Ndaty Manao Akore ty Atao Tihoe Kristiana? Ino ty Rehafe ty Baiboly?

Ndaty maro magneneke ty tane toy ro misengesenge mirehake tie nao zao iareo Kristiana, ie amy izao iareo mampijale ty hafa. Ty ila’e amy iareo tea tegna, manao ty tsy maregne naho raty fagnahy. Ty ila’e ka mivalike amy ty vali’e. Noho ze findesam-bata iareo zay, le mieretseretse ty ndaty ila’e tie: ‘Ndaty manao akore maregne moa ty atao tihoe Kristiana?’

Ino ty atao tihoe Kristiana?

Mora amo o ndatio ty mirehake tie Kristiana reke. Faie tsy vita an-drehake avao zay. Arake ty rehafe ty Baiboly, le mpiana i Jesosy Kristy ty ndaty raike Kristiana. (Asa 11:26) Izao ty nirehafe i Jesosy: “Naho magnorike ty raha rehafeko avao nareo, le tena mpianako vata’e.” (Jaona 8:31) Mazava hoaze fa tsy misy ndaty mahavita magnorike tanterake ze raha nirehafe i Jesosy. Faie ty tena Kristiana le mikezake magnorike ty fampianara i Jesosy sady manoro izay amy ty fomba fiaigna’e sanandro vaho amy ty fanapahan-kevetse rambese’e. Andao tika handineke ty ohatse tsiampeampe retoa.

Maneho hatea ty Kristiana

Izao ty raha nirehafe i Jesosy: “Omeako lily vaovao nareo, le tihoe mifankateava. Manahake ty niteavako anareo ro toko’e hifankateava’areo ka. Naho mifankatea nareo, le izay ro hahafantara ty ndaty iaby tie mpianako nareo.”​—Jaona 13:34, 35.

Izao ty raha natao i Jesosy: Naneho hatea tamy ze kila ndaty reke, ndra ndaty mpagnarivo zay ndra ndaty mahantra ndra inogn’ino ty foko nisy aze. Nagnasitragne ty marare naho nagnomey hanegne ty keré reke. Nivognogne hagnomey ty fiai’e hoahy ty hafa ka aza reke.​—Matio 14:14-21; 20:28.

Izao ty raha atao ty Kristiana: Maneho hatea iareo, le matarike, tsy magnavakavake vaho mamela ty fahadisoa ty hafa. Magnampe ze ndaty miatreke raha sarotse ka iareo le vognogne hamoe ty raha sarobily anagna’e mba hagnampeagne ty hafa.​—1 Jaona 3:16.

Manao ty maregne ty Kristiana

Izao ty raha nirehafe i Jesosy: “Izaho ro ... hamaregnagne.”​—Jaona 14:6.

Izao ty raha natao i Jesosy: Nanao ty maregne tamy ze kila raha nirehafe’e naho natao’e reke. Tsy namitake ndaty ty Jesosy sady tsy nampianatse raha vande iareo. Nalaza amy ty fanoagne ty maregne reke. Nanao ty maregne avao reke ndra tie nahaboseke ty ndaty ila’e aza zay.​—Matio 22:16; 26:63-67.

Izao ty raha atao ty Kristiana: Tsy mavande iareo. Mandoa ty hetra toko’e haloa’e iareo, tsy mangalatse, sady miasa amy ty fotoagne toko’e hiasa’e. (Romana 13:5-7; Efesianina 4:28) Tsy mamitake ty hafa iareo, tsy mangalakatahake naho fa an-dakilasy agne, tsy mavande naho fa mameno CV ndra naho fa misy taratasy hafa mila fenoegne.​—Hebreo 13:18.

Soa fagnahy ty Kristiana

Izao ty raha nirehafe i Jesosy: “Mbamako mbetoa ze miasa mafe naho mavesatse entagne, fa hamelombelogne anareo raho. Ento i baokoy, le mianara amako fa soa fagnahy naho miambane raho, le inareo ka hahazo hery indraike. Satria mora andesegne i baokoy sady tsy mavesatse ty entako.”​—Matio 11:28-30.

Izao ty raha natao i Jesosy: Nimora hantognegne naho nisoa fagnahy reke. Nirambese’e soa o ajajao, nampahereze’e ze nikivy, le nihaja’e o ndatio.​—Marka 10:13-15; Lioka 9:11.

Izao ty raha atao ty Kristiana: Ty Kristiana le mirehake aman-kasoa fagnahy amy ty hafa, tsy masiake ndra mpiarotegne. (Efesianina 4:29, 31, 32) Mipay ze hahasoa ty hafa reke sady mipay fomba ka mba hagnampeagne iareo.​—Galatianina 6:10.

Tsy mivalike amy ty vali’e ty Kristiana

Izao ty raha nirehafe i Jesosy: “Ao areke ze naharon’Andrianagnahare baogne, tsy hosarahe o ndaty.”​—Marka 10:9.

Izao ty raha natao i Jesosy: Ndra tie tsy nanambaly aza reke, le nandrisike o ndaty manambalio mba tsy hivalike amy ty valy iareo. (Matio 19:9) Nampitao i ndaty rey ka ty Jesosy mba hikezake hitao amy ty raha atao iareo, satria va’e ho boake amy izay avao ty hahavy iareo hisarake.​—Matio 5:28.

Izao ty raha atao ty Kristiana: Mikezake manao raha mba hagnomezagne voninahitse ty vali’e iareo. (Hebreo 13:4) Mifankatea sady mifagnaja ka ty mpivaly kristiana.​—Efesianina 5:28, 33.