Mikezaha ‘Hifampahery Lognandro’

1. Ino ty asa azontikagne iaby atao, arake ty 1 Tesalonianina 5:11?

FA NISY fotoagne vao namboaregne ndra nihavaozegne ty Anjomba i Fanjakagney ivoria’o? Naho eka ty vale’e, le azo antoke fa tsy haligno’o ty nivoria’o tao voaloha’e. Tena nankasitrake i Jehovah rehe tamy izay. Va’e nifale loatse aza rehe le nipopoke ty ranomaso’o sady tsy nivita’o iaby ty nihira tamy i hira fanombohagney. Magnomey voninahitse i Jehovah o Anjomba i Fanjakantikagney io, satria tena fanjaka ty fomba namboaragne aze. Faie vao mainke hagnomey voninahitse aze tika naho fa mandrambe anjara amy ze fagnoregnagne agn’ohatse zay. Mbe sarobily ambone o fagnoregnagne tragno ara-bakitenio o fagnoregnagne iohoe. Tafilitse amy izay ty mampahery ze ndaty avy amy i Anjomba natao hanompoagne an’Andrianagnaharey ao. Va’e ze karazagne fagnoregnagne zay ty tan-tsay i apostoly Paoly tao, naho fa nanoratse ty rehake trea amy 1 Tesalonianina 5:11 ao, i andinin-teny fototse ty fianaragne toỳ reke.​—Vakio.

2. Ino ty hodinehentika amy ty lahatsoratse toy?

² Tena modely soa ho antika ty Paoly satria tena nahay nampahery o rahalahi’e naho o rahavave’eo. Nitretré iareo reke. Hodinehentikagne amy ty lahatsoratse toy tie akore ty nagnampea’e o rahalahi’e naho o rahavave’eo mba 1) hahavita hiaretse fitsapagne, 2) hilongo amy ty hafa, naho 3) hagnamafe ty finoa iareo i Jehovah. Hodinehentikagne ka tie akore ty fomba azontika anahafagne aze amy ty fomba hampaherezagne o rahalahy naho o rahavaventikagneo.​—1 Kor. 11:1.

NAMPEA I PAOLY MBA HAHAVITA HIATREKE FITSAPAGNE O RAHALAHI’E NAHO O RAHAVAVE’EO

3. Akore ty nanoroa i Paoly fa nahay nanahatsahatse reke?

³ Tena nitea i Paoly o rahalahi’e naho o rahavave’eo. Fa niatreke raha sarotse reke tie taloha. Izay ty nahavy aze ho soa fagnahy naho hitretré o rahalahi’e naho o rahavave’eo naho fa niatreke raha sarotse ka iareo. Nisy fotoagne ty Paoly tsy nanam-bola, le tsy maintsy nipay asa mba hahafaha’e mahazo ze raha nilae’e naho nilae i nama’e niarake tama’e rey. (Asa. 20:34) Mpanao tragnolay ty niasa’e. Vaho niavy ta Korinto tagne reke, le niarake namboatse tragnolay tamy i Akoila naho i Prisila. Faie nitory tamo o Jiosio naho o Grikeo reke “isake sabata.” Ie naho fa niavy ty Silasy naho i Timoty, le “nifantoke tanterake tamy ty fitoriagne ty saontsin’Andrianagnahare ty Paoly.” (Asa. 18:2-5) Tsy nitondregne tamy ty asa fivelomagne ty Paoly fa nifantoke avao tamy i tanjo’e hanompo i Jehovah-y. Tena afake nampahery o rahalahi’e naho o rahavave’eo areke ty Paoly. Naniahy iareo reke mba tsy hifantoke amo o raha sarotse amy ty fiaignagneo naho ty andraiky iareo amy ty keleiagne eo, le hanao ambanen-draha “ty raha tena lahibey.” Tsy ino zay fa ze raha iaby mifandrambe amy ty fanompoagne i Jehovah.​—Fil. 1:10.

