Mandehana amy ty Finoagne Lognandro

1. Nagnino ty apostoly Paoly ro niafa-po naho fa nandineke ty fiaigna’e?

NIHAY i apostoly Paoly tie fa marine ty fotoagne hamonoagne aze. Faie nahatsapa ho afa-po tamy ty fiaigna’e reke. Hoe reke naho fa nandineke ty fiaigna’e: “Fa nahavita ty laiko amy i korsay raho. Fa nitagne ty finoagne raho.” (2 Tim. 4:6-8) Nandrambe fanapahan-kevetse feno fahendreagne ty Paoly tamy ty fanompoa’e, le niazo’e antoke tie nifale ama’e ty Jehovah. Te handrambe fanapahan-kevetse soa sady te hankasitrahan’Agnahare ka tikagne. Akore ty hanoantikagne izay?

2. Ino ty dika tihoe mandeha amy ty finoagne?

² Nirehake hoe izao miomba aze naho ty Kristiana hafa tsy nivalike ty Paoly: “Ty finoagne ro andehanantikagne fa tsy ty trea maso.” (2 Kor. 5:7) Ino ty tea i Paoly horehafegne? Kindraike, ty rehake tihoe “mandeha” amy Baiboly ao, le manondro ty fomba fiaignagne filie ty ndaty raike. Mandrambe fanapahan-kevetse mioregne amy ty raha trea’e, rei’e vaho tsapa’e ty ndaty raike mandeha amy ty trea ty maso. Mifanohetse amy izay fa mandrambe fanapahan-kevetse mioregne amy ty fatokisa’e i Jehovah Andrianagnahare ty ndaty mandeha amy ty finoagne. Trea amy ty raha atao’e fa rese lahatse reke tie, hamale soa aze ty Andrianagnahare. Naho fa magnorike ty toroheve i Jehovah amy ty Saontsi’e ao ka reke, le handrambe soa.​—Sal. 119:66; Heb. 11:6.

3. Ino ty soa rambese ze mandeha amy ty finoagne? (2 Korintianina 4:18)

³ Kindraike le va’e hioregne amy ty raha treantika, reintikagne vaho tsapantikagne ty fanapahan-kevetse ila’e rambesentikagne. Faie va’e hisy olagne hanjò antika, naho ireo avao ty ioregna ty fanapahan-kevetse rambesentikagne amy ty raha lahibey. Ino ty anto’e? Satria va’e hamitake antikagne reo kindraike. Ndra tie tsy izay aza ty raha hiseho, le va’e hanjare tsy hidare ty zoton’arofon’Agnahare ndra ty toroheve’e tikagne amy ty fara’e, naho mandeha amy ty trea ty maso avao. (Mpito. 11:9; Mat. 24:37-39) Faie naho mandeha amy ty finoagne tikagne, le handrambe fanapahan-kevetse “ankasitraha i Tompo.” (Efes. 5:10) Hahavy antikagne hahatsapa hiadagne naho tena ho sambatse, ty fagnorihagne ty toroheven’Agnahare. (Sal. 16:8, 9; Isaia 48:17, 18) Hahazo fiaignagne nainai’e ka tikagne amy ty hoavy, naho mandeha amy ty finoagne avao.​—Vakio ty 2 Korintianina 4:18.

4. Akore ty ahafantaragne tie mandeha amy ty finoagne ty ndaty raike sa mandeha amy ty trea ty maso?

⁴ Akore ty ahatreavagne tie mandeha amy ty finoagne tikagne sa mandeha amy ty trea ty maso? Dineho zao: Inogne iaby ty mitari-dalagne ahy naho fa handrambe fanapahan-kevetse raho? Miantehetse amy ty raha treako avao vao raho? Sa matoky i Jehovah naho ty toroheve’e? Andao hodinehentikagne tie, akore ty azontikagne andehanagne amy ty finoagne lognandro amy ty raha telo lahibey retoagne: Naho fa mifily asa, naho fa mifily valy, le naho fa mahazo toromareke boake amy fandaminagne. Naho fa mandineke ty tsikiraidraike amy ireo tikagne, le horehafentika ka ty raha toko’e hodinehentika naho itika te handrambe fanapahan-kevetse soa.

NAHO FA MIFILY ASA

5. Ino ty toko’e hodinehentika naho fa hifily asa tika?

⁵ Sambe te hahazo ty raha ilaentikagne naho ty keleiantikagne iaby tika. (Mpito. 7:12; 1 Tim. 5:8) Soa karama ty asa ila’e, le ahazoagne ze raha ilaegne isan’andro sady mbe misy ambi’e hiomanagne amy ty hoavy ka. Faie tsahatse amy ty raha ilae ty keleiagne avao ty karama amy ty asa ila’e. Ara-dalàna naho mandineke soa hey ty karama ho azo tika naho fa hifily ty hanao ty asa raike. Faie ty ndaty raike mandeha amy ty trea ty maso’e, le izay avao ty ifantoha’e.

