Tsy Ombia ho Irerike Tikagne

1-2. a) Nagnino tikagne ro mirehake tie tsy ombia hialy raike? b) Ino ty hodinehentikagne amy ty lahatsoratse toy?

NAHO FA miatreke olagne lahibey tikagne, le va’e hahatsapa ho irerike manahake ty agnate ty lakagne raike amy ty riake mivalitaboake. Faie tsy irerike tika naho fa miatreke olagne. Tsy tihoe mahavazoho ty raha sarotse atrehentikagne avao i Babantikagne bey hatea an-dagnitse agney, fa mampitamà ty hagnampe antikagne hiatreke irey ka. Magnomey toky o mpanompo’e tsy mivalikeo hoe izao ty Jehovah: “Hagnampe azo raho.”​—Isaia 41:10.

² Hodinehentikagne amy ty lahatsoratse toy ty fomba agnampea i Jehovah antikagne naho fa ireke: 1) Mitari-dalagne antikagne, 2) magnomey ze raha ilaentikagne, 3) miaro antikagne, 4) mampionogne antikagne. Magnomey toky antikagne ty Jehovah tie, ndra inogn’inogne raha sarotse atrehentikagne amy ty fiaignagne, le tsy ombia hagnaligno antikagne reke. Tsy ombia hienga antikagne reke. Tsy ho irerike zao tika.

MITARI-DALAGNE ANTIKAGNE TY JEHOVAH

3-4. Akore ty fomba itariha i Jehovah antikagne? (Salamo 48:14)

³ Vakio ty Salamo 48:14. Ony i Jehovah tie, tsy mahay mivey vatagne tikagne. Akore areke ty itariha’e o mpanompo’e tsy mivalikeo tie amy izao? Ty fomba raike anoa’e izay, le amy ty alala ty Baiboly. (Sal. 119:105) Mampiasa ty Saontsi’e ty Jehovah mba hagnampeagne antika hahay handrambe fanampaha-kevetse sady hanagne toetse soa. Izay ty hahavy antika ho tena sambatse manomboke amy izao naho amy ty hoavy.a Mampianatse antikagne ohatse reke mba tsy hitagne am-po, hanao ty maregne amy ze kila raha naho hotea ty hafa amy ty fontikagne. (Sal. 37:8; Heb. 13:18; 1 Pet. 1:22) Naho fa mampiseho o toetse boake aman’Agnahare reo tikagne, le hanjare rae aman-drene, valy vaho ragnetse fanjaka.

⁴ Tsy vita izay fa nampanorate i Jehovah agnate ty Saontsi’e ao ka ty tantara ty ndaty tena nisy niatreke raha sarotse. Nanagne fihetseham-po manahake antikagne avao iareo. (1 Kor. 10:13; Jak. 5:17) Roe fara fahakede’e ty soa ho rambesentikagne, naho mamaky sady mampihatse ty lesogne ianarantikagne boake amy i tantara rey tika. Voaloha’e, manjare fantantikagne tie tsy irerike tikagne fa kay fa nisy ndaty niatreke raha sarotse mitovy amy ty raha iaignantikagne, sady nahavita niaretse irey. (1 Pet. 5:9) Faharoe, manjare haintikagne ty fomba hiatrehagne i raha sarotse rey.​—Rom. 15:4.

5. Ia iaby ty ampiasae i Jehovah mba hitarike antikagne amy i lala ty fiaignagney?

⁵ Mitarike antikagne amy ty alala o mpiharo finoagne amantikagneo ka ty Jehovah.b Mitilike o fiangonagneo tsy tapake zao ohatse o mpiandraikitse faritseo mba hampaherezagne antikagne. Magnamafe ty finoantikagne ty lahajaka anoe iareo, sady magnampe antikagne hiharo saigne avao. (Asa. 15:40–16:5) Mipay ze hahasoa ty mpitory tsikiraidraike ka ty androanavy o fiangonagneo. (1 Pet. 5:2, 3) Mitarike ty ana iareo amy ty lafi’e ara-pagnahy ka o rae aman-dreneo, magnampe iareo mba hisaigne soa naho hanagne fahazaragne soa. (Ohab. 22:6) Ty rahavave matotse ka magnampe o rahavave tanorao, naho fa mikezake ho modely, magnomey torohevetse sady mampahery iareo.​—Tit. 2:3-5.