4. Akore ty nagnampea i Paoly naho i Timoty o mpiharo finoagne amy iareò mba hahavita hiatreke fagnenjehagne?

⁴ Tafara kede ty niforogna ty fiangonagne ta Tesalonika agne, le niatreke fagnenjehagne mafe o Kristiana vaovao rehoe. Nisy vahoake maro nanohetse i Paoly naho i Silasy rezay niboseke naho fa tsy nahatrea iareo, hafara’e ‘ty rahalahy ila’e nitrea o ndaty rehoe ro ndra niriridririte iareo mbamy ty lahibey i tanàgney mbeo.’ Nikorakorake iareo naho fa niavy agne tie: “Manohetse ty lily i Kaisara iareo iaby hinaneo.” (Asa. 17:6, 7) Azo’o sare an-tsaigne vao ty nitaho o Kristiana vaovao rehoe naho fa nahita tie nanohetse iareo ty ndaty tamy i tanàgney teo? Va’e ho nahavy iareo tsy hafana fo amy ty fanompoagne i Jehovah sasa zay. Faie tsy nitea i Paoly hiseho ze raha zay. Maregne fa nienga i tanàgney ty Paoly naho i Silasy, faie natao iareo azo antoke tie nivoakarakara soa avao o fiangonagne vaovao iohoe. Naniahy o Tesalonianao ty Paoly tie: “Nirahe’ay ty Timoty rahalahi’ay ... mba hagnatanjake naho hampahery anareo, soa tie ho mafe ty finoa’areo. Amy izay tsy ho voaozongozogne nareo ndra tie eo aza i haoreagne rey.” (1 Tes. 3:2, 3) Hoe tan-tanàgne amy iareo a Listra agne ty niatreha i Timoty fagnenjehagne voaloha’e. Nihita’e ty fomba nagnatanjaha i Paoly ty finoa o rahalahi’e tagneo. Noho ty fahatreava i Timoty ty fomba nanohagna i Jehovah iareo ro nahavy aze ho afake nagnomey toky i rahalahi’e naho i rahavave’e vaovao ta Tesalonika agne rey tie mbe hiova avao o raha iaigna iareo io.​—Asa. 14:8, 19-22; Heb. 12:2.

5. Ino ty soa nirambese i rahalahy Bryant naho fa nampea ty androanavi-pagnahy raike reke?

⁵ Ino ka ty raha hafa natao i Paoly mba hagnatanjahagne o mpiharo finoagne ama’eo? Naho fa niheregne nitilike i Listra, i Ikonioma, naho i Antiokia iareo amy i Barnabasy, le “nanendre androanavi-pagnahy” tamo o tanàgne rehoe. (Asa. 14:21-23) Tsy isalasalagne fa natoro o lahilahy tinendre rehoe tie tena fampaherezagne hoahy o fiangonagneo ty fisia iareo, manahake o androanavi-pagnahy amy izaò avao. Mareho ty raha nirehafe ty rahalahy raike atao tihoe Bryant toy. Hoe reke: “Tamy izaho ni-15 taogne, le nienga anay ty babako, le i reneko nivoaroake. Nahatsiaro ho irerike raho tamy izay sady nikivy.” Ino ty nagnampe i Bryant hahavita hiaretse tamy izay? Hoe reke: “Nisy androanavi-pagnahy raike atao tihoe Tony zay nifampirehake amako naho fa tam-pivoriagne agne naho tamy ty fotoagne hafa. Nirehake miomba ty ndaty niatreke raha sarotse faie mbe nifalefale avao rey reke. Nivakie’e tamako ty Salamo 27:10, sady mateteke reke ro nirehake tamako ty miomba i Hezekia. Tsy nivalike reke ndra tie tsy nagnomey modely soa aze aza ty baba’e.” Ino ty nivoka izay tamy i Bryant? Hoe reke: “Noho ty fampahereza i Tony ahy ro nahavy ahike nanao ty asa tena mahafale toy, le ty fanompoagne marain-tsy hariva.” Ry androanavi-pagnahy, mikezaha mba le avy le hagnampe ze ndaty va’e hipay “rehake mampahery”, manahake i Bryant.​—Ohab. 12:25.

