Ampeo Ze ‘Managne Toe-po Soa’

1. Akore ty va’e ho fihetse o ndatio naho fa maharey i talily soay? (Asa o Apostolio 13:47, 48; 16:14, 15)

LE AVY le nagneke ty hamaregnagne ty ankamaroa ty ndaty tamy ty taonjato voaloha’e, naho fa naharey ty hafatse nitorie o Kristianao. (Vakio ty Asa o Apostolio 13:47, 48; 16:14, 15.) Fale ka ty ndaty ila’e amy izao naho fa naharey i talily soay voaloha’e. Ndra tie tsy niliagne tamy ty hafatse miomba i Fanjakagney hey aza ty ndaty ila’e, le va’e hagneke avao naho fa afara atoy. Akore ty toko’e hataontika naho fa mahatrea ndaty “managne toe-po soa” tika?

2. Nagnino ty asa fanoagne mpianatse ro azontika ampitoviegne amy ty asa ty mpikarakara zaridaigne?

² Ty asa fanoagne mpianatse, le azo ampitoviegne amy ty asa ty mpikarakara zaridaigne. Naho fa masake ty voa ty hatae raike, le azo antoke fa sady mandrofotse igne i mpamboley ro mbe mikarakara tane hamboleagne ndra mambole hatae hafa. Naho fa mahatrea ndaty vognogne handrambe i hafatsey tika, le te hagnampe iareo mba hanjare mpiana i Kristy malaky. Faie mikezake magnampe ze mbe tsy vognogne avao ka tika, amy izay iareo mahatrea tie nagnino ro mahasoa iareo ty mianatse miomba an’Agnahare naho ty Baiboly. (Jaona 4:35, 36) Ty fahaiagne magnambake, le hagnampe antika hahatrea fomba mete soa hagnampeagne ze mitsanogne antika. Andao tika handineke ty raha azontika atao, naho fa mifampirehake voaloha’e amy ze ndaty vognogne handrambe naho ty fomba hagnampeagne iareo mba handroso avao.

NAHO FA MISY NDATY VOGNOGNE HANDRAMBE

3. Akore ty toko’e hataontika naho fa mahatrea ndaty liagne amy i fanompoagney ey? (1 Korintiana 9:26)

³ Naho fa mahatrea ndaty liagne tika amy i fanompoagney ey, le te hagnampe iareo mba handeha amy i lalagne mbamy i fiaignagney mbeo malaky. Amy ze fotoagne zay, le tsy toko’e hisalasala ty hanasa iareo hianatse Baiboly naho hivory tika amy i fifampirehafagne voaloha’ey.​—Vakio ty 1 Korintiana 9:26.

4. Tantarao ty raha niseho tamy ty ndaty raike le avy le nianatse Baiboly.

⁴ Asao hianatse Baiboly iareo. Le avy le vognogne hianatse Baiboly ty ndaty ila’e. Te indraike Kamisy zay, le nagnantogne i kalesy fampirantiagney ty somondrara raike a Kanadà agne. Nalake amy i bokekele Ankamamio Nainai’e o Fiaignagneoy! reke. Nagnazava ty rahavave raike teo tie, afake mianatse Baiboly maimaim-poagne amy igne reke. Niliagne i somondraray, le nifagnomey nimerò iareo. Tamy i androy avao, le nanoratse tamy i rahavavey reke sady nagnontane tie mbia iareo ty afake mianatse. Naho fa nirehake i rahavavey tie amy fara heregnandroy ty hiavia’e, le hoe i somondraray tie: “Afake vao rehe naho maray?” Tamy i Joma igne areke iareo ty nianatse. Nivory i somondraray tamy ty fara heregnandro igne sady nandroso malaky.

5. Akore ty anoroantika tie mahay magnambake tika naho fa manasa ndaty hianatse Baiboly? (Henteo ka i sare rey.)

⁵ Tsy mitamà tika tie, ze ndaty mitsanogne i hafatsey le avy le hazoto manahake i somondraray. Va’e hitake fotoagne ty ila’e. Va’e ty foto-kevetse mahaliagne i ndatỳ ty mila anoantika fampidiran-drehake voaloha’e. Naho itika managne toe-tsaigne soa sady manao ze hahaliagne i ndatỳ avao, le va’e hanomboke fampianaragne Baiboly ndra tie fotoagne fohe avao aza. Ino ty azo rehafegne naho fa manasa ndaty hianatse Baiboly? Nagnonteneagne hoe izay ty rahalahy naho rahavave nahavita nanomboke fampianaragne Baiboly.

