Akore ty Ampiasà o Vavolombelo i Jehovah-o ze Fagnomezagne Voarae’e?
Mampiasa i fagnomezagne voarae’ay rey zahay mba hanohagnagne ty raha atao i fikambana’aỳ, ndra raha mifandrambe amy ty fivavahagne zay ndra asa soa. Manao ireo zahay mba hagnatratraragne i tanjo’ay tena lahibeỳ. Tsy inogne zay fa ty hagnampe o ndatio hanjare mpiana i Kristy Jesosy.—Matio 28:19, 20.
Tsy ampiasae’ay mba hampanan-karena ndaty i fagnomezagne rey. Tsy karamaegne o androanavi-pagnahio, ndra ty mpiandraikitse faritse ama’ay eo. Tsy karamaegne hitory isan-tragno o Vavolombelo i Jehovah-o. Tsy mikarama ka ze miasa amy ty birò ty sampa’ay ndra amy ty foibei’ay agne, agnisa izay ty Filan-keve-pitantana ty Vavolombelo i Jehovah.
Ty Ila’e amy ty Raha Atao’ay
Famoahagne boke naho lahatsoratse: Mandika Baiboly naho boke ara-baiboly an-tapetrisa’e zahay isan-taogne, sady manao pirinty sady mizara irey maimaim-poagne. Tsy andoavam-bola ka ty mangalake ty raha aboake amy ty tragnom-porarotse jw.org ao naho amy ty programa JW Library ao, sady tsy ahatreavagne dokam-barotse natao mba hipaliavagne vola.
Fagnoregnagne naho fikojakojagne: Magnoregne tragno tsotsotra zahay magneran-tane, mba hahafaha o fiangonagneo mivory naho midera an’Andrianagnahare. Mikojakoja i anjomba rey ka zahay. Magnoregne birò sampagne naho birò fandikan-drehake ka zahay, sady mikojakoja irey. Mpiasa an-tsitrapo ty manao ty ankamaroa i asay, amy izay mba tena fara izay ty kede ty vola lany.
Fitantanagne: Fagnomezagne an-tsitrapo boake amy ty asa atao’ay magneran-tane ty anohagnagne ty asa atao amy ty foibei’ay agne, birò ty sampagne, birò ty fandikan-drehake, vaho ty asa atao ty mpiandraikitse faritse.
Fitoriagne: Tsy karamaegne ty Vavolombelogne mitory i talily soay sady mampiasa ty “Saontsin’Andrianagnahare.” (2 Korintianina 2:17) Faie ty mpitory ila’e meagne fagnampeagne, mba ho afake hanokagne ty ankamaroa ty fotoa’e hanoagne i asa fitoriagney, manahake ty natao ty Kristiana tamy ty taonjato voaloha’e. Afake mahazo ze raha tena ilae’e amy ty fiaignagne iareo tie amy izay, sady afake mipetrake amy ty tragno tsotsotra. Ampiofagnegne ze mpitory finily hanao izay.—Filipianina 4:16, 17; 1 Timoty 5:17, 18.
Fampianaragne: Ty vola fagnomezagne azo’ay ro anohagnagne ty havoriambey faritse naho ty havoriambey vondrom-paritse anoe’ay. Mamokatse raki-peo naho video ara-baiboly ka zahay. Mandamigne sekoly hampiofagnagne androanavi-pagnahy naho mpitory marain-tsy hariva ka zahay mba hahafaha iareo mamita soa ty andraiki’e.
Fagnampeagne ze nizoem-boigne: Mea’ay hanegne naho rano vaho tragno ze zoem-boigne noho ty tsikolony, ohatse, ndra noho ty aly. Tsy ty ‘mpiharo finoagne ama’ay’ avao ro anoa’ay soa, fa ndra ty ndaty tsy Vavolombelo i Jehovah ka.—Galatianina 6:10.