‘Soa ho Antikagne ty Miharine An’Agnahare’!

1-2. a) Ino ty kezake ilaegne mba hahavy ty ndaty roe ho mpinamagne? b) Ino ty hodinehentikagne amy ty lahatsoratse toy?

MANA-NAMAGNE maifitse azo vao rehe? Akore ty nahavy anareo ho mpinamagne? Va’e nanokagne fotoagne mba hiarahagne ama’e rehe, namantatse ty olagne atrehe’e, ty raha tea’e miharo ty raha heje’e. Nanjare nitrea’o ty toetse fanjaka anagna’e, le tea’o hotsikombegne. Nanjare tea’o areke i nama’oy.

² Mitake fotoagne naho kezake ty hahavy ty ndaty roe ho mpinamagne maifitse. Hoe izay avao ka ty hahavy ty ndaty raike hifandrambe maifitse amy i Jehovah Andrianagnahare. Hohazavae ty lahatsoratse toy tie, ino ty toko’e hatao mba hahavy antikagne vao mainke hiharine i Andrianagnaharentikagney, le ino ty soa rambesentikagne boake amy ty fanoagne izay. Hodinehentikagne voaloha’e hey tie, nagnino ro tena soa ty miharine i tena Namantikagney, le i Jehovah.

3. Nagnino tikagne ro toko’e hisaintsaigne ty soa rambesentikagne boake amy ty fiharineantikagne i Jehovah? Hazavao amy ty ohatse.

³ Tsy isalasalagne fa magneke rehe tie, soa ty miharine i Jehovah. Faie arakarake ty isaintsaignagne ty hasoa ty fanoagne izay ty vao mainke handrisike antika hiharine aze lognandro. (Sal. 63:6-8) Haintikagne ohatse fa mahasoa ty mahay manahatsahatse naho fa mihinagne, manao sporo, mitofatofa, vaho manao ampe rano. Mbe maro avao ty ndaty tsy mivaky loha o raha reo sady tsy midare ty fahasalama’e. Faie arakarake ty ifantohantikagne amy ty soa ho azontikagne naho fa managne fahazaragne soa, ty vao mainke hahavy antikagne hazoto hanao izay. Fa haintikagne ka tie, soa ho antikagne ty miharine i Jehovah. Faie naho misaintsaigne ty soa ho rambesentikagne boake amy ty fanoagne izay tika, le handrisike antikagne vao mainke hiharine i Ragnentikagney zay.​—Sal. 119:27-30.

4. Arake ty Salamo 73:28, ino ty nitsapa i mpanao Salamoy?

⁴ Vakio ty Salamo 73:28. Levita mpihira tamy i tempoly i Jehovah-y ao ty mpanoratse ty Salamo 73. Nanompo i Jehovah reke sady tsy nivalike tagnate ty taogne maro. Faie ndra tie teo zay, le mbe nahatsapa avao reke tie, “ty miharine an’Agnahare” ro mahasoa aze naho ty ndaty hafa. Nila nitadidie’e avao zay sady nitiahive’e hoe izay ka ty ndaty hafa. Inogne iaby ty soa ho rambesentikagne naho fa manao izay tikagne?

MAHASAMBATSE “TY MIHARINE AN’AGNAHARE”

5. a) Nagnino ty fiharineagne i Jehovah ro mahasambatse antikagne? b) Mioregne amy ty Ohabolana 2:6-16, mirehafa ohatse mampiseho tie mahasoa naho miaro antikagne manokagne ty fahendrea i Jehovah.

⁵ Arakarake ty iharineantikagne i Jehovah ty vao mainke hahasambatse antikagne. (Sal. 65:4) Maro ty anto’e mahavy antikagne mirehake izay. Mandrambe soa ohatse tikagne naho fa mampihatse ty fahendreagne agnate ty Saontsi’e ao, le ty Baiboly. Miaro antikagne tsy hanao raha raty naho tsy hanao hadisoagne lahibey o fahendreagne iohoe. (Vakio ty Ohabolana 2:6-16.) Izay ty anto’e mahavy ty Baiboly mirehake tie: “Sambatse ty ndaty mahatrea fahendreagne naho ty ndaty manjare mahay mandineke.”​—Ohab. 3:13.

