Tsiaro’o Vao?
Nivakieʼo soa vao i Fitalakesan-davitse tamy ty taogne toy rey? Henteo areke naho haiʼo ty mamale ty fagnonteneagne retoa:
Ino ty fitsikombe soa nenga i Jehovah miomba ty fomba hindesagne o ampelao?
Tsy magnavakavake reke, le tsy tihoe tea’e mandikoatse o ampelao o lahilahio. Mijanjigne o ampelao ty Andrianagnahare naho fa mirehake ty fihetseham-po’e naho ty raha mampinekoneko aze iareo. Matoky iareo ka reke, le magnomey asa iareo.—w24.01 p. 15-16.
Akore ty azontika ampiharagne i raha rehafegne amy Efesianina 5:7 ao tihoey tie: “Ko manao manahake ty atao iareo”?
Nampitao antika ty apostoly Paoly tie, tsy toko’e hifandrambe amy ty ndaty tsy magnorike ty fitsipy i Jehovah tika. Tsy mifandrambe amy ty ndaty hoe izay mivantagne ndra amy ty alala o tragnom-porarotse fifandrambesagneo areke tika.—w24.03 p. 22-23.
Ino ty toko’e hatao naho fa misy tantara tsy maregne?
Mila mitao tika naho fa misy raha tsy voamaregne soa boake amy ty namantika, e-mail misy raha mahaliagne miomba ty vahoa i Jehovah boake amy ty ndaty tsy fantantika, le naho fa mifankatrea amy ty mpivalim-pinoagne magnetake ty miomba aze naho manao sare liagne amy ty raha torientika.—w24.04 p. 12.
Ino ty raha fantantika naho tsy fantantika miomba ty fomba hitsara i Jehovah i Solomona Mpanjaka, ze ndaty nimate ta Sodoma naho Gomora tao naho ze nimate tamy i Safodranoy?
Tsy fantantika tihoe hozamagne nainai’e vao o ndaty rehoe, faie ty fantantika le tihoe maha onigne ze kila raha ty Jehovah sady mamindra fo.—w24.05 p. 3-4.
Hoe “Lamilamy” ty Andrianagnahare. Ino ty toky mea izay antika? (Deot. 32:4)
Afake mitsoloke ama’e tika. Azo atokisagne reke, le lava magnatanterake ty raha ampitamae’e avao. Tsy miova ty toetse’e naho ty fikasa’e.—w24.06 p. 26-28.
Ino ty hagnampe azo naho nifindra fiangonagne rehe?
Miantehera amy i Jehovah. Hagnampe azo reke manahake ty fa nagnampea’e o vahoa’e talohao. Ko mampitaha i fiangonagne vaovaoy amy i aze nisy azo talohay. Mandrambesa anjara amy ze asa atao amy i fiangonagney ao, le mipaliava namagne vaovao.—w24.07 p. 26-28.
Ino ty lesogne ianarantika boake amy i fagnoharagne telo amy Matio toko 25 aoy?
Magnasongadigne miomba ty tsy fivalihagne naho fanagnagne finoagne i fagnoharagne miomba ty agnondry naho ty osey. Magnazava ty maha lahibey tihoe vognogne naho miambegne avao i fagnoharagne miomba i virjiny mahimbagne naho i virjiny minegney. Magnasongadigne ty maha lahibey tihoe mazoto miasa naho miasa mafe i fagnoharagne miomba i talentaỳ.—w24.09 p. 20-24.
Nanao akore ty haabo i tilikambo fizilihagne amy i tempoly i Solomonay aoy?
Misy dikan-drehake ila’e mirehake tie, “120 hakiho” ty haabo’e arake ty rehafe ty 2 Tantara 3:4, zane hoe 53 metatse. Faie mirehake ty Fandikan-drehake Tontolo Vaovao nadika tamy 2023 tie, “20 hakiho ty haabo’e” ndra 9 metatse. Mifagnarake soa amy ty fateve ty rindry i tempolỳ zay.—w24.10 p. 31.
Ino ty dika tihoe ‘tsy toko’e hampirafe’ ty mpagnampe amy ty fiangonagne? (1 Tim. 3:12)
Midika zay tie raike avao ty vali’e sady tsy toko’e hila ampela hafa ankoatse i vali’e reke. Tsy toko’e hikiroke ampela hafa ka reke.—w24.11 p. 19.
Nagnino tika ro mirehake tie tsy ty toko’e hatao amy i Mahakama Hariva i Tompoy ty raha rehafegne amy Jaona 6:53 ao?
Mirehake ty Jaona 6:53 tie, mila ‘hanegne ty nofo i Jesosy, le inomegne ty lio’e.’ Nirehake io tamy ze Jiosy nila naneho finoagne aze ty Jesosy tamy ty taogne 32 tamy tie ireke ta Galelia agne. Tao’e raike tafara io ty nanoagne i Mahakama Hariva i Tompoy ta Jerosalema agne. Nirehake tamy i aze hiarake hanjaka ama’e an-dagnitse agne rey reke tie tagne.—w24.12 p. 10-11