“Filio’areo ... ze Hotompoe’areo”

1. Ino ty tsy maintsy ataontikagne mba hahavy antikagne tena ho sambatse, le ino ty anto’e? (Isaia 48:17, 18)

TENA tea antika i Raentika an-dagnitse agney, le tea’e hankamamy o fiaignagneo tikagne tie amy izao naho amy ty hoavy. (Mpito. 3:12, 13) Naho fa namorogne antika reke, le nimea’e talenta miambake tikagne. Faie tsy nimea’e fahaiagne mivey vatagne tika, ndra hamaritse ty soa naho ty raty hoahy ty tegnantika. (Mpito. 8:9; Jer. 10:23) Fohi’e tie tsy maintsy manompo aze naho miaigne mifagnarake amy ty fitsipi’e tikagne vaho izay tena ho sambatse.​—Vakio ty Isaia 48:17, 18.

2. Ino ty raha tea i Satana hinoantikagne, le akore ty namalea i Jehovah ze vande zay?

² Tea i Satana hino tikagne tie, afake ty ho sambatse avao tika ndra tie tsy misy i Jehovah aza sady mahavita mivey vatagne o ndatio. (Gen. 3:4, 5) Mba hamalea i Jehovah ze vande zay, le nenga’e hivey vatagne agnate ty fotoagne voafetra o ndaty tsy mankatò azeo. Fa mibaribary hinane zao tie, mampalahelo ty voka ty fitondra o ndatio. Faie maro ty lahilahy naho ty ampela tantarae ty Soratse Masigne tie, nifily ty hanompo i Jehovah, le niafa-po tamy ty fiaignagne. Voaloha’e amy izay ty Jesosy Kristy. Andao hey hohenteantikagne ty anto’e nahavy aze nifily ty hanompo i Jehovah. Hodinehentikagne afara izay tie, nagnino i Babantikagne an-dagnitse agney ro fagneva ty hotompoegne. Amy ty fara’e tikagne, le handineke indraike ty anto’e ila’e, mahavy antikagne mifily ty hanompo i Jehovah.

NAGNINO TY JESOSY RO NIFILY TY HANOMPO I JEHOVAH?

3. Ino ty raha nimea i Satana i Jesosy, le ino ty safidy natao’e?

³ Tsy maintsy nifily ty Jesosy tie, ia ty hotompoe’e tamy ireke tambone tane tetoỳ. Tafara kede ty badisa i Jesosy, le nirehake tama’e ty Satana tie, naho miankohoke ama’e indraike avao reke mba hivavake ama’e, le homea’e aze iaby ze kila fanjakagne an-tane etoy. Faie hoe ty navale i Jesosy aze: “Mberoagne agne rehe Satana! Voasoratse ka tie: ‘I Jehovah Andrianagnahare’o avao ro tsy maintsy ivavaha’o, le ireke raike avao ka ro tsy maintsy tompoe’o.’” (Mat. 4:8-10) Nagnino ty Jesosy ro nandrambe ze fanapahan-kevetse zay? Dineho moa ty anto’e ila’e retoagne:

4-5. Inogne ty anto’e ila’e nahavy i Jesosy nifily ty hanompo i Jehovah?

⁴ Ty anto’e voaloha’e nahavy i Jesosy nifily ty hanompo i Jehovah, le ty hatea. Tena tea’e sady nikokoa’e ty Baba’e. (Jaona 14:31) Nanompo i Jehovah ka ty Jesosy, satria fanta’e tie izay ty raha toko’e hatao. (Jaona 8:28, 29; Apok. 4:11) Nihai’e tie Boake amy i Jehovah o aigneo, sady azo atokisagne naho matarike Reke. (Sal. 33:4; 36:9; Jak. 1:17) Nisaontsy ty maregne tamy i Jesosy lognandro ty Jehovah, sady nimea i Jehovah aze iaby ze raha nanagna’e. (Jaona 1:14) Faie mifanohetse amy izay ty Satana, satria noho ireke ty mahavy o fateo. Tsy mete afa-po reke sady tea tegna, le izay ty mandrisike aze hanao raha, hafarà’e reke mpavande. (Jaona 8:44) Noho ty fahafantara i Jesosy ireo, le tsy mba niavy an-tsai’e ao ty hanahake i Satana, le higoreve amy i Jehovah.​—Fil. 2:5-8.

⁵ Misy anto’e hafa ka nahavy i Jesosy nifily ty hanompo i Jehovah. Fa tsy niligne’e ty hahatrea tie, ino ty ho voka’e naho fa tsy mivalike reke. (Heb. 12:2) Nifanta’e tie naho tsy mivalike reke, le hagnamasigne ty tahina i Baba’e, sady ho afake hagnafoagne ze fijaleagne naboa i Devoly.

