Inogne ty Hagnampe Azo Hanagne Tanjogne Ara-pagnahy Sady Hahavita Hagnatratse Izay?

1. Inogne iaby ty tanjogne azontikagne tratraregne?

TENA teantika ty Jehovah amy ty maha Kristiana antikagne. Teantika naho ty fara’e soa vitantika ro meintikagne aze naho fa itika manompo aze. Faie naho itika te hagnomey ze fara’e soa ho aze, le mila managne tanjogne ara-pagnahy. Agnisa izay ty hanagne i toetse Kristiana rey, hianatse ty fahaiagne ilaegne amy ty fanompoagne vaho hipay fomba hagnampeagne ty hafa.b

2. Nagnino tika ro toko’e hanagne tanjogne ara-pagnahy naho hikezake mafe hagnatratraragne aze?

² Nagnino tika ro toko’e hanao fandrosoagne ara-pagnahy? Voaloha’e, te hampifale i Babantikagne bey hatea an-dagnitse agney tika. Fale ty Jehovah naho fa mahavazoho antika mampiasa ze fahaiagne iaby anagnantika amy ty fanompoagne aze. Ankoatse izay, te hanao fandrosoagne ara-pagnahy ka tika satria te hagnampe o rahalahy naho o rahavaventikagneo amy ty fomba maro. (1 Tes. 4:9, 10) Afake manao fandrosoagne areke tika iaby, ndra fa ela ndra vaho tsy ela ty naha tagnate ty hamarenagne ao antika. Andao hohenteantikagne tie akore ty fomba azontikagne anoagne izay.

3. Inogne ty raha nirisihe i apostoly Paoly hatao i Timoty? ( 1 Timoty 4:12-16)

³ Mbe nitanora ty Timoty tamy i apostoly Paoly nanoratse i taratasy ho aze voaloha’ey, faie fa ni-androanavi-pagnahy za-draha ka. Faie mbe nirisihe i Paoly avao reke mba hanao fandrosoagne ara-pagnahy. (Vakio ty 1 Timoty 4:12-16.) Naho fa mamaky o reha i Paoly rehoe rehe, le ho voamare’o tie tea’e hanao fandrosoagne amy ty lafin-draha roe retoagne ty Timoty: Voaloha’e, hanagne i toetse toko’e hanagna ty Kristiana rey, agnisa izay ty hatea, finoagne, naho halio findesam-batagne. Faharoe, nila nagnasoa ty fahaia’e ty raha retoa ka reke: Famakiagne teny agnatreha o ndaty maro eo, fahaiagne mandrese lahatse naho ty fahaiagne mampianatse. Hotreantika amy ty fandinehagne ty modely i Timoty fa hagnampe antika handroso ara-pagnahy ty fanagnagne tanjogne azo tratraregne. Hodinehentikagne ato ka tie akore iaby ty azontika ampitomboagne ty fanompoantikagne.

MIKEZAHA HANAGNE TOETSE KRISTIANA

4. Inogne ty nahavy i Timoty ho azo i Jehovah nampiasaegne, arake ty Filipianina 2: 19-22?

⁴ Inogne ty nahavy i Timoty ho azo i Jehovah nampiasaegne? Nanagne toetse soa miambake reke. (Vakio ty Filipianina 2:19-22.) Trea amy ty raha nirehafe i Paoly miomba aze fa niambane ty Timoty, tsy nivalike, nazoto sady azo atokisagne. Tena nitea naho nikarakara o rahalahi’e reo ka reke. Izay ty nahavy i Paoly ho tea i Timoty naho tsy hisalasala ty hagnankigne andraikitse sarotse tama’e. (1 Kor. 4:17) Ho tea i Jehovah naho ho azo ampiasaegne amo o fiangonagneo eo ka tika naho mikezake hanagne i toetse tea i Jehovah rey.​—Sal. 25:9; 138:6.