6. Akore ty nampiasà i Paoly ty tantaram-piaigna ty hafa mba hampaherezagne o rahalahi’e naho o rahavave’eo?

⁶ Naniahy o mpiharo finoagne tama’eo ty Paoly tie misy “vavolombelogne maro hoe rahogne” nahavita niaretse raha sarotse noho ty hery i Jehovah. (Heb. 12:1) Nihay i Paoly tie afake nagnampe o rahalahi’e naho o rahavave’eo hanagne herim-po naho hifantoke avao amy i “tanà i Andrianagnahare velogneỳ” ty tantara i ndaty taloha nahavita niatreke raha sarotse rey. (Heb. 12:22) Hoe izay avao ka tie amy izao. Ia amantika zao ty tsy nahazo fampaherezagne naho fa mamaky ty fomba nagnampea i Jehovah i Gideona, i Baraka, i Davida, i Samoela, naho ty maro hafa? (Heb. 11:32-35) Akore ty amy i rahalahy naho i rahavaventikagne manam-pinoagne amy izao rey? Mateteke ty amy i foibeintikagne agne ro mahazo taratasy boake amo o rahalahy naho o rahavaventikagneo. Mirehake iareo tie nahazo fampaherezagne naho fa boake namaky ty tantara ty Vavolombelo i Jehovah manam-pinoagne amy izao rey.

NATORO I PAOLY O RAHALAHI’E NAHO O RAHAVAVE’EO TIE AKORE TY FOMBA HILONGOAGNE AMY TY HAFA

7. Ino ty ianara’o boake amy i toroheve i Paoly amy Romanina 14:19-21 aoy?

⁷ Mampahery o rahalahy naho o rahavaventikagneo tika naho fa manao ze hisia ty filongoagne amo o fiangonagneo eo. Tsy toko’e hengantikagne hampizarazara antika o tsy fitovian-kevetseo, sady toko’e hikezake handefetse tika naho mbe tsy misy toro lala ty Baiboly voadika. Dineho ty ohatse raike toy. Nisy Jiosy naho Kristiana boake amy ty firenena hafa tamy ty fiangonagne ta Roma tagne. Naho fa nifoagnagne ty Lalà i Mosesy, le tsy voatere hagnorike i lily hifaly ty karazan-kanegne ila’e rey sasa ty mpanompo i Jehovah. (Mar. 7:19) Nanomboke tamy izay, ty Kristiana Jiosy ila’e le nihinagne ze karazan-kanegne iaby. Fa ty Kristiana Jiosy ila’e tsy nenga ty eretsere’e hanao izay. Nanjare nizarazara areke i fiangonagney noho ze raha zay. Nasongady i Paoly fa tena ilaegne ty milongo soa naho manao ze hiarovagne o filongoagneo. Hoe reke: “Ndra aleo tsy mihinan-kena ndra minogne divay ndra manao raha hafa va’e hanafintohigne ty rahalahi’o.” (Vakio ty Romanina 14:19-21.) Trea amy izay fa nampea i Paoly o mpiharo finoagne ama’eo mba hahatrea tie manimba ty filongoantikagne naho o fiangonagneo o aly hevetseo. Nivognogne hagnova ty fahazara’e ka reke amy izay tsy tafintohigne ty hafa. (1 Kor. 9:19-22) Hampahery ty hafa naho manao ze hisia ty filongoagne ka tika naho tsy mitsara ty hafa amy ty fiheventikagne manokagne.