NAGNINO TY JEHOVAH RO FAGNEVA TY HOTOMPOENTIKAGNE?

6-7. Nagnino ty ankamaroa ty ndaty amy izao ro tsy manompo i Jehovah, faie nagnino reke ro fagneva ty hotompoentikagne?

⁶ Maro ty ndaty tsy manompo i Jehovah tie amy izao satria mbe tsy fanta iareo ty miomba i toetse’e fanjaka rey, naho ty raha maro natao’e hoahy iareo. Hoe izay ty raha niseho tamy i ndaty nitoria i apostoly Paoly ta Atena agne rey.​—Asa. 17:19, 20, 30, 34.

⁷ Nihazavae i Paoly amy i ndaty nitsanogne aze rey tie, i Andrianagnahare maregney “ty nagnomey aigne naho fofognaigne o ndatio iaby naho ze kila raha.” Hoe ka reke: “Ireke ty mahavy antikagne hovelogne naho hihetseke vaho hisy.” Mpamorogne ty Andrianagnahare, le ‘boake amy ty ndaty raike ty nanoa’e o ndaty amy ty firenena sambe hafao.’ Manan-jò ty hotompoentikagne areke reke.​—Asa. 17:25, 26, 28.

8. Ino ty raha tsy ombia hatao i Jehovah? Hazavao.

⁸ Noho i Jehovah Mpamorogne sady Mpanjaka ze kila raha, le afake mamoresé o ndatio mba hanompo aze reke. Faie tsy ombia hanao izay ty Jehovah. Porofoe’e amantikagne aza tie tena misy reke sady tena tea’e tikagne tsikiraidraike. Tea’e naho maro arake ze azo atao ty ndaty minamagne ama’e nainai’e. (1 Tim. 2:3, 4) Izay ty mahavy i Jehovah mampiofagne antikagne mba hampianatse o ndatio ty raha safirie’e, naho hirehake amy iareo ty raha fanjaka hatao’e hoahy o ndatio. (Mat. 10:11-13; 28:19, 20) Nimea’e antikagne o fiangonagneo sady nimea’e mpiandraikitse bey hatea mba hikarakara antikagne tika.​—Asa. 20:28.

9. Akore ty ahatreavagne tie bey hatea ty Jehovah?

⁹ Trea amy ty fomba indesa i Jehovah o ndaty tsy mino ty fisia’eo fa tena miambake ty hatea’e. Dineho moa ty raha misy. Amparake izay, le ndaty tsifotofoto ty nifily ty hamaritse ty soa naho ty raty amy ty fiaigna’e. Faie ndra tie teo zay, le nisoa fagnahy tamy iareo ty Jehovah. Nimea’e iareo ze raha mahavelogne iareo, amy izay iareo mankamamy o fiaignagneo. (Mat. 5:44, 45; Asa. 14:16, 17) Natao’e ka ty hahavy iareo ho afake hifaneho hatea, hanagne keleiagne, vaho handrambe soa boake amy ty asa mafe atao’e. (Sal. 127:3; Mpito. 2:24) Mazava areke fa tea ze kila ndaty, i Babantikagne an-dagnitse agney. (Eks. 34:6) Andao areke tikagne handineke indraike ty anto’e mahavy antikagne mifily ty hanompo i Jehovah, naho ty fomba hitahia’e antikagne.

NAGNINO TIKAGNE RO MIFILY TY HANOMPO I JEHOVAH?

10. a) Ino ty anto’e voaloha’e mahavy antikagne manompo i Jehovah? (Matio 22:37) b) Ino ty soa rambese’o boake amy ty fahareta i Jehovah? (Salamo 103:13, 14)

¹⁰ Manahake i Jesosy, le tena teantikagne sady ikokoantikagne ty Jehovah. Izay ty anto’e voaloha’e anompoantikagne Aze. (Vakio ty Matio 22:37.) Manjare te hiharine i Jehovah tikagne naho fa mianatse ty miomba i toetse’e rey. Dineho ohatse ty fomba ampisehoa i Jehovah faharetagne amantikagne. Naho fa tsy nankatò aze o Israelitao, le izao ty nangatahe’e tamy iareo: “Mba isintaho ajafady i lalan-drati’areo rey.” (Jer. 18:11) Ony i Jehovah tie tsy voririke tikagne, sady lemboke avao. (Vakio ty Salamo 103:13, 14.) Tsy mandrisike azo hanompo i Jehovah nainai’e vao ty fisaintsaigna’o ty fahareta’e naho i toetse’e fanjaka hafa rey?

