e zao ty Jaona.—1 Jaona 3:11, 12.

3. Ino ty raha nasongady i Jaona mateteke?

³ Nasongady i Jaona mateteke amy i boke nisorate’e rey fa tsy maintsy maneho hatea tika. Naho ty maregne aza, le amy i Filazantsara i Jaona ao ro tena ahatreavagne ty rehake tihoe “tea” naho “hatea” fara izay ty maro naho oharegne amy i Filazantsara telo ila’e rey. Va’e zato taogne teo ho eo ty Jaona tamy ireke nanoratse i Filazantsara’ey naho i taratasy telo minday ty agnara’e rey. Trea amy i raha nisorate’e rey, fa ty hatea ty toko’e handrisike ty Kristiana hanao raha. (1 Jaona 4:10, 11) Faie ndra tie nandrisike antika hanao izay aza reke, le elaela reke vaho nahavita nampihatse izay.

4. Ino ty mampiseho tie tsy nahavita naneho hatea ty Jaona kindraike?

⁴ Tamy i Jaona mbe nitanoray zao, le tsy nimora tama’e ty naneho hatea kindraike. Tamy iareo nandeha ta Jerosalema tagne tie indraike zay ohatse, le nipay tragno hivantagnagne naho fa niavy ta Samaria tao. Faie tsy nisy nimete handrambe iareo ty ndaty tao. Le ino ty natao i Jaona? Hoe ty Jaona naho i Jakoba rahalahi’e: “Tea’o vao Tompo ty hirehafa’ay tie misia afo ty boake an-dagnitse agne mba hampangotomomoke iareo?” (Lioka 9:52-56) Nisy raha ka nampiseho tie tsy nahavita naneho hatea tamo o apostoly nama’e reo ty Jaona. Nagnatogne i Jesosy ty rene i Jakoba naho i Jaona tie indraike, le nangatake tamy i Jesosy tie: “Anò aba ty anako reo toa mba hitoboke agnila’o eo, ... amy i Fanjakà’oy ao.” Nirahe i Jaona naho i Jakoba varagne ty rene iareo nahavy aze nangatake izay io. Nanao akore i apostoly ila’e rey naho fa naharey izay? Tena niboseke iareo. (Mat. 20:20, 21, 24) Faie ndra tie teo ze raha tsy nimete natao i Jaona zay, le mbe nitea aze avao ty Jesosy.​—Jaona 21:7.

5. Ino ty hodinehentikagne ato?

⁵ Hodinehentika amy ty lahatsoratse toy tie ino ty raha azontika ianaragne boake amy i Jaona naho ty raha ila’e nisorate’e miomba ty hatea. Naho fa mandineke ireo tika, le ho treantika tie akore ty azontika anoroagne fa teantika o rahalahio naho o rahavaventikagneo. Hianarantika ka tie akore ty hanoroa o loha ty keleiagneo tie tea’e ty keleia’e.

ASEHÒ AMY TY RAHA ATAO’O FA MANAGNE HATEA REHE

6. Akore ty nampisehoa i Jehovah tie tena tea antikagne reke?

⁶ Va’e hieretseretse tika tie fa maneho hatea ty ndaty raike naho fa tea aze avao am-pontikagne ao sady tsy manao rehake raty ama’e. Faie naho tena tea aze tika, le mila atorontika amy ty raha ataontikagne zay. (Ampitahao Jakoba 2:17, 26.) Tena tea antika ohatse ty Jehovah. (1 Jaona 4:19) Faie akore ty nampisehoa’e izay? Nisaontsie’e agnate Baiboly ao ohatse tie tena tea’e tikagne, sady fanjaka ty fomba nisaontsie’e aze. (Sal. 25:10; Rom. 8:38, 39) Faie tsy izay avao ty mahavy antikagne hino fa tena tea antikagne reke fa noho ty raha natao’e ho antika ka. Hoe ty Jaona: “Izao ty nampisehoan’Andrianagnahare ty hatea’e antikagne: Nirahe’e ho amy ty tontolo toy i Ana’e bakotokagney amy izay boake ama’e ty ivelomantikagne.” (1 Jaona 4:9) Fa ony i Jehovah tie hampijalegne naho hovonoegne i Ana-dahi’e bakotokagney, faie le nafoe’e reke noho ty hatea’e antikagne.​—Jaona 3:16.

