Tsy Ombia ho Boribory ty Fità i Jehovah

1. Akore ty nanoroa i Mosesy tie matoky i Jehovah reke naho fa nitarike o Israelitao boake Ejipta agne?

AGNISA i ndaty miambake nanam-pinoagne rehafegne amy ty boke Hebreo ao rey ty Mosesy. (Heb. 3:2-5; 11:23-25) Nampiseho finoagne reke naho fa nitarike o Israelitao boake a Ejipta agne. Tsy natahotse i Farao naho ty tafi’e reke. Natoky i Jehovah reke, le nitarike o vahoakeo ho amy i Riake Menay agne, le ie naho fa tafara tatoy ninday iareo tam-patrambey agne. (Heb. 11:27-29) Tsy natoky ty ankamaroa o Israelitao tie, hahavita hagnomey ze raha ilae iareo ty Jehovah, faie natoky i Andrianagnahare’ey avao ty Mosesy. Tsy diso ty Mosesy naho nanagne ze finoagne zay. Toe nanao fahagagagne ty Andrianagnahare mba hagnomeagne hanegne naho rano i vahoakey, mba hahafaha iareo hanegnantegna i fatrambeỳ.a​—Eks. 15:22-25; Sal. 78:23-25.

2. Nagnino ty Andrianagnahare ro nagnontane i Mosesy tihoe: “Boribory hao ty fità i Jehovah?” (Nomery 11:21-23)

² Ndra tie nanagne finoagne matanjake aza ty Mosesy, le mbe nagnontane i Jehovah reke naho toe hahavita hagnomey hena i vahoa’ey vata’e reke, tao’e raike teo ho eo tafara ty nagnafahagne o Israelitao. Tsy niazo i Mosesy sare an-tsaigne tie, akore ty hagnomea i Jehovah hena hahaeneke ndaty an-tapetrisa’e amy i tane fatrambeỳ agne. Mba hamaleagne i Mosesy, le nagnontane aze hoe izao ty Jehovah: “Boribory hao ty fità i Jehovah le tsy hahavita izay?” (Vakio ty Nomery 11:21-23.) Etoagne ty rehake tihoe “fità i Jehovah”, le manondro ty fagnahy masin’Andrianagnahare ndra ty hery ampiasae’e. Hoe te hagnontane i Mosesy hoe izao ty Jehovah: ‘Mieretseretse vao rehe tie, tsy ho vitako ty hagnatanterake ty raha nirehafeko tie hataoko?’

3. Nagnino ro toko’e hahaliagne antikagne ty raha niseho tamy i Mosesy naho o Israelitao?

³ Fa nisy fotoagne vao rehe nieretseretse naho toe hagnomey ze raha ilae’o ndra ze raha ilae ty keleia’o vata’e ty Jehovah? Ndra fa nieretseretse izay rehe ndra mbe mboe’e, le andao tikagne handineke ty raha niaigna i Mosesy naho o Israelitao. Nisalasala iareo naho toe afake magnomey ze raha ilae iareo vata’e ty Jehovah. Misy toro lala ty Soratse Masigne trea boake amo o raha niseho iohoe. Hagnampe antikagne vao mainke hatoky ty fandinehagne irey tie, tsy ombia ho boribory ty fità i Jehovah.

FIANARAGNE BOAKE AMY I MOSESY NAHO O ISRAELITAO

4. Ino ty anto’e va’e nahavy ty ankamaroa i ndaty rey nagnontane naho toe afake magnomey ze raha ilae iareo ara-nofo ty Jehovah?

⁴ Dineho ty raha niseho tamy izay. Niheo tamy i fatrambey midadasikey agne, tagnate ty fotoagne elaela ty firene o Israelio, naho ty “ndaty maro boake amy ty firenen-kafa” tsy Israelita. Boake Ejipta handeha amy i Tane Nampitamaegney agne iareo tamy io. (Eks. 12:38; Deot. 8:15) Entsake nihinagne i manay i ndaty maro boake amy ty firenena hafa rey, le nitaraigne niarake amy iareo kagne ty ankamaroa o Israelitao. (Nom. 11:4-6) Nanomboke nipay i hanegne ta Ejipta tagne rey i vahoakey. Nahatsapa ho sinere i vahoakey ty Mosesy, le nieretseretse tie mila magnomey izay hoahy i vahoakey reke.​—Nom. 11:13, 14.

5-6. Nisy voka’e tamy ty ankamaroa o Israelitao ty raha natao i ndaty boake amy ty firenena hafa rey. Ino ty ianarantikagne boake amy izay?