6. Ino ty nahavy i mpanao salamoy tsy nifalefale sasa?

⁶ Ndra ty ndaty nama i Jehovah aza, le va’e halahelo kindraike. Nanjare tsy nifalefale i mpanoratse ty Salamo 73 oy, naho fa nifantoke amy ty raha mahakivy. Nanjare nisoregne naho nialogne reke, satria nieretseretse tie milamigne soa avao ty fiaigna o ndaty tsy midare an’Agnahare naho ty fitsipi’eo. Nidiso hevetse reke, le nieretseretse tie, lava manan-karena, salama soa sady tsy mba mijale zao o ndaty mpiarotegne naho miavognavogneo. (Sal. 73:3-7, 12) Niveren-draha i mpanao salamoy, le nagnontane tegna naho toe misy dika’e avao ty kezake natao’e mba hanompoagne i Jehovah. Nalahelo reke, le nitaraigne hoe izao: “Montso antoke avao ty kezake nataoko mba hanagnagne fo malio lognandro, naho ty nanasako ty tagnako ho porofo tie tsy manan-tsiny raho.”​—Sal. 73:13.

7. Naho misy raha mampalahelo antikagne, ino ty toko’e hataontikagne mba hahavy antikagne ho falefale avao? (Henteo ka i sarey.)

⁷ Tsy nenga i mpanao salamoy hampaleme aze ze alahelo’e zay, fa le avy le nanao raha reke. ‘Nilitse tamy i toeragne masin’Agnaharey’ tao reke, le nahitsy i Jehovah ty fomba fisaigna’e naho fa tao. (Sal. 73:17-19) Fanta i Jehovah i tena Namantikagney ka ty alahelo tsapantikagne naho fa kivy tika. Naho mangatake tari-dalagne ama’e amy ty alala ty vavake tika, sady magneke ty fagnampeagne mea’e amy ty alala ty Saontsi’e naho ty fiangonagne, le hahazo hery hagnampe antikagne hiaretse ty alahelontikagne. Ndra tie maro aza ty raha mampinekoneko antikagne, le hampionogne naho hampitony antikagne ty Jehovah.​—Sal. 94:19.a

HAMPISY DIKA’E TY FIAIGNANTIKA SADY HAGNOMEY FANANTENAGNE ANTIKAGNE ‘TY FIHARINEAGNE AN’AGNAHARE’

8. Inogne ka ty anto’e lahibey hafa mampiseho tie soa ho antikagne ty miharine i Jehovah?

⁸ Trea amy ty raha lahibey roe retoagne fa mahasoa antikagne ty miharine an’Agnahare: Voaloha’e, hanjare hisy dika’e ty fiaignantika. Faharoe, hanagne fanantenagne azo antoke miomba ty hoavy tika. (Jer. 29:11) Andao hodinehentikagne o soa ho azontikagne rehoe.

9. Nagnino ty fiharineagne i Jehovah ro mahavy ty fiaignantikagne hisy dika’e?

⁹ Hampisy dika’e ty fiaignantikagne ty fiharineagne i Jehovah. Maro amo o ndaty mandietse ty fisian’Agnahareo ro mieretseretse tie, tsisy dika’e ty fiaignagne, sady ho zamagne iaby ze kila ndaty amy ty hoavy. Faie noho ty fianarantikagne ty Saontsin’Agnahare, le rese lahatse tikagne tie, ‘misy ty Andrianagnahare sady mpamale soa ze mikodebe mafe aze’ reke. (Heb. 11:6) Ndra tie amy izao aza tikagne, le fa mahatsiaro ho sambatse amy ty fiaignagne, satria manompo i Babantikagne an-dagnitse agney le i Jehovah. Toe izay ty anto’e namorognagne antikagne.​—Deot. 10:12, 13.

10. Ino ty rehafe ty Salamo 37:29 miomba ty hoavy ze ndaty mitamà i Jehovah?

¹⁰ Tsy misy raha tamaegne amy ty fiaigna’e ankoatse tihoe miasa, managne keleiagne vaho magnomagne ty ho reterete’e ty ankamaroa o ndatio. Tsy mba eretserete iareo ty Andrianagnahare. Faie tsy hoe izay o mpanompo i Jehovah-o, satria ama’e ty ametraha iareo ty fanantena’e. (Sal. 25:3-5; 1 Tim. 6:17) Matoky i Andrianagnahare iharineantikagney tika sady matoky ty fampitamà’e. Mitamà tika fa hanompo aze nainai’e amy i Paradisay ao amy ty hoavy.​—Vakio ty Salamo 37:29.