7. Akore ty nampisehoa i Jesosy tie tea antikagne reke?

⁷ Nirehake tamy i mpiana’e rey ty Jesosy tie tena tea’e iareo. Faie naseho i Jesosy tamy ty raha natao’e ze hatea’e iareo zay fa tsy an-drehake avao. Hoe ty Jesosy: “Tsy misy ndaty managne hatea lahibey ambone izao, le ty mahafoe ty fiai’e hoahy ty ragne’e.” (Jaona 15:13) Naho fa mandineke ze raha natao i Jehovah naho i Jesosy ho antikagne tika, ino ty toko’e ho voka izay amantikagne?

8. Ino ty toko’e ataontikagne arake ty 1 Jaona 3:18?

⁸ Trea tie teantika ty Jehovah naho i Jesosy naho magnorike ze raha andilia iareo tikagne. (Jaona 14:15; 1 Jaona 5:3) Nandily antikagne mba hifankatea ohatse ty Jesosy. (Jaona 13:34, 35) Faie tsy toko’e ho an-drehake avao ty ampisehoantikagne amo o rahalahintikagneo naho o rahavaventikagneo ze hateantikagne iareo zay fa mila asehontikagne amy ty raha ataontikagne ka. (Vakio ty 1 Jaona 3:18.) Akore ohatse ty azontikagne anoagne izay?

TEAO TY RAHALAHI’O NAHO TY RAHAVAVE’O

9. Ino ty raha natao i Jaona noho ireke nanagne hatea ty hafa?

⁹ Azo i Jaona natao ty nagnarato fiagne niarake tamy i baba’e avao mba hahafaha’e hahazo vola hamelomagne ty keleia’e. Faie ndra aleo’e nanokagne ty fiaigna’e mba hagnampeagne ty hafa hahafantatse ty maregne miomba i Jehovah naho i Jesosy. Tsy mora ze raha nijobogne’e hatao zay. Ty anto’e, nenjehegne ohatse reke naho fa nitory. Natao sese-tane ka reke tamy ty taogne 96 tagne ho agne, ie amy izao reke fa bey tamy izay. (Asa. 3:1; 4:1-3; 5:18; Apok. 1:9) Faie mbe naseho’e avao tie tena tea ty hafa reke tamy ireke nigadray. Naho fa nahazo fahitagne ohatse reke tamy ireke natao sese-tane tamy ty tokonose i Patmo agney, le nisorate’e. Nalefa’e tamo o fiangonagneo zay naho fa niavy eo mba hahafantara iareo ty ‘raha hiseho tsy ho ela.’ (Apok. 1:1) Va’e tafara ty namotsoragne aze tamy ie natao sese-tane ta Patmo agney ty nanoratse i Filazantsara’ey. Nanoratse taratasy telo ka reke mba hampaherezagne naho hagnatanjahagne ty finoa o mpiara-manompo ama’eo. Akore ka ty azo’o hanahafagne i Jaona?

10. Akore ty ampisehoa’o tie tea’o o ndatio?

¹⁰ Trea amy ty raha jobogne’o atao amy ty fiaignagne ka tie tea’o o ndatio. Tea ty tontolo i Satana toy naho tsy mieretseretse afa-tsy ty tegna’o avao rehe, le ze hahametemete ty fiaigna’o avao, naho hahazoa’o vola naho laza avao ro tea’e handrisihagne azo. Faie ty mpanompo i Jehovah magneneke ty tane toy mikezake mampiasa ty fotoa’e mba hitoriagne i talily soay naho hagnampeagne o ndatio hiharine i Jehovah. Ty ila’e amy iareo aza manompo marain-tsy hariva.

11. Akore ty ahatreavagne tie tea i Jehovah naho ty mpiharo finoagne ama’e ty ankamaroa o mpanompo i Jehovah-o?

¹¹ Tsy maintsy miasa ty ankamaroa o mpanompo i Jehovah-o mba hahafaha iareo hahazo ze raha ilae iareo naho ty keleia iareo. Faie ndra tie eo zay, le mikezake avao ka iareo manohagne ze fandaharagne atao i fandaminagne. Mikezake magnampe o mpiharo finoagne amantikagneo ohatse iareo naho fa misy loza manjò iareo. Ty ila’e magnampe amy ty asa fagnoregnagne. Afake manao fagnomezagne an-tsitrapo mba hanohagnagne ty asa atao magneran-tane ka tika tsikiraidraike. Manao ireo tika, satria tea an’Andrianagnahare naho o mpiharo finoagne amantikagneo. Trea ka tie tea o rahalahy naho o rahavaventikagneo tika naho fa magnatreke fivoriagne isan-keregnandro ndra tie va’e ho rokake aza tikagne. Le magnomey toin-drehake ka tika ndra tie va’e matahotse aza. Ndra tie managne olagne ka aza tika, le mikezake avao mampahery ty hafa naho fa aloha ndra afara i fivoriagney. (Heb. 10:24, 25) Tena ankasitrahantikagne areke ty asa mafe atao o mpiharo finoagne amantikagne reo.