6. Akore ty handehanantikagne am-pinoagne naho fa mifily asa tika? (Hebreo 13:5)

⁶ Naho mandeha amy ty finoagne tikagne, le hodinehentikagne ka tie ino ty ho voka i asay amy ty fifandrambesantikagne amy i Jehovah. Afake magnontane tegna hoe izao tika: ‘Hahavy ahy hanao ty raha heje i Jehovah vao i asay?’ (Ohab. 6:16-19) ‘Hisy voka’e amy ty fanompoako vao i asay sa hahavy ahy ho lavitse ty keleiako agnate ty fotoagne lava bey?’ (Fil. 1:10) Naho eka ty vale o fagnonteneagne reo, le hendre rehe naho tsy magneke i asay ndra tie sarotse ty mahatrea asa. Noho itikagne mandeha amy ty finoagne, le matoky tikagne tie hahavazoho fomba hagnomeagne ze raha ilaentikagne ty Jehovah, naho fa mandrambe fanapahan-kevetse tika.​—Mat. 6:33; vakio ty Hebreo 13:5.

7-8. Akore ty nampisehoa ty rahalahy an’Amerika Atimo agne tie mandeha amy ty finoagne reke? (Henteo ka i sarey.)

⁷ Nitrea i Javier,a rahalahy an’Amerika Atimo agne tie, mila mandeha amy ty finoagne reke. Hoe reke: “Nahatrea asa ambonembone raho. In-droe i karamako talohay ty ho karamako sady tena mahafa-po ahy i asay.” Faie nagniry mafe ty ho mpisava lalagne ka ty Javier. Le hoe avao reke: “Nadikadigne ty sefo i orinasay hey raho. Taloha i fagnadikadignagney, le nangatake ty fagnampea i Jehovah hey raho satria raho rese lahatse tie, ireke ty tena mahay ze mahasoa ahy. Teako naho mba managne asa soa raho, faie hejeko naho mikalagne ahy amy ty fagnatratrarako ty tanjoko ara-pagnahy o asa iohoe.”

⁸ Nitantara hoe izao ty Javier: “Nirehake tamako ty sefo i orinasay tamy i fagnadikadignagney tie, hiasa lera fagnampe’e mateteke raho. Nihazavaeko ama’e tam-pagnajagne tie, tsy afake hanao izay raho noho ty fanompoako.” Ie, tsy nagneke hanao i asay ty Javier. Nanao mpisava lalagne reke roe heregnandro tafara izay. Nahatrea asa tapa-potoagne reke naho fa tafara tatoy. Hoe reke: “Nijanjigne ty vavake nanoeko ty Jehovah, le nimea’e asa mifagnarake amy ty fandaharam-potoako amy ty maha mpisava lalagne ahy raho. Tena fale raho fa nahazo asa ahafahako manokagne fotoagne bey mba hanompoagne i Jehovah naho o rahalahikò.”

9. Ino ty ianara’o boake amy ty raha niaigna i Trésor?

⁹ Akore naho tsapa’o tie tsy magnenga azo handeha amy ty finoagne ty asa’o amy izao? Dineho moa ty tantara i Trésor, boake a Kongo agne. Hoe reke: “Tena niteako tamy ty fiaignako i asako vaovaoy. In-telo ty nikaramako taloha ty nikaramako ama’e sady nihajaegne ka raho.” Faie niasa lera fagnampe’e ty Trésor, hafara’e nateteke tsy nivory. Niserégne hagnetake ty raha tsy mete atao i orinasay ka reke. Te ho niala amy i asa’ey reke faie ninekoneko kera tsy hanagne asa. Ino ty nagnampe aze? Hoe reke: “Nagnampe ahy ty Habakoka 3:17-19 mba hahatakatse tie, ndra tie hamoe ty fidiram-bolako aza raho, le mbe hahavazoho fomba hikarakaragne ahy avao ty Jehovah. Nialako areke i asay.” Izao ty namaragna’e aze: “Mpiasa maro ty mieretseretse tie mba hahazoagne asa soa karama, le mila atao’o sorogne iaby ze kila raha. Agnisa izay ty keleiagne vaho ty fivavahan-tegna. Fale raho fa afake niaro ty fifandrambesako amy i Jehovah naho ty keleiako. Nampea i Jehovah hahatrea asa mete amako ahafahako mifantoke amy ty fanompoagne raho tao’e raike tafara tatoy. Naho fa i Jehovah ty ataontikagne voalohan-draha, le va’e ho sahiragne ara-bola tikagne, faie hikarakara antikagne avao reke.” Ie, naho matoky ty toroheve i Jehovah naho ty fampitamà’e tikagne, le handeha amy ty finoagne avao sady hitahy antikagne reke.