5. a) Inogne ty hagnampe azo hahatrea tie ty aia amy i toetse Kristiana rey ro mila hasoae’o? b) Akore ty atao i rahavave tanora atoro amo o sareo eò mba hagnatratrara’e i tanjo’e te hampitombo ty fitretréza’e ty hafay?

⁵ Managna tanjogne voafaritse soa. Dineho am-bavake tie inogne amy ty toetse’o ro mila hasoaegne, le mijobogna raike amy i toetse rey naho fa avy eo. Ohatse, te hampitombo ty fitretréza’o ndra ty fagniria’o hagnampe o rahalahio naho o rahavaveo vao rehe? Sa te ho tea filongoagne naho hamela heloke? Va’e hotrea’o tie magnampe ka ty magnontane ty ragne’o maifitse azo tie inogne ty raha mila hasoae’o.​—Ohab. 27:6.

6. Inogne ty azo’o atao mba hahavy azo hahatratse i tanjogne hanagne i toetse tea’o hanagnagney?

⁶ Manoa raha hagnatratraragne i tanjo’oy. Akore ty azo’o anoagne izay? Fomba raike anoa’o izay ty fianaragne soa i toetse tea’o hohasoaegney. Andao hatao tihoe te hikezake mba hamela heloke rehe. Hanomboha’o aze, le va’e hianatse naho hisaintsaigne i ndaty rehafe ty Baiboly tie namela heloke naho tsy namela heloke rey rehe. Dineho ohatse ty Jesosy. Namela heloke ty hafa reke. (Lioka 7:47, 48) Tsy nifantoke tamy ty hadisoagne natao iareo ka reke fa ty raha soa ho vita iareo ro nifantoha’e. Faie o Fariseo tamy ty andro i Jesosio ‘nihevetse ty ndaty hafa ho tsy misy dika’e.’ (Lioka 18:9) Eretsereto zao naho fa boake misaintsaigne o ohatse rehoe rehe: ‘Manao akore ty fahatreavako ty ndaty hafa? I toetse iareo manao akorey ro ifantohako?’ Naho sarotse ama’o ty mamela heloke ty ndaty raike, le kezaho sorategne iaby ty toetse soa anagna o ndaty iohoe. Le saintsaigno indraike zao: ‘Akore ty fahatreava i Jesosy o ndaty iohoe? Hamela heloke aze vao reke sa tsy hamela aze?’ Magnitsy ty toe-tsaintikagne ty fanoagne izay naho fa mianatse tika. Amy ty voaloha’e, va’e hikezake mafe tika vaho hahavita hamela heloke ty ndaty nanao raha nahaboseke antikagne. Faie naho mikezake avao tika, le hanjare ho mora amantika ty manao izay.

MIKEZAHA HANAGNE I FAHAIZAGNE ILAEGNE AMY TY FANOMPOAGNE REY

7. Akore ty fomba ampiasà i Jehovah o mpanompo’e managne fahaiagneo tie amy izao? (Ohabolana 22:29)

⁷ Azo’o atao tanjogne ka ty hianatse i fahaiagne ilaegne amy ty fanompoagne rey. Eretsereto ohatse ty hamaro ty mpiasa ilaegne mba hagnoregne Betela, Anjomba Fanoagne Havoriambey naho Anjomba i Fanjakagney rey. Ty ankamaroa o mpiasa rehoe le tamo o rahalahy naho o rahavave za-drahao ty nianara iareo nanao i asay. Arake ty atoro amo o sareo eo, le sambe mikezake hanagne fahaiagne ilaegne mba hikojakojagne ty Anjomba Fanoagne Havoriambey naho Anjomba i Fanjakagney o rahalahy naho o rahavaveo. Noho ty fampiasà i Jehovah Andrianagnahare i “Mpanjaka nainai’ey” naho i Kristy Jesosy, i “Mpanjaka ty mpanjakay” ty fahaia o rahalahy naho o rahavaveo, le manjare mahavita raha miambake iareo. (1 Tim. 1:17; 6:15; vakio ty Ohabolana 22:29.) Miasa mafe naho mampiasa ty fahaiantikagne tika mba hagnomeagne voninahitse i Jehovah fa tsy ty tegnantikagne.​—Jaona 8:54.

