Mbe Afake Mianatse Boake amy i Fampianaragne Fototse amy Baiboly ao rey vao Rehe?

1. Ino ty nivoka ty fampianara ty Baiboly tama’o tamy tie irehe nianatse ty hamaregnagne voaloha’e?

NAGNOVA ty fiaignantikagne i fampianaragne fototse amy i Baiboly ao rey. Naho fa nihaintikagne zao ohatse tie, i Jehovah ty tahinan’Agnahare, le itikagne ty nanao dingagne voaloha’e mba hanjare ho nama’e. (Isaia 42:8) Naho fa itikagne ka nahafantatse ty maregne miomba ty mate, le tsy ninekoneko sasa tie mijale vao i longontikagne nimate rey. (Mpito. 9:10) Naho fa nifantantikagne ka tie mampitamà Paradisa an-tane etoy ty Andrianagnahare, le tsy ninekoneko miomba ty hoavy sasa tika. Matoky tika fa ho afake hiaigne nainai’e, fa tsy tihoe 70 ndra 80 taogne avao.​—Sal. 37:29; 90:10.

2. Naho henteagne ty 2 Petera 1:12, 13, nagnino ro mbe mahasoa o Kristiana matotseo i fampianaragne fototse agnate ty Soratse Masigne ao rey?

² Toko’e heverentikagne ho lahibey avao i fampianaragne fototse amy i Baiboly ao rey. Nanoratse hoahy ty Kristiana “fa mioregne soa amy ty hamaregnagne” ty apostoly Petera, amy i taratasi’e faharoey ao. (Vakio ty 2 Petera 1:12, 13.) Faie nisy raha nagnoho-doza ty ara-pagnahy iareo ty tamy i fiangonagney eo, agnisa izay ty fampianaran-diso naho ty ndaty nitarike iareo hiala aman’Agnahare. (2 Pet. 2:1-3) Te hagnatanjake o rahalahi’e naho o rahavave’e reo ty Petera mba hahavita iareo hanohetse izay. Nitiahive’e iareo areke ty fampianaragne ila’e fa nianara iareo. Nagnampe iareo tsy hivalike hatrake am-para’e o fampianaragne rehoe.

3. Nagnino ty Kristiana iaby ro toko’e hanohy handineke avao i fampianaragne fototse amy Baiboly ao rey? Magnomeza ohatse.

³ Mbe afake hahatrea lesogne vaovao boake amy i fampianaragne fototse amy i Baiboly ao rey tikagne, ndra tie fa Kristiana matotse aza. Eretsereto zao: Va’e hitovy ty fangaron-draha ampiasae ty mpahandro raike tena mahay naho ty raike vaho mianatse, naho fa mahandro raha mitovy iareo. Faie naho fa mandeha ty fotoagne, le va’e hipay fomba hafa ampiasaegne i fangaron-draha rey i mpahandro mahaỳ, mba hagnamboaragne hanegne vaovao sady mafiry. Hoe izay ka fa va’e tsy hitovy ty lesogne trea ty mpanompo i Jehovah fa ela naho ty mpianatse vaovao boake amy i fampianaragne fototse rey. Amparake ty nahavita badisa antikagne, le va’e niovaova ty raha iaignantikagne ndra ty tombotsoam-panompoagne nanagnantikagne. Naho ampiharentikagne amy izao, i raha nianarantikagne fa ela rey, le va’e hahatrea lesogne vaovao azo ampiharegne tikagne. Andao tikagne handineke fampianaragne fototse telo boake amy i Baiboly ao naho ty lesogne azo ty Kristiana matotse ianaragne boake amy iareo.

MPAMOROGNE TY JEHOVAH

4. Nagnino ro misy voka’e amantikagne ty fahafantaragne tie i Jehovah ty Mpamorogne antikagne?

⁴ “I Andrianagnaharey ty namboatse ze kila raha.” (Heb. 3:4) Fantantikagne fa ty planeta misy antikagne toy naho ze raha miaigne etoy, le namboare i Mpamorogne tena hendre sady maherỳ. Ireke ty namorogne antikagne, le hai’e amy ty pitsopitso’e tika. Tsy izay avao fa tena tea antikagne reke. Oni’e soa ty raha tena hahasoa antikagne. Ty fahafantarantika tihoe i Jehovah ty Mpamorogne, le nisy voka’e laleke tamantikagne. Mahavy ty fiaignantikagne hisy dika’e naho hanan-draha tamaegne zay.