8. Akore ty natao i Paoly naho fa nisy olagne lahibey natahoragne hanimba ty filongoa o fiangonagneo?

⁸ Modely soa ho antika ty Paoly satria natao’e ze hahavy aze hilongo avao amy ze tsy nitovy hevetse ama’e miomba ty raha lahibey ila’e. Nisy Kristiana Jiosy ila’e tamy ty taonjato voaloha’e ohatse nizizo fa tsy maintsy tapahegne o Kristiana tsy Jiosio, amy izay varagne tsy ho tsikerà o Jiosio iareo. (Gal. 6:12) Tena tsy nitovy hevetse amy iareo miomba izay ty Paoly. Faie ndra aleo’e niambane le nangatake torohevetse tamo o apostolio naho o androanavi-pagnahy ta Jerosalema agneo ta tie hizizo avao amy ty hagnorihagne i heve’ey. (Asa. 15:1, 2) Ty voka’e, nilongo soa naho nifalefale i fiangonagney.​—Asa. 15:30, 31.

9. Akore ty azontikagne anahafagne i Paoly?

⁹ Naho misy raha lahibey tsy mampitovy hevetse antika, le toko’e hipay tari-dalagne amy ze tinendre i Jehovah hikarakara o fiangonagneo tika mba hisia ty filongoagne. Mateteke ze tari-dala ty Baiboly zay ro trea amo o boke naho o gazetentikagneo ndra amy ty toromareke mea i fandaminagne. Naho mikezake magnorike i tari-dalagne rey tika fa tsy mizizo avao amy ty heventikagne, le hilongo soa o fiangonagneo.

10. Ino ka ty raha hafa natao i Paoly mba hahavy o fiangonagneo hilongo soa avao?

¹⁰ Nilongo soa tamo o rahalahi’eo naho o rahavave’eo ty Paoly, satria nifantoke tamy ty toetse soa iareo fa tsy tamy ty fahaleme iareo. Amy ty fara i taratasi’e hoahy o Romanaoy ohatse, le nirehake agnara o ndaty maro reke, sady nimarehe’e tao ty raha natao i ndaty rey ndra ty toetse soa iareo. Manahake i Paoly tika naho tsy misalasala mirehake miomba ty toetse soa o rahalahy naho o rahavaventikagneo. Ty voka’e, hifandrambe soa amy iareo ze maharey izay, le hanjare vao mainke hifankatea o fiangonagneo.

11. Ino ty azontika atao naho misy raha tsy mampifagnarake antika amy ty ndaty hafa?

¹¹ Kindraike le va’e tsy hitovy hevetse ndra o Kristiana za-drahao aza. Izay zao ty raha niseho tamy i Paoly naho i Barnabasy, i ragne’ey. Tena tsy nitovy ty heve iareo miomba i Marka. Ty raike te hinday aze amy i lia misionera magnarake hatao iareoy, le ty raike tsy te hinday. ‘Nifamale’ ty Paoly naho i Barnabasy tamy izay, sady sambe niboseke ka, hafara iareo nanapa-kevetse fa tsy hiharo lia. (Asa. 15:37-39) Faie nanao raha ty Paoly naho i Barnabasy vaho i Marka mba hahavy iareo hilongo indraike. Trea amy izay fa tena sarobily tamy iareo ty filongoa naho ty firaisan-tsay o fiangonagneo. Nidera i Barnabasy naho i Marka ty Paoly tafara tatoy. (1 Kor. 9:6; Kol. 4:10) Hoe izay ka tika. Mila mikezake tika mba handamigne ze tsy fifankahazoan-kevetse va’e hanagnantikagne amy ty hafa amo o fiangonagneo eo, le hifantoke avao amy ty toetse soa iareo. Manao ze hahavy o fiangonagneo hilongo soa naho hiharo saigne tika naho manao izay.​—Efes. 4:3.