12. Akore ka ty nampisehoa i Jaona tie tea’e o rahalahi’e naho o rahavave’eo?

¹² Akore ka ty nanoroa i Jaona tie tea’e o mpiharo finoagne ama’eo? Nidera iareo reke sady nagnomey torohevetse iareo. Trea amy i taratasy nisorate’e rey ohatse fa nidera i rahalahi’e naho i rahavave’e rey reke noho ty finoagne nanagna iareo naho ty asa soa natao iareo. Faie nanoro hevetse iareo ka reke mba tsy hanotà iareo. (1 Jaona 1:8-2:1, 13, 14) Izay ka ty toko’e hataontikagne. Toko’e hidera o rahalahy naho o rahavaventikagneo tika noho ty asa soa atao iareo. Faie naho misy ndaty ka treantika tie manomboke managne toe-tsaigne raty ndra fahazaran-draty, le toko’e hagnitsy iareo aman-kasoa fagnahy tikagne. Atorontika tie teantikagne iareo naho manao izay tika. Maregne fa mila managne herim-po tika vaho hahavita hagnomey torohevetse iareo faie tsy tena ragnetse tika naho tsy manao izay.​—Ohab. 27:17.

13. Ino ty raha tsy toko’e hataontikagne?

¹³ Misy raha tsy toko’e hataontika ka mba hanoroagne tie teantika o rahalahio naho o rahavaventikagneo. Tsy toko’e ho mora boseke tika naho fa misy raha rehafe iareo mandagìgne antika. Dineho ohatse ty raha niseho toy: Nirehake tamy i mpiana’e rey ty Jesosy tie tsy maintsy mihinagne ty nofo’e naho minogne ty lio’e ze te hahazo havelogne nainai’e. (Jaona 6:53-57) Niboseke ty ankamaroa o mpiana’eo naho fa naharey zay, le tsy nanonjohy ty lia’e sasa. Faie tsy nanao hoe izay i tena nama i Jesosy rey, agnisa izay ty Jaona. Nipiteke tamy i Jesosy avao iareo. Tsy niazo iareo ty raha nirehafe i Jesosy sady va’e nitampoke iareo ka. Faie tsy nieretseretse iareo tie raty ze reha i Jesosy zay, sady tsy natao iareo hahaboseke iareo. Tena natoky i Jesosy aza iareo satria nihay iareo tie maregne i raha nirehafe i Jesosỳ. (Jaona 6:60, 66-69) Tsy toko’e ho mora boseke areke tika naho fa misy raha rehafe o mpiara-manompo amantikagneo. Toko’e hengantika iareo mba hagnazava ty raha tea iareo ho rehafegne.—Ohab. 18:13; Mpito. 7:9.

14. Nagnino tika ro tsy toko’e halaigne o mpiharo finoagne amantikagneo?

¹⁴ Nanoro hevetse antika ka ty Jaona mba tsy halaigne o rahalahy naho o rahavaventikagneo. Naho tsy magnorike izay tika, le manjare i Satana ty engantika hifehe antika. (1 Jaona 2:11; 3:15) Fa niseho ze raha zay tamy ty farampara ty taonjato voaloha’e. Nikezake mafe ty Satana nanao ze hahavy o mpanompo i Jehovah-o mba hifankalaigne naho tsy hiharo saigne. Nirehafe i Jaona tamy i taratasy nisorate’ey aza tie misy ndaty managne toe-tsaigne manahake i Satana ty agnivo o fiangonagneo eo. Agnisa izay ty Diotrefa. Natao’e ze hampizarazara o fiangonagneo. (3 Jaona 9, 10) Tsy nihajae ka o androanavi-pagnahy nirahe ty Filan-keve-pitantanagne hitilike o fiangonagneò. Nihorohoroe’e aza ze Kristiana nandrambe i ndaty rey. Tena raty ze raha natao’e zay! Mikezake ka ty Satana amy hinane zao mba hampizarazara ty vahoa i Jehovah. Lonike areke tika mba ho tea o mpiharo finoagne amantikagneo avao.

