Rahalahy Vaovao Roe Agnisa ty Filan-keve-pitantanagne
NISY fitaliliagne manokagne hoe izao ty tamy ty fivoriagne fatao isan-taogne 5 Oktobra 2024: I Rahalahy Jody Jedele naho i Jacob Rumph, le nivoatendre ho agnisa ty Filan-keve-pitantana ty Vavolombelo i Jehovah. Sambe nanompo i Jehovah sady tsy nivalike tagnate ty taogne maro o rahalahy rehoe.
I Jody Jedele naho i Damaris vali’e
Naterake ta Missouri a Etazonia agne ty Rahalahy Jedele sady nitezaegne tagnate ty hamaregnagne ao. Nitoboke tamy ty faritane nisy Vavolombelogne tsiampeampe ty keleia’e. Nifankatrea tamy ty rahalahy maromaro boake amy ty tane sambe hafa nitilike tagne mba hagnampe amy ty fitoriagne i talily soay reke. Nisy voka’e tama’e ty hatea naho ty fiharoan-tsay iareo. Natao badisa reke tamy 15 Oktobra 1983. Tena tea fanompoagne reke, le nanao mpisava lalagne maharetse tafara ty nività ty fianara’e, tamy Septambra 1989.
Nindese i rae aman-drene’e rey nitilike Betela ty Jedele naho ty rahavave’e tamy tie iareo mbe nitanora. Nagnampe iareo hagniry hanompo amy Betela ao ze fitilihagne natao iareo zay, le sambe nahatratse ze tanjogne zay iareo tafara tatoy. Niavy tamy Betela a Wallkill agne ty Rahalahy Jedele tamy Septambra 1990. Tamy ty Sampan-draharaha ty Fagnaliovagne ao reke ty niasa voaloha’e, le tamy ty Birò ty Fahasalamagne ao tafara tatoy.
Nihanitombo avao ty fiangonagne mampiasa firehake Espaignoly narine iareo tey tamy izay, le nila rahalahy. Nivory tamy ty raike tamy i fiangonagne rey areke ty Rahalahy Jedele sady nanomboke nianatse firehake Espaignoly. Tafara kede izay, le nifankatrea tamy i Damaris, rahavave mpisava lalagne raike tamy ty faritse nisy aze reke. Nifanambaly iareo tafara tatoy, le niarake tamy Betela ao.
Niala tamy Betela ao iareo tamy 2005 mba hikarakara i rae aman-drene iareo tsy mivalike rey. Ni-mpisava lalagne maharetse iareo tagnate ze fotoagne zay. Ni-mpagnampe ty mpampianatse tamy ty Sekoly ty Fanompoa ty Mpisava Lalagne ty Rahalahy Jedele, le boakeo nanompo tamy ty Komity Mifandrambe amy ty Lapotaly naho tamy ty Komity ty Faritse Miomba ty Fagnoregnagne ao.
Tamy 2013, le nasaegne hiheregne amy Betela agne ty Rahalahy naho Rahavave Jedele mba hiasa tamy ty tetik’asa fagnoregnagne i Warwick. Nanomboke tamy izay, le nanompo ta Patterson naho ta Wallkill agne ka iareo. Niasa tamy ty Sampan’asa ty Fagnoregnagne Tan-toeragne eo naho tamy ty Fipaliagne Hevetse Miomba ty Lapotaly ty Rahalahy Jedele. Tamy Marsa 2023, le nitendregne ho mpagnampe ty Komity ty Fanompoagne reke. Hoe reke naho fa mandineke miomba ty fanendreagne aze: “Naho fa mahazo fanendreagne vaovao rehe, le mateteke ro minekoneko. Faie amy ty raha hoe izay tika ro toko’e tsy hagnaligno ty hiantehetse amy i Jehovah satria ireke raike avao ty afake magnampe antika mba hahavita ze raha ampanoe’e antika.”
I Jacob Rumph naho i Inga vali’e
Naterake ta Kalifornia, a Etazonia agne ty Rahalahy Rumph. Tsy nitory ndra tsy nivory sasa ty rene’e tamy tie ireke mbe nikede, faie nikezake avao mba hampianatse aze ty hamaregnagne amy Baiboly ao. Nitilike i bebei’e, Vavolombelogne tsy nivalike ka reke isan-taogne. Nagnampe aze hahafantatse ty hamaregnagne ty bebei’e, le nangatake hianatse Baiboly reke tamy tie ireke 13 taogne. Natao badisa reke tamy 27 Septambra 1992. Nahafale fa niheregne nitory ndra nivory indraike ty rene’e sady tsiela avao ka i keleia’e rey iaby, le nandroso naho natao badisa.
Nahatrea ty hafaleagne tsapa o mpisava lalagneo ty Rahalahy Rumph tamy tie ireke mbe nitanora. Naho fa nivita ty fianara’e, le nanomboke nanao mpisava lalagne reke tamy Septambra 1995. Tamy ty taogne 2000, le nifindra ta Ekoatera agne reke mba hanompo amy ty toeragne nila mpitory maro. Nifankatrea tamy i Inga, mpisava lalagne raike boake a Kanada agne reke, le nifanambaly iareo. Niarake nanompo tamy ty antokom-pitory tsiampeampe amy ty tanàgne a Ekoatera agne iareo naho fa nifanambaly. Fa fiangonagne bey io tie amy izao.
Nivoatendre ho mpisava lalagne manokagne ty Rahalahy naho Rahavave Rumph naho fa nandeha ty fotoagne, le ni-mpiandraikitse faritse tafara izay. Nasaegne hagnatreke ty kilasy faha-132 amy ty sekoly Gileada iareo tamy 2011. Tafara i fizaràgne diplomay, le nanompo tamy ty faritse sambe hafa magneran-tane iareo. Nankamamy karazam-panompoagne sambe hafa ka iareo, agnisa izay ty fanompoagne amy Betela ao, asa ty misionera naho ty asa ty faritse. Nahazo tombotsoa hampianatse amy ty Sekoly ty Mpitory i Fanjakagney ka ty Rahalahy Rumph.
Noho i arete-manjamagne COVID-19, le niheregne ta Etazonia agne ty Rahalahy naho Rahavave Rumph. Nasaegne ho amy ty Betela i Wallkill agne iareo, le tao ty Rahalahy Rumph ty nahazo fampiofagnagne ho amy ty Sampan-draharaha ty Fanompoagne. Nitendregne ho amy ty sampa i Ekoatera agne indraike iareo, le ni-Komity ty Sampagne tao ty Rahalahy Rumph. Nafindra ta Warwick agne iareo tamy 2023. Tamy Janvie 2024, le nitendregne ho mpagnampe ty Komity ty Fanompoagne ty Rahalahy Rumph. Hoe reke naho fa misaintsaigne ty fanompoagne natao’e: “Tsy ty toeragne anendreagne azo ty maha lahibey i asa atao’oy fa ty ndaty miara-miasa ama’o.”
Tena mankasitrake ty asa mafe atao o rahalahy rehoe tika sady “ho tea naho hagnaja ty ndaty manahake ireo avao.”—Fil. 2:29.