NAGNAMAFE TY FINOA O RAHALAHI’E NAHO O RAHAVAVE’EO TY PAOLY

12. Ino ty olagne atrehe o rahalahy naho o rahavaventikagneo?

¹² Mampahery o rahalahy naho o rahavaventikagneo tika naho magnatanjake ty finoa iareo i Jehovah. Misy amy iareo ohatse tsikihe ty longo iareo tsy vavolombelogne ndra ty mpiara-miasa amy iareo ndra ty mpiara-mianatse amy iareo. Ty ila’e marare mafe ndra mikezake mafe magnaligno ty raha nampalahelo natao ty hafa aze. Ty ila’e ka fa ela ty natao badisa sady fa ela ty nandignisa iareo ty hiavia ty fara ty tontolo toy. Va’e hitsapa ty finoa ty Kristiana amy izao o raha rehoe. Niatreke raha hoe ireo ty Kristiana ila’e tamy ty taonjato voaloha’e. Ino ty natao i Paoly mba hagnatanjahagne o rahalahi’e naho o rahavave’e reo?

13. Akore ty nagnampea i Paoly i mpiharo finoagne ama’e nisy nitsikike noho ty raha inoa iareo rey?

¹³ Nampiasa o Soratse Masigneo ty Paoly mba hagnamafesagne ty finoa o rahalahi’e naho o rahavave’eo. Va’e tsy nihay o Jiosy niova ho Kristianao ohatse tie ino ty havale iareo i longo iareo nirehake tie ty fivavahagne Jiosy ro ambone tie amo o fivavahagne Kristianaoy. Le azo antoke fa tena nampahery o Kristiana rehoe i taratasy i Paoly hoahy o Hebreoỳ. (Heb. 1:5, 6; 2:2, 3; 9:24, 25) Azo iareo natao ty nampiasa i fandresean-dahatse nirehafe i Paoly ao rey naho fa iareo nirehake tamy i longo iareo rey. Azontikagne atao ka ty magnampe i mpiharo finoagne amantikagne misy mitsikike rey mba hampiasa o boke naho o gazetentikagneo naho fa magnazava ty raha inoa iareo. Naho misy mitsikike ohatse ty tanora amy ty fiangonantikagne eo noho iareo mino ty fisia ty Mpamorogne, le azontika atao ty magnampe iareo hipay fagnazavagne amy ty bokekele tihoe Nisy Namorogne vao ze Kila Raha? (malagasy) naho tihoe Akore ty Nampisy Antikagne? Fagnonteneagne Dime Mila Dinehegne mba hanoroagne tie nagnino iareo ro mino fa nisy namboatse ze kila raha.

14. Inogne ty raha natao i Paoly ndra tie nibey atao tamy ty asa fitoriagne naho fampianaragne reke?

¹⁴ Nirisihe i Paoly o rahalahi’e naho o rahavave’eo mba haneho hatea amy ty alala “ty asa soa.” (Heb. 10:24) Tsy tamy ty alala ty raha nirehafe’e avao ty nagnampea i Paoly o rahalahi’e naho o rahavave’eo fa ndra tamy ty raha natao’e ka. Naho fa nisy keré ohatse ty ta Jodia tagne, le ninday fagnampeagne boake amy ty rahalahy tan-tane hafa agne ty Paoly mba hozaraegne tamo o rahalahy ta Jodia agneo. (Asa. 11:27-30) Nibey atao tamy ty asa fitoriagne naho fampianaragne ty Paoly. Faie ndra tie teo zay le lava nipay fomba avao reke mba hagnampeagne ze mpiara-manompo nipay fagnampeagne ara-nofo. (Gal. 2:10) Ty fanoa’e izay le nahavy o mpiharo finoagne ama’e reo hatoky tie le vata’e mikarakara iareo ty Jehovah. Magnamafe ty finoa o rahalahy naho o rahavaventikagneo tika amy izao naho mahafoe ty fotoantikagne, ty herintikagne naho ty fahaiantikagne mba hagnampeagne ze niazom-boigne. Manao izay ka tika naho manao fagnomezagne hoahy ty asa magneran-tane tsy tapake. Naho itika manao ireo ndra mipay fomba hafa mitovy amy ireo mba hagnampeagne o rahalahy naho o rahavaventikagneo, le hatoky iareo tie tsy hienga iareo zao ty Jehovah ndra ombia ndra ombia.

15-16. Akore ty fomba toko’e hindesantikagne i namantika nanjare naleme finoagne rey?