8. Inogne ty hagnampe azo hahay tie inogne ty raha mila ianara’o?

⁸ Managna tanjogne voafaritse soa. Inogne ty fahaiagne tea’o hanagnagne? Agnonteneo ty androanavi-pagnahy ama’areo eo ndra va’e ty mpiandraikitse faritse’areo tie inogne ty raha va’e ho vita’o ty mianatse aze. Naho mirehake, ohatse, iareo tie mila magnasoa ty fahaia’o mirehake naho ty fahaiza’o mampianatse rehe, le agnonteneo iareo mba hagnampe azo hahay tie ty manao akore ama’e ro mila hasoae’o. Le mikezaha hagnasoa aze amy izay naho fa avy eo. Akore ty azo’o anoagne izay?

9. Inogne ty azo’o atao’o mba hahaia’o i raha tea’o ho haỳ?

⁹ Manoa raha hagnatratraragne i tanjo’oy. Andao hatao tihoe te hagnasoa ty fahaia’o mampianatse rehe. Azo’o atao ty mianatse soa ty bokekele tihoe Hasoao ty Fahaia’o Mamaky Teny Naho Mampianatse. Naho fa managne anjara ka rehe amy i fivoriagne andavanandroy, le azo’o atao ty mangatake rahalahy matotse raike mba hitsanogne i anjara’oy aloha ty hanoa’o aze am-pivoriagne agne naho hagnomey soso-kevetse hagnasoagne ty fanoa’o aze. Omano soa areke ty anjara meagne azo, amy izay hotrea o ndatio tie mikezake mafe rehe sady azo atokisagne.​—Ohab. 21:5; 2 Kor. 8:22.

10. Mirehafa ohatse raike mampiseho tie akore ty hampitomboagne ty fahaiagne teantikagne hanagnagne.

¹⁰ Faie akore naho sarotse ama’o ty mianatse i raha tea’o ho haỳ? Ko kivy! Tsy tena nahay namaky teny soa ty rahalahy Garry tie taloha. Tsiaro’e fa nimegnatse reke naho fa namaky teny tam-pivoriagne agne. Faie tsy nikivy reke fa nikezake nagnasoa ty fahaia’e mamaky teny avao. Nirehake reke tie noho ty fampiofagnagne niazo’e, le nanjare nahavita nanao lahajaka hoahy ty ndaty maro amy i Anjomba i Fanjakagney agne, amy ty havoriambey faritse naho vondrom-paritse reke tie amy izao.

11. Inogne ty hagnampe antika hahay ty andraikitse fagnampe’e ampanoegne antika, manahake i Timoty?

¹¹ Nanjare mpizaka malaza naho mpampianatse miambake vao ty Timoty? Tsy mirehake izay ty Baiboly. Faie azo antoke fa noho ty fagnoriha’e i toroheve i Paolỳ ty nahavy aze nahavita soa ty andraikitse nankinegne tama’e. (2 Tim. 3:10) Naho itika ka magnasoa ty fahaiantikagne, le ho vitantika soa ty andraikitse fagnampe’e ampanoegne antikagne.

MIPALIAVA FOMBA HAGNAMPEAGNE TY HAFA

12. Akore ty fa nagnampea ty hafa azo?

¹² Sambe mandrambe soa boake amy ty fagnampea ty hafa tika iaby. Naho marare ohatse tika, le fale naho fa mitilike antika an-dapotaly agne o androanavi-pagnahy agnisa ty Komity Mifandrae amy ty Lapotalio ndra o Antoko Mpitilike Marareo. Naho miatreke raha sarotse ka tika, le fale naho fa manokagne fotoagne mba hitsanognagne antika naho hampaherezagne antika o androanavi-pagnahy bey hateao. Naho sarotse amantikagne ka ty mitarike fampianaragne Baiboly, le fale tika naho fa misy mpisava lalagne za-draha miarake mampianatse Baiboly amantika sady magnomey soso-kevetse antika. Mahafale o rahalahy naho o rahavave rehoe ty magnampe antika. Ho fale manahake iareo ka tika naho vognogne hagnampe ty hafa. Hoe ty Jesosy: “Mahasambatse ty magnomey ty amy tie mandrae.”(Asa. 20:35) Inogne ty hagnampe azo naho te hampitombo ty fanompoa’o amy ze lafi’e rezay ndra amy ty fomba hafa rehe?

