Tsikombeo ty Fazotoa i Jesosy Mitory

1. Ino ty toetse raike mampiambake ty vahoa i Jehovah amy ty tontolo toy?

RAHA raike mampiambake o vahoa i Jehovah-o amy ty ndaty mihaboke ho Kristiana ty fazotoagnea mitory. (Tit. 2:14) Faie va’e hisy fotoagne tikagne halaindaigne hitory. Va’e hahatsapa manahake ty rehafe ty androanavy raike miasa mafe toy rehe. Hoe reke: “Kindraike raho le tsy mahefa hitory.”

2. Ino ty raha va’e hahavy antikagne tsy hazoto amy ty fanompoagne kindraike?

² Va’e hahafale antikagne mandikoatse ty mitory ty manao karazam-panompoagne hafa. Ino ty anto’e? Va’e le avy le hotreantikagne ty voka’e sady hahatsapa ho nahavita raha tika, naho fa magnoregne naho mikojakoja i anjomba ampiasaegne amy ty fanompoagne rey, vaho magnampe ze niazom-boigne ndra naho fa mampahery o rahalahio. Tena mahafinaritse antikagne ty filaminagne naho ty hatea misy amo o rahalahio eo naho fa miara-miasa amy iareo tika, sady fantantikagne fa ankasitraha iareo ty raha ataontikagne hoahy iareo. Mifanohetse amy izay, fa va’e fa nitory tamy ty faritane raike tagnate ty taogne maro tika, faie zara’e naho nisy nandrambe. Ndra va’e ho tendreke ndaty manohetse i hafatsey ka tikagne. Haintikagne ka fa arakarake ty agnatogna i fara’ey, ty vao mainke tsy handrambesa o ndatio i hafatsey. (Mat. 10:22) Inogne areke ty hagnampe antikagne hazoto avao, ndra hampitombo ty fazotoantikagne amy ty fanompoagne?

3. Akore ty ampisehoa ty Lioka 13:6-9 ty fazotoa i Jesosy?

³ Hagnampe antikagne hazoto amy ty fanompoagne, ty fandinehagne ty modely i Jesosy. Tsy nisy raha nenga’e hampihegne ty fazotoa’e manompo. Naho ty maregne, le arakarake ty nampandeha ty fotoagne ty vao mainke nampitombo ty fazotoa’e. (Vakio ty Lioka 13:6-9.) I Jesosy le manahake ty mpambole voaloboke raike, nandany telo taogne mba hikarakaragne fihamy raike tsy namoa. Nandany telo taogne eo ho eo reke mba hitoriagne amo o Jiosio, faie mbe tsy nandrambe aze ty ankamaroa iareo. Tsy nikivy ndra nalaindaigne tamy ty fanompoagne ty Jesosy fa nitory avao, manahake i mpambole voaloboke nitamà avao i fihamỳ. Vao mainke nikezake mafe reke mba hanohinagne ty fo iareo.

4. Inogne iaby i raha efatse hodinehentika azontikagne anahafagne i Jesosy rey?

⁴ Hotreantikagne amy ty lahatsoratse toy ty fomba nanehoa i Jesosy ty fazotoa’e, lohotsie fa tamy i enem-bolagne fara’e tamy ty fanompoa’ey. Hagnampe antikagne hazoto avao amy hinane zao, ty fianaragne ty raha nirehafe’e naho ty fitsikombeagne ty raha natao’e. Andao tikagne handineke raha efatse azontikagne anahafagne i Jesosy: 1) Nifantoke tamy ty zoton’arofo i Jehovah reke, 2) nifantoke tamy ty faminania ty Baiboly, 3) niantehetse tamy ty fanohagna i Jehovah, 4) natoky reke fa mbe hisy avao ty ndaty hitsanogne aze.