11. Ino ty anto’e hafa mahavy antikagne mifily ty hanompo i Raentikagne an-dagnitse agney?

¹¹ Mifily ty hanompo i Jehovah ka tikagne satria izay ty toko’e hatao. (Mat. 4:10) Tsy vita izay fa fantantikagne tie, ino ty ho voka’e naho tsy mivalike tikagne. Naho tsy mivalike tikagne, le hagnamasigne ty tahina i Jehovah, hagnaporofo tie mpavande ty Devoly sady hampifale ty arofo i Babantikagney. Naho mifily ty hanompo i Jehovah ka tikagne tie amy izao, le mitamà ty hanompo aze nainai’e.​—Jaona 17:3.

12-13. Ino ty ianarantikagne boake amy ty tantara i Jane naho i Pam?

¹² Ndra tie mbe kede aza tikagne, le afake ty ho tea i Jehovah sady azontika ampitomboegne avao ze hatea zay. Mareho moa ty tantara ty mpizay mpizoke atao tihoe Jane naho i Pam toy.a Ni-11 taogne ty Jane le i Pam ni-10 taogne tamy tie iareo nanomboke nianatse Baiboly. Nagnenga i Jane naho i Pam hifandrambe amo o Vavolombelogneo ty rae aman-drene iareo, ndra tie tsy niliagne aza. Faie tsy maintsy nivavake tamy ty fiangona ty keleia iareo agne iareo mirahavave, naho fa fara ty heregnandro. Hoe ty Jane: “Ty raha nampianare o Vavolombelogneo ahy boake amy Baiboly ao, le nagnampe ahy handietse ty fitaonagne hifoke rongony naho haloto findesam-batagne natao ty tanora mitovy amako.”

¹³ Taogne tsiampeampe tafara tatoy, le ni-mpitory iareo mirahavave. Nanomboke nanao mpisava lalagne ka iareo naho fa tafara tatoy, sady nikarakara ty rae aman-drene iareo bey taogne. Hoe ty Jane naho fa mieretseretse ty raha niaigna iareo: “Nianarako tie tsy mivalike sady mikarakara ty nama’e ty Jehovah. Toe izay ty rehafe ty 2 Timoty 2:19 tie: ‘Fanta i Jehovah ty aze.’” Tsy isalasalagne fa mikarakara ze mifily ty ho tea naho hanompo aze ty Jehovah.

14. Akore ty hagnaliovantikagne i tahina i Jehovah-y? (Henteo ka i sare rey.)

¹⁴ Te hagnampe amy ty fagnaliovagne ty tahina i Jehovah tikagne, satria misy magnafa-baraka zay. Dineho zao: Managne ragnetse soa fagnahy, matarike, sady tea mamela heloke rehe, le mpiragnetse maifitse nareo. Faie nisy nagnaraty aze tama’o agne tie indraike tie, nao zao reke masiake sady tsy manao ty maregne. Hoe izay avao ka ty atao i Satana naho o ndaty ambane ty fahefa’eo, satria magnely vande miomba i Jehovah iareo mba hanimbagne ty laza’e. Akore zao ty ho natao’o amy i nama’o nisy nagnaratỳ? Azo antoke fa hiaro aze rehe. Hafana fo hiaro ty tahina i Jehovah ka tika, le hirehake ty maregne miomba aze. (Sal. 34:1; Isaia 43:10) Atorontikagne amy ty raha rehafentikagne naho ty raha ataontikagne tie, te hanompo i Jehovah amy ty fontikagne iaby tika.

15. Ino ty soa nirambese i apostoly Paoly naho fa nagnova ty tanjo’e reke? (Filipianina 3:7, 8)

¹⁵ Vognogne hagnova ty tanjontikagne amy ty fiaignagne tikagne, mba hampifaleagne i Jehovah ndra hampitomboagne ty fanompoagne aze. Nahafoe ty toeragne nitana’e tamy ty fiaraha-monegne nisy aze zao ohatse ty apostoly Paoly, mba hagnorihagne i Kristy naho hanompoagne i Jehovah. (Gal. 1:14) Voka’e nahazo valesoa tamy ty fiaigna’e reke sady nanagne fahafahagne hiarake manjaka amy i Kristy an-dagnitse agne. Tsy nanegnegne reke noho ireke nifily hanompo i Jehovah, le hanahake izay ka tikagne.​—Vakio ty Filipianina 3:7, 8.