6. Ino ty tsy maintsy ataontikagne mba hahavy antikagne handrambe soa amy ty fitariha i Jehovah?

⁶ Fa nanao ty anjara’e mba hagnomeagne ty tari-dalagne ilaentikagne ty Jehovah. Akore ty ampisehoantikagne tie mankasitrake ty raha fa natao’e ho antikagne tika? Hoe ty Ohabolana 3:5, 6: “Matokia i Jehovah amy ty fo’o iaby fa ko miantehetse amy ty fahaia’o.” Naho manao izay tikagne, “le hatao’e mandeha soa ty fiaignantikagne.” Ty dika izay, hampea’e tikagne amy izay mba tsy azo ty olagne maro, sady hankamamy o fiaignagneo. Tena mankasitrake i Jehovah tikagne, noho ireke manoro hevetse antikagne tsikiraidraike aman-katea.​—Sal. 32:8.

MAGNOMEY ZE RAHA ILAENTIKAGNE TY JEHOVAH

7. Ino ty atao i Jehovah mba hagnomeagne ze ilaentika? (Filipianina 4:19)

⁷ Vakio ty Filipianina 4:19. Tsy vita tihoe mitarike antika amy ty lafi’e ara-pagnahy avao ty Jehovah, fa mitahy ty kezake ataontikagne ka reke, amy izay tika mahazo hanegne, akanjo vaho tragno hitobohagne. (Mat. 6:33; 2 Tes. 3:12) Ara-dalàna naho minekoneko miomba ty raha ilaentika ara-nofo tikagne. Faie mandrisike antika ty Jehovah mba tsy hinekoneko loatse miomba o raha rehoe. (Mat. 6:25) Ino ty anto’e? Satria tsy hienga ty mpanompo’e tsy mivalike amy ty fotoagne ilae iareo fagnampeagne i Babantikagney. (Mat. 6:8; Heb. 13:5) Misaontsy reke tie hagnomey ze raha ilaentika. Azontikagne antoke zay.

8. Ino ty natao i Jehovah hoahy i Davida?

⁸ Dineho moa ty fomba nagnampea i Jehovah i Davida. Tagnate ty taogne maro, le tena nisarotse ty nifiaigna’e naho fa nilay i Saoly. Faie nagnomey ze raha nilae’e naho nilae i ndati’e rey avao ty Jehovah mba hiveloma iareo. Naho fa nandineke ty fikarakara i Jehovah aze tagnate ty taogne maro ty Davida, le nanoratse hoe izao: “Mba fa nitanora avao raho le fa antetse hinane zao, faie mbe liako nahatrea ndaty maregne naforintsegne ndra nahatrea ty ana’e nangatake hanegne.” (Sal. 37:25) Va’e nitsapa’o tamy ty fiaigna’o ka tie, magnomey ze raha ilae ty mpanompo’e mahafoe tegna ty Jehovah.

9. Akore ty atao i Jehovah tie amy izao mba hagnomeagne ze raha ilae ty vahoa’e naho fa misy loza miseho? (Henteo ka i sare rey.)

⁹ Magnomey ze raha ilae ty vahoa’e ka ty Jehovah naho fa misy loza. Naho fa nisy keré ohatse tamy ty taon-jato voaloha’e, le nandefa fagnampeagne hoahy ty rahalahy naho ty rahavave sahiragne ty Kristiana boake amy ty toeragne sambe hafa agne. (Asa. 11:27-30; Rom. 15:25, 26) Matarike hoe izay avao ka ty mpanompon’Agnahare amy izao. Naho fa misy loza, le mandrisike o vahoa’eo aman-katea ty Jehovah mba hagnomey ze raha ilae iareo. Agnisa izay ty hanegne, rano, akanjo, vaho fagnafoly hoahy ze mipetrake amy ty toeragne nisehoa i lozay. Mamboatse ze tragno naho Anjomba i Fanjakagney simba ka o ekipa mpanao fagnoregnagneo. Le avy le manohagne amy ty lafi’e ara-pihetseham-po naho amy ty lafi’e ara-pagnahy ze niazon-draha ka o mpanompo i Jehovah-o.c

10-11. Ino ty ianara’o boake amy ty raha niaigna i Borys?