NIFANTOKE AMY TY ZOTON’AROFO I JEHOVAH REKE

5. Akore ty nampisehoa i Jesosy tie nifantoke amy ty fanoagne ty zoton’arofon’Agnahare reke?

⁵ Nazoto nitory i “talily soa miomba i Fanjakagney” ty Jesosy satria nifanta’e tie, izay ty asa tean’Agnahare hatao’e. (Lioka 4:43) Ty fitoriagne ty natao i Jesosy voalohan-draha tamy ty fiaigna’e. Nandeha “tamy ty rova naho tamy ty tanàgne tambanevohitse” agne reke, mba hampianatse o ndatio ndra tie fa tamy ty farampara ty fanompoa’e aza. (Lioka 13:22) Nampiofagne mpianatse hafa ka ty Jesosy mba hitory hiarake ama’e.​—Lioka 10:1.

6. Ino ty ifandrambesa ty asa fitoriagne amy ty asa fanompoagne hafa ataontikagne? (Henteo ka i sarey.)

⁶ Ty fitoriagne i talily soay ka ty asa tea i Jehovah naho i Jesosy hataontikagne voalohan-draha tie amy izao. (Mat. 24:14; 28:19, 20) Misy ifandrambesa’e mivantagne amy i asa fitoriagney iaby ze asa fanompoagne hafa. Tena ilaegne mba hanohagnagne ty asa atao amy i faritaney ey ohatse, ty fagnoregnagne ndra ty asa atao amy i Betela ao. Ty fagnampeagne ze nizoem-boigne kagne, le tsy tihoe fagnomezagne ze raha ilae o rahalahio avao, fa fagnampeagne iareo mba hanohy ty fahazara’e ara-pagnahy ka, agnisa izay ty fitoriagne. Naho ekéntikagne tie tena lahibey ty asa fitoriagne sady tadidientikagne avao tie, io ty asa lahibey tea i Jehovah hataontikagne, le vao mainke hagniry te hitory tsy tapake tika. Izao ty nirehafe i János, androanavy a Hongria agne: “Nitadidieko avao tie, tsy misy asa fanompoagne mahasolo i asa fitoriagney. Io ty nanendreagne antikagne voaloha’e.”

7. Nagnino tikagne ro tea i Jehovah hitory lognandro? (1 Timoty 2:3, 4)

⁷ Naho manahake ty fomba fivazohoa i Jehovah o ndatio ty fomba fahatreavantikagne iareo, le vao mainke hazoto amy ty fanompoagne tikagne. Tea’e naho maro arake ze azo atao ty ndaty maharey naho mandrambe i talily soay. (Vakio ty 1 Timoty 2:3, 4.) Izay ty mahavy aze mampiofagne antikagne, mba hahatrea vokatse naho fa mitory i hafatse mamonje aigney. Misy torohevetse hagnampe antikagne hahay hanombo-drehake mba hahavy antikagne hanao mpianatse ohatse, ty amy ty bokekele tihoe Atorò fa Tea’o o Ndatio, le Ampianaro Iareo. Ndra tie tsy mitsanogne o ndatio tie amy izao, le va’e mbe hitsanogne iareo, aloha kede ty hifaragna i haoreagne lahibeỳ. Amy ty hoavy, le va’e hotsiaro iareo ty raha torientikagne amy iareo amy izao, le handrisike iareo hagneke i talily soay. Izay ty raha va’e hiseho naho mazoto mitory avao tika.

NIFANTOKE AMY TY FAMINANIA TY BAIBOLY REKE

8. Nagnino ty fahafantara i Jesosy ty faminania ty Baiboly ro nisy voka’e amy ty fomba nampiasa’e ty fotoa’e?

⁸ Taka i Jesosy soa tie, akore ty ahatanteraha ty faminania ty Baiboly. Nifanta’e tie telo taogne tsy tapa’e avao ty fahareta ty fanompoa’e. (Dan. 9:26, 27) Nifanta’e ka ty raha rehafe o faminaniagneo miomba ty fotoagne naho ty fomba himateza’e. (Lioka 18:31-34) Nisy voka’e tamy ty fomba nampiasae i Jesosy ty fotoa’e ty fahafantara’e izay. Voka’e, nazoto nitory reke mba hamitagne i asa nanendreagne azey.