11. Ino ty voka’e amantika naho fa miharine an’Agnahare tika le ino ty voka izay ama’e?

¹¹ Misy anto’e hafa ka mahasoa tihoe miharine an’Agnahare. Nampitamà ohatse ty Jehovah tie naho manota ty ndaty raike marine aze faie mibebake, le havela’e ty helo’e. (Isaia 1:18) Voka’e, tsy voatere ho heagnen’eretseretse lava noho ty fahotagne nataontikagne taloha tika. (Sal. 32:1-5) Mahafinaritse antikagne ty mampifale i Jehovah. (Ohab. 23:15) Afake mieretseretse ty fitahiagne hafa ho azo’o, noho i rehe minamagne aman’Agnahare ka rehe. Faie akore ty hahavy azo harine an’Agnahare lognandro?

AKORE TY HAHAVY AZO ‘HIHARINE AN’AGNAHARE’ LOGNANDRO?

12. Ino ty kezake fa natao’o mba hahavy azo hiharine an’Agnahare?

¹² Naho Kristiana vita badisa rehe, le maro ty kezake fa natao’o mba hahavy azo hiharine i Jehovah. Fa nianatse hamaregnagne maro miomba i Jehovah Andrianagnahare naho i Jesosy Kristy zao ohatse rehe. Fa nibebake tamy ty fahotagne natao’o taloha, nagnatanjake ty finoa’o an’Agnahare, naho nikezake nanao raha mifagnarake amy ty zoton’arofo’e ka rehe. Faie tsy maintsy manohy manao o raha reo avao tikagne, naho teantikagne ty vao mainke hiharine an’Agnahare.​—Kol. 2:6.

13. Ino ty raha telo hagnampe antikagne vao mainke hiharine i Jehovah lognandro?

¹³ Ino ty hagnampe antikagne vao mainke hiharine i Jehovah lognandro? Voaloha’e, tsy maintsy mamaky naho mianatse Baiboly tsy tapake tikagne. Faie tsy ty hahafantatse ty hamaregnagne fototse miomba an’Agnahare avao ty toko’e ho tanjontikagne naho fa manao izay tikagne. Toko’e hikezake hamantatse ty zoton’arofon’Agnahare miomba antikagne tika, sady hiaigne mifagnarake amy i toro lalagne agnate ty Saontsi’e ao rey. (Efes. 5:15-17) Faharoe, tsy maintsy magnamafe ty finoantikagne tika, ty dika izay, misaintsaigne ty porofo maro mampiseho tie tena tea’e tikagne. Fahatelo, tsy maintsy mikezake lognandro halaigne ze raha mampangorìgne i Jehovah tikagne, sady tsy minamagne amy ze ndaty manao irey.​—Sal. 1:1; 101:3.

14. Arake ty 1 Korintianina 10:31, inogne iaby ty raha azontikagne atao amy ty fiaignantika andavanandro mba hampifaleagne i Jehovah? (Henteo ka i sare rey.)

¹⁴ Vakio ty 1 Korintianina 10:31. Tena lahibey tihoe manao ty raha mampifale i Jehovah. Tsy tihoe mandeha manompo naho mivory avao zay. Toko’e hanao raha mampifale i Jehovah tika amy ze raha ataontika isan’andro. Mampifale aze zao ohatse tika naho manao ty maregne amy ze kila raha sady mizara ze anagnantika amy ty hafa. (2 Kor. 8:21; 9:7) Tea’e ka tikagne naho mihevetse ty aigne ho fagnomezagne sarobily. Miharine i Mpagnomey ty fiaigney tika, naho mahay manahatsahatse naho fa mihinagne naho minogne, sady mikarakara ty fahasalamantikagne amy ty fomba sambe hafa. Ze kila kezake ataontikagne mba hampifaleagne i Jehovah, ndra amy ty raha kedekede aza, le hahavy antikagne vao mainke ho tea’e.​—Lioka 16:10.