16. Ino ty ianarantikagne boake amy ty raha niaigna i Julia? (Henteo ka i sare rey.)

¹⁶ Naho ty fanompoagne i Jehovah ty tena ifantohantikagne, le hahazo valesoa tikagne manomboke amy izao naho amy ty hoavy. Dineho moa ty raha niaigna ty rahavave atao tihoe Julia. Nikoraly tamy ty fiangonagne raike reke tamy tie ireke mbe nitanora, taloha ty nianara’e ty hamaregnagne. Nisy mpihira mahay raike nahafantatse tie, mahay mihira ty Julia, le nampiofagne aze. Nanjare mpihira malaza ty Julia, sady nihira amy i toeragne malaza rey. Tamy tie ireke nianatse mozike tamy ty lakilasy malaza raike, le nisy mpiara-mianatse ama’e nirehake tama’e ty miomba an’Agnahare. Nihazavae’e tamy i Julia tie, i Jehovah ty tahinan’Andrianagnahare. Tsiela tafara izay, le nianatse Baiboly indroe isan-keregnandro reke. Naho fa tafara tatoy, le nanapa-kevetse ty hampiasa ty fiaigna’e amy ty fanompoagne i Jehovah reke, fa tsy amy ty hira. Faie tsy nimora ty nandrambe ze fanapahan-kevetse zay. Hoe reke: “Maro ty ndaty nirehake amako tie, nijoieko i talentakoy. Faie teako hampiasaegne amy ty fanompoagne i Jehovah ty fiaignako iaby.” Ino ty tsapa’e tie amy izao miomba ty safidy natao’e tagnate ze 30 taogne mahery zay? Hoe reke: “Milamin-tsaigne raho. Matoky raho fa ho tanterahe i Jehovah iaby ty fagniria ty foko amy ty hoavy.”​—Sal. 145:16.

TOHIZO AVAO TY FANOMPOAGNE I JEHOVAH

17. Miaigne amy ty tapa’e fara’e amy ty andro fara’e tikagne. Ino ty voka izay amy ze ndaty fa nifily ty hanompo i Jehovah naho i aze mbe tsy nanao izay rey?

¹⁷ Miaigne amy ty tapa’e fara’e amy ty andro fara’e tikagne. Izao ty nisorate i apostoly Paoly: “Fa ‘tena fa kedekede ty sisa’ le ‘hoavy i aze hoavỳ sady tsy ho tara.’” (Heb. 10:37) Ino ty dika izay? Raike amy izay zao tihoe, fa kede sisa ty fotoagne anagna o ndatio mba hahafaha’e hifily ty hanompo i Jehovah. (1 Kor. 7:29) Le naho fa nifily ty hanompo i Jehovah tika, le haintikagne tie ‘fotoagne kedekede’ avao ty sisa iaretantikagne o raha sarotseo.

18. Mandrisike antika mba hanao inogne ty Jesosy naho i Jehovah?

¹⁸ Tsy tihoe nandrisike o mpiana’eo mba hanonjohy ty lia’e amy i voaloha’ey avao ty Jesosy, fa hanonjohy ty lia’e lognandro. (Mat. 16:24) Lonike areke tika mba ho tapa-kevetse ty hanompo i Jehovah avao, naho ohatse fa tagnate ty taogne maro ty nanoantikagne izay. Tsy maintsy mikezake mba hiaigne mifagnarake amy i fanapahan-keventikagne hanompo azey tika. Va’e tsy ho mora zay. Faie hahazo fitahiagne naho ho afa-po tikagne manomboke amy izao naho manao izay.​—Sal. 35:27.

19. Ino ty ianarantikagne boake amy ty raha niaigna i Gene?

¹⁹ Mahatsapa ty ndaty ila’e tie, maro ty raha afoe naho fa manompo i Jehovah. Tanora vao rehe? Mahatsapa hovoafehefehe vao rehe satria manompo i Jehovah? Hoe ty rahalahy tanora raike atao tihoe Gene: “Nahatsapa hovoafehefehe raho satria Vavolombelo i Jehovah. Hoe falefale avao i ajaja niarake nibey amako rey satria manao fete, mampiarake, mihisa video misy alialy. Faie mivory naho manompo ty nandany ty fotoako.” Ino ty nivoka ze eretseretse zay tamy i Gene? Hoe reke: “Nanomboke narengerenge raho faie naetako, sady nataoko ze raha nahafalefale ty tegnako. Faie tsy ninday hafaleagne maharetse ho ahy zay. Nanomboke nieretseretse miomba i hamaregnagne tsy nidareako amy i Baiboly ao rey raho, le nanapa-kevetse ty hanompo i Jehovah amy ty foko iaby. Nanomboke teo, le hoe raha nivalea i Jehovah iaby ze vavake nanoeko.”

20. Toko’e ho tapa-kevetse ty hanao ino tika?

²⁰ Nihira hoe izao hoahy i Jehovah ty mpanao salamo raike: “Sambatse ze filie’o sady ampagnantogne’o mba hitoboke an-kiririsa’o eo.” (Sal. 65:4) Lonike areke tikagne ho tapa-kevetse manahake i Josoa, le hirehake tie: “Iraho naho ty keleiako, le hanompo i Jehovah.”​—Jos. 24:15.