Ino ty Rehafe ty Baiboly Miomba o Aly Niklerao?

Atahoragne ty hisia o aly niklerao magneran-tane satria vao mainke mampitombo ty hamaro ty fitaovam-pialiagne niklera anagna iareo o firenena matanjakeo. Minekoneko o ndatio tie arakarake ty itomboa o fitaovam-pialiagne niklerao ty vao mainke hatahoragne hampisy o aly niklerao. Vao mainke matahotse o ndatio satria ndra tie bomba niklera raike kidikidy avao aza ty ampiasà ty firenena raike, le va’e hitarike aly niklera handravarava ty tontolo toy zay. Rehafe ty Gazete ty Manam-pahaiagne Miomba o Atomao (angilé) tie miaigne amy ty “fotoagne atahoragne hisia o aly niklerao tikagne tie amy hinane zao.”

Tena azo eretseretegne vao ty hisia o aly niklerao? Naho izay ty raha misy, le ho poteke vao ty tane toy? Naho matahotse ty hisia o aly niklerao rehe, le inogne ty hagnampe azo tsy hinekoneko loatse? Ino ty rehafe ty Baiboly?

Ty hotrea amy ty lahatsoratse toy ato

Fa nirehake mialoha miomba o aly niklerao vao ty Baiboly?

Tsy mirehake mivantagne miomba ty aly niklera ty Baiboly. Faie fa nirehafe’e mialoha ty toe-tsay o ndatio naho ty raha miseho amo o androntikagne zao. Le ze raha rezay ty atahoragne hampisy o aly niklerao.

Dineho ty raha rehafe ty andinin-teny boake amy Baiboly ao retoa naho ty raha miseho amy izao:

Andinin-teny: Izao ty raha nagnontenea i mpiana i Jesosy rey: ‘Inogne ty ho famantaragne ty fagnatreha’o vaho ty fotoagne hifaragna ty tontolo toy?’ Le hoe ty Jesosy: “Hisy firenena hanafike firenena, le hisy fanjakagne hialy amy ty fanjakagne.”—Matio 24:3, 7.

Ty raha miseho amy ty tontolo toy eto: Mateteke ro mampiasa fitaovam-pialiagne i firenena managne ndra mamboatse fitaovam-pialiagne niklera rey naho fa mialy.

“Tagnate ze taogne farampara’e zay, le vao mainke nitea aly ty tontolo toy. Vao mainke nihamaro nihamaro avao o alio.”—The Armed Conflict Location & Event Data Project.

Andinin-teny: “Amy ty fotoa ty fara’e agne, le hifanoseke ama’e [ty mpanjaka i avaratse] ty mpanjaka i atimo.”—Daniela 11:40.

Ty raha miseho amy ty tontolo toy eto: Fa nirehafe ty Baiboly mialoha fa hisy firenena roe miarake amy ty mpanohagne iareo hialy. Hifanoseke ndra hifaninagne iareo mba hahatreavagne tie ia ty tena mahery amy iareo. Ndra tie mbe tsy mialy mivantagne aza o firenena managne fitaovam-pialiagne niklera reo tie amy izao, le atao iareo avao ze hahavy i fitaovam-pialia iareo rey tena hahery.

“Tagnate ze folo taogne lasa zay, le vao mainke maro ty firenena nialy, agnisa izay ty firenena matanjake manohagne an-tsisitsisi’e i aly atao o firenenao rey.”—The Uppsala Conflict Data Program.

Andinin-teny: “Amy ty andro fara’e, le hisy fotoan-tsarotse tsy mora atrehegne. Fa ty ndaty ... tsy ho azo ifagnarahagne, ho mpagnaratiraty, tsy hahafehe tegna, hasiake loatse.”—2 Timoty 3:1-3.

Ty raha miseho amy ty tontolo toy eto: Tsy mitovy hevetse manahake ty ankamaroa o ndatio avao ka ty mpitondra amy ty tontolo toy eto tie amy izao. Naho fa hamaha ze tsy fitovian-kevetse zay iareo, le ndraleo iareo magnorohoro ndra mampiasa hery ta tie hamaha i olagney am-pilaminagne avao. Faie vao mainke atahoragne hampisy aly niklera ze raha atao iareo zay.

“Naho tsy mipay fomba mba hahafahagne miara-miasa soa iareo, le vao mainke hanjeke o alio.”— I S. Saran naho i J. Harman, World Economic Forum.

Hengan’Andrianagnahare hisy vao o aly niklerao?