NAHO FA MIFILY VALY

10. Akore ty va’e hahavy antikagne handeha amy ty trea ty maso naho fa mifily valy?

¹⁰ Fagnomezagne boake amy i Jehovah ty fanambaliagne, le ara-dalàna tihoe te hanambaly. Naho fa mieretseretse ty valy mete soa ama’e ty rahavave raike, le va’e ty toetse ty rahalahy raike, ty hasoa’e, ty laza’e, ty asa’e, ty andraiki’e vaho ty fahaia’e mampifale aze ty va’e hifantoha’e.b Tena lahibey o raha rehoe. Faie naho ireo avao ty ifantoha’e, le va’e handeha amy ty trea ty maso reke.

11. Akore ty handehanantikagne amy ty finoagne naho fa hifily valy? (1 Korintianina 7:39)

¹¹ Tena rehareha i Jehovah o rahalahy naho o rahavave magnorike ty toroheve’e naho fa hifily valio. Rambese iareo am-po zao ohatse i toroheve ty Baiboly manao tihoey, toko’e handigne hey fa tsy hampiarake, amparake ty ilosora i “taogne maha tanora” azey. (1 Kor. 7:36) Dinehe iareo soa tie, ty ndaty filie iareo ho valy vao managne ty toetse saontsie i Jehovah tie, toko’e hanagna ty lahilahy ndra ty ampela valy fanjaka. (Ohab. 31:10-13, 26-28; Efes. 5:33; 1 Tim. 5:8) Matoky i torohevetse amy 1 Korintianina 7:39 (vakio) aoy iareo, le tihoe manambaly “amy Tompo ao avao” naho misy ndaty tsy Vavolombelogne mampiseho hasoa fagnahy amy iareo mba hangalagne ty fo iareo. Mandeha amy ty finoagne avao iareo, le matoky tie afake magnomey iareo ze raha ilae iareo ara-pihetseham-po, mandikoatse ty ahy o ndatio ty Jehovah.​—Sal. 55:22.

12. Ino ty ianara’o boake amy ty raha niaigna i Rosa?

¹² Dineho ty raha niaigna i Rosa, mpisava lalagne a Kolombia agne. Nahavy aze hifandrambe mateteke amy ty lahilahy mpiara-miasa ama’e tsy Vavolombelogne ty asa’e. Nanomboke naneho hasoa fagnahy ama’e i lahilahỳ. Nitara ama’e areke ty Rosa. Hoe reke: “Hoe ndaty soa zay avao reke. Magnampe ty ndaty amy ty fiaraha-monegne misy iareo eo reke sady mba manamanagne. Teako ty fomba nindesa’e ahy. Nanagna’e iaby ty raha ilaeko amy ty ndaty teako ho valy, faie le ireke tsy Vavolombelogne zao avao.” Hoe avao reke: “Nisarotse tamako ty nandietse aze satria izay ty nilae ty foko. Tamy izay ka raho tena nahatsapa ho irerike sady nite hanambaly, faie mbe tsy nahatrea ndaty tamy ty hamaregnagne ao.” Faie tsy nifantoke amy ze trea’e avao ty Rosa. Nidinehe’e ty ho voka ty fanapahan-keve’e amy ty fifandrambesa’e amy i Jehovah. Nitapahe’e areke ze raha hahavy aze hifandrambe amy i ndatỳ, le nikezake ho bey atao amy ty fanompoagne avao reke. Nivoasa hagnatreke ty Sekoly ty Mpitory i Fanjakagney reke tsiela tafara izay, le amy izao reke mpisava lalagne manokagne. Hoe ty Rosa: “Nifenoe i Jehovah hasambaragne ty foko.” Ndra tie tsy mora aza ty mandeha amy ty finoagne kindraike, lohotsie naho fa amy ty raha ipiteha ty fontikagne, le toko’e hanao izay avao tikagne.

NAHO FA MAHAZO TOROMAREKE BOAKE AMY FANDAMINAGNE

13. Ino ty va’e hahavy antikagne handeha amy ty trea ty maso naho fa mahazo toromareke boake amy fandaminagne?

¹³ Mateteke mahazo tari-dalagne miomba ty fanompoagne boake amo o androanavio, o mpiandraikitse faritseo, ty birò i sampagne ndra ty Filan-keve-pitantanagne tika. Faie akore naho misy fotoagne tsy azontikagne ty anto’e nanoagne ty toromareke ila’e? Va’e ty ho voka-draty i toromarekey amantikagne avao ty hotreantika. Va’e hanomboke hifantoke amy ty hadisoa i rahalahy magnomey toromareke rey ka tika.