6. Ino ty azontika rehafegne mba hitohiza ty debà nataontika tamy ty ndaty liagne raike?

⁶ Nisy mpitory naho mpisava lalagne nagnonteneagne miomba ty fanombohagne fampianaragne Baiboly nagnazava tie amy ty tane ila’e, le tsy soa ty mampiasa tihoe “fianaragne, fampianaragne Baiboly” ndra “hampianatse azo” naho fa mirehake i fianaragney. Faie nihazavae iareo fa soa ty mampiasa ty rehake tihoe “fifampirehafagne, fiharoagne midineke naho fampahafantaragne ty raha rehafe ty Baiboly.” Mirehafa hoe izao mba hitohiza i debày: “Tena mahalatsa tihoe mamale fagnonteneagne lahibey amy ty fiaignagne o Baibolio,” ndra “tsy tihoe boke ara-pivavahagne avao o Baibolio, fa misy lesogne azontika ampiharegne ka.” Afake tohiza’o hoe izao i rehakey: “Tsy mitake fotoagne bey zay, fa 10-15 minitra eo, le ahavitagne mianatse raha lahibey.” Tsy voatere mampiasa ty rehake tihoe “afake mifanao fotoagne” ndra “isan-keregnandro” rehe amy izay reke tsy hahatsapa seregne.

7. Akore ty nahafantara ty ndaty ila’e ty hamaregnagne amy Baiboly ao? (1 Korintiana 14:23-25)

⁷ Asao hivory iareo. Ty ndaty ila’e tamy ty andro i apostoly Paoly, le tamy tie iareo nivory ty nahafantara iareo ty hamaregnagne voaloha’e. (Vakio ty 1 Korintiana 14:23-25.) Misy hoe izay ka tie amy izao. Mandroso malaky ty ankamaroa o ndaty vaovaò naho fa mivory. Ombia tika ty toko’e hanasa iareo? Misy fanasagne o ndatio hivory ty lesogne 10 amy i boke Ankamamio Nainai’e o Fiaignagneoy!, faie tsy voatere mandigne izay tika. Naho vaho manomboke i debày, le azo atao ty manasa iareo hivory amy ty fara i heregnandroy. Azo’o rehafegne ty lohan-dreha ty lahajaka hoahy ty ndaty maro ndra ty hevetse amy ty Fianaragne Fitalakesan-davitse.

8. Ino ty azontika rehafegne naho fa manasa ndaty hivory? (Isaia 54:13)

⁸ Naho fa manasa ndaty raike liagne rehe, le hazavao ama’e tie nagnino ty fivoriantika ro tsy mitovy amy ty atao amy ty fivavaha’e agne. Naho fa nivory voaloha’e ty mpianatse Baiboly raike, le hoe reke tamy i mpampianatse azey: “Fanta i mpitarikey iaby vao ty agnara ze ndaty ao?” Nagnazava i rahavavey tie, mikezake mamantatse ty agnara ty ndaty amy fiangona’ay ao zahay, manahake ty ahafantara’ay ty agnara ty keleia’ay. Nitrea i mpianatsey tie, tsy manahake ty amy ty fiangona’e agne zay. Hoe izay ka fa vaovao amy ty ndaty maro ty raha atao amy ty fivoriantika. (Vakio ty Isaia 54:13.) Mivory tika mba hanompo i Jehovah, hianatse boake ama’e sady hifampahery. (Heb. 2:12; 10:24, 25) Izay ty mahavy ty fivoriantika hilamigne soa sady ho azo ampiharegne fa tsy tihoe fombafomba avao. (1 Kor. 14:40) Tsotra i toeragne ivoriantika rey amy izay mora amantika ty mianatse naho fa agne. Tsy midebà politike tika naho fa agne satria tsy miomba ty atia naho ty aroa sady tsy mialy hevetse miomba ty olagne naho ty heve ty tsikiraidraike. Hahafantatse ty raha hotrea’e agne i mpianatse Baibolỳ, naho atoro’o aze mialoha ty video tihoe Inogne ty Atao amy i Anjomba i Fanjakagney Agne?

9-10. Naho fa itika manasa ndaty hivory, ino ty azontika atao mba hagnomeagne toky aze tie tsy mamoresé aze hiarake amantika ndra handrambe anjara amy ze atao ao tikagne? (Henteo ka i sarey.)