⁵ Nisy voka’e tamo o Israelitao ty tsy fankasitraha i ndaty boake amy ty firenena hafa rey. Va’e hisy voka’e amantikagne ka ty toe-tsaigne tsy mahay mankasitrake anagna ty hafa, sady hahavy antikagne tsy ho afa-po amy ze raha mey i Jehovah zay. Naho mieretseretse ty raha nanagnantikagne taloha, ndra manjare mialogne ty raha anagna ty hafa tikagne, le va’e hotra izay. Faie ho fale tikagne naho mikezake mionogne amy ze raha anagnantikagne ndra ino ndra ino ty raha iaignantikagne.

⁶ Toko’e ho nitadidie o Israelitao avao tie nagnomey toky iareo ty Andrianagnahare, fa naho fa hoavy amy i tane vaovao hitoboha iareoy agne iareo, le ho afake hankamamy raha maro. Amy i Tane Nampitamaegney agne ty ahatanteraha izay, fa tsy amy iareo mbe am-patrambey agney. Soa kagne naho misaintsaigne ty raha ampitamae i Jehovah homea’e antikagne amy i tontolo vaovaoy agne tika, fa tsy mifantoke amy ty raha va’e tsy anagnantikagne amy ty tontolo toy eto. Toko’e hisaintsaigne ze andinin-teny afake magnampe antikagne vao mainke hatoky i Jehovah ka tikagne.

7. Nagnino tikagne ro afake matoky tie tsy boribory ty fità i Jehovah?

⁷ Va’e mbe hieretseretse rehe tie, nagnino ty Andrianagnahare ro nagnontane i Mosesy hoe izao: “Boribory hao ty fità i Jehovah le tsy hahavita izay?” Tsy tihoe i fità’e matanjakey ty tea i Jehovah hoeretserete i Mosesy, fa tea’e hosaintsaigne’e ka tie, afake mampiasa o fità’e iohoe reke ndra aia ndra aia, ndra tie amy ty toeragne fara’e lavitse aza. Afake magnomey hena maro hoahy o Israelitao ty Andrianagnahare, ndra tie amy i fatrambeỳ agne aza iareo. Nampiseho ty heri’e tamy ty alala i “fità’e matanjake naho i sira’e maozatsey” ty Andrianagnahare. (Sal. 136:11, 12) Naho fa miatreke raha sarotse areke tika, le toko’e hatoky tie afake magnampe antikagne manokagne ty fità i Jehovah.​—Sal. 138:6, 7.

8. Ino ty hagnampe antikagne tsy hagneregne ty hadisoagne natao ty ankamaroa i ndaty tam-patrambey agne rey? (Henteo ka i sarey.)

⁸ Nagnomey hena o Israelitao ty Jehovah tafara izay. Nagnomey karazan-kibo maro hoahy iareo reke. Faie tsy nisaotse an’Andrianagnahare amo o fahagagagne iohoe o Israelitao. Nanjare tsy nimete afa-po ty ankamaroa iareo. Le nifanehake ty namory maro i karazan-kiboy avao iareo. Nivignetse mafe tamo o “ndaty tea tegna” reo ty Jehovah, le nisazea’e iareo. (Nom. 11:31-34) Afake miana-draha boake amy ze raha niseho zay tikagne. Mila mitao tikagne mba tsy hanjare tsy ho mete afa-po. Ndra manan-karena tikagne ndra mahantra, le ty hinamagne amy i Jehovah naho i Jesosy ty ataontikagne voalohan-draha. Mamory “harena an-dagnitse agne” tikagne naho manao izay. (Mat. 6:19, 20; Lioka 16:9) Afake matoky tikagne naho fa manao izay tie, hagnomey ze raha ilaentikagne ty Jehovah.

9. Nagnino tikagne ro afake matoky tie hanohagne antikagne ty Andrianagnahare?

⁹ Manolotse ty fità’e ty Jehovah mba hagnampeagne o vahoa’eo tie amy izao. Tsy midika zay tie, tsy ombia tsy ho montso fanagnagne tikagne ndra tsy ombia tsy ho keré.b Faie i Jehovah le tsy ombia hienga antikagne. Hanohagne antika reke naho fa miatreke raha sarotse sambe karaza’e tikagne. Akore areke ty ampisehoantika fa matoky tika tie, hanolotse ty fità’e ty Jehovah mba hagnomeagne ze raha ilaentikagne? Andao tikagne handineke ty raha roe retoagne: 1) Naho fa miatreke olagne ara-bola, 2) naho fa magnomagne ty raha ilaentikagne amy ty hoavy.