5. Ino ty hamaregnagne hagnampe antikagne hiambane? (Isaia 45:9-12)

⁵ Mampianatse antikagne hiambane ty hamaregnagne tihoe, i Jehovah ty Mpamorogne. Nanomboke nifantoke bey tamy ty tegna’e naho tamy ty ndaty hafa ohatse ty Joba. Naniahy aze areke ty Jehovah tie Ireke i Mpamorogne fara’e amboney. (Joba 38:1-4) O faniahiagne iohoe, le nagnampe i Joba hahatrea tie, ambone noho ty lala o ndatio ty lalan’Agnahare. Izay ty nahavy i Isaia mpaminany nirehake hoe izao naho fa tafara tatoy tie: “I tane lietsey vao, le hirehake amy i Mpampibokoboko azey tie: ‘Ino ka ty amboare’o toy?’”​—Vakio ty Isaia 45:9-12.

6. Naho fa ombia tikagne ro toko’e hieretseretse ty hery i Jehovah, amy ty maha Mpamorogne aze? (Henteo ka i sare rey.)

⁶ Naho fa ela nanompoagne i Jehovah ty Kristiana raike, le va’e hanomboke hiantehetse amy ty fomba fiheve’e manokagne, fa tsy hipay i Jehovah naho ty Saontsi’e mba hitari-dalagne aze. (Joba 37:23, 24) Faie akore naho mieretseretse laleke ty fahendreagne tsy misy hoe’e naho ty hery i Mpamorogney ty ndaty hoe izay? (Isaia 40:22; 55:8, 9) Hagnampe aze hiambane avao sady hagnitsy ty fomba fiheve’e o hamaregnagne fototse iohoe.

7. Ino ty natao i Rahela mba hahavy aze hagneke fagnovagne?

⁷ Mitoboke a Slovenia agne ty Rahela. Nahavy aze hagneke ty fagnovàgne boake amy i fandaminagne ty fisaintsaigna’e miomba i Mpamorogne azey. Nieke hoe izao reke: “Kindraike, le tsy mora amako ty magneke ty fanapahan-kevetse rambese o lahilahy mitarike reo. Ndra tie fa boake nagnente i Vaovao Fara’e Boake amy ty Filan-keve-pitantanagne (2023) #8-oy aza raho, le niendrake tamy ty voaloha’e naho vaho nahatrea rahalahy nagnisy vaoke manao lahajaka. Nivavake amy i Jehovah areke raho mba hagnampe ahy hagneke i fagnovagney.” Nitaka i Rahela tie amy ty maha Mpamorogne ty lagnitse naho ty tane i Jehovah, le afake mitari-dalagne amy ty fomba soa ty fandamina’e reke. Akore naho sarotse ama’o ty magneke ty fagnitsiagne ty fahatakarantika ty Soratse Masigne ndra ty tari-dalagne vaovao? Mikezaha hiambane, le saintsaigno ty fahendreagne tsy misy hoe’e naho ty hery anagna i Mpamorogney.​—Rom. 11:33-36.

TY ANTO’E MAHAVY AN’AGNAHARE MAGNENGA O FIJALEAGNEO

8. Nagnino ro mahasoa antikagne ty fahafantaragne ty anto’e agnengan’Agnahare o fijaleagneo?

⁸ Nagnino ro engan’Agnahare hisy o fijaleagneo? Ty ndaty ila’e tsy mahay ty vale izay, le manjare boseke aman’Agnahare ndra mieretseretse tie tsy misy reke. (Ohab. 19:3) Faie nianara’o fa ty ota naho ty tsy fahavoririhagne nilovaentika ty mahavy o fijaleagneo fa tsy boake amy i Jehovah. Nianara’o kagne tie manam-paharetagne amo o ndatio ty Jehovah, amy izay ndaty an-tapetrisa’e ty manjare mahafantatse aze naho mahatrea ty hagnafaha’e o fijaleagneo. (2 Pet. 3:9, 15) Nampahery naho nahavy azo hifandrambe marine ama’e o hamaregnagne rehoe.

9. Naho fa amy ty raha manao akore tika ro mila mieretseretse ty anto’e agnengà i Jehovah o fijaleagneo?

⁹ Haintikagne fa mila manam-paharetagne tika, amparake ty hagnafaha i Jehovah o fijaleagneo. Faie naho fa mate ty ndaty teantikagne, ndra mijale tika, ndra ihara ty tsy rare’e, le va’e hieretseretse tie magnino ty Jehovah ro tsy le avy le manao raha. (Hab. 1:2, 3) Naho fa miseho zay, le hendre tikagne naho misaintsaigne ty anto’e mahavy i Jehovah magnenga o ndaty maregneo hijale.a (Sal. 34:19) Afake misaintsaigne ty raha safirie’e ka tikagne le tihoe, le avy le hafaha’e indraike avao o fijaleagneo sady tsy hisy nainai’e.

