Vao Mainke Mihatsiampe ty Hanegne Magneran-tane Noho ty Fisia i Aly a Ukraine Agney

Tamy 19 Mey 2022, le nahazo fitaraignagne mihoatse ty 75 boake amo o manam-pahefagneo ty Filan-kevetse Miandraikitse ty Filaminagne Magneran-tane amy Firenena Mikambagne ao fa “mihamitombo ty krizy amo o hanegneo noho ty fisia i arete-manjamagne COVID-19-oy naho ty fiovà o toets’andrò, sady va’e hahavy ty firenena maro tena tsy ho ampe hanegne iaby ka aza i aly a Ukraine agney.” Tsy ela tafara izay, le nirehake o Manam-pahaiagne Ara-toe-karenao tie “fa maro ty olagne atrehe o ndaty magneran-taneo noho ty fisia o alio faie le vao mainke ka io hampitombo ty keré.” Fa nirehafe ty Baiboly mialoha fa hiseho amo o andro iaignantikagne zao ty fisia o kerégneo sady afake magnampe antikagne hiatreke izay io.

Fa nirehafe ty Baiboly mialoha tie hisy keré

•  Naminany ty Jesosy tie: “Hisy firenena hialy amy ty firenena, hisy ka fanjakagne hialy amy ty fanjakagne. Hisy keré.”​—Matio 24:7.

•  Mirehake miomba ty mpitingitse sovala agn’ohatse efatse ty boke Apokalypsy amy Baiboly ao. Manondro aly ty raike amo o mpitingitse sovala rehoe. Misy mpitingitse sovala hafa manondro ty fisia o keréo ka ty magnarake aze. Amo o fotoagne iohoe le tena sarotse ty hahazoagne hanegne sady tsy ho amy ty toko’e ho ie ty vily o hanegneo. “Nahatrea sovala mainte raho, sady nisy balantsy ty tan-tagna i nitingitse azey. Naharey feo ... nanao tihoe raho tie ‘raike denaria ty vily ty varem-bazaha kilò raike, sady raike denaria ty vare orza telo kilò.’”​—Apokalypsy 6:5, 6, Dikan-drehake Angilé amy Hinane Zao.

Tanterake amo ze o andro atao ty Baiboly tihoe “andro fara’e” zao i faminania ty Baiboly miomba ty keré igne. (2 Timoty 3:1) Naho te hipay fagnazavagne miomba ty “andro fara’e” naho i mpitingitse sovala efatse amy ty boke Apokalypsy aoy rehe, le henteo ty video tihoe Niova ty Tontolo toy Nanomboke Tamy 1914, sady vakio ka ty lahatsoratse tihoe “Iza Ireo Mpitaingin-tsoavaly Efatra?”

Akore ty agnampea ty Baiboly antikagne hiatreke io?

•  Misy torohevetse azo ampiharegne magnampe antikagne hiatreke ty olagne miseho amy ty fiaignagne ty amy Baiboly ao, agnisa izay ty fisondrota ty vily o hanegneo naho o kerégneo. Misy ohatse tsiampeampe amy ty lahatsoratse tihoe “Ahoana Raha Lasa Mihena ny Vola Miditra Aminao?”

•  Magnomey fampitamaegne antikagne ka ty Baiboly fa mbe hihasoa o fiaignagneo. Mampitamà reke fa “hahavokatse ty tane toy” sady sambe hanagne hanegne maro iaby o ndatio. (Salamo 72:16) Naho mipay fagnazavagne fagnampe’e miomba ty raha ampitamae ty Baiboly amy ty hoavy rehe, naho ty anto’e toko’e hatokisagne io, le vakio ty lahatsoratse tihoe “Mbola Hihatsara ve ny Fiainana Amin’ny hoavy?”