NAHO FA MIATREKE OLAGNE ARA-BOLA

10. Ino ty raha va’e hahavy antikagne hiatreke olagne ara-bola?

¹⁰ Fa ampoizentikagne tie, arakarake ty agnantogna ty fifaragna ty tontolo toy, le hiharaty o toe-karenao. Va’e hahavy antikagne hanao fandaniagne tsy ampoizegne ndra ho montso asa, fanagnagne, tragno o korontagne ara-politikeo, o alio, o loza arake ty natiorao, ndra o arete-manjamagneo. Va’e hipay asa vaovao amy ty toeragne misy antikagne eo tika ndra mieretseretse ty hisese tane miarake amy ty keleiantikagne, amy izay afake magnomey ze raha ilae iareo. Ino ty hagnampe antikagne handrambe fanapahan-kevetse mampiseho tie matoky ty fità i Jehovah tikagne?

11. Ino ty hagnampe azo hahavita hiatreke olagne ara-bola? (Lioka 12:29-31)

¹¹ Ty dingagne voaloha’e sady tena mete soa, le tihoe mametrake i raha mampinekonekoy amy i Jehovah. (Ohab. 16:3) Angataho reke mba hagnomey ze fahendreagne ilae’o, hagnampe azo handrambe fanapahan-kevetse soa naho hahavy ty fo’o ho tony, le “tsy hinekoneko bey loatse” miomba i raha iaigna’oy. (Vakio ty Lioka 12:29-31.) Ihalaleo reke mba hagnampe azo hahay hionogne amy ze raha tena ilaegne amy ty fiaignagne. (1 Tim. 6:7, 8) Manoa fikarohagne amo o boke aman-gazetentikagneo, mba hahatreava’o ty raha hagnampe azo hahay hiatreke olagne ara-bola. Maro ty nandrambe soa boake amy i video naho i lahatsoratse amy jw.org ao rey, le nahavita niatreke olagne ara-bola.

12. Inogne iaby ty fagnonteneagne afake magnampe ty Kristiana handrambe fanapahan-kevetse soa hoahy ty keleia’e?

¹² Maro ty azo ty tsapa hevetse nagneke nanao asa lavitse ty keleia’e. Faie trea amy ty raha misy fa tsy fahendreagne ty handrambesagne ze fanapahan-kevetse zay. Aloha ty hagnekeagne hanao asa raike, le tsy ty karama horambesegne avao ty toko’e hodinehegne, fa ty ho voka’e amy ty ara-pagnahy ka. (Lioka 14:28) Dineho zao: ‘Ino ty ho voka’e amy ty fanambaliako naho lavitse i valiko raho? Ho afake hagnatreke ty fivoriagne iaby, hanao fanompoagne vaho hifagnosehose amo o rahalahy naho o rahavaveo vao raho?’ Soa ka ty handineha’o ty fagnonteneagne lahibey toy, naho managne anake rehe: ‘Akore ty hitezako ty anako “arake ty fagnanaragne naho ty fanoroa i Jehovah” naho tsy amy iareo eo raho?’ (Efes. 6:4) Ty fomba fiheve i Jehovah ty toko’e hitari-dalagne azo, fa tsy ty ahy ty longo’o ndra ty keleia’o tsy magnaja ty toro lala ty Soratse Masigne.c Mitoboke a Azia ahandrefagne agne ty Tony. Mateteke nahazo fanasagne hiasa andafe agne reke. Naho fa boake nivavake sady nifampirehake tamy i vali’e miomba izay reke, le nanapa-kevetse ty tsy hagneke i asa rey. Tsy vita izay fa nahein iareo ka ty fandania iareo tamy ty fiaigna’e. Naho fa mandineke ty taloha reke, le nirehake hoe izao: “Managne tombotsoa hagnampe ndaty maro hahafantatse i Jehovah raho sady mafana fo amy ty hamaregnagne i ana’ay rey. Nitsapa o keleia’ay io tie, naho fa magnorike ty Matio 6:33 tikagne, le hikarakara antikagne ty Jehovah.”

NAHO FA MAGNOMAGNE TY HOAVINTIKAGNE

13. Ino ty toko’e hataontikagne mba hagnampe antikagne hanagne ze raha ilaegne naho fa antetse?

¹³ Va’e hitsapa ty fatokisantikagne ty fità i Jehovah ty fieretseretantikagne ty ho fiaignantikagne naho fa itika antetse. Mandrisike antikagne hiasa mafe ty Baiboly, amy izay tikagne managne ze raha ilaentikagne amy ty hoavy. (Ohab. 6:6-11) Tena soa tihoe magnomagne ze raha ilaentikagne amy ty hoavy naho afake manao izay tikagne. Fiarovagne o volao. (Mpito. 7:12) Faie mila mitao tikagne mba tsy ho ty raha ara-nofo ty hifantohantikagne amy ty fiaignantika.