¹⁵ Tsy nikivy ty Paoly fa lava nagnampe ze nanjare naleme finoagne tamo o rahalahi’e naho o rahavave’eo. Nitretré iareo reke, sady nitrea tamy ty reha’e fa nisoa fagnahy naho natoky iareo reke. (Heb. 6:9; 10:39) Trea amy ty taratasy nisorate’e hoahy o Hebreò ohatse fa mateteke reke ro nampiasa ty rehake tihoe “tika” naho “-ntikagne” mba hanoroagne fa ndra ireke ka aza nila nampihatse i torohevetse nirehafe’e rey. (Heb. 2:1, 3) Toko’e hagnampe avao o rahalahy ndra o rahavave nanjare naleme finoagneo ka tika, manahake ty natao i Paoly. Toko’e hampahery iareo tika, le hanoro amy ty raha ataontika fa tena mihevetse ze hahasoa iareo. Ty fanoantikagne izay, le mampiseho fa teantika vata’e iareo. Hampahery iareo tika naho mitretré iareo sady soa fagnahy naho fa mirehake amy iareo.

¹⁶ Nimey i Paoly toky o rahalahy naho o rahavave’eo tie vazoho i Jehovah ty asa soa atao iareo. (Heb. 10:32-34) Azontikagne atao ka ty manao hoe izay naho fa magnampe o rahalahy ndra rahavave nanjare naleme finoagneo. Azontika atao ohatse ty magnontane aze tie akore ty fomba nahatreava’e ty hamarenagne ndra mipay fomba hafa hahavy aze hitantara ty fomba nagnampea i Jehovah aze taloha. Naho fa mitantara amy izay reke, le azontika hararaotegne zay mba hagnomeagne toky aze tie tsy haligno i Jehovah i hatea naseho’e tama’e rey, sady tsy hienga aze ka Reke. (Heb. 6:10; 13:5, 6) Va’e hahavy i rahalahintika rey ndra i rahavaventikagne rey hagniry hanompo i Jehovah indraike ty fanoantikagne izay.

“MIFAMPAHEREZA LOGNANDRO”

17. Ino ty fahaiagne mila ikezahantikagne ampitomboegne?

¹⁷ Mikezake mampitombo ty fahaia’e lognandro o ndaty mpamboatse tragnò. Toko’e hanahake iareo ka tika, le hampitombo ty fahaiantikagne mampahery ty hafa. Manao izay tika ohatse naho mitantara amy iareo ty miomba i mpanompo i Jehovah nahavita niaretse fitsapagne rey, satria magnampe iareo hanagne hery hiatrehagne raha sarotse zay. Ankoatse izay, le azontika atao ty manao ze hahavy o fiangonagneo hilongo soa avao. Manao izay tika naho fa mirehake ty raha soa atao ty hafa ndra ty toetse soa iareo, milongo amy ty ndaty managne olagne amantika ndra tsy nifagnarake amantikagne, naho tsy mamoresé ty hafa hagnorike ty heventikagne. Magnamafe ty finoa o rahalahy naho o rahavaventikagneo ka tika naho mirehake hevetse mampahery boake amy Baiboly ao, magnomey fagnampeagne iareo naho manohagne ze nanjare naleme finoagne.

18. Tapa-kevetse hanao ino rehe?

¹⁸ Mahatsiaro ho fale naho afa-po ze mandrambe anjara amo o asa fagnoregnagneo. Ho fale naho ho afa-po hoe izay ka tika naho mandrambe anjara amy i fagnoregnagne ara-pagnahỳ, le ty magnamafe ty finoa o rahalahy naho o rahavaventikagneo. Simba avao o tragnò naho fa ela ty ela. Faie tsy hoe izay ty fampaherezagne ataontika satria afake ty hisy voka’e haharetse nainai’e. Lonike abey tika mba ho tapa-kevetse ty ‘hifampahery naho hifagnampe lognandro.’​—1 Tes. 5:11.