Tifitifitse Basy Niseho Tan-dakilasy Agne: Ino ty Rehafe ty Baiboly?

Tamy 24 Mey 2022, le nisy loza tsy hay rehafegne ty tamy ty tanàgne kede atao tihoe Uvalde, a Texas, a Etazonia agne. Arake ty nirehafe ty Gazete i New York (angilé), le “nisy lahilahy raike ninday basy namono mpianatse 19 naho ramosé roe ... tamy ty lakilasy raike fagnabeazagne fototse atao tihoe ‘Robb Elementary School’ tao.”

Mampalahelo fa mateteke miseho ty raha hoe izay. Nirehafe ty gazete atao tihoe Etazonia Amy Izao (angilé) fa a Etazonia agne avao, le “fa miiake 249 ty tifitifitse basy miseho an-dakilasy agne, amy i kiririsa o lakilasio eo, tamy i taon-dasagney. Tena maro zay naho oharegne tamy ty taogne hafa nanomboke tamy 1970.”

Nagnino ro miseho ty raha raty hoe io? Akore ty hiatrehantikagne aze? Mbe ho foagne avao vao o hampiarotegneo indraike andro agne? Mamale ireo ty Baiboly.

Nagnino ro vao mainke mihamaro ty hampiarotegne an-tane etoy?

•  Rehafe ty Baiboly fa “andro fara’e” ze o fotoagne iaignantikagne zao, le maro ty ndaty “tsy ho tea ty saveregna’e” naho “hasiake loatse”, ty dika izay ho romotse naho ho mpiarotegne. Le ‘vao mainke hiharaty’ ty toetse o ndaty rehoe. (2 Timoty 3:1-5, 13) Naho mipay fagnazavagne fagnampe’e rehe, le vakio ty lahatsoratse tihoe “Efa Voalazan’ny Baiboly Mialoha ve ny Toe-tsain’ny Olona Amin’izao Andro Izao sy ny Zavatra Ataony?”

Maro ty ndaty mieretseretse tie: ‘Nagnino ro engan’Andrianagnahare hiseho o lozao, agnisa izay ohatse ty fitifiragne ndaty an-dakilasy agne?’ Naho te hahafantatse ty vale’e mea ty Baiboly rehe, le vakio ty lahatsoratse tihoe “Nahoana ny Tsara Fanahy no Mijaly?”

Akore ty hiatrehantikagne aze?

•  ‘Fa ze sinoratse taloha, le sinoratse mba hampianaragne antika. Amy izay tikagne hanan-draha tamaegne satria ... magnomey fampionognagne antika ty Soratse Masigne.’​—Romanina 15:4.

Afake magnampe azo hiatreke ty hampiarotegne amy ty tontolo toy eto ty toro lala ty Baiboly. Henteo ty Mifohaza! minday ty lohan-drehake tihoe “Ho Foana Ihany ve ny Herisetra?” mba hahatreava’o fagnazavagne fagnampe’e.

Misy soso-kevetse hoahy ty rae aman-drene, azo iareo agnampeagne ty ana iareo naho fa maharey vaovao mampatahotse, ty amy ty lahatsoratse tihoe “Matahotra Vaovao Ratsy ve ny Zanakao?”

Mbe ho foagne avao vao o hampiarotegneo indraike andro agne?

•  “Hagnafake iareo amy ty fampijaleagne naho o hampiarotegneo reke.”​—Salamo 72:14.

•  “Le hanefe ty mesabei’e ho lasarỳ iareo, vaho ty lefo’e ho mesa fanapaham-boaloboke. Tsy hifanomboke amy ty mesabey naho le lia’e tsy hianatse aly sasa iareo.”​—Mika 4:3.

Hanao ty raha tsy vita o ndatio ty Andrianagnahare. Hofoagna i Fanjakà’e an-dagnitse agney ze kila fitaovam-pialiagne naho o hampiarotegneo iaby. Naho te hahatrea fagnazavagne fagnampe’e miomba ty raha hatao i Fanjakàn’Andrianagnaharey rehe, le vakio ty lahatsoratse tihoe ‘“Ho Be ny Fiadanana’ Rehefa Hitondra ny Tany Ilay Fanjakana.”