14. Nagnino tikagne ro toko’e handineke ty Hebreo 13:5 naho fa magnomagne ty hoavintikagne?

¹⁴ Nirehake fagnoharagne miomba ty ndaty raike gege nitamiry vola maro faie tsy ‘nanan-karena tagnatrehan’Agnahare’ eo ty Jesosy. (Lioka 12:16-21) Tsy misy ndaty mahafantatse ty raha hiseho hamaray. (Ohab. 23:4, 5; Jak. 4:13-15) Noho itikagne mpanonjohy ty lia i Kristy, le miatreke raha sarotse hafa ankoatse ty mpahazo ty maro. Nirehake ty Jesosy tie, tsy maintsy vognogne “hamoe” ty fanagna’e ze te ho mpanonjohy ty lia’e. (Lioka 14:33) Nifale avao o Kristiana ta Jodia agne tamy ty taonjato voaloha’eo ndra tie namoe ty fanagna iareo aza. (Heb. 10:34) Amy izao ka, le hamake mamoe ty fidiram-bola’e ty rahalahy maro, ta tie hanao politike. (Apok. 13:16, 17) Ino ty nagnampe iareo hanao izay? Tena matoky ty fampitamà i Jehovah toy iareo: “Tsy hienga azo raho sady tsy hahafoe azo.” (Vakio ty Hebreo 13:5.) Manao ze azontikagne atao tika mba hagnomanagne ty hoavy, faie matoky ty fanohagna i Jehovah tika naho misy raha miseho tsy ampoizentikagne.

15. Akore ty toko’e hihevera ty rae aman-drene Kristiana ty ana’e? (Henteo ka i sarey.)

¹⁵ Amy ty kolontsaigne ila’e, le avy le miterake o ndatio naho vata’e vaho manambaly, amy izay ty ana’e afake manohagne aze ara-bola naho fa antetse reke. Amo o mpivaly rehoe, le i ana iareoy ty “reterete” iareo. Faie rehafe ty Baiboly tie, o rae aman-dreneo ro toko’e hikarakara ze raha ilae ty ana iareo. (2 Kor. 12:14) Mazava ho aze fa va’e hipay ty fagnampea ty ana’e o rae aman-dreneo naho fa antetse, sady mahafale ty ankamaroa o anakeo ty manao ze fandaharagne zay. (1 Tim. 5:4) Tsapa o rae aman-drene Kristianao tie, tsy ty fitezagne ty anake mba hahavita hanohagne iareo ara-bola ty tena mahafale, fa ty fagnampeagne ty ana iareo mba hanjare mpanompo i Jehovah.​—3 Jaona 4.

16. Inogne ty azo o rae aman-dreneo atao mba hagnampeagne ty ana iareo hahay hamelon-tegna? (Efesianina 4:28)

¹⁶ Ampianaro hatoky i Jehovah amy ty alala ty ohatse omea’o ty ana’o naho fa magnampe aze mba hahay hamelon-tegna rehe. Atorò iareo amy iareo mbe kedey tie, tena ilaegne ty miasa mafe. (Ohab. 29:21; vakio ty Efesianina 4:28.) Le naho fa mihamitombo iareo, le ampeo mba hianatse soa naho fa an-dakilasy agne. Mila manao fikarohagne soa naho mampiasa ty toro lala ty Baiboly o rae aman-drene Kristianao, mba hagnampeagne ty ana’e hanapa-kevetse tie, akore ty hampiasa’e ty fianaragne atao’e mba hameloma’e tegna naho fa afara agne, sady hagnampe aze hifantoke amy ty fanompoagne Kristiana.

17. Ino ty raha atokisantikagne?

¹⁷ Matoky o mpanompo i Jehovah tsy mivalikeo tie, mahavita mikarakara sady magniry hagnomey ze raha ilae iareo ty Jehovah. Fa ampoizentikagne tie, arakarake ty agnantogna ty fara ty tontolo toy, le hotsapaegne ty fatokisantikagne i Jehovah. Ndra inogn’ino raha miseho, le lonike tikagne mba ho rese lahatse tie, hampiasa ty heri’e mba hagnomeagne ze raha ilaentikagne ty Jehovah. Afake matoky tika tie, tsy ombia ho boribory i fità i Jehovah matanjake naho i sira’e maozatsey.