14. Ino ty hagnampe antika handeha amy ty finoagne naho fa mahazo toromareke boake amy fandaminagne? (Hebreo 13:17)

¹⁴ Ino ty ho voka’e naho itikagne mandeha amy ty finoagne, le matoky tie i Jehovah ty mitarike ty fandamina’e sady hai’e soa ze kila raha iaignantika? Le avy le mankatò tika sady mampiseho tie managne toe-tsaigne soa naho fa manao izay. (Vakio ty Hebreo 13:17.) Haintika tie naho mankatò tika, le hiharo saigne o fiangonagneo. (Efes. 4:2, 3) Matoky ka tika tie, hitahy ty fankatoavantikagne ty Jehovah ndra tie tsy voririke aza o rahalahy mitarikeo. (1 Sam. 15:22) Hagnitsy ze raha toko’e hahitsy reke amy ty fotoagne mete ama’e naho ilaegne ty hanoagne izay.​—Mika 7:7.

15-16. Ino ty nagnampe ty rahalahy raike handeha amy ty finoagne ndra tie nisalasala miomba ty toromareke niazo’e aza reke? (Henteo ka i sarey.)

¹⁵ Asongady ty raha niseho raike toy tie, mahasoa ty mandeha amy ty finoagne. Ndra tie miparitake a Però agne aza ty rehake Espaignoly, le ty firehan-draza’e ty ampiasae ty ankamaroa ty ndaty agne. Agnisa izay ty firehake Quechua. Tagnate ty taogne maro, le nipay ty ndaty mirehake Quechua tamy i faritaney tey ze rahalahy naho rahavave mirehake Quechua. Faie mba ho fagnorihagne ty lamigne apetra o fanjakagneo, le tsy maintsy novagne ty fomba hipaliavagne i ndaty rey. (Rom. 13:1) Voka’e, nisy ty ninekoneko tie kera hagnasarotse ty asa amy i faritaney ey zay. Satria nagnorike i fagnovagney o rahalahio, le nitahy ty kezake natao iareo mba hipaliagne o ndaty mirehake Quechuao ty Jehovah.

¹⁶ Agnisa i ninekoneko rey ty Kevin, androanavy amy ty fiangonagne mampiasa firehake Quechua. Nirehake hoe izao reke: “Nieretseretse raho tie, ‘akore hinaneo ty hahatreavagne i ndaty mirehake Quechua rey?’” Faie ino ty natao i Kevin? Hoe reke: “Nitsiaroko ty rehafe ty Ohabolana 3:5. Nieretseretse ty miomba i Mosesy ka raho. Naho fa nitarihe i Mosesy hiala i Ejipta o Israelitao, le hoe raha nindese’e mbamy ty toeragne hahafate iareoy zay, satria ho mora amo o Ejipsianao ty hahatratse iareo. Faie nankatò avao ty Mosesy, le nitahy ze fankatoava’e zay tamy ty fomba miambake ty Jehovah.” (Eks. 14:1, 2, 9-11, 21, 22) Nanao fagnovagne amy ty fanompoa’e areke ty Kevin. Ino ty nivoka’e? Hoe reke: “Nilatsa raho fa tena nitahy anay ty Jehovah. Nitsoekao tsoekao zahay tie taloha mba hahatreavagne ndaty mirehake Quechua, faie zara’e naho raike ndra roe avao ty nitrea’ay kindraike. Faie amy izao zahay, le mifantoke amy ty faritane misy i ndaty rey avao. Voka’e, vao mainke mifampirehake mateteke amy iareo zahay, managne fitilihagne maro vaho mpianatse Baiboly maro. Nanjare nitombo ka ty ndaty nagnatreke ty fivoria’ay.” Ie, naho mandeha amy ty finoagne tikagne, le lava hamale soa antikagne avao ty Jehovah.

17. Ino ty nianara’o tamy ty lahatsoratse toy ato?

¹⁷ Nidinehentikagne tato tie, akore ty handehanantikagne amy ty finoagne lognandro, amy i raha telo lahibey rey. Faie mila mandeha amy ty finoagne tikagne amy ze kila raha ataontikagne amy ty fiaignagne. Agnisa izay ohatse naho fa mifily fihisagne vaho mandrambe fanapahan-kevetse miomba ty fianaragne ndra ty fitezagne. Ndra inogn’inogne fanapahan-kevetse horambesentikagne, le tsy ampe naho ty raha trea ty masontikagne avao ty mitari-dalagne antikagne, fa soa naho ty fifandrambesantikagne amy i Jehovah, ty toroheve’e vaho i fampitamà’e tihoe hikarakara antikay. Naho manao izay tika, le ho vitantika ty “handeha amy ty tahina i Jehovah Andrianagnaharentikay, nainai’e.”​—Mika 4:5.