TEAO TY KELEIA’O

15. Ino ty raha tsy maintsy tadidie o loha ty keleiagneo?

¹⁵ Trea tie tena tea ty keleia’e o loha ty keleiagneo naho magnomey ze raha paliae iareo ara-nofo. (1 Tim. 5:8) Faie tsy toko’e ho haligno’e ka fa tsy maintsy magnomey ze raha ilae ty keleia’e ara-pagnahy ka reke. (Mat. 5:3) Mareho ohatse ty raha natao i Jesosy tamy ireke nipehegne tamy i hazo fijaleagney teoy. Rehafe ty Filazantsara i Jaona fa mbe nieretseretse i keleia’e rey avao reke. Nitsangagne marine i Jaona teo ty Maria rene i Jesosy tamy izay. Nijale mafe reke tamy izay, faie le mbe nieretseretse ty fomba hikarakaragne an-drene’e avao. Nangatahe’e ohatse ty Jaona mba hikarakara i Maria. (Jaona 19:26, 27) Maregne fa mbe teo i rahalahi’e naho i rahavave’e niharo troke tama’e rey. Faie i Jaona ty nagnankigna’e an-drene’e. Ty anto’e, mbe tsy nisy nanonjohy ty lia’e varagne i rahalahi’e naho i rahavave’e rey tamy izay, le tsy hahavita hikarakara ze raha paliae i rene iareo ara-nofo naho ara-pagnahy. Tena ohatse soa hoahy ty loha ty keleiagne ty Jesosy.

16. Ino iaby ty niandraiky i Jaona?

¹⁶ Nimaro ty andraiky i Jaona. Amy ty maha apostoly aze ohatse, le tsy maintsy nikezake reke mba ho loha laharagne amy ty asa fitoriagne. Va’e nanambaly ka reke, le tsy maintsy nikarakara ze raha nipaliae ty keleia’e ara-nofo naho ara-pagnahy. (1 Kor. 9:5) Ino ty raha azo ty loha ty keleiagne ianaragne boake amy izay?

17. Akore ty azo ty loha ty keleiagne atao mba hampisehoagne tie tea’e ty keleia’e?

¹⁷ Va’e ho maro ka ty andraiky ty loha ty keleiagne raike. Tsy maintsy miasa mafe ohatse reke naho fa ampiasagne agne, amy izay midera i Jehovah o ndatio naho fa mahatrea izay. (Efes. 6:5, 6; Tit. 2:9, 10) Va’e ho androanavi-pagnahy ka ohatse reke ndra mpagnampe amy ty fanompoagne, le mila mampahery naho magnampe o rahalahio naho o rahavaveo sady toko’e ho voalohan-draha ama’e ka ty asa fitoriagne. Faie misy raha lahibey hafa ka mila atao’e. Mila mitarike fotoam-pivavaha ty keleiagne tsy tapake reke. Tena hankasitrake aze o keleia’eo naho fa mahatrea aze mikezake mafe magnampe iareo mba ho salama ara-batagne naho ho falefale vaho hifandrambe maifitse amy i Jehovah avao.​—Efes. 5:28, 29; 6:4.

“KO MIALA AMY TY HATEAKO”

18. Ino ty raha natokisa i Jaona?

¹⁸ Fa niantetse ty Jaona vaho nimate, sady maro ka ty raha nahafinaritse niaigna’e. Faie maro ka ty olagne natrehe’e, va’e ho nampihegne ty finoa’e. Faie nikezake mafe avao reke mba hagnorike i lily i Jesosy rey. Agnisa izay i lili’e tihoey tie teao o rahalahi’o naho o rahavave’ò. Ty voka’e, natoky ty Jaona tie tea aze ty Jehovah naho i Jesosy sady hagnomey hery aze iareo mba hahavita’e miatreke ty olagne manjò aze. (Jaona 14:15-17; 15:9, 10; 1 Jaona 4:16) Ndra inogn’inogne natao i Satana naho ty tontolo’e toy, le tsy nahakalagne i Jaona tsy haneho hatea o mpiharo finoagne ama’eo zay. Naseho’e tamy ty reha’e naho tamy raha natao’e aza ze hatea’e iareo zay.

19. Mandrisike antika hanao inogne ty 1 Jaona 4:7, le ino ty anto’e?

¹⁹ Miaigne amy ty tontolo fehe i Satana toy eto manahake i Jaona ka tika amy hinane zao. I Satana ty andrianagnahare ty tontolo toy sady tsy managne hatea reke. (1 Jaona 3:1, 10) Tea’e naho malaigne o rahalahy naho o rahavaventikagneo tika. Faie tsy ho afake hanao izay reke naho tsy itika ro magnenga aze hanao izay. Lonike areke tika mba ho tapa-kevetse ty ho tea o rahalahy naho o rahavaventikagneo, le haneho izay amy ty raha rehafentika naho amy ty raha ataontika. Naho itika manao izay, le ho fale satria agnisa ty keleia i Jehovah sady tena ho falefale avao ka.​—Vakio ty 1 Jaona 4:7.