9. Nagnino ty faminania ty Baiboly ro mandrisike antikagne hazoto hitory?

⁹ Ty fahatakarantikagne o faminania ty Baibolio ka, le handrisike antika hazoto hitory. Fantantikagne tie fa kedekede ty fotoagne anagna ty tontolo toy. Haintika fa ty raha misy amy izao naho ty toe-tsay ty ndaty amy izao, le mampiseho ty raha nirehafe ty Baiboly mialoha amantaragne ty andro fara’e. Fantantika fa ty aly ty Firenena Matanjake Anglisy-Amerikana naho i Rosia vaho ty mpanohagne iareo, le fahatanteraha ty faminania ty Baiboly miomba ty mpanjaka i atimo naho ty mpanjaka i avaratse “amy ty fotoa ty fara’e.” (Dan. 11:40) Fantantikagne ka fa ty Firenena Matanjake Anglisy-Amerikana, le manondro i tomboke amy i sare vongagne amy Daniela 2:43-45 aoy. Arake ty faminania ty Baiboly, le rese lahatse tikagne fa tena fa kidikidy ty sisa, le handrava ty fitondra o ndatio i Fanjakàn’Andrianagnaharey. O faminania ty Baiboly reo iaby, le magnampe antikagne hahatakatse tie, aia ho aia amy ty fotoagne tikagne hinane zao, sady mandrisike antikagne mba hanao ze azo atao amy i asa fitoriagney zay.

10. Ino ka ty anto’e hafa mahavy ty faminania ty Baiboly mandrisike antikagne hitory?

¹⁰ Fa tsy lignentikagne kagne ty hizara ty hafatse agnate i faminaniagne amy Baiboly ao rey. Hoe ty Carrie, rahavave raike manompo amy ty Repoblika Dominikana agne: “Mandrisike ahy hizara ty hamaregnagne amy ty hafa, i hoavy fanjaka ampitamae i Jehovah-y.” Hoe ka reke: “Naho fa mahatrea ty raha iaigna o ndatio amy izao raho, le tsapako fa tsy natao ho ahike avao o fampitamaegne rehoe, fa natao hoahy iareo ka.” Mandrisike antika tsy ho kamo ka i faminania ty Baiboly rey satria fantantikagne fa i Jehovah ty amboho i asa fitoriagney ao. Hoe ty Leila, mitoboke a Hongria agne: “Mandrisike ahy hitory i talily soay ndra tie amy ty ndaty tsy tea aze aza ty Isaia 11:6-9. Fantako fa ndra ia ndra ia, le afake miova naho fa ampea i Jehovah.” Nirehake hoe izao ka ty Christopher, rahalahy boake a Zambia agne: “Fa nirehafe ty Marka 13:10 mialoha fa hiparitake magnenen-tane i talily soay, le tsapako fa voninahitse ho ahy ty magnampe amy ty fahatanteraha o faminaniagne iohoe.” Inogne amy ty faminaniagne amy Baiboly ao areke ty mandrisike azo hitory lognandro?

NIANTEHETSE AMY TY FANOHAGNA I JEHOVAH REKE

11. Nagnino ty Jesosy ro nila niantehetse amy i Jehovah mba hahavy aze hazoto hitory lognandro? (Lioka 12:49, 53)

¹¹ Niantehetse tamy ty fanohagna i Jehovah avao ty Jesosy, mba hahavy aze hazoto hitory. Ndra tie nahay nitory aza ty Jesosy, le nifanta’e fa hahavy o ndatio halaigne naho hanohetse aze i talily soa miomba i Fanjakagney. (Vakio ty Lioka 12:49, 53.) Voka’e, nanjare nipay fomba hamonoagne i Jesosy o mpitarike fivavahagneo noho ty fitoria’e. (Jaona 8:59; 10:31, 39) Faie nitory avao ty Jesosy satria fanta’e fa miarake ama’e ty Jehovah. Hoe reke: “Tsy irerike raho, fa miarake amako ty Rae, i nagnirake ahỳ. ... Mbe lia’e naho nienga ahy, satria lava manao ze raha mampifale aze avao raho.”​—Jaona 8:16, 29.