Tsy mirehake izay ty Baiboly. Ty raha rehafe’e le tihoe, hisy ‘famantaragne lahibey’ ndra “raha mampatahotse” hiseho amo o androntikagne zao. (Lioka 21:11) Agnisa izay zao i bomba atomike nipoake tamy i Aly Lahibey Faharoeỳ. Hazavae ty Baiboly tie nagnino ty Andrianagnahare ro mbe magnenga o alio hiseho. Naho te hahazo fagnazavagne fagnampe’e rehe, le henteo ty video tihoe Nagnino o Fijaleagneo Engàn’Andrianagnahare Hisio?

Ho poteke vao ty tane toy?

Oho’o. Ndra tie mbe hampiasa fitaovam-pialiagne niklera indraike aza o ndatio, le tsy hengan’Andrianagnahare hamoteke ty tane toy zay. Rehafe ty Baiboly fa tsy tihoe harovan’Andrianagnahare mba tsy ho simba avao ty tane toy fa natao’e hitoboha o ndatio nainai’e avao ka.

‘Haharetse nainai’e o taneo.’—Mpitoriteny 1:4.

“I Andrianagnahare, i mpamboatse ty tane toỳ, ... le tsy tihoe tsy misy dika’e ty namboara’e ty tane toy fa natao’e hitobohagne.”—Isaia 45:18.

Mieretseretse ty ndaty ila’e fa amy ty hoavy, le ndaty tsiampeampe avao ty sisa hiaigne ambone tane eto sady ho sahiragne iareo satria tsy hahavokatse ty tane iareo noho ty voka-draty hatera i aly nikleray. Faie mirehake ty Baiboly fa haheren’Andrianagnahare amy ty toe’e ze voka-draty atera o alio.

“Hifale ty tane fatrambey naho ty tane maike mangirikitàgne, le hirebeke ty lemake maike sady ho feno folera.”—Isaia 35:1.

Ndaty miara-miasa sady falefale amy i paradisa ambone tane etoay. — Teàn’Andrianagnahare hiaigne amy ty tontolo raike tena fanjaka tika sady ho sambatse

Tena mahalatsa ty fomba namboaran’Andrianagnahare ty tane toy satria afake mikarakara irerike ty tegna’e reke. Faie ndra tie eo zay, le hampiasa ty heri’e ty Andrianagnahare mba hagneregnagne ty tane toy amy ty toe’e. Amy ze fotoagne zay, le hanjare toeragne soasoa afake hitoboha o ndatio nainai’e ty tane toy.—Salamo 37:11, 29; Apokalypsy 21:5.

Ino ty hagnampe azo tsy hinekoneko loatse miomba o aly niklerao?

Va’e hijale ty ndaty ila’e satria minekoneko miomba o aly niklerao. Matahotse i aly nikleray naho ty voka-draty va’e hatera izay iareo. Afake magnampe iareo mba hiatreke izay naho hampihegne ty taho iareo ty fampitamagne naho ty toroheve ty Baiboly. Faie amy ty fomba akore?

Mirehake fampitamagne soa miomba ty hoavy ty tane toy naho ze ndaty miaigne ambone tane eto ty Baiboly. Ty fahafantarantikagne izay, le hagnampe antika tsy hinekoneko loatse. Ty anto’e, rehafe ty Baiboly fa manahake o “vatofantsike” mitagne o sambò mba tsy haviombio o tiobey an-driake ey io ty raha tamaentika. (Hebreo 6:19) Tsy hinekoneko loatse ka tikagne naho tsy mametsevetse ty raha raty va’e hiseho amy ty hoavy fa mifantoke avao amy ze raha miseho amy i androy. Izay ty nahavy i Jesosy nirehake tie “fa tsahatse ty andro tsikiraidraike ty haratiagne miseho amy i andro igne.”—Matio 6:34.

Tena ilaentikagne ty mikarakara soa ty vatantikagne, amy izay tikagne mba afake misaigne soa sady tsy hatahotse. Hahavita izay tika naho ferantika avao ty fagnazavagne vakientika naho henteantika, ndra ty raha tsanognentika va’e hahavy antika hinekoneko. Agnisa izay ty aly hevetse naho ty vinavina rehafe o ndatio vaho ty heve iareo miomba ty fandrosoagne fara’e amo o bomba niklerao. Faie tsy midika zay tie tsy toko’e hagnara-baovao tika, fa manao ze azontikagne atao avao ka tika mba tsy hinekoneko lava amy ty raha tsy azontikagne fehezegne, ie amy izao tsy fantatse ndra hiseho i rahay.

“Mahakivy o ndatio ty finekoneko am-po’e ao, fa ty rehake mampahery ro mahafale ty fo’e.”—Ohabolana 12:25.

Mifantoha amy ty raha soa amy ty fiaigna’o fa tsy amo o vaovao ratio.

“I Andrianagnahare magnomey fanantenagney abey ro hameno fifaleagne naho fiadanagne ty fo’areo satria matoky aze nareo.”—Romanina 15:13.

