Magnampe Antika Hiaretse ty Jehovah

1. Nagnino tika ro mila miaretse, le ino ty hagnampe antikagne hahavita izay? (1 Petera 5:10)

AMO ze o andro fara’e fa mihasarotse zao, le mila miaretse o vahoa i Jehovah-o. Ty ila’e zao va’e mijale satria managne aretegne miteza, le ty hafa ka nimate longo. Misy ka ty tohere ty keleia’e ndra o fitondragneo. (Mat. 10:18, 36, 37) Matokia fa ndra inogn’ino raha sarotse atrehe’o, le hagnampe azo hiaretse ty Jehovah.​—Vakio ty 1 Petera 5:10.

2. Boake amy ia ty fahaia o Kristianao miaretse?

² Maharetse sady mipiteke amy ty raha tamaegne avao ty atao tihoe miaretse, ndra tie misy raha mikalagne, fagnenjehagne, raha sarotse ndra tsapa hevetse aza. Ty fahaiagne miaretse, le tsy tihoe boake amy ty hery ty Kristiana manokagne, fa boake amy i Jehovah, i magnomey ‘hery mihoatse ty ahy o ndatioy.’ (2 Kor. 4:7) Handineke raha efatse natao i Jehovah hagnampeagne antika hiaretse tika amy ty lahatsoratse toy. Hotreantika ka tie, ino ty azontika atao mba handrambesagne soa boake amy ireo.

VAVAKE

3. Nagnino tikagne ro afake mirehake tie tena mahalatsa o vavakeo?

³ Nanao raha mahalatsa ty Jehovah mba hagnampeagne antika hiaretse. Natao’e ze hahafahantika hifandrambe ama’e, ndra tie mpanota aza tikagne. (Heb. 4:16) Eretsereto zao: Afake mivavake amy i Jehovah tikagne ndra ombia ndra ombia, le ndra inogn’ino rehafentika. Afake mijanjigne antikagne reke ndra inogn’ino firehantikagne, le ndra aia ndra aia misy antikagne, ndra irerike ndra am-pirizò agne. (Jona 2:1, 2; Asa. 16:25, 26) Mahaonigne ze raha teantika horehafegne ty Jehovah naho fa itikagne minekoneko, le tsy haintika ty hirehafagne ty raha tsapantikagne ama’e. (Rom. 8:26, 27) Mahalatsa vata’e o vavakeo!

4. Afake mivavake amy i Jehovah tikagne mba hagnampe antika hiaretse. Nagnino zay ro mifagnarake amy ty zoton’arofo’e?

⁴ Magnomey toky antika hoe izao ty Jehovah amy ty Saontsi’e ao: “Ndra inogn’inogne angatahentikagne naho fa mifagnarake amy ty zoton’arofo’e, le mijanjigne antikagne reke.” (1 Jaona 5:14) Afake mivavake mba hahavita hiaretse vao tika? Ie, mifagnarake amy ty zoton’arofo’e zay. Ino ty anto’e? Naho fa itika miaretse raha sarotse, le magnenga i Jehovah hamale i Satana Devoly, i mpagnaraty azey. (Ohab. 27:11) Mirehake ka ty Baiboly tie, vognogne “hampiasa ty heri’e hagnampeagne ze manompo aze amy ty fo’e iaby” ty Jehovah. (2 Tan. 16:9) Afake matoky areke tika tie, managne hery sady magniry hagnampe antikagne hiaretse ty Jehovah.​—Isaia 30:18; 41:10; Lioka 11:13.