12. Akore ty nagnampea i Jesosy i mpiana’e rey mba hahavy iareo hitory avao ndra tie misy fagnenjehagne aza?

¹² Nitiahive i Jesosy o mpiana’e reo tie, afake miantehetse amy i Jehovah iareo mba hanohagne iareo. Nagnomey toky iareo mateteke reke tie, hagnampe iareo ty Jehovah naho fa enjehegne iareo. (Mat. 10:18-20; Lioka 12:11, 12) Tsy izay avao fa nandrisike iareo mba hitao ka reke. (Mat. 10:16; Lioka 10:3) Nanoro hevetse iareo ka reke mba tsy hamoresé ze tsy te hitsanogne. (Lioka 10:10, 11) Nirehafe’e iareo mba hilay naho fa enjehegne. (Mat. 10:23) Ndra tie nazoto sady natoky i Jehovah aza ty Jesosy, le tsy nisatry raha hagnoho-doza ty vata’e.​—Jaona 11:53, 54.

13. Nagnino rehe ro afake matoky fa hagnampe azo ty Jehovah?

¹³ Mila ty fagnampea i Jehovah ka tikagne tie amy izao, mba hahavy antikagne hazoto hitory naho fa miatreke fagnenjehagne. (Apok. 12:17) Nagnino rehe ro afake matoky tie hanohagne azo ty Jehovah? Dineho ty vavake natao i Jesosy, amy Jaona toko 17 ao. Nangatake tamy i Jehovah ty Jesosy mba hiaro o apostoli’eo. Nivalea i Jehovah o fangatahagne iohoe. Tantaraegne amy ty boke Asan’ny apostoly ao, ty fomba nagnampea’e o apostolio mba hazoto hitory avao, ndra tie nenjehegne aza. Amy i vavake natao’ey ao ka ty Jesosy, le nangatake amy i Jehovah mba hiaro ze mino ty hafatse nitorie o apostolio, agnisa izay rehe. Mbe mamale o vavake natao i Jesosy iohoe avao ty Jehovah. Hagnampe azo reke manahake ty nagnampea’e o apostolio.​—Jaona 17:11, 15, 20.

14. Nagnino tika ro matoky tie hazoto hitory avao? (Henteo ka i sarey.)

¹⁴ Ndra tie vao mainke hihasarotse aza ty hazoto hitory i talily soay, arakarake ty iharinea ty fara’e, le hahazo ty fagnampeagne ilaentikagne avao tikagne. (Lioka 21:12-15) Manahake i Jesosy naho i mpiana’e rey, le o ndatio ty engantikagne hifily ndra hitsanogne antikagne ndra tsy hitsanogne sady tsy mialy hevetse amy iareo ka tika. Ndra tie voarara aza ty asantikagne, le mbe mahavita mitory i talily soay avao o rahalahintikagneo, satria iareo miantehetse amy i Jehovah fa tsy amy ty hery iareo manokagne. Manahake ty nagnomea i Jehovah hery ty mpanompo’e tamy ty taonjato voaloha’e avao, ty agnomea’e hery antikagne tie amy izao, amy izay “i asa fitoriagney vita soa” sady amy ty iteava’e aze. (2 Tim. 4:17) Afake matoky rehe fa naho miantehetse amy i Jehovah, le hazoto hitory i talily soay lognandro.