13. Inogne ty raha toko’e ho tadidiegne naho fa itika mametrake tanjogne?

¹³ Mitaoa tsy mone tsy ho voafaritse ty tanjogne atao’o. Va’e hieretseretse, ohatse, rehe tie: ‘Te ho maro raha atao amo o fiangonagneo eo raho!’ Va’e ho sarotse ama’o areke ty hamantatse tie akore ty hagnatratraragne ze tanjo’o zay, sady va’e ho sarotse ama’o ka ty hamantatse tie fa nitratse’o vao reke sa mbe mboe’e. Anò mazava naho voafaritse soa areke ty tanjo’o. Va’e hagnampe azo aza ty fanoratagne izay naho ty raha toko’e hatao’o mba hagnatratraragne aze.

14. Nagnino tika ro mila mahay manahatsahatse naho fa mametrake tanjogne?

¹⁴ Mila mahay manahatsahatse ka tika naho fa mametrake tanjogne. Fa nagnino? Satria tsy haintikagne ty raha hiseho amy ty fiaignantikagne. Dineho ohatse toy. Nagnampe i fiangonagne vaho nioregne ta Tesalonika tagney ty apostoly Paoly. Azo antoke fa nieretseretse reke tie ty fijanogna’e agne avao ty hahafaha’e magnampe o fiangonagne vaovao iohoe. Faie sinere o mpanohetseo hiala ty agne ty Paoly. (Asa. 17:1-5, 10) Va’e ho nagnoho-doza o rahalahi’eo ty Paoly naho nijanogne tagne avao. Neké’e areke i fiovagney. Faie tsy tihoe lelia’e tsy nagnampe iareo reke. Nandefa i Timoty ta Tesalonika agne reke mba hagnampe o fiangonagne vaovao iohoe hanagne finoagne matanjake. (1 Tes. 3:1-3) Azo antoke fa tsy maintsy ho nahafale o Tesalonianao ty nahatrea tie nivognogne handeha amy ze toeragne mipay fagnampeagne ty Timoty.

15. Nagnino ro va’e hagnova ty tanjontikagne ty fiovà ty raha iaignantika? Mirehafa ohatse raike.

¹⁵ Afake miana-draha amy ty raha natrehe i Paoly ta Tesalonika agne tika. Va’e hametrake tanjogne raike tika, faie va’e hiova tampoke ty raha iaignantikagne le misakagne antika tsy hahatratse i tanjontikagney zay. (Mpito. 9:11) Naho izay ty raha manjò azo, le mipalia tanjogne hafa azo’o tratraregne. Izay zao ty natao ty mpivaly raike toy. I Ted naho i Hiedi ty agnara iareo. Nanagne olagne ara-pahasalamagne ty raike amy iareo, le tsy maintsy niala tamy Betela tao iareo. Faie noho ty hatea iareo i Jehovah, le nipay fomba hafa mba hampitomboagne ty fanompoa’e iareo. Nanomboke nanao mpisava lalagne maharetse iareo. Tinendre ho mpisava lalagne manokagne iareo tafara izay, le i Ted niofagne ho mpiandraikitse faritse mpisolo toeragne. Faie niova ty fetra ty taogne takegne amo o mpiandraikitse faritseo. Nihay i Ted naho i Hiedi areke tie tsy ho afake hanao o asa ty faritse iohoe iareo satria fa antetse loatse. Ndra tie nidiso tamà aza iareo noho ze raha zay, le neké iareo tie afake manompo i Jehovah amy ty fomba hafa iareo. Hoe ty Ted: “Nianara’ay tie tsy toko’e hifantoke amy ty endrem-panompoagne raike avao zahay.”