5. Nagnino ty vavake ro magnampe antika hilamin-tsaigne? (Isaia 26:3)

⁵ Naho fa mihalale miomba ty raha mampinekoneko antikagne tika, le rehafe ty Baiboly fa ‘i fiadagnan’Agnahare ambone ze kila eretseretsey, le hiambegne ty fontika naho ty saintika.’ (Fil. 4:7) Dineho moa zay. Miatreke raha sarotse o ndaty tsy manompo i Jehovah-o. Va’e hampiasa fomba sambe hafa iareo amy izay milamin-tsaigne. Ty ila’e zao magnafoagne ze raha iaby an-tsai’e ao [meditation] amy izay tony. Magnoho-doza zay satria hahavy aze hifandrambe amo o demoniao. (Ampitahao amy ty Matio 12:43-45.) Mandikoatse ty filaminan-tsaigne azo o ndatio boake amy ty raha hoe izay ty fiadagnan-tsaigne boake amy i Jehovah. Naho fa mivavake amy i Jehovah tika, le manoro tie tena mipiteke ama’e sady hagnomey “fiadagnagne antikagne lognandro” reke. (Vakio ty Isaia 26:3.) Fomba raike anoa i Jehovah izay ty fagnampea’e antika hahatadidy i hamaregnagne mampahery nianarantika amy ty Saontsi’e ao rey. Hahavy ty saintikagne naho ty fontika ho tony zay satria haintikagne tie, midare sady te hagnampe antikagne ty Jehovah.​—Sal. 62:1, 2.

6. Akore ty azo’o ampiasaegne soa ty raha natao i Jehovah le ty vavake? (Henteo ka i sarey.)

⁶ Ino ty azo’o atao? Naho miaretse raha mitsapa ty finoa’o rehe, le “apetraho amy i Jehovah ze raha magnavesatse azo” sady mivavaha mba hahazo ty fiadagna’e. (Sal. 55:22) Mivavaha ka mba hahazo ze fahendreagne ilae’o hahavita’o hiatreke raha sarotse. (Ohab. 2:10, 11) Naho fa mihalale ama’e mba hahavita hiaretse rehe, le ko haligno ka ty manao vavake fisaoragne. (Fil. 4:6) Dineho ty fomba fa agnampea i Jehovah azo mba hahavita’o hiaretse i raha sarotsey, le isaoro reke amy ze fanohagna’e zay. Ko engagne hikalagne azo tsy hahatrea ty fitahiagne fa niazo’o i raha sarotse atrehe’o rey.​—Sal. 16:5, 6.

SAONTSIN’AGNAHARE

7. Nagnino ty fianaragne Baiboly ro magnampe antika hiaretse?

⁷ Nagnomey ty Saontsi’e ty Jehovah mba hagnampeagne antikagne hiaretse. Maro ty andinin-teny amy Baiboly ao magnomey toky tie, manohagne antika ty Jehovah. Izao ohatse ty rehafe ty Matio 6:8: “Hay i Rae’areoy ty raha paliae’areo ndra tie mbe tsy mangatake ama’e aza nareo.” I Jesosy ty nirehake o rehake rehoe, sady ireke raike avao ty tena mahafantatse soa i Jehovah. Tsy toko’e mbe hisalasala areke tika tie, mahaonigne ze ilaentika ty Jehovah naho fa miatreke raha sarotse tika. Misy hevetse hafa maro mitovy amy io magnampe antika hiaretse ty amy Baiboly ao.​—Sal. 94:19.

8. a) Mirehafa toro lala ty Baiboly raike afake magnampe antikagne hiaretse. b) Ino ty hagnampe antikagne hahatsiaro i toro lala ty Baiboly rey naho fa itikagne mila irey?

⁸ Afake magnampe antika hiaretse ty toro lala ty Baiboly. Misy fahendreagne azo ampiharegne afake magnampe antika handrambe fanapahan-kevetse soa ka ty amy irey. (Ohab. 2:6, 7) Mandrisike antikagne ohatse ty Baiboly mba hifantoke amy ty androany avao, fa tsy hinekoneko amy ty raha va’e hiseho ndra tsy hiseho hamaray. (Mat. 6:34) Naho zatse mamaky ty Soratse Masigne sady misaintsaigne irey tika, le ho mora amantikagne ty hahatadidy ty toro lalagne ilaentika, naho fa amy ty fotoagne ilaentika aze.

9. Nagnino ty fitantaragne amy Baiboly ao ro mahavy antikagne vao mainke hatoky tie, hagnampe antikagne ty Jehovah?

⁹ Misy tantara tena nisy ka ty amy Baiboly ao. Ndaty manahake antikagne avao iareo, le natoky i Jehovah sady nitohagna’e. (Heb. 11:32-34; Jak. 5:17) Naho fa misaintsaigne irey tika, le vao mainke hatoky tie “fialofagne naho hery ho antikagne” ty Jehovah sady “vognogne hagnampe amy ty fotoan-tsarotse.” (Sal. 46:1) Hanahake ty finoagne naho ty fiareta o mpanompo i Jehovah talohao tika, naho mandineke ty tsy fivaliha iareo.​—Jak. 5:10, 11.