10. Ino ty nagnampe i Anne naho fa nimate ty rene’e?

¹⁰ Afake magnampe antikagne hiaretse ty fahafantaragne ty maregne miomba o fijaleagneo. Nirehake hoe izao ty Anne mitoboke amy ty tokonose i Mayotte, amy ty Oseana Indiana agne: “Tena nampalahelo ahy ty nimateza i reneko, taogne tsiampeampe lasa zay. Faie nitadidieko avao tie, tsy boake amy i Jehovah o fijaleagneo. Tena te hagnafake ze kila raha mampijale antikagne reke, sady magniry mafe ty hamelogne i longontikagne nimate rey. Manjare milamin-tsaigne raho naho fa misaintsaigne io. Tena nahalatsa ahike zay.”

11. Nagnino ro magnampe antikagne hanohy hitory avao ty fahafantaragne ty anto’e mbe agnengà i Jehovah o fijaleagneo?

¹¹ Ty fahafantarantikagne ty anto’e mahavy an’Agnahare mbe magnenga o fijaleagneo, le mandrisike antikagne hitory avao. Naho fa boake nagnazava tamy ze ndaty nibebake ty Petera tie, midika ho famonjeagne ty fahareta i Jehovah, le nanoratse hoe izao reke: “Dineho tie ndaty toko’e hanao akore nareo. Toko’e hanagne findesan-tegna masigne naho hahafoe tegna ho an’Agnahare nareo.” (2 Pet. 3:11) “Mahafoe tegna” tikagne naho fa manompo amy i faritaney ey. Manahake i Raentikagney tika, le tea o ndatio. Teantikagne hiaigne amy i tontolo vaovao i Andrianagnahare maregneỳ iareo. Manam-paharetagne ty Jehovah, le magnomey fahafahagne ty ndaty amy ty faritane’areo ey mba hanompo aze. Managne tombotsoa hiara-miasa aman’Agnahare naho hagnampe ndaty maro arake ze azo atao mba hianatse ty miomba aze rehe aloha ty hiavia i fara’ey.​—1 Kor. 3:9.

MIAIGNE AMY TY “ANDRO FARA’E” TIKAGNE

12. Nagnino ro mahasoa antikagne ty fahafantaragne tie miaigne amy ty “andro fara’e” tika?

¹² Rehafe ty Baiboly mazava soa tie, hanao akore o ndatio amy ty “andro fara’e.” (2 Tim. 3:1-5) Vaho magnente ty magnodidigne antikagne avao tika, le fa mahatrea tie tanterake o faminaniagne iohoe. Tena rese lahatse ka tikagne tie, azo atokisagne ty Saontsin’Agnahare satria treantikagne fa vao mainke miharaty ty toetse o ndatio.​—2 Tim. 3:13-15.

13. Naho henteagne i fagnoharagne nirehafe i Jesosy amy i Lioka 12:15-21 aoy, ino ty fagnonteneagne toko’e hodinehentikagne?

¹³ Ty fahafantaragne tie miaigne amy ty andro fara’e tikagne, le mahavy antikagne hifantoke amy ty raha tena lahibey. Mareho moa ty lesogne azontikagne ianaragne boake amy i ohatse nirehafe i Jesosy, amy Lioka 12:15-21 (Vakio) aoy, miomba ty raha toko’e ho lahibey amantikagne. Nagnino i lahilahy mpagnarivoy ro nitokavegne tihoe “gege”? Tsy noho ireke mpagnarivo fa noho ireke tsy nahay ty raha toko’e ho lahibey. “Namory raha sarobily ho aze reke fa tsy nanan-karena tagnatrehan’Agnahare eo.” Nanao hadisoagne lahibey reke naho fa nanao izay satria hoe ty Andrianagnahare tama’e: “Hisy hamono rehe ty androany halegne.” Toko’e hagnontane tegna hoe izao ka tikagne satria fa mihamarine ty fifaragna ty tontolo toy: ‘Mifantoke amy ty raha lahibey vao raho naho henteagne ty tanjoko? Tanjogne manao akore ty ampagnatratsereko ty anako? Ampiasaeko mba hamoriagne raha sarobily hoahy ty tegnako vao ty heriko, ty fotoako naho ty fanagnako sa ampiasaeko mba hamoriagne harena an-dagnitse agne?’

14. Naho henteagne ty tantara i Miki, nagnino ro fahendreagne ty misaintsaigne ty porofo arake ty Soratse Masigne tie fa miaigne amy ty andro fara’e tikagne?