NATOKY REKE FA MBE HISY AVAO TY NDATY HITSANOGNE AZE

15. Ino ty mampiseho tie nanagne toe-tsaigne soa miomba ty fanompoagne ty Jesosy?

¹⁵ Nanagne toe-tsaigne soa avao ty Jesosy naho fa nanao i asa fitoriagney. Izay ty nahavy aze hafana fo amy ty fanompoa’e. Tamy ty farampara ty taogne 30 ohatse, le nitrea i Jesosy fa maro ty ndaty vognogne handrambe i hafatse nitorie’ey, sady nampitovie’e amy ty vokatse fa havory iareo. (Jaona 4:35) Tao’e raike teo ho eo tafara tatoy, le hoe reke tamy i mpiana’e rey: “Maro i vokatsey.” (Mat. 9:37, 38) Mbe nagnamafe hoe izao indraike reke naho fa tafara tatoy: “Maro i vokatsey. ... Angataho’areo areke i Tompo i vokatseỳ, mba hagnirake mpiasa maro hamory i vokatsey.” (Lioka 10:2) Tena natoky ty Jesosy tie, mbe hitsanogne i talily soay avao o ndatio, le tena nifale reke naho fa nanao izay iareo.​—Lioka 10:21.

16. Akore ty nampisehoa i fagnoharagne nirehafe i Jesosy rey fa nanagne toe-tsaigne soa miomba ty fanompoagne reke? (Lioka 13:18-21) (Henteo ka i sarey.)

¹⁶ Nampianatse i mpiana’e rey ka ty Jesosy, mba hanagne toe-tsaigne soa miomba i hafatse indese iareoy. Handrisike iareo hazoto hitory avao zay. Dineho ohatse ty fagnoharagne roe nirehafe’e retoagne. (Vakio ty Lioka 13:18-21.) Nirehake miomba ty voan-tsinapy ty Jesosy mba hampianaragne tie, maro ty ndaty hagneke ty hafatse miomba i Fanjakagney, sady tsy misy raha mikalagne ty fitomboa’e. Nampiasa fagnoharagne miomba ty lalivay ka reke mba hagnasongadignagne tie, miparitake magnenen-tane ty hafatse miomba i Fanjakagney, sady tsy le avy le mibaribary ty voka’e amo o ndatio naho fa mandrambe aze iareo. Nagnampe o mpiana’e reo areke ty Jesosy mba hahatakatse tie, hisy voka’e lahibey ty fitoriagne atao iareo.

17. Inogne iaby ty toko’e hahavy antikagne hanagne toe-tsaigne soa avao miomba ty fanompoagne?

¹⁷ Hazoto hitory tikagne naho mandineke ty voka i asa fitoriagney magnenen-tane tie amy izao. Isan-taogne, le ndaty liagne an-tapetrisa’e ty magnatreke Fahatsiarovagne sady miarake mianatse Baiboly amantikagne. An-ketse’e ty atao badisa sady miarake mitory amantikagne. Tsy fantantikagne tie, fire ty ndaty va’e handrambe i asa fitoriagney fa ty fantantika le tihoe, mamory vahoake maro ho votso-belogne amy i haoreagne lahibey hoavy tsy ho elay ty Jehovah. (Apok. 7:9, 14) Mbe mitamà i Tompo i vokatsey fa hisy ndaty handrambe i talily soay. Naho izay areke, le toko’e hazoto hitory avao tika.

18. Ino ty raha teantikagne ho voamare o ndatio amantikagne?

¹⁸ Ty fazotoagne mitory ty ahafantaragne o mpiana i Jesosio hatrake amy izao. Naho fa nahatrea ty fahasahia o apostolio o ndatio, le “nifanta iareo tie niarake tamy i Jesosy iareo.” (Asa. 4:13) Lonike mba ty zotom-po i Jesosy ty hotrea o ndatio amantikagne, naho fa mandineke antikagne manao i fanompoagney iareo.