15. Akore ty tea i Jehovah hindesantikagne o ndatio?

¹⁵ Soa fagnahy amo o ndaty maregneo naho o tsy maregneo ty Jehovah. (Mat. 5:45) Mitamà reke fa haneho hasoa fagnahy amy ty hafa ka tika. Ohatse zao, tsy toko’e ‘hagnaraty ndaty tika, tsy ho tea mialy, ... sady haleme fagnahy amy ze kila ndaty.’ (Tit. 3:2) Naho mitadidy izay avao tikagne, le tsy hagnambanembane ty hafa satria iareo tsy mitovy raha inoagne amantikagne. (2 Tim. 2:23-25) Vao mainke harine i Jehovah tikagne naho soa fagnahy lognandro, sady magnisy fiheveragne ze kila ndaty.

AFAKE “MIHARINE AN’AGNAHARE” TIKA NDRA TIE TONTA AZA

16. Ino ty nitsapa i mpanoratse ty Salamo 73 oy naho fa nandeha ty fotoagne?

¹⁶ Naho fa mandeha ty fotoagne, le va’e hahatsapa rehe tie tsy fagneva ty hatea i Jehovah. Ino ty hatao’o naho izay ty raha miseho? Arake ty fa nidinehentikagne tato, le fa nahazo i mpanoratse ty Salamo 73 oy ze raha zay. Nirehake ty alahelo’e hoe izao reke: “Dìdỳ tsy ho niviogne lalan-kafa raho, fa ho nidorasitse ty tomboko.” (Sal. 73:2) Nieke reke tie nanjare “nilagy”, “tsy nieretseretse soa” sady “nanahake o biby tsy misaigneo” tagnatreha i Jehovah eo. (Sal. 73:21, 22) Faie nahavy aze nieretseretse vao zay tie, tsy fagneva ty hatea i Jehovah reke noho i hadisoagne natao’ey?

17. a) Ino ty natao i mpanao salamoy ndra tie nikivy aza reke? b) Ino ty lesogne azontikagne ianaragne boake amy ty raha niaigna’e? (Henteo ka i sare rey.)

¹⁷ Naho ohatse i mpanao salamoy nahatsapa tie, nienga aze ty Jehovah le tsy naharetse zay. Va’e nahatsapa reke amy i reke malaheloy tie, mila miharine an’Agnahare naho henteagne ty raha nirehafe’e toy: “Ama’o [Jehovah] eo lognandro raho tie amy izao, nandrambe ty tagnako an-kavana rehe. Ty toroheve’o ro itariha’o ahy, sady homea’o voninahitse raho afara izay.” (Sal. 73:23, 24) Toko’e hataontikagne lamilamy tsy voahozongozogne ty Jehovah, naho fa mahatsapa maleme tikagne ndra kivy. (Sal. 73:26; 94:18) Ndra tie niviogne lalan-kafa tagnate ty fotoagne fohe aza rehe, le afake miheregne amy i Jehovah, sady matokia fa “vognogne hamela heloke” reke. (Sal. 86:5) Vao mainke toko’e hiharine i Andrianagnaharentikagney tika, lohotsie naho fa mahatsapa tie tena kivy.​—Sal. 103:13, 14.

“MIHARINE AN’AGNAHARE” NAINAI’E

18. Nagnino ro rehafegne tie tsy misy fetra’e ty fiharineagne i Jehovah?

¹⁸ Tsy misy fitapera’e ty fahafahantikagne miharine i Jehovah, naho ty fikezahantikagne hahafantatse aze. Rehafe ty Baiboly tie “tsy hay fantaregne” ty lala i Jehovah, ty fahendrea’e vaho ty fahalala’e.​—Rom. 11:33.

19. Ino ty toky anagnantikagne boake amy i Salamoy?

¹⁹ Izao ty rehafe ty Salamo 79:13: “Hisaotse azo nainai’e zahay vahoa’o naho agnondry fiaraze’o, sady hidera azo hatrake amy ty taranake nainai’e.” Naho miharine an’Agnahare lognandro rehe, le afake matoky ka tie hahazo fitahiagne nainai’e sady ho afake hirehake tihoe: “Andrianagnahare ty lamilamy ty foko, sady anjarako nainai’e.”​—Sal. 73:26.