¹⁴ Hiova ty fahatreavantikagne ty fiaignagne naho fa itika mandineke ty porofo tie, fa miaigne amy ty andro fara’e vata’e tika. Izay ty natao ty rahavave raike atao tihoe Miki. Hoe reke: “Naho fa nivita ty fianarako, le nagniry hanagne asa ahafahako mianatse ty miomba o bibio raho. Nite ho mpisava lalagne maharetse ka raho sady nite hanompo amy ze toeragne nila mpitory maro. Nisy namagne matotse maromaro nampisaintsaigne ahy tie, tena ho vitako vao ty sady hanao i asay ro hagnatratse i tanjoko ara-pagnahy rey. Nitiahive iareo raho tie, fa marine ty hifaragna ty tontolo toy, sady hianatse biby fara izay ty maro agnate ty fotoagne tsy voafetra raho amy i tontolo vaovaoy agne. Nifily ty hianatse asa tsy mitake fotoagne faie tena ilaeko areke raho. Nagnampe ahy hahatrea asa ahafahako manao mpisava lalagne maharetse zay. Nifindra ta Ekoatera, toeragne mila mpitory maro agne raho naho fa tafara tatoy.” Mpiandraikitse faritse amo o firenena iohoe agne ty Miki mirovaly tie amy izao.

15. Va’e hanao akore hey o ndatio naho fa maharey i talily soay? Mirehafa ohatse. (Henteo ka i sare rey.)

¹⁵ Tsy toko’e ho kivy tikagne naho mandietse i talily soay heike o ndatio amy ty voaloha’e. Afake miova iareo. Dineho ty tantara i Jakoba rahalahy i Jesosy. Nitrea’e ty nibeiza i Jesosy naho ty nanjarea’e Mesia. Nitrea’e kagne tie tsy manahake ty fampianara o ndatio ty fampianara i Jesosy. Faie mbe tsy nagnorike i Jesosy avao reke tagnate ty taogne maro. Tafara kede ty namelomagne i Jesosy o rahalahi’e iohoe vaho nanjare mpiana’e sady tena nafana fo.b (Jaona 7:5; Gal. 2:9) Ko kivy amy ze longo’o tsy liagne ndra amy ze ndaty fa nitoria’o faie tsy nagneke ty talily soa i Fanjakagney areke. Ko haligno fa miaigne amy ty andro fara’e tika, sady tena meke i asa fitoriagney. Ty raha rehafe’o amy izao, le va’e hisy voka’e amy iareo naho fa afara agne ndra tie afara ty anomboha i haoreagne lahibeỳ aza.c

ANKASITRAHO LOGNANDRO TY FANIAHIAGNE BOAKE AMY I JEHOVAH

16. Ino ty soa nirambese’o boake amy i faniahia i Jehovah rey? (Henteo ka ty efajoro tihoe “Ampiasao Rey mba Hagnampeagne ty Hafa.”)

¹⁶ Ty ila’e amy i hanegne ara-pagnahy azontikagne rey, le natao hoahy ty ndaty mbe lia’e naho naharey ty hamaregnagne fototse amy Baiboly ao. Ty ndaty tsy Vavolombelogne ohatse ty tena nanoagne ty lahajaka hoahy ty ndaty maro isan-keregnandro, ty lahatsoratse naho ty video ila’e amy jw.org ao naho ty gazete hoahy ty ndaty maro. Ndra tie izay aza, le mandrambe soa boake amy i faniahiagne rey tikagne. Mampitombo ty hateantikagne i Jehovah, magnatanjake ty finoantikagne ty Saontsi’e sady magnampe antikagne hahay hampianatse soa i fampianaragne fototse rey i raha rey.​—Sal. 19:7.

17. Naho fa amy ty raha manao akore tika ro toko’e hisaintsaigne i fampianaragne fototse amy i Baiboly ao rey?

¹⁷ Amy ty maha Vavolombelo i Jehovah antikagne, le tena fale tikagne naho fa mihamazava ty fahatakarantikagne ty hamaregnagne. Tena mankasitrake i fampianaragne fototse agnate Baiboly ao rey ka tikagne, satria irey ty nitarike antikagne ho amy ty hamaregnagne. Akore naho azo ty tsapa hevetse hagnorike ty heventikagne avao tika fa tsy hipay ty tari-dalagne boake amy i Jehovah? Toko’e hiambane tikagne le hagneke tie, i Mpamorogne fara’e ambone naho manam-pahendreagney ty mitarike i fandaminagne. Naho fa miatreke raha sarotse tika ndra ty longontika, le toko’e hanam-paharetagne sady hisaintsaigne ty anto’e agnenga i Jehovah o fijaleagneo. Naho fa manapa-kevetse miomba ty hampiasaentikagne ty fotoagne naho ty fanagnantikagne tika, le mila mitadidy tie fa miaigne amy ty andro fara’e tikagne tie amy izao. Lonike abey i faniahiagne boake amy i Jehovah rey hagnatanjake antikagne avao, handrisike antikagne vaho hagnampe antikagne hanam-pahendreagne.