⁹ Misalasala hivory ty ndaty ila’e satria matahotse kera ho taonentika “hagnorike ty fivavahantika.” Meo toky iareo tie fale tika naho fa misy mitilike sady tsy mamoresé iareo hiarake amantika ndra handrambe anjara amy ze atao ao tika. Afake miavy agne o keleiagneo reketse ty ana iareo. Amy ty fivoriantika, le tsy tihoe ampianaregne mitokagne o ajajao. Miharo toboke o rae aman-dreneo naho ty ana’e sady miara-mianatse. Voara-maso iareo soa areke ty ana iareo naho ty raha ianara i ajaja rey. (Deot. 31:12) Tsy mitake raketse tika, fa magnorike ty raha nandilia i Jesosy toy: “Fa nahazo maimaimpoagne nareo, le magnomeza maimaimpoagne.” (Mat. 10:8) Azo’o rehafegne amy i ndatỳ ka tie, tsy voatere hivily lamba lafo vily reke naho fa mivory. Ty fo ro vazohoen’Agnahare, fa tsy ty pozy o ndatio.​—1 Sam. 16:7.

¹⁰ Naho fa mivory ty ndaty raike, le anò ze hahatsapa’e tie rambesegne soa reke. Ampahafantaro aze o androanavio naho ty mpitory hafa. Naho fa tsapa’e tie mahazo aigne soa reke, le te hiheregne indraike amy ty magnarake. Naho tsy managne Baiboly reke, le ampagnenteo aze i azoy sady ampeo reke haharake ty fagnazava i mpizakay ndra i fianaragney.

NAHO FA MANOMBOKE I FIANARAGNE BAIBOLỲ

11. Akore ty azontika anoroagne tie magnaja ty fandaharam-potoa ty ndaty nitsanogne antikagne tika?

¹¹ Ino ty toko’e hotadidientika avao naho fa mampianatse Baiboly? Hajao ty fotoagne naho ty fandaharam-potoa i ndatỳ. Naho fa nifanao fotoagne amy i ndatỳ ohatse rehe, le mikezaha hagnaja izay ndra tie tsy le magnaja fotoagne aza ty ndaty ama’areo agne. Soa ka ohatse naho atao boribory avao hey i fianaragney amy ty voaloha’e. Nisy mpitory za-draha ila’e nanoro hevetse tie, ndra tie mbe te hitsanogne aza i ndatỳ, le soa naho faragnagne hey i fianaragney. Ko bey rehake, fa engao hirehake ty raha tsapa’e i ndatỳ.​—Ohab. 10:19.

12. Ino ty toko’e ho tanjontika naho vata’e vaho manomboke ty fampianaragne Baiboly raike?

¹² Naho vaho manomboke mianatse i ndatỳ, le ty hagnampe aze hahafantatse i Jehovah naho i Jesosy vaho hotea iareo ty toko’e ho tanjo’o. Manao izay rehe naho mampifantoke ty sai’e amy ty Saontsin’Agnahare fa tsy amy ty tegna’o ndra amy ty fahalala’o ara-baiboly. (Asa. 10:25, 26) Mateteke ty apostoly Paoly ro nampifantoke ty fampianara’e tamy i Jesosy Kristy, i nirahe i Jehovah hagnampe antika hahafantatse Azey. (1 Kor. 2:1, 2) Nihazavae i Paoly soa ka ty maha lahibey ty fagnampeagne ty mpianatse vaovao hanagne i toetse soa hoe volamena, volafotsy vaho vato sarobily rey. (1 Kor. 3:11-15) Agnisa o toetse rehoe ty finoagne, fahendreagne, fahaiagne mandineke vaho ty fatahoragne i Jehovah. (Sal. 19:9, 10; Ohab. 3:13-15; 1 Pet. 1:7) Tsikombeo ty fomba fampianara i Paoly, le ampeo ty mpiana’o mba hanagne finoagne matanjake naho hifandrambe amy i Rae iareo bey hatea an-dagnitse agney.​—2 Kor. 1:24.

13. Akore ty azontika anoroagne tie manam-paharetagne naho mahay manahatsahatse tika naho fa magnampe ndaty liagne raike? (2 Korintiana 10:4, 5) (Henteo ka i sarey.)