10. Akore ty azo’o ampiasaegne soa ty Saontsin’Agnahare?

¹⁰ Ino ty azo’o atao? Mamakia Baiboly isan’andro, le anò lista ze andinin-teny trea’o tie hagnampe azo. Maro ty mahatsapa fa managne raha mampahery hosaintsaignegne agnate i androy iareo naho fa maraindraigne ty manao teny vakina. Nitrea i rahavave Mariea fa maregne zay, tamy i rae aman-drene’ey nivoa ty kanseray. Ino ty nagnampe aze hiaretse tamy ty volagne fara’e nikarakara’e iareo? Hoe reke: “Mamaky naho misaintsaigne ty andinin-teny amy i Fandinehagne ty Soratse Masigne Sanandro aoy raho isake maraindraigne. Noho izay le nifeno hevetse boake amy Baiboly ao ty saiko. Nagnampe ahy hifantoke amy ty raha lahibey zay, fa tsy amy ty tegnako naho i raha mahakivỳ.”​—Sal. 61:2.

MPIARA-MANOMPO

11. Nagnino ro mampahery ty mahafantatse tie tsy itikagne raike avao ty miaretse raha sarotse?

¹¹ Magnomey o mpiara-manompò ty Jehovah mba hagnampeagne antikagne hiaretse. Ty fahaiantika tie ‘ampijalegne ka ty rahalahintika magneran-tane’, le magnomey toky antika tie tsy itika raike avao ty miatreke raha sarotse. (1 Pet. 5:9) Afake matoky tikagne tie, ndra inogn’ino raha sarotse atrehentikagne, le fa niatreke raha hoe izay ka ty hafa sady fa nahavita niaretse. Hahavita hiaretse ka areke tikagne.​—Asa. 14:22.

12. Akore ty agnampea o mpiara-manompò antikagne, le ino ka ty azontikagne atao hoahy iareo? (2 Korintianina 1:3, 4)

¹² Afake mampahery antika o mpiara-manompò naho fa miaretse tikagne. Nitsapa i apostoly Paoly tie maregne zay. Mateteke reke ro nankasitrake ze nagnampe aze tamy tie ireke nambenagne tan-tragno aoy, le nitognone’e ty agnara iareo. Nampionogne, nampahery vaho nagnomey ze raha nilae’e iareo. (Fil. 2:25, 29, 30; Kol. 4:10, 11) Va’e hiatreke raha hoe izay ka tika. Faie eo avao o mpiara-manompò, naho fa mila fagnampeagne tikagne mba hahavitantikagne hiaretse. Eo avao ka tika naho fa mipay izay iareo.​—Vakio ty 2 Korintianina 1:3, 4.

13. Ino ty nagnampe ty rahavave raike atao tihoe Maya mba hahavita hiaretse?

¹³ Nagnampe i rahavave Maya a Rosia agne o mpiara-manompò. Nisavagne ty tragno’e tamy 2020, le niakatse fitsaràgne reke tafara izay noho ireke nizara ty raha inoa’e. Hoe ty Maya: “Tena nikivy raho tamy izay. Faie niantso naho nanoratse hoahy o rahalahy naho o rahavaveo, le nimea iareo toky raho tie teà iareo. Fa nihaiko avao tie, managne keleiagne bey hatea raho, faie vao mainke nieke izay raho nanomboke tamy 2020.”

14. Ino ty hagnampe antikagne handrambe soa boake amy ty fanohagna o mpiara-manompò naho fa miaretse? (Henteo ka i sarey.)

¹⁴ Ino ty azo’o atao? Magnarinea o rahalahy naho o rahavaveo, naho fa miaretse rehe. Ko misalasala mangatake fagnampeagne amo o androanavio. Afake ty ho “fialokalofagne amy ty tioke naho fitampinagne amy ty oram-baratse iareo.” (Isaia 32:2, f.a.p.) Ko haligno fa miaretse ka o mpiharo finoagne ama’ò. Naho maneho hasoa fagnahy amy ze ndaty mipay fagnampeagne rehe, le ho fale sady hahavita hiaretse.​—Asa. 20:35.