16. Inogne ty lesogne ianarantikagne boake amy ty Galatianina 6:4?

¹⁶ Tsy afake mifehe ty raha hiseho amy ty fiaignantikagne tika. Tena ilaegne areke ty mitadidy tie tsy arakarake ty tombotsoam-panompoagne anagnantika ro mahasarobily antika amy i Jehovah sady tsy toko’e hampitaha ty tombotsoam-panompoagne anagnantikagne amy ty ahy ty hafa ka tika. Hoe ty Hiedi: “Tsy ho falefale sasa rehe naho mampitaha ty fiaigna’o amy ty ahy ty hafa.” (Vakio ty Galatianina 6:4.) Tena ilaegne areke ty mipay fomba hafa mba hagnampeagne ty hafa naho hanompoagne i Jehovah.c

17. Inogne ty azo’o atao naho misy tombotsoam-panompoagne tea’e ho tratraregne?

¹⁷ Naho mete le anò ze hanagna’o fiaignagne tsotra avao sady ko mitrosa naho mbe azo’o atao, amy izay rehe ho afake hampitombo ty fanompoa’o. Mametraha tanjogne kedekede hagnampe azo hagnatratse ty tanjogne lahibey tea’o ho tratraregne. Naho te hanao mpisava lalagne maharetse ohatse rehe, nagnino naho manao mpisava lalagne mpagnampe mitohy heike tie amy izao? Naho ohatse ka te ho voatendre ho mpagnampe amy ty fiangonagne rehe, nagnino naho mampitombo ty lera anompoa’o heike sady mikezake mba hitilike o mpiara-manompo tsy salama naho fa antetse amy ty fiangona’areo eò? Miankigne amy ty raha atao’o amy izao ty va’e hahavy azo hahazo tombotsoam-panompoagne fagnampe’e naho fa afara agne. Mikezaha areke hamita soa ze andraikitse ampanoegne azo.​—Rom. 12:11.

18. Arake o ohatse amo o sareo eò, inogne ty ianara’o boake amy ty raha natao i rahavave Beverley?

¹⁸ Mbe afake mametrake tanjogne naho mikezake hagnatratse izay avao tika ndra tie fa antetse aza. Dineho ohatse ty rahavave Beverly, 75 taogne. Narare mafe reke hafara’e tsy afake nandeha. Faie te hanohagne amy ty fomba feno tamy i kezake manokagne hizaragne fanasagne amo o ndatio mba hagnatreke Fahatsiarovagney reke. Nametrake tanjogne voafaritse soa areke reke. Naho fa nitratse i rahavave Beverly i tanjo’e tamy i kezake manokagneỳ, le tena nifale reke. Nandrisike ty hafa hiasa mafe amy ty fanompoagne ty kezake natao i Beverly. Sarobily amy i Jehovah ty asa anoe o rahalahy naho o rahavaventikagne fa antetse reo, ndra tie voafetra avao aza ty raha azo iareo atao noho ty raha iaigna iareo.​—Sal. 71:17, 18.

19. Inogne iaby ty tanjontika ara-pagnahy azontikagne tratraregne?

¹⁹ Mametraha tanjogne azo’o tratraregne. Mikezaha hanagne toetse hahavy azo ho tea i Jehovah. Mikezaha hanagne i fahaiagne ilaegne amy ty fanompoagne rey mba hahavy azo ho azo i Jehovah naho i fandamina’e ampiasaegne. Mipaliava fomba hahafaha’o magnampe o rahalahio naho o rahavaveo.d Hotahie i Jehovah rehe amy izay, sady “halange amy ze kila ndaty ty fandrosoa’o”, manahake i Timoty.​—1 Tim. 4:15.