¹⁰ Matarike ka ty Jehovah, le magnomey ze raha ilae o ndaty mbe tsy manompo azeo. Hoe izay avao ka, fa toko’e hipay hirike hanehoagne hasoa fagnahy amo o ndaty tsy mitovy finoagne amantikagneo tika. (Gal. 6:10) Mateteke zay ro fitoriagne vita ho aze. Dineho ty raha niaigna i Borys, mitoboke a Ukraine agne. Talé amy ty lakilasy raike reke. Ndra tie tsy Vavolombelo i Jehovah aza ty Borys, le lava nisoa fagnahy tamy ty mpiana’e Vavolombelogne avao sady nagnaja ty raha inoa iareo. Nanapa-kevetse hilay amy ty faritse voaro agne ty Borys naho fa nisy aly ty tamy ty nisy aze eo, le nagnampe aze o rahalahintikagneo. Nagnatreke ty Fahatsiarovagne ty nimateza i Kristy ty Borys naho fa tafara tatoy. Izao ty nirehafe’e naho fa nandineke i raha nisehoy reke: “Tena nitsanogne sady nikarakara ahy o Vavolombelogneo. Misaotse o Vavolombelo i Jehovah-o raho.”

¹¹ Afake mitsikombe ty famindram-po i Raentika an-dagnitse agney tika naho fa maneho hatea amy ze sahiragne. Manao izay tikagne ndra tie tsy mitovy finoagne amantika aza iareo. (Lioka 6:31, 36) Mitamà tikagne fa handrisike o ndatio mba hanjare mpiana i Kristy ty kezake ataontika mba hanehoagne hatea amy iareo. (1 Pet. 2:12) Faie ndra tie tsy izay aza ty raha hiseho, le hahatsiaro ho sambatse avao tikagne satria magnomey.​—Asa. 20:35.

MIARO ANTIKAGNE TY JEHOVAH

12. Ino ty nampitamae i Jehovah fa hatao’e amo o vahoa’eo amy ty fitambara’e? (Salamo 91:1, 2, 14)

¹² Vakio ty Salamo 91:1, 2, 14. Mampitamà ty Jehovah tie amy izao tie hiaro antika amy ty lafi’e ara-pagnahy. Tsy ombia henga’e handrava ty fivavahagne maregne zao ty Satana. (Jaona 17:15) Naho fa manomboke i “haoreagne lahibeỳ,” le afake matoky tikagne tie, hagnatanterake i fampitamà’e hiaro ty vahoa’ey ty Jehovah. Tsy amy ty lafi’e ara-pagnahy avao o fiarova’e iohoe fa ara-batagne ka.​—Apok. 7:9, 14.

13. Akore ty fomba iarova i Jehovah antikagne tsikiraidraike?

¹³ Akore ty fomba iarova i Jehovah antikagne tsikiraidraike? Mampiasa ty Soratse Masigne ty Jehovah mba hagnampeagne antika hahay hagnambake ty soa amy ty raty. (Heb. 5:14) Naho fa miaigne mifagnarake amy ty toro lalagne agnate ty Saontsin’Agnahare ao tikagne, le hovoaro amy ty lafi’e ara-pagnahy naho amy ze raha hanimba ty vatantika. (Sal. 91:4) Tsy vita izay fa mbe miaro antika amy ty alala o fiangonagneo ka ty Jehovah. (Isaia 32:1, 2) Hahazo fampaherezagne sady hahavita hanohetse ze raha hanimba antikagne tika, naho ze ndaty tea i Jehovah sady miaigne mifagnarake amy ty fitsipi’e ro ifagnosehoseantikagne.​—Ohab. 13:20.