TY RAHA TAMAENTIKAGNE

15. Nagnino ro nagnampe ty ndaty tsy nivalike manahake i Jesosy ty raha tamae’e? (Hebreo 12:2)

¹⁵ Nagnomey fanantenagne mafe oregne ty Jehovah mba hagnampeagne antika hiaretse. (Rom. 15:13) Nagnampe i Jesosy hiaretse ty raha tena nisarotse tama’e tan-tane etoy i raha tamae’ey. (Vakio ty Hebreo 12:2.) Nihai’e fa naho tsy mivalike reke, le hagnamasigne i tahina i Jehovah-y. Tsy niligne’e ty hihaogna’e amy i Baba’e naho ty hiaraha’e amy i rahalahi’e rey, amy i Fanjakagne an-dagnitse agney. Hagnampe antika hiaretse ty tontolo i Satana toy ka, ty fiaignagne nainai’e tamaentika amy i tontolo vaovaon’Agnaharey ao.

16. Nagnino ty raha tamaegne ro nagnampe ty rahavave raike hiaretse, le ino ty ianara’o boake amy ty raha nirehafe’e?

¹⁶ Mareho fa nagnampe i rahavave Anna, a Rosia agne ty raha tamae’e miomba i Fanjakagney. Nitsepahegne ty vali’e, le nitanagne am-pirizò ao amparake ty hitsaragne aze. Hoe ty Anna tamy izay: “Nivavake miomba i raha tamaentikagney raho sady nisaintsaigne izay, le nagnampe ahy tsy le nikivy zay. Fantako tie mbe hiova zao. Handrese ty Jehovah, le hoe izay ka tikagne.”

17. Akore ty ampisehoantikagne tie mankasitrake i fampitamagne amy i Baiboly ao rey tikagne? (Henteo ka i sarey.)

¹⁷ Ino ty azo’o atao? Manokàgna fotoagne hisaintsaignagne i hoavy fanjaka nampitamae i Jehovah-y. Saintsaigno tie fa amy i tontolo vaovaon’Agnaharey ao rehe, le eretsereto ty fitahiagne azontika ao! Amy izay le hoe ‘hihelagne naho haivagne’ ze raha sarotse atrehegne amy izao. (2 Kor. 4:17) Anò ze azo’o atao mba hizaragne ty raha inoa’o amy ty hafa. Eretsereto ty raha sarotse atrehe iareo, ie amy izao tsy fanta iareo ty raha safirien’Agnahare. Va’e ho liagne amy ty raha tamaegne miomba i Fanjakagney iareo ndra tie kede avao ty raha rehafentika amy iareo.

18. Nagnino tikagne ro afake matoky i fampitamà i Jehovah rey?

¹⁸ Izao ty nirehafe i Joba tamy i Jehovah, naho fa nahavita niatreke i raha sarotse rey reke: “Fantako hinane zao fa mahay ze kila raha rehe, sady tsy misy tsy ho vita’o ze raha iaby vetsevetse’o hatao.” (Joba 42:2) Nianara i Joba fa tsy misy afake mikalagne i Jehovah tsy hagnatanterake ze raha safirie’e. Magnampe antikagne vao mainke hiaretse ty fahafantaragne izay. Eretsereto tie misy ampela raike marare. Kivy reke satria dokotera maro ty fa nandena’e faie tsy nisy nahasitragne aze. Faie nisy dokotera mahay sady azo atokisagne, nahafantatse soa i arete’ey sady nagnazava ama’e ty fomba hitsaboa’e aze. Naivankivagne reke ndra tie mbe ho elaela aza vaho ho sitragne. Ho vita’e ty hiaretse i arete’ey satria hai’e fa ho sitragne reke. Magnampe antika hiaretse ka ty fatokisantika i Paradisa tamaentikagney.

19. Ino ty toko’e hataontikagne mba hahavy antikagne hiaretse?

¹⁹ Nitreantika teo fa magnampe antikagne hiaretse raha sarotse amy ty alala ty vavake, ty Saontsi’e, o mpiara-manompò vaho ty raha tamaegne ty Jehovah. Naho mampiasa soa o raha rehoe tika, le hagnampe antikagne ty Jehovah amy ze raha sarotse atrehentikagne, amparake ty hagnafaha’e ty tontolo i Satana toy.​—Fil. 4:13.