Sare: Lahilahy mifantoke amy ty raha hiseho amy ty hoavy sady feno toky. 1. Misy aly ty amboho’e ao, rapolany findese o maramilao mialy, bomba niklera naho setro ty bomba. 2. Le ty aloha’e eo misy toeragne malio sady milamigne, vohitse, vavasaka feno raha maintso, renerano naho vorogne. — Magnomey fampitamagne fanjaka azo antoke miomba ty hoavy ty Baiboly

Ty fahafantara’o soa ty raha ampitamaen’Andrianagnahare, le hahavy azo hanan-draha tamaegne, ho fale naho hilamin-tsaigne.

Fa nirehafe ty Baiboly mialoha vao fa aly niklera i Haramagedonay?

Misy amo o ndatio mieretseretse tie aly niklera hiseho magneran-tane i Haramagedonay. Azo antoke fa azo iareo sare an-tsaigne ty ho voka-draty ty raha hoe izay.

Rehafe ty Baiboly fa ty rehake tihoe Haramagedona, le manondro alin’Andrianagnaharea naho “i mpanjaka ty tane toy iabỳ”, ndra o mpitondra olombelogneo. (Apokalypsy 16:14, 16) Ty Haramagedona, le tsy tihoe raha hiseho kisendrasendra avao le hanjamagne o ndatio sady hamoteke ty tane toy, manahake ty vita o bomba niklerao. Fa amy io ty Andrianagnahare, le hamonovono o ndaty ratio mba hisia ty tena fiadanagne naho filaminagne.—Salamo 37:9, 10; Isaia 32:17, 18; Matio 6:10.

Ino ty vahaolagne rehafe ty Baiboly amo o alio?

“Mampijanogne aly amy ze kila tane reke. Tapatapahe’e ty folesidoro sady potepotehe’e ty lefogne. Oroa’e ty sareten-tsovala findese o maramilao mialy.”—Salamo 46:9.

Hampiseho ty heri’e amo o firenena mialio ty Jehovahb Andrianagnahare, le hampijanogne ty aly atao iareo sady hamotepoteke ty fitaovam-pialiagne ampiasae iareo. Hanao izay amy ty alala i Fanjakà’ey, ndra i fitondra’e an-dagnitse agney reke, le o Fanjakà’e iohoe ty hifehe ty tane toy iaby.—Daniela 2:44.

Hampianatse o ndatio ty fomba hilongoagne soa i Fanjakàn’Andrianagnaharey. Satria fitondragne raike avao ty hinday ty tane toy iaby amy ty hoavy, lelia’e ho foagne agne o tsy fitovian-kevetse misy magneran-taneo. Tsy hisy ndaty hianatse aly sasa ka tie amy izay. (Mika 4:1-3) Ino ty ho voka’e? “Sambe hitoboke ambane ty voalobo’e naho ty fihami’e iaby ka iareo sady tsy hisy raha hampihondrahondra aze.”—Mika 4:4.

a Henteo ty lahatsoratse tihoe “Ino ty Atao Tihoe Aly Hara-magedona?”

b I Jehovah ty tahinan’Andrianagnahare. (Salamo 83:18) Henteo ty lahatsoratse tihoe “Ia o Jehovah Zao?”

Mirehake miomba ty aly niklera vao ty boke Apokalipsy?

Mieretseretse ty ndaty ila’e tie mirehake miomba ty fandravaravàgne hatera o aly niklerao ty boke Apokalipsy. (Apokalypsy 6:14; 8:7-12; 16:1-21) Rehafe’e ao zao ohatse fa hisy ‘afo boake an-dagnitse agne ho poke an-tane etoy.’ (Apokalypsy 13:11-13) Taka o Vavolombelo i Jehovah-o, fa tsy tihoe aly niklera ty tea o andine’e iohoe horehafegne, fa ty nifampiasàgne bomba atomike tamy i Aly Lahibey Faharoey.

Ndra tie mirehake miomba ty fampiasagne i bomba niklera rey aza ty boke Apokalipsy, le ty tanjo’e le tsy tihoe mba hampihorohoroagne. Tadidio retoa naho fa mamaky ty boke Apokalipsy rehe:

Mampiasa famantaragne maro ndra saren-drehake tsy azo rambesegne ara-bakiteny o boke iohoe.—Apokalypsy 1:1.
Tsy natao hampitahoragne ze mamaky aze o boke iohoe. Naho mahatakatse ty raha rehafe’e ao naho mampihatse izay ty ndaty mamaky aze, le ho sambatse.—Apokalypsy 1:3.

Naho te hahazo fagnazavagne fagnampe’e rehe, le henteo ty lahatsoratse tihoe “Inona Marina no Voalaza ao Amin’ny Apokalypsy?”