¹³ Tsikombeo ty fomba fampianara i Jesosy, le manehoa faharetagne sady mahaia manahatsahatse. Ko mametrake fagnonteneagne tsy mampahazo aigne o ndatio. Naho mete, le riogno avao hey ze hevetse sarotse ama’e, fa mbe hiheregnagne naho fa afara agne. Engao handeha hey ty fotoagne mba hahavy i hamaregnagney hamahatse am-po’e ao, fa ko mamoresé aze hagneke i fampianaragney naho mbe tsy vognogne reke. (Jaona 16:12; Kol. 2:6, 7) Ampitovie ty Baiboly amy ty raha fa mafe fototse i fampianaran-diso ravaentika rey. (Vakio ty 2 Korintiana 10:4, 5.) Ampeantika reke mba Hialoke amy i Jehovah satria va’e sarotse ama’e ty hagnafake i fampianaragne fa mafe fototse ama’e aoy.​—Sal. 91:9.

NAHO FA MISY VAHO SAMBA’E MIVORY

14. Akore ty toko’e ho findesantika ty ndaty raike vaho samba’e mivory?

¹⁴ Teà i Jehovah tika naho tsy magnavakavake o ndaty vaovaò noho ty kolontsai’e, ty toeragne misy aze amo o fiaraha-monegneo eo ndra ty foko niavia’e. (Jak. 2:1-4, 9) Akore ty azontika anoroagne hatea ze ndaty vaho samba’e mivory?

15-16. Akore ty azontika agnampeagne ty ndaty raike vaho samba’e mivory mba hahatsapa ho rambesegne soa?

¹⁵ Va’e hivory ty ndaty ila’e satria mba te hahafanta-draha avao ndra nisy ndaty tamy ty toeragne hafa agne nandrisike aze. Tsy toko’e hisalasala hagnantogne ze ndaty avy am-pivoriagne ao areke tika. Rambeso soa iareo fa ko atao ze tsy hampahazo aigne aze. Miaraha mitoboke ama’e. Iharò’areo magnente i Baiboli’oy naho ze fitaovagne fianaragne ndra omeo vita pirinty reke. Fantaro ka ty raha tsapa’e. Nirehake tamy ty rahalahy raike nandrambe aze ty lahilahy raike vaho samba’e nivory tie, sahiran-tsaigne reke satria tsy soasoa manahake ty ahy ty hafa ty akanjo’e. Natao i rahalahỳ ze hampahazo aigne aze sady nihazavae’e tama’e tie, manahake o ndatio avao o Vavolombelo i Jehovah-o. Nandroso i lahilahỳ naho fa tafara atoy, le natao badisa sady tsy haligno’e i reha i rahalahỳ. Naho fa mifampirehake amy ty ndaty vaho samba’e mivory rehe, aloha ndra afara i fivoriagney, le mitaoa mba tsy hilitse amy ty fiaigna’e. Atorò tie mitretré aze rehe.​—1 Pet. 4:15.

¹⁶ Hahatsapa ho rambesegne soa ka o ndatio naho magnaja iareo tika naho fa midebà amy iareo, magnomey toin-drehake, ndra naho fa misy anjara am-pivoriagne agne mirehake miomba o tsy Vavolombelogneo ndra ty raha inoa iareo. Ko manao rehake va’e hanafintohigne ndra hahavy iareo tsy hivory sasa. (Tit. 2:8; 3:2) Tsy toko’e hagnakiagne ty raha inoa iareo ohatse tikagne. (2 Kor. 6:3) Tena mila mitao soa amy izay o rahalahy manao lahajakao. Mila tadidie iareo avao ka tie misy tsy Vavolombelogne o mpagnatrekeo. Manao izay iareo naho atao iareo mora azo ty rehake ndra ty hevetse amy ty lahajaka atao iareo.

17. Ino ty tanjontika naho fa mahatrea ndaty “managne toe-po soa” amy i fanompoagney ey?

¹⁷ Vao mainke meke i asa fanoagne mpianatsey, arakarake ty andehana ty andro tsikiraidraike. Mila mipay ze ndaty “managne toe-po soa mba hahazo i havelogne nainai’ey” areke tika. (Asa. 13:48) Tsy toko’e hisalasala ty hanasa o ndatio hianatse Baiboly ndra hivory tika. Magnampe iareo handeha amy “i lalagne mbamy i havelogne mbeoy” ty fanoantika izay.​—Mat. 7:14.