14. a) Nagnino ty Andrianagnahare ro tsy voatere hiaro antikagne isake tie misy raha miseho? b) Ino ty atokisantikagne arake ty Salamo 9:10? (Henteo ka i fagnamarehagne ambane pejey.)

¹⁴ Nisy fotoagne ty Jehovah niaro o mpanompo’eo amy ze raha ho nagnoho-doza iareo. Faie tsy tihoe isake tie misy raha miseho, le manao izay reke. Kindraike tikagne va’e hotratse ty “raha tsy ampoizegne.” (Mpito. 9:11) Nisy fotoagne aza o mpanompo i Jehovah-o tsy narova’e naho fa niatreke fagnenjehagne sady nivonoegne. Nanao izay reke mba hagnaporofoagne tie mpavande ty Satana. (Joba 2:4-6; Mat. 23:34) Hoe izay ka ty raha miseho amy izao. Ndra tie tsy afaha i Jehovah aza o raha sarotse manjò antikagneo, le afake matoky tikagne tie tsy ombia hienga ze tea aze reke.d​—Sal. 9:10.

MAMPIONOGNE ANTIKAGNE TY JEHOVAH

15. Akore ty ampionogna ty vavake, ty Saontsin’Agnahare naho o mpiharo finoagneo antikagne? (2 Korintianina 1:3, 4)

¹⁵ Vakio ty 2 Korintianina 1:3, 4. Va’e hisy fotoagne tikagne halahelo, hinekoneko ndra hialy saigne. Va’e miaigne amy izay rehe hinane zao le mahatsiaro ho irerike. Mba misy mahatakatse ty raha tsapa’o vao? Ie, i Jehovah. Tsy tihoe mahatsapa ty raha mahaore antika avao reke, fa “mampionogne antikagne amy ze kila haoreagne” ka. Amy ty fomba akore? Naho fa mihalale amy i Jehovah amy ty alala ty vavake tikagne, le homea’e ty “fiadagnan’Agnahare.” Tsy taka ty saintikagne o fiadagnagne iohoe. (Fil. 4:6, 7) Mahazo fampionognagne ka tikagne naho fa mamaky ty raha saontsie i Jehovah amantikagne amy Baiboly ao. Mahatsapa ho velombelogne tikagne, naho fa mamaky agnate ty Saontsi’e ao ty fomba anehoa’e ty hatea’e antikagne, ty fomba agnampea’e antikagne ho hendre naho hana-draha tamaegne. Mahazo famelombelomagne boake amo o mpiara-manompò naho fampaherezagne boake amy Baiboly ao tikagne naho fa am-pivoriagne agne.

16. Ino ty ianara’o boake amy ty raha niaigna i Nathan naho i Priscilla?

¹⁶ Andao tika handineke ty tantara i Nathan naho i Priscilla, mitoboke a Etazonia agne. Hahatakarantika ty fomba ampionogna i Jehovah naho ampahereza’e antika amy ty alala ty Saontsi’e ty tantara iareo. Nanapa-kevetse ty hifindra amy ty toeragne ilaegne mpitory maro iareo taogne maro lasa zay. Hoe ty Nathan: “Natoky zahay tie hitahy ty kezake atao’ay ty Jehovah.” Naho fa niavy amy fanendreagne iareo vaovaoy agne iareo, le niatreke tsy fahasalamagne tampoke naho olagne ara-bola. Tsy maintsy noly i mpivaly rey ie amy izao mbe tsy niafake i olagne ara-bola natrehe iareoy. Nirehake ty Nathan tie: “Nagnontane tegna raho tie, nagnino ty Andrianagnahare ro tsy niaro anay arake ty nieretsereta’ay aze. Nanomboke nieretseretse iaby aza raho tie, kera raho ndra nanao raha tsy mete.” Naho fa nandeha ty fotoagne, le nitsapa i Nathan naho i Priscilla tie tsy nienga iareo ty Andrianagnahare tamy i fotoagne rey. Nitantara ty Nathan tie: “Tagnate i fotoan-tsarotse rey, le nanahake ty namagne hendre nagnomey fampaherezagne naho tari-dalagne ho anay o Baibolio. Tsy nifantoke tamy i raha sarotsey zahay fa tamy ty fomba nagnampea i Jehovah anay, le izay ty nagnampe anay ho vognogne hiatreke ze raha sarotse amy ty hoavy.”

17. Akore ty fomba nahazoa ty rahavave raike atao tihoe Helga fampionognagne? (Henteo ka i sarey.)

¹⁷ Afake mampionogne antikagne ka o rahalahy naho o rahavaventikagneo. Amy ty fomba akore? Dineho ty raha niaigna i Helga, mitoboke a Hongrie agne. Tagnate ty taogne maro, le niatreke raha sarotse maro reke hafara’e nahatsapa ho kivy naho tsisy dika’e. Faie naho fa mandineke ty fiaigna’e taloha reke, le trea’e tie nampionogne aze tamy ty alala o fiangonagneo ty Jehovah. Izao ty nisorate’e: “Nagnampe ahy lognandro ty Jehovah naho fa nivazoho’e tie nihegne ty heriko noho ty asa ataoko naho ty fikarakarako i anako tsy salamay vaho ty raha sarotse hafa. Mbe lia’e ndra ho indraike tagnate ze 30 taogne lasa zay naho tsy nitagne i fampitama’e tie hampionogne ahikey reke. Nanao rehake mampahery, voahevetse soa, vaho feno fankasitrahagne ahike ty hafa. Tamy ty alala ireo ty nagnatanjaha i Jehovah ahy. Mateteke nahazo sms, karatse kede vaho rehake fideragne boake amy ty hafa raho tamy ty fotoagne nilàko aze.”

18. Akore ty azontikagne ampionognagne ty hafa?

¹⁸ Tombotsoa ho antika ty mampahery ty hafa satria manahake i Andrianagnaharentikagney tika naho manao izay. Akore ty azontika anoagne izay? Afake mitsanogne iareo amim-paharetagne tika, manao rehake mampahery iareo sady manao raha mba hagnampeagne iareo. (Ohab. 3:27) Mikezake mafe tika mba hagnampe o ndaty mijaleo, agnisa izay i mbe tsy manompo an’Agnahare rey. Naho fa misy ndaty mpiharo tanàgne amantika zao malahelo, marare ndra minekoneko, le mitilike iareo tika, mitsanogne iareo sady mizara amy iareo andinin-teny mampahery boake amy Baiboly ao. Naho fa mitsikombe i Jehovah, i “Andrianagnahare ze kila fampionognagney” tika, le tsy tihoe magnampe o mpiharo finoagne amantikagneo hiatreke raha sarotse avao, fa magnalefake ty fo ze tsy mpino hagnorike ty fivavahagne malio ka.​—Mat. 5:16.

EO AVAO TY JEHOVAH MBA HAGNAMPE ANTIKAGNE

19. Ino ty atao i Jehovah ho antikagne, le akore ty azontikagne anahafagne aze?

¹⁹ Tena mikarakara ze ndaty tea aze ty Jehovah. Tsy mienga antikagne reke naho fa miatreke raha sarotse tika. Manahake ty rae aman-drene bey hatea mikarakara ty ana’e, le mikarakara ty mpanompo’e tsy mivalike ka ty Jehovah. Mitari-dalagne antika reke, magnomey ze raha ilaentikagne, miaro antikagne vaho mampionogne antikagne. Manahake i Babantikagne bey hatea an-dagnitse agney tika naho manohagne sady mampahery ty hafa naho fa miatreke raha sarotse iareo. Ndra tie miatreke raha sarotse naho mamparare fo aza tikagne, le afake matoky tie hanohagne antika ty Jehovah. Toe fa nampitamà ka reke tie: “Ko matahotse fa hanohagne azo raho.” (Isaia 41:10) Fagnomezan-toky an’izao! Tsy